اين براءة الطفولة

[ام سيرا]

السلام عليكم ورحمو الله تعالى وبركاته
سبحان الله ملقيتش كيفاش نبدى هدرتي
علابالي كون نسترسل منزيدش نسكت
راح نحكيلكم اليوم على طفلة صغيرة بعمر ابنتي 9 سنوات
راح تضحكو وتقولولي حاطا عقلك مع وحدة بعمر بنتك
اسمحولي نقللكم الله غالب والله راح تهبلني
ومعرفتش اذا راه صغيرة ولا سكنها شيطان ولا جن ولا الدنيا تبدلت وانا لمزالني عايشة في طفولة السبعينات والثمنينات
وقت كنت عمري 9 سنين كنت نروح نقرى ونرجع نرقد في حضن امي بعد مانشؤب كاس حليب بدون قهوة على خاطر كنت نظن القهوة تقلبني سمرة ههه وانا فالحقيقة سوداء ماشي غير سمرا
مي وقتها كانت النية وكنت نشوف في روحي بيضاء كيما سانديبال
المهم هذي الطفلة العام لفات حاولت بشتى الطرق تعطل بنتي على الدراسة وعملتلها مشاكل مع المعلمة لاتعد ولاتحصى والحمد لله انو المعلمة كانت تعرف تلاميذها مليح بعثتلي وحذرتني انو لازم نبعد بنتي عليها
وبالفعل هذا لكان وحتى انا بعدت على امها هكذا باش يبقاو هم بعاد
ومند ذلك الوقت اندلعت الحرب في حينا لشنتها هته الفتاة واختاها الكبيرتين على ابنتي
واصبحت المسكينة قاعدا فالدار متقدر تخرج متقدر توقف فالبالكون ولا الطاقا
واصبحت عدوة الجميع بعد ان جكاو لباقي لبنات اكاذيب بالجملة
لحد الان منقدرش نبعثها تقرى مع خوها لازم انا لنديها والا راح يضربوها وسمعوها كلام الله لايسمعكم
والله تغيضني نتي وهي تسمع فالبنات لفعمرها يلعب وهي متقدرش تلعب ولا جتى تتفرج عليهم
خاصة وانو انا مربيتها انها متردش على الشتائم لانو هذا عيب وحرام
ومعرفتش انا ربيت بنتي خطا وانو المثل والمبادئ هذي ديمودي وانا لمزالني عايشا مع كتاب القراءة تاع ليلى تحلب البقرة ونورة تشرب الحليب في عصر ولى فيه لحليب لويا ب 38 الف للعلبة
ولا بنت جارتي لمراهيش نورمال
المهم حبيت نفرغ لفي قلبي لاني معنديش واش ندير
ولا لمن نشكي حتى امها تشوف وتتبسم من بعيد وكانها فرحانا
ربي يهدينا ويهدي الجميع
وحسبي الله ونعم الوكيل
وسامجوني اذا كسرتلكم روسكم بحكاية تافهة بصح صدقوني والله غير مقلقتني وملقيتلهاش حل

 

[smisma asma]

السلام عليكم حسب ماقريت واش كتبتي الغلطة ماشي في تربيتك بصح هذا هو الوقت درك لزم من صغر تبدا تحامي على روحك و تفرض شخصيتك صراحة أنا منيش أم أنا 18 سنة برك بصح علبالي كيفاه الصغار و تعامل معاهم و نصيحتي أنك تعلمي بنتك دافع على روحها و أنت دافعي عليها بطريقة خرى أنك تهدري مع أم الطفلة هذي و تنصحي بنتك أنها متخلهمش يتحكمو فيها هذي مجرد نصيحة من عندي

 

[اميرة في مملكة العلم]

اعتقد انو عليك بتهديد الطفلة المجنونة ....و تعلمين ابنتك ان تدافع عن نفسها فهذا الزمن ليس زمن الرحمة و الحب و الصداقة ...و انما هو زمن الضعيف هو الظالم و القوي هو المظلوم في رأي الناس ...
و ارجو ان تجدي الحل المناسب فلالا استطيع اعطائك الحل الصحيح فانا بعمر 13 سنة ...لم ار الحياة بكاملها و ما فيها ...اعذريني

 

[ديسق]

السلام عليكم ورحمة الله وبركاته

تحية طيبة .. الموضوع هذا مهم للغاية ومش تافه، لانو التربية في هذا الوقت جد صعبة والمشكلة ليست
في ابنتك وانما في ابنة جيرانك، ممكن تكون الغيرة شاداهم مادام ان امها تبتيم وما تدير والو وكما قلتِ
وكأنها فرحانة بما يحصل، ولكن تذكري ان دوام الحال من المحال، وتجي الايامات وتنقلب الامور عليهم، وما
ننصحكش انك تتخذي اي اجراءات اخرى معاهم لانه واضح انهم مش متربين والحاجة الي تجي من عند مش
متربي راهي صعيبة بزاف ممكن توصل لامور اخرى صعيبة بزاف.

الاجراءات الي قمتِ بيها الآن راهي مليحة وخاصة انك توّصلي ابنتك للمدرسة، وهذا جيد مش بسبب ابنة
جارتكم فقط وانما من امور اخرى، وانتِ قلت انه في وقت 80 و90 الامور كانت الامور مختلفة والآن تغيرت
اي نعم تغيرت، وولا ماكانش لامان في الشارع وحتى في المدرسة.

بخصوص مشكلة لعب ابنتك مثل اطفال اخرون وخاصة انها في عمر الزهور وابنة الجيران -هداهم الله- بسبب
تصرفاتها خلاتها ما تخرجش، حاولي تخلي ابنتك تجيب للمنزل زميلاتها في الدراسة ويكونوا متربيات مليح
واذا كان الوضع في المنزل ما يسمحش ساعة على ساعة اديها مثلا لكاشي قريباتك عندهم بنات تلعب معاهم
او تديها كاشي ملاهي،..

الله يهدي ما خلق، وتتربى ابنتكم في عزكم ان شاء الله، وربي يحفظكم ويجعلها قرة عين لكم

بالتوفيق
​

 

[بنت الـ25]

السلام عليكم
هاد الطفلة وختها قاعدين يتصرفو بهاد الطريقة باش يشوفو ليهم الناس على أنهم محبوبين وأقوياء ولا حابين لفتو الانتباه
وعلى الأغلب الغيرة اللي خلاتهم يديرو هاد التصرفات
الحل فهاد الخطوات

يلزم بنتك تلقى طفلة خلاف تعقب معاها الوقت (معظم الوقت) خاطر اللي يكون وحدو هو اللي غالبا يكون ضحية هاد التصرفات ولأنو الطفلة الاخرى تحسسها بالأمان وانو رح دافع عليها كي يتطلب الأمر

قويلها ثقتها بنفسها متخليهاش تكون خجولة فوق اللازم وعلميها مهما كانت كذلك لازم تتصرف بشخصية قوية قدامهم
وجامي تبكي قدامهم وديما تشبح وجهها وتتعلم تضرب هي تاني ودافع عن نفسها
انا نقترح تسجليها في صف جودو ولا كارتيه أحسن

شوفي اختي انا منشتيش الظلم مي ياي والله وجات بنتي كون منحكمش هدوك الزوج بنات نديرهم شطيطحة
ونحكم امهم نغسلها غسيل الكرشة فالواد نعتلها تحقر بنتي ولا تخلي بناتها يحقروها وهي تتفرج
انا عجال ولادي (مستقبلا ان شاء الله خخخخ ) نباصي نورمال
​

 

[حُلم عابرْ]

اختي ديفو مش فيك ديو في ناس هذا الوقت لان الزمان ماتبدلش الناس هي لي تبدلت

نصيحتي احتوي بنتك وماتخليهاش تشوف العالم من خلالك برك عريها على بنات جدد مش غير صاحبة وحدة لالا بزا بنات يكونو من الجوغ تاعها باش تستعيد ثقتها بروحها وكي تكبر ماتوليلهاش عقدة خممي لبعيد صغار يبكو ويرقدوا بصح الحرقة تكبر معاهم متخبية وفي لحظة غير منتظرة تطرطق حكايات الماضي بشكل عقد وامراض نفسية

مادام بنت صغيرة قبل لا توصل لمرحلة النضج حاولي تستدركي الامر وصي المعلمة ثانيك تقعدها من الامام

 

[Hakan]

اعطيلي العنوان وانا نهنييك منها نضربها بعين نتاع قناص وتشوفي من بعد واش يصراا ههههههه الله يعينك.

 

[HAMZA USMA]

أحكمي الطفلة الصغيرة و وريلها العين الحمراء يعني خوفيها

وبنتك علميها تدافع على نفسها ،، ومنين ذاك روحي معاها للمدرسة
وبالشوية تتعلم
​

 

[ندى الشاوية]

والله انا عانيت من هدا المشكل قبل بضعة سنوات ومازالني نعاني منو وشنو بدرجات متفاوتة
انا ننصحك وحسب رايي والله اعلم تهدري مع بنتك تفهميها بلي ماشي راي اناس لي يهم وخليها تحل مشاكلها وحدها ومنها رايحا تقوى شخصيتها ونتي راقبيها غار من بعيد
انا كنت نعاني من هذا المشكل يخي عمبالكم القراية تاع القسم ما يشتيوهاش والحمد الله هدا وين لقيت الصحابات لي ليقو بيا
انا هدا رايي ومنعرف
​

 

[ام سيرا]

شكرا لكل من اهتم بالموضوع
والف شكر على نصائحكم
اخي حكيم العنوان نبعثهولك على الخاص ان شاء الله ههههه
وراح نتابع اخبار البنت على الجرائد ههه

 

[Hakan]

شكرا لكل من اهتم بالموضوع
والف شكر على نصائحكم
اخي حكيم العنوان نبعثهولك على الخاص ان شاء الله ههههه
وراح نتابع اخبار البنت على الجرائد ههه

هههههه ان شاء الله تسمعي الخبر و ان شاء الله بنتك تريح من همها ربي يهدي والدين مثل هؤلاء الاطفال المشاغبين وانا راني حاس ببنتك لاخاطر كي كنت صغير كان محتقرني واحد يقلي جيبلي الدراهم لقيت الحل وهو اني غيرت الابتدائية نتاعي والحمد لله دركا كي نتلاقاو ونفكرو في واش كان يديرلي يضحك معايا والقدرات العقلية التي اصبحا امتلكها الان والحمد لله برهنت له اني تفوقت عليه في كل مجال وهو بعيد عني الان الى مسافة كبيرة اعيد واقول ان شاء الله تريح بنتك وجربي تحويلها اذا قدرتي واذا ماكانش حاولي تضغطي على المعلم نتاع بنتك باش يتكلم معع البنت هادي لاخاطر كيما كنا بكري كي يقلي صاحبي نبيعيك للشيخ والله نرهب ونخاف ولحمد لله دركا راهم يقدرونا ونقدروهم سلام شكرا على ردك وردي الاول ماكان الا فقط للفرفشة ولكي اخرجك من الجو الحزين لادخلك في مجال يتعلق اكثر واكثر بمجال التربية الاسرية وعلاقتها بنجاح الطفل سلام اختي الكبيرة نلتقي ان شاء الله في مواضيعك او مواضيعي لنتبادل وجهات النظر.
​

 

[red rose]

الله يهدي ما خلق يبقى المشكل ديما في التربية