السلام عليكم حباب المنتدى
هادو اليامات رانا في عطلة مؤقتة (طبعا صحاب الليسي)
امالا بداو وحد الخواطر يدورو في راسي وتفكرت وحد الحاجة كلما يقولوها قدامي تشعلي هاديك اللامبة تاع جيري °-°
ناس بكري يقولو " الهناء ولا دراهم الجيب "
السؤال هو صح تصلح المقولة هادي في وقتنا
كاين بزاف المرفهين والي عندهم مشاكل يقولك لوكان نحالي ربي الدراهم وعطاني الهناء
..... اففففففففف كرهت الكلمة هادي
نسقسيكم عمركم شفتو واحد في الدنيا هادي متهني وما عندو حتى مشاكل يخبطو في الراس؟
عمركم شفتو واحد معدوم وما عندو حتى دورو وعايش مرتاح؟
عمركم شفتو الدنيا خالية من المشاكل؟
.
.
.
الدنيا هادي خلقنا فيها ربي وخلانا نواجهوها بحلوها ومرها
وحياة العبد عمرها ما تخلى من المشاكل والمنغصات مهما كان المنصب تاعو ولا العلم تاعو ولا دراهمو
امالا ماكان حتى واحد متهني في هاد الدنيا
امالا نعيش بلي بروبلام وعندي الدراهم خير ما نعيش دورو ماكانش وزيد فوقها المشاكل
يعني بالمختصر الهناء فالدنيا ماكانش
وطبعا باش مانعترضوش على حكم ربي لازم كل واحد يستعمل اسباب السعادة تاعو
الا عندك الدراهم والمشاكل استعمل دراهمك باش تحل مشاكلك
والا ماعندكش استعمل قرايتك ولا جمالك ولا اي نعمة عندك باش تحلهم
كان لقيت لي يعطيني صحتو مقابل المال والله انا مستعد 
