السلام عليكم يا لحباب ان شاء الله تكونو بخير
ان شاء الله صبحتو ملاح مع البرودة هذي ارواحو هنا دفو رواحكم فالموضوع
اليوم يا جماعة حبيت نحكو على موضوع موجود في كل دار
أرواحو نشوفو الأم الحنينة يقال الأم ما تفرقش بين أولادها مي تبّعوني تعرفو إنّو كاين مخلوق مفضل عند الأم ولو واش دار
نحكو على الجون فالدار ملك الدار والعشيق اللي تعشق فيه الأم رايح جاي وهي خموس على وليدي تبارك الله من ينوض وهي تشلل عينيها فيه تقول جاها ضيف
السبع اللي بنات الدار خدامات عندو
مسلسلو من ينوض من صباح ارواحو تشوفوه
ينوض ..... وتبدا اليماة وين راكي وجدي لخوك القهوة ازربي وخفي وتجري المخلوقة وهي ترعش تخاف يصبّح عليها بكاش كف وتسخن وينوض مع الصباح تقول فلّس فالمنام حواجبو متلاقين لو تشوف فيه اختو برك يشعل عليها بسب او بكف ولو يماه تشوفو اييييه يا سبع الدار هناك وين تزيد تحبو اكثر الحقرة عيني عينك
ورا القهوة لازم يدوّش
يدوش وييش هذي حفافة
يروح ويدور ويشد الحيطان او يخدم ولازم يرجع ما ياكلش الماقرون وما ياكش العدس ولو الطفلة تقول ما ناكلش يرجهوها تاكلي الرهج روحي ترقدي هو يدخل الفريت فرااااااش تغلي سخونة
آآآآآآآه يا ربي ظلم عيني عينك لهذيك الخدامة مسكينة
ويا ريت يقدرو ويزيد يمى نخرج تقولها شاوري خوك
يمى نروح عندي صحبتي ..... شاوري خوك
يمى نشري حجاب ........اه ما علاباليش ما عنديش اصبري خوك بلا كسوة خلي يشري هو من بعد نشوفو
يمى راني فالميكرو .......نوضي نوضي اجري قبل ما يشوفك ..... تقولي انت ما نعرف شكون هذا
الحقرة رانا نعيشو فيها انا صح مهنية منهم حاليا مع امي وبرك تهنيت مي عشت الفترة هذي وين خونا نحسابوه بابانا والله حتى مرات الأب هو يخلّي المسؤولية ليه وهو يا حسراه أسد الآمازون ويا ريتو فالح
ولما يتزوّج تولّي مرتو هي السّبع
واللّي كان ينوض مع 7 نوجدّولو القهوة رجع يخرج من الدّار وما يقربعش الغزالة راقدة ويروح يشرب فالقهوة ..... ايييييه ما تستغربوش سبحان مغير الاحوال
واليماة اللي البارح دلل ..... اليوم ما تشوفوش بالشهر وهو ساكن معاها فنفس الدار
معناها دلالها رجع عليها
الطفلة تغسل وطيب وتقوم بكل الدار ولو تتزوج محال تسمح فوالديها
مي الراجل اللي دلوه واعطاولو حق حتى يحرم ختو من قراية او من اي شي
واش رايكم انتم فالتفضيل فالدار
علاه الجون هو المخيّر فالدار عند الام او الاب؟
شكون قال للجون انك انت مسؤول على حياة اختك صح كاين امور لازم تدخل فيها لانك راجل الدار
لكن هذا ما يعطيكش حق تمحي وجودها وكانو حيوان
الخط لكم واش رايكم
موضوع اليوم راه كونتري علي أدم:d إيه خيتو شير دايما هو مومو عين أنا لوكان نحكيلك أنا كبيرة علي خويا 3سنين 
