الأم الجزائرية في فترة الإختبارات ... صبرٌ لا يُقاس و دعاء لا ينقطع

[ام أمينة]

ام امينة والمواضيع اللذيذة

عندك وحد اللمسة تحرك الأعماق والذكريات سبحان الله ..

صح كيما قلتي الأم أيام الامتحانات تتعب أكثر من ولادها ما تتهناش غير تشوفهم خلصو امتحاناتهم وما تتهناش غير كي يدو علامات يفرحوها ، تلقايها حتى اسبوع التصحيح تسقسي يادرا جبتو مليح شحال جبتو وكذا حتى المعدل ..

واخص بالذكر أمي الحبيبة بعد توفيق الله عز وجل هي وصلتني لوين راني ، كانت تتعب معايا فالاختبارات تفهمني وتقريني وتحل معايا الامتحانات وتسهر معايا وتزيد تبكر تعاود تراجع معايا ، نشفى فالبيام شدتلي كراس الاجتماعيات كامل نص نهار وهي حاكمة الكراس ، وكي بدات أيام الباكالوريا هذيك الفترة عاد بدات أمي تستعفا شويا من كورونا مزالت الاعراض لكن بشدة أقل ، ناضت وهي في تلك الحالة حضرتلي " كرات الطاقة " كيما تسميهم بالمكسرات و المعجون وكل يوم كي نجي من الامتحان نلقاها دارتلي في طبسي كرة من كرات الطاقة مع تيزان يهدأ الاعصاب..

وضرك حتى كي كبرت وراني في الجامعة كل يوم تسقسيني يادرا قريتي ؟ وفالامتحانات يادرا راكي لاحقة ؟ راني ندعيلك وتبقى تستنى فالافيشاج أكثر مني ..

اااه دمعت عيني وانا اكتب هذه الذكريات التي هي عبارة عن قليل من كثير

عقلي عقلي ام امينة ديما جيبيتي الدمعة ..

والله كيما قلتي الأم الجزائرية هي أم محاربة تضحي بكلش في سبيل انو ابناءها يقراو وينجحو ويكونو بصحة جيدة ..

تحية عطرة لأمي ولكل الأمهات معنا في المنتدى , بوركت جهودكم وبلا ما ننساو الآباء باش ما يزعفوش

بوركت أم امينة على طرح الموضوع

اهلا حبيبتي
هذا الموضوع كان لنا ذكريات معه مع أمهاتنا و الآن نعيشه مع أبناءنا
صحيح الأم تعيش ضغط الإمتحانات أكثر من أولادها و تفرح بنجاحهم كأنه نجاحها
ما شاء الله أمك مثال في التضحية و الحنان تعبها و دعمها هو سر نجاحك بعد توفيق الله ربي يحفظها و يشافيها و يجازيها كل خير
دمعتك أغلى دليل على حبك و وفاءك و ذكرياتك شهادة على أم عظيمة
ربي يحفظها
تحية إحترام لكل أم و أب ضحّوا من أجل راحة أبنائهم
شكرا لكِ على المرور و الرد في الموضوع

 

[ام أمينة]

سمحولي طولت عليكم
بصح اتمنى تقراو واش كتبت حرفا حرفا

ماشاء الله رد مليئ بالأحاسيس
ربي يحفظلك والدتك و ربي يقدر كل أم تحب الخير و النجاح لأبنائها

 

[أمير جزائري حر]

نصائح إضافية للأمهات وأبنائهن.. يُنصح بها ومُجربّة:

يمكن للطالب إن أحس ب-: " الإغلاق الذّهني" أو " البلوكاج" أن يسترخي على الطاولة بإسناد رأسه على يديه ليغفو غفوة خفيفة.. بضعة دقائق.. غفوة استرخاء أقرب ما تكون من النّوم إلا أنها ليست نوما كاملا..
ممّا يمكّنه من استعادة النشاط والحيوية..

 

[باتنية و نص]