- إنضم
- 13 أفريل 2013
- المشاركات
- 14,618
- نقاط التفاعل
- 54,535
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السّلآم عليكم يا ناس لمتّي الأعزاء ^^
ان شاء الله راكم لاباس ؟؟
بصراحة راني نشوف قسم فرغ واش كاين في قلبك وبالخصوص موضوع أحكي حكايتك راهو فارغ هاد الأيام, قلت نوضع اليوم إحدى ذكرياتي ونفرغ نص من مخي ونخليه هنا
ربما يشوفوه بعض الاعضاء ويفرغو قلبهم ويوضعو ذكرياتهم السيئة وإلا الجيدة هنا وفي هاد الركن , المهم بدون إطالة رايحة نحكيلكم على وحدة من اصعب الذكريات في حياتي وبما انو غدوة هو يوم الدخول المدرسي وكاين لي تستنا فيه امتحانات رسمية كيما الباك وكيما شهادة التعليم المتوسط وربما راهو خايف , قلت قصتي ربما تكون عبرة لهاد الطلاب باه يقراو ومايفقدوش الامل
المهم الحكاية هادي صراتلي في العام لي كنت رايحة نجوز فيه شهادة التعليم المتوسط كان عمري ربما 15 سنة تما, المهم الحكاية هادي صراتلي قبل 4 ايام هكاك ولا 3 من امتحانات شهادة التعليم المتوسط , وكأي شخص عندو امتحان كنت موجدة روحي لهاد الإمتحان وأكيد الايام الأربعة الأخيرة رايحة تكون فيها مراجعة مكثفة لكن للاسف ماكانتش عندي فرصة باه ندير مراجعة مكثفة لأنو قبل 4 ايام مرضت بمرض خلاني نكون طريحة الفراش وبدون سبب, كان التنفس تاعي بسرعة الضوء, كيما شخص يجري بسرعة وكي يخلص الجري يلقى الشيق والزفير تاعو سريع حتى مايقدرش يهدر هكاك كنت أنا 24 على 24 ساعة حتى الهدرة ومانقدرش نهدر , واذا حبيت حاجة نهدر بالإشارة برك وغير في الفراش ماناكل ماشرب غير نتنفس برك بصعوبة
من بعد داوني والديا لعند طبيبة تاع أمراض الصدر والربو قاتلهم عندها ربو بصح في البداية تاعو ويقدر يتداوا بصح المشكل الكبير هو انو الحالة تاعها صعبة وحادة لدرجة النبض تاعها ماش قادرة نحكمو ولا نقيسو , ومن بعد ولات مدتلي 3 بخاخات للربو وكل وحدة وفايدتها و مجموعة من الأدوية فيها حتى ادوية مستحيل ناكل معاها الأكل المالح لازم بدون ملح, وقالتلهم إذا كتب ربي وراحت للامتحان مستحيل تمشي على رجليها لازم سيارة من باب الدار لباب المدرسة ومن باب المدرسة لباب الدار وإلا تتعب ويزيد يقوى الشهيق والزفير ويتقطع فيها النفس
من بعد رجعت للدار وحالتي كانت أسوء كنت ندير البخاخات هادوك تاع الربو في ثلاثة في نفس الوقت ونحس شوي بالارتياح لدقائق وزيد نولي بهاديك السرعة الخيالية تاع الشهيق والزفير , حسيت روحي بقاولي دقائق ونموت وليت ندعي في ربي وحاطة في قلبي بلي اذا كتبلي عمر جديد رايحة نرتاح واذا كتبلي ربي نموت ماعليا غير نستنى ساعتي وخلاص ,بصح في نفس الوقت كي تفكرت بلي عندي امتحان بعد يومين ماحبيتش نستسلم وليت هزيت الكراريس وبقيت نقرا بعينيا برك وانا في الفراش , نحط الكراس قدامي ونتبع برك وكي نتعب نقفلو ونرتاح , ومن بعد نهار جا الإمتحان نقصت شوي هاديك السرعة تاع الشهيق والزفير بصح التعب والمرض مازالو دايرين بيا واذا حبيت نهدر ولا نحكي نولي لنفس الحالة الأولى لازم مانهدر مانتحرك كلي دمية , المهم توكلت على ربي وجوزت هادوك الايام تاع الإمتحان بصعوبة , قلت ندير لي عليا والباقي على ربي سبحانو ومن بعد بديت نرتاح بالشوي بالدوا بصح من وراها ولحتى الآن عدت لازم ديما ببخاخات الربو نمشي ساعات يجيوني نوبات يدومو نهار كامل وتتعاود نفس الحكاية ونعود مانقدرش نهدر والشهيق والزفير يولي بسرعة مليار في الثانية , ساعات نضطر نروح للمستشفى وساعات تروح كي ندير الدوا برك بصح الحمد لله تحسنت بزاف وكل عام نتحسن اكثر والمرض تاعي بالشوي راهو يتحول لحساسية تقوى في الربيع فقط ولا اسعات كي نمرض في الشتا , وفي النهاية نسيت ماقلتش بلي نجحت في تعليم المتوسط وبمعدل مليح والحمد لله بعد ماحطيت روحي ماننجحش خلاااااص
بصح الحمد لله , حبيت نقول لجميع الطلبة وجميع التلاميذ جامي تفقدو الامل حتى ولو بقاتلكم ساعة في يدكم اغتانموها, اقراو واتعبو واجتاهدو, خاطر مستحيل انسان يتعب ومايلحقش غير لاكان ربي شايفلو خير في جهة أخرى
هادي كانت جزء من ذكرياتي القديمة ونشجع كل عضو لي عندو حكاية واجعتو يجي يشاركنا في موضوع احكي حكايتك لأنو رايح يلقى ناس يسمعولو ويوقفو معاه
المهم اتهلاو في روحكم ونتمنى ماكنتش تقيلة عليكم
تحياتي للجميع وربي ينجحكم كامل
سلآم
