انا منعرفش نرجع الصرف ثم ثم وانتومه؟

[MiSs Sisi StyLe]

ممممم موضوع مثير للاهتمام و مهم
انا اختي ما نكذبش عليك عندي الصرف و نرجعو ثم ثم دقيقة ما تفوتش و الي يحب يشر لحاجة نشرلو ل10 نخليه يعاود حسابو و يخمم 1000 مرة قبل ما يطيشلي هدرة و هادي هي لمعيشة في دزاير العاقل ميريزيستيش
شكرا على الموضوع و ربي يعينك​

 

[وصال]

ههههههههههههه
تاع زعمة باش تقووليلنا بلي نتي عااقلة
ايه عاقلة و نص و 75 ههههههه وليت نعرف نرجع الصرف


لوكان درتي موضوع و قلتي انا عاقلة
هههههههههههه
واش يا محمد واقيلا راك تسيي فيا نرد ولا لالا ههههه
المهم و الأهم ختيييتي
شووفي انا منردش تمتم الصرف
بصح بصح بصح
اه هادي خطييييييييييرة جدا
الا ردييييت نفسدلها جدها
ههههههههههههههههههه ياو المثل يقول خلطها تصفى
معناتها الا كنت حاب نخسر هاذاك الشخص
نردلو الصرف
مانعرفش نهدر الصراااحة

​

صافي اطونسيون ياوصال تخلطي في محمد ههههههههههه صحيت على الرد خيو .

انا تاني يا ختو مانعرفش نرجع الصرف كيما راكي تقولي....جابلي ربي بلي هدوك لي يعرفو موالفين ....ساعات نحب نرجع ...او ساعات نقول خليهم هوما ليغلطو خير مالي نغلط انا..نبات مظلومة خير ما نبات ظالمة...من عاتي منحبش نغلط في حتى واحد ..باش ما نطلبش سماح لخطراش كاين بزاف ما يستهلوش كلمة ...سمحلي ..حاش لي ما يستهلهاش.... ربي يجبلك لخير يا ختو ...او صح بزاف على هدا الموضوع شباب. بالتوفيق

انضمي للمجموعة اذن والله متشرفين صحيتي لعزيزة ربي يخليك .

السلام عليكم

حسبتك تحكي على الصرف في الحانوت:d
ههههههههههه وحتى هذاك ومنعرفش نرجعو ههههههههه يعني كل حاجة عندها علاقة بالصرف خاطيتني هههههه

نقولك حاجة اختي و الله راكي في نعمة مظلومة ولا ظالمة

ترجاع الصرف تطور عندي حتى وليت نفهم هدرة الناس ديما ليزان حتى ولو مش قاصدينها كيما نقولو وليت نقرا النقص و الكثير من المناسبات غير السارة هلكني فمي.

عندي 5 سنين تقريبا و انا راني نقص من الصرف ..... رجعتهم كامل كاغط :d ومنبد نحو العشرين نتاع الكاغط ورجعوهالنا حديد .... (ارجع يا خويا عاود من الاول):d

نصيحتي ليك خليها على ربي

على خير

:regards01:
​

صحيت خيو بارك الله فيك رانا مخليينها على ربي .

انا صراحة نرد مي وين تقيسو كيما قاستني بلاما نطيح الهدرة
مهم ماتقعدش في قلبي ولا نطرطق كيفاش راكي تتحملي انك ماترجعيش الهدرة
المهم يعني نقولك الصح هكا خير ماتزيدش في الهدرة مي كاين عيباد لازم ترد عليهم باش تبردي غشك
ايا سلامو وتهلاي في روحك واذا باغيا تتعلمي الصرف انا وهنا

شكرا جزيلا وبارك الله فيك كينحتاجك راني نفيبي ههههههههههه

السلآم عليكم و رحمة الله و بركآته ..

والله يآ اختي صرآحة في هذآ الوقت لآزمكـ تتعلمي تردي الصرف
مآنيش نحرض فيكـ بصح الله غآلب كآين نآس كون مآترديلهمش كلآم مريـgـل
مآ يحشموش ..

بصح الصمت ثآني مليح ، طنشي كيمآ يقولو بصح لآزآدت الحآلة أتآكي :d ..

و ششششكرآآ ~
​

صحيتي راني في طور الانجاز دوك نحكم امثال ونحفظهم ونولي ناتاكي ديراكت هههههههههه

صآديبون الدعوة معآيآ مرآت ليه ليه نرجع الصرف
نفحّم الطرف الثآني ومرآت نضرب عليه النـح
مي مآ ننسآهآلوش يجي نهآر مش برك نفحمو نزلفوآ
بصرف أكبر من لي كآن لوكآن رديت عليه في الوقت
مرآت بقول ومرآت بفـعل والفعل أقـوى من القول
وأستمتع بهذآ على فكـرة ومآ يهمونيش النآس مآ خلقتش
بآش يقولوآ عليآ ظريفة المهم لي يظلمني يخـلص لوكآن نتسمى
شيطآن بجنحين ملآئكة كيمآ يقولوآ ...
مآ ننصحكش تتعلمي ترجعي الصرف مي نقولك
ربي يعينك على لي مآ تعرفيش تردي عليهم ,,,
سلآمي ’
​

امين يا رب شكرا على الرد

أنا الصرف نحطه طاي طاي في الوجه وخاصة كي نكون نرخس في واحد مايشبه لوالو و حاسب في روحو ولد فلان...اول سؤال نطرحولو هو:عندك مراية في داركم؟؟؟بصح مع البنات شوية سيرتو اذا طحت في وحدة بلعوطة تغلبني بالهدرة تسلكها غير الصفعة هههههههههههه:regards01:​

صحيتي حنونتي على الرد عجبتني نتاع عندكم مراية في داركم هادي 4444444444 هههههه والله تقتل في البلاص

راني كيفك مالا كي نروح لدار باش نقول انا لجايحة كون قلت هكا وهكا بصح بيناتنا كي تسكتي خير خاطر تحسيهم بلي كلامهم داخل من خارج منهيه​

صح كاينة بصح ديفوا الكلام جارح ميتنساش .صحيتي على المرور الطيب .

 

[وصال]

ممممم موضوع مثير للاهتمام و مهم
انا اختي ما نكذبش عليك عندي الصرف و نرجعو ثم ثم دقيقة ما تفوتش و الي يحب يشر لحاجة نشرلو ل10 نخليه يعاود حسابو و يخمم 1000 مرة قبل ما يطيشلي هدرة و هادي هي لمعيشة في دزاير العاقل ميريزيستيش
شكرا على الموضوع و ربي يعينك​

بارك الله فيك ، انت عكسي تماما وصح لي ميفهمش المعاني مستحيل يقدر يرجع الصرف وانا حتى نروح للدار باش نفهم هههههههه المهم الله يسترنا وخلاص .

 

[أم أمين23]

هو طبيعي انك ما ترديش وتكوني مبهمة كي واحد يعطيك الدق وخصوصا البنات الي مازالهم آنسات والافضل ما ترديش خصوصا على الكبار بصح انا نأكدلك انو مع الوقت وخاصة لما تتزوجي اولي عندك الصرف ديما واجد انا واحدة من الناس قبل يهدرو ويمعني ولا كأني هنا نحط روحي ماشي فاهمة كأن الهدرة ماشي عليا لازم يقولو فلانة المقصودة باش ممكن نحس هههه بصح ضرك وليت نار حتى ماشي عليا الهدرة نشعل فيهم ونرد بالمعاني كيما ردو وما نخليهاش في قلبي لخاطر كاين شيء ناس الا سكتي عليهم يتماداو والافضل توجدي ديما صرفك

 

[بنت الـ25]

يضاف الموضوع إلى قائمة المواضيع المميزة
قائمة المواضيع المميزة لمنتدى واش راك تهدر - متجدد -
​

 

[وصال]

يضاف الموضوع إلى قائمة المواضيع المميزة
قائمة المواضيع المميزة لمنتدى واش راك تهدر - متجدد -
​

شكرا جزيلا على هذا التكريم الذي لم اكن احلم به صدقيني فرحتي لا توصف ، شكرا لك مينات ولكل المشرفين على المنتدى وشكرا لكل من شارك في هذا الموضوع واعطاه طابع التميز بارك الله فيكم جميعا .

 

[فريال04]

انا عندي هاذ المشكل وفي نفس الوقت نعتبر انو للجرحني وسكتت عليه قتلتو بالبارد، ههه عندي شوفة من عينيا مليحة انتاع وحدة واعرة خير من مكانش. ومرات نحمد ربي بلي ما خلطتش في الكلام كاين ناس تندم عليها.

 

[وصال]

انا عندي هاذ المشكل وفي نفس الوقت نعتبر انو للجرحني وسكتت عليه قتلتو بالبارد، ههه عندي شوفة من عينيا مليحة انتاع وحدة واعرة خير من مكانش. ومرات نحمد ربي بلي ما خلطتش في الكلام كاين ناس تندم عليها.

صافي تقتلي بعينيك ههههه شوفي حنونة الانسان مهما كان ميقدرش يتكلم وميغلطش شوفي ديفوا كاين عباد يمتاهنو صبرك بالعاني باش ينطقوك وتغلطي معاهم ، بصح كيطيحو مع واحد ميعرفش يرد يموتو بالحصرة وينعتوه بالتيهوديت مالقري هو الله غالب هذاك ماعطى ربي ههههه المهم صحيتي على الاقل عندك سلاح الدافعي بيه على روحك شكرا على المرور الذي نور صفحتي المتواضعة .

 

[همس الوُرود]

لا تكوني كالحمقى يا أختاه
وارتقي بأخلاقك ​

 

[nina usma]

هههههه يللزم يكون ص

رفك في جيبك

منيعد نبعتلك شويا:d

سلام​

 

[mamouu]

تعرفي حاجة أنا كنت كيما نتي.................. تماما
مي مع الزمان تعلمت نرجع الصاع صاعين
أو من نخلي حتى حاجة في القليب لي ما يحملش التنوفيق...................... هاهاها

 

[NICHA03]

وعليكم السلام
موضوع هايل
ههههه انا عكسك ياوصال
عندي الصرف بزاف
ونقولها تم بعد في لوجه
منخليهاش تبرد
تاع باه نخبيها في قلبي ونروح نبكي ونشكي
نونو
لي قاسني نفرغلو واش في قلبي
مي كي تفض راهي تفض صح بيناتنا
مثلا قتلو اخرج من حياتي راه يخرج صح
ماش هدرة برك
ولي نفاصيه من حياتي ميعولش يزيد يرجع
صحيتي على الموضوع الزين
تحياتي ​

يا يما يا يما مناش قالميات باطل

ههه شوشو عجبني الرد تاعك

و الله يا اخت وصال انا كيما طاطا شوشو ثم ثم بعد و هيا شخونة

نرجع الصرف الله غالب حقك يروح و انتي ساكة لا لا لا لا لال لا لا لال

مرسي على الموضوع
​

 

[امونة الشاوية]

انا عندي الصرف نخلي العبد يحوس على بياس دي تاشي للكرامة تاعو والو ما نخليش حقي يروح ولا نجامل تم تم ماش العباد يربحوها دنيا يبردو قلوبهم يهدرو واش يحبو ويربحوها اخرة نسمحلهم ونعاود يوما تقولي ما نعرف لمن خرجتي فمك مشرك لوذنيك بصح الحق الحق ما نظلمش بصح لي يوصلني خلات عليه نظرب على طول ذراعي

 

[serinee]

اهلا ك اختي وصال
انا صراحة الصرف رجعوا ثم ثم في الوجه لكان منرجعش تقعد تحرق فيا و اوقات عقلي يكون لاتي بشغالات و يروحلي الصرف اووووووه نقعد نستنى مقتاش تجيني الفرصة
و كي نرجع نعرف كيفاش نرجع
مشكورة على الموضوع غاليتي
​

 

[MĭŠš Čhŏů]

هههههههههههههههه
جيتي عندي
ارواحي نقريك باطل
هههههه
​

 

[MĭŠš Čhŏů]

انا عندي الصرف نخلي العبد يحوس على بياس دي تاشي للكرامة تاعو والو ما نخليش حقي يروح ولا نجامل تم تم ماش العباد يربحوها دنيا يبردو قلوبهم يهدرو واش يحبو ويربحوها اخرة نسمحلهم ونعاود يوما تقولي ما نعرف لمن خرجتي فمك مشرك لوذنيك بصح الحق الحق ما نظلمش بصح لي يوصلني خلات عليه نظرب على طول ذراعي

اكي باينة من هدرتك هنا
هادو هما الشاوية حنا كل هكا حارين
على فكرة انا اصلي من ام بواقي مسكانة
ونعرفهم بياان ميي قلبهم ابيض
​

 

[مايا الجزائرية]

سلام اختي
واش تحبي
كاين ناس من ناس
مش قاع كيف كيف
انا وحدا من الناس ما نتعاملش مع الناس كيف ما يتعاملو
ونمشي على مقولة تقول" القاع ازدحم ارتقو"
شكرا على موضووعك عجبني

 

[youcef.as.dz]

السلام عليكم ورحمة الله تعالى وبركاته

واش الاحوال لاباس ، الصحة ، المورال كامل لاباس ايا اوكي الحمد لله اعطيوني شويا من وقتكم باش نتكلموا في واحد الميضوع .

انا ياخاوتي ما نعرفش نرجع الصرف كاين ديفوا تطيح مع ناس هدرتهم كامل بالمعاني والله غير تحير وتلقى عندهم الصرف غير ثم ، انا ماما تقولي خرجتوا ليا معندكمش الصرف ، يعني انسان يقولي كلام جارح ولا يتهمني منعرفش ندافع على نفسي وتغيضني عمري بزاف ونديرها غير على البكا والله منحبش واحد يطلع صوتوا فيا :cray02::cray02::cray02:، اما واحد يحرجني ثم وين قالت خر .
هو المثل يقول واحد صرفو في فمو وواحد صرفو في كمو وواحد صرفو عند امو، وانا صراحة حتى نروح للدار باش نبدى نريي في الكاسيطا ونقول علاش مقلتش هكذا وهكذا وهكذا ، يعني كيتطير الطيور تبقى الهامة تدور هههه

وانتومه ثاني عندكم هذا المشكل ، تحبوا الصراحة ما كانش كيما واحد يضرب الحديد وهو سخون وكاين ديفوا الانسان تقعد تحرق في قلبوا بصح في الاخير يقول الحمد لله لي مقلتش بويسك الانسان كيزعف كابابل يخسر بالكلام وهادي المقولة ماما ديما تقولهالي داوس غيرك وخلي مضرب الصلح .
وكينعاود نولي مع روحي نقول الحمد لله نتغالى مع روحي شويا ومنقولش كلام لي نندم عليه امبعد .
نتمنى المعنى وصلكم .
في انتظار تفاعلاتكم .
تقبلوا تحياتي :regards01::regards01:
​

موضوع هايل:up: مي متوقعتش تفتحو طفلة :$ وزيد أغلب الردود طفلات:s:s:s

راني قاصد بنات مش طفلات راني عارف راكم كبار و ربما كبر مني سامحوني