ماعندهمش غير ربي

[إحْسَان]

السلآم عليكم ورحمة الله وبركآته
خآوتي =)
اليوم عندي قصة والله انا نكتب فيهآ وقلبي دم وصدري مخنوق ..
ماقدرتش نكمل والله يمكن ماتامنوش
يمكن تكذبو
يمكن تقولو ماكانش منها
يمكن تقولو القصة هاذي فيها علامة استفهام كبيرة
الله غآلب هاذي هي الحقيقة وهاذي هي حقيقة المجتمع

راح نبدآ القصة :

هآذي مرة مسكينة كان راجلها يدزها تطلب و ينحيلها الصوارد ويروح يسكر بيهم ويضربها ومعاملها ماتليقش نهائيا بشوفة الناس كامل

مسكينة مُرضت وماتت وهي تطلب في الشآرع
خلآت زوج ذرآري عمرهم 7 سنين و 5 سنين
بآبآهم ومانيش مأمن بلي بآبآهم
طردهم ل سونطر وتبرآ منهم
قعدو في السونطر 5 سنين ومنبعد هربو
ماقدروش يزيدو كثر
مانكذبوش على بعضانا هذاك راه حبس وراه فيه الحقرة بزاف والظلم بزاف والاعتداء الجنسي بزاف

المهم كي خرجو راحو لباباهم
مرة ثانية طردهم وهااذ المرة لشآرع مع الاسف
اليوم راهم 15 سنة و 13 سنة
يعني 3 سنين يا خاوتي وهوما برآ مطايشين في الشارع
والله حالتهم حاالة
الصغير الحمد لله راهي تبيت فيه عائلة عندها فليل
وخوه لكبير راه يبات في واحد الديار رايبين
والله الحالة نتاعهم تقطع القلب
مرة من المرات جاا جسمو كامل أزرق
علابالكم لاه ؟.
صب الثلج فليلة هاذيك وبات برآ
مرة من المرآت لقيتو برآ
قالي اعطيني ألفين قتلو لاه ؟
قالي والله غير بردت وحاب نروح لسيبار نسخن شوي
باباهم شكاو بيه جماعة و ماكاين والو لحد السآعة
السلطآت داتهم مرة ثانية لسونطر لكن هم ماحبوش ورفضو
خوالهم مايعرفوهمش
وماعندهمش عمامهم
والله غير قصة تبكي الحجر
يا جمااعة فيقوو شوي فيقوو
لي راه يتمزا على الماكلة مايكلهاش
راهوو كاين الشريف باات سمانة لشر ماكلا والو
لي راه يتبربخ في الغطا فليل اعرف بلي خووه محمد راهوو قتلو البرد في الثلج
يلي راك معا والديك وتسب فيهم
اعرف بلي غيرك يتمناو انو يكونوا عندهم والدين
يا جماااعة خافوو ربي
وفي الاخير نرجوو لمن يهمه الامر نشر قصتهم في الصحاافة
لزعزعة المجتمع الجزائري لحالتهم

​

 

[بنت الـ25]

لا حول ولا قوة إلا بالله العلي العظيم
قصتهم تدمي القلب وتبكي الحجر
نحير لاكان كاين آباء كيما هكا
كي عدت مش تع مسؤولية علاه مالأساس رايح تتزوج تغبن بنت الناس معاك وتمرمد ولاد معندهم حتى ذنب
مي كاين ربي
لبارح احنا تاني في كرتينا صرا فيلم اكشن
جارنا تعارك مع مرتو وحاوزها مالدار رفدها ولدها داها عند جداتو
ورجع لباباه يرمي عليه فالحجر من تحت ويسب فيه
(بوغطون الطفل هدا عويقل والكل يشهدلو بحسن التربية)
خرجو الجيران يكالميو فيه والو ، حكمتو مرا توقع فيه محبش وبقى يسب ويهدد يحرق الدار
كون ما يبعتلوش حوايجو (اللي شراتلو يماه)
وش دار باباه؟ عيط لابوليس جااو رفدو وليدو
انا قعدت بلا راس؟ كيفاش رح يقدرو يزيدو يقابلو وجوه بعضاهم برك

كوارث صايرة في مجتمعنا
وهاد محمد والشريف الأكيد ربي يسخرلهم لي ياخد بيدهم

مشكوررررة على مشاركتنا القصة كشما نعتبرو
​

 

[إحْسَان]

حسبنآ الله ونعم الوكيل
​

 

[شاهيندا]

لا حول و لا قوة إلا بالله العلي العظيم.
ربي يهدي ما خلق.

 

[stella.m]

لاحول ولا قوة الا بالله العلي العظيم
فعلا قصة تقطع القلب يا لطيف يا ستار
كيفاش... هذا ماشي بنادم هذا وحش الله لا تربحوا
كيفاش تجيه من قلبو يرمي ولادو
الله يرزقهم الي يتهلا فيهم الله غالب اضعف الايمان نديروه
ندعولهم دعوة صادقة من القلب
مشكور خويا :regards01:

​

 

[ملكًة الاحسآس]

وعليكم السلآم
حسبنآ الله ونعم الوكيل
خويآ علآش مانامنوكش ونفس حآلة الشريف ومحمد
موجودة بالعشرآت هدي الي نشوفوهم ونعرفوهم
والعدد اكثر للي مآنشوفوهم مآنسمعو بيهم
هدآ نشك فيه الآ صح أب ، والآ صح بآبآهم كون مكآنش خير
يقولو يتآمى لآ أب ولآ ام خير من يقولو عندهم بوهم وطيشهم
وآش من قلب يعطيه يرمي أولآده وهمآ مآزآلهم صغآر
vغيمون مآلقيت وآش نقول ، ربي الي خلق مآيضيع
وان شاء الله رآيح يجي نهآر وتفرج على الدرآري هدو
بركـ لآزم على المحيطين بيهم يوقفو معآهم سوغثو رآهم في عمر
شويآ حسآس يآ يكملو في الطريق المليحة والآ تبعو اولآد الحرآم
طريقهم آي بآينة
ربي يفرج عليهم ان شاء الله
وبآرك الله فيك خويآ على الموضوع ، رسآلتكـ وصلت :regards01:


​

 

[إحْسَان]

أدعيولهم يا خاوتييي
​

 

[־●ـ‗غمــــوض ــالــورد_ـ●־]

لاحول ولاقوة إلا بالله
والله قصتهم تقطع لقلب ،يالطيف يارحيم ياساتر ألطف بيهم وبالناس لي كيفهم...
للأسف بــــــــزاف حالات كيما هدوما نشوفوهم ونسمعوا بيـــــــــهم...
انــــا هدومــــــا الاباء لي كيما هك نشك فيهم بلي عبــــــاد، نحطهم كش كائنات عجيبة تحطوا هنا...
ميليقش لواحد يقول عليهم آبـــــــــــــــــاء...متجرديــــــــــن من الانسانيــــــــة خلاه....
زيمـــــــــاه عطاه قلبوا يرمي ولادوا ويعاملهم بالوحشية هدي كامــــــــل...
هديــــــــــــك لخسارة رجــــــال ولاو يتراماو فالشارع ... لواحد يبات يدعي يبات مشتاق يكون عندوا طفل، وناس راها ترمي فيهم للشارع ...
والله يخرجوا فيه يكبروا ويفرج عليهم ربي ايولي هو لي يتراما ويرجع يطلب الرحمة من ولادوا..
دركا خليه يعيش بالغفلة تاعوا مش فايق مباعد يولي يبكي دم مش دموع نهار مينفعش الندم درك يولي يندم
يولي يكره ليوم لي زاد فيـــــــه ماعندوا ويــــــــــــن راح يهرب...دركا ربي راه حلالوا الدنيــــا في عينوا...
بعديــــــــــــــكا درك يشوف وش معنتها كي يضيع حياة غيروا بلا حتى دنب...
درك يولي يشتاق لحلاوة الدنيــــــــــا صح لي راحتلوا مع اعز حاجة كانت عندوا وضيعهـــــــا...
طولت ولا قصرت ربي مش راح يدي حق حتى واحـــــــد يمهل ولايهمــــــــــــل...
انا والله نتشوكا فالناس هدوما شايف روحوا مش قادر على لمسؤولية تاع لولاد عماه يجيبهم..
باغي يعيــــــش في طريق واحد خلاف يعيشوا وحدوا بلامايدير حرام في حرامين... يجيب بنت الناس يغبنها عندوا ومكرهلها حياتها وزيــــــد يجيب ويعدب ولاد بريئة بحتى دنب داروه....حرام عليـــــــــــه والله مارايح يربح ولا يشوف خيــــــــر...
والله قلبي يتقطع كي نسمع حكايات زي هدوما ومنقدر ندير والوا...انا تعدب اكتر ملي راه عايش في هديك لحالة....
منيـــــــــــش باغية نزيـــــــــــد نهدر اكتر باسكوا راني مخنوقة وحساسة بزاف في هاد ليشوز...
معندي غير ندعيلهم انشاء الله ميضيعوش وميطيحوش في ولاد لحرام يخسرولهم حياتهم كامل انشاء الله يطيحوا في ناس تحميهم وتنحيلهم شوية من هاد لعداب والالم لي راهم عايشين فيه....
وبارك الله فيــــــــــك اخي عالموضوع..
​

 

[سمسم السمسومة]

رحماك يا الله.....هناك بدلهما الكثير و الكثير........نحن كدولة و كشعب نستطيع فعل ما يفعله الغرب فهم له جمعيات تتكفل بأشخاص كهؤلاء رغم أنهم الغرب الا أننا حينما نقارن بيننا و بينهم نجدهم في الجانب الانساني ربما أحسن منا بكثير و لما لا نكون نحن مثلهم...ربما هناك أولياء ليسوا بشرا هم قلوب من حجر و لكن يوجد منا الكثير و الكثير من الاشخاص الواعيين و الذين يستطيعون أن يكون العين التي يرى بها هؤلاء....نحن نتحمل جزءا من المسؤولية في شيء كهذا

 

[إحْسَان]

ألم يعلم بأن الله يرى

​

 

[serinee]

يا يما العزيزة الدمعة طاحتلي كي قريت قصتهم
ايعقل هدا اب
هدا صفة الابوة كامل ماتليقش بيه
كان يمرمد في مرتو
تبهديلة عليه هدا مش راجل
و ممبعد يطرد ولادو
يا للعار
حسبي الله و نعم الوكيل فيه
و ربي ينحيلو الظبابة لي راهي مغمضة عينيه
​

 

[إحْسَان]

آمِين آمِين

​

 

[EL General]

حسيت بيهآ قصتهم من حكآيتك خويآ ،
آلله يلطف بيهم ، و آلله مآيلموهم غير خوآلهم في هآدي لحآلة
​

 

[إحْسَان]

الله يبآرك فيك
ربي يصونهم و يحفظهم من ولاد الحرآم
​

 

[ahlam02]

la hawla wala kowata ella bellah

 

[إحْسَان]

يآ ربي فرج عليهم برك
بُورك فيك
​

 

[nanoche]

لا حول و لا قوة الا بالله العلي العظيم
كاين شي ناس راهم خسرو دراهم كبار و ربي حرمهم من الذرية و يتمناو ظفر طفل يعيطلهم بابا و يما و كاين ناس النعمة في يديهم و ناكرينها
انسان كيما هذا ما عندوش الحق باش يتزوج و يرزقو ربي بالذريه
انا نعرف عينات من هاذو اللي يبعثو نساهم للطلبة محتى اولادهم و في نهاية النهار يديولهم واش كسبو و ما يخليولهمش حتى دورو بصح واحد يرمي اولادو :-o:-o يا حفييييظ ربي يسترنا يا ربي
​