المُتَزَوِجَــــــة تُفيْد وَ المخْطُوبَـة تَسْتفيْـد { الضيفَـة 2 أم ياسمينdz }

[ضآحكة مستبشرة]

​

السلام عليكم و رحمة الله تعالى و بركاته



أهلا وسهلا بكن عضوات اللمة الجزائرية نرحب بكن من جديد في ركن تجهيز العروس ولوازمها


نعود إليكن من جديد موضوع مع فكرة جديدة
قصد النهوض بالقسم و اخراجه من الركود الى النشاط
و كذا قصد استفادة المخطوبة خاصة و العازبة عامة من المتزوجآت
​

نلتَقــــــي معكم هذه الامسية و لمدة أسبوع كــــــامل مع ضيفتي و ضيفتـــكم الخالة @أم ياسمينdz
و هي ضيفة عزيزة علينا جميعا و هي بمثابة الاخت الكبرى لنا و هي عضوة نشيطة و مميزة لها مكانتها و قدرها في المنتدى
عضوة من اكبـر الشخصيات ساهمت بشكل كبير في رقيّ المنتدى و تطوره

تفضلوا اليوم و لمدة اسبوع كامل بالاسئلة و الاستفسارات و ستجيب عليكم جميعا ان شاء الله
كما ستفيدنا بخبرتها الطويلة و تشاركنا تجاربها و تحدياتها البطولية لاستمرار الزوآج

اتمنى لكم قضاء وقت ممتع مع هذه الضيفة العزيزة و المميزة

​

فكرة الموضوع :
في كل أسبوع نستضيف احدى العضوات المتزوجات و نضعها تحت المجهر​

و على المخطوبات و حتى العازبات و المتزوجات تقديم الاسئلة و كل استفساراتهن حول الزواج و فترة الخطوبة و كل ما يخص العروس
و على الضيفة الاجابة على الاسئلة و تقديم نصائح و تدابير للمخطوبات
و مشاركتهن تجاربها و تقديم كذلك برنامج جيد لسير الحياة الزوجية بدون مشاكل
و كيفية التخلص من المشاكل في حالة وجودها​

​

مع تمنياتي أن تلقى هذه الفكرة تفاعل و الهدف هو أن نستفيد لكي نفيـد

​

​

 

[sanaya]

السلام عليكم
أختي أم ياسمين منيش مخطوبة هههه بل متزوجة وحابة نسقسيك لأستفيد منك
ماهي أقرب الطرق للوصول لقلب الزوج ؟

 

[السلطانة]

وعليكم السلام ورحمة الله وبركاته
شكرا
المتفآئلة@ على الدعوة الطيبة

 

[السلطانة]

السلام عليكم
أختي أم ياسمين منيش مخطوبة هههه بل متزوجة وحابة نسقسيك لأستفيد منك
ماهي أقرب الطرق للوصول لقلب الزوج ؟

وعليكم السلام ورحمة الله وبركاته
هههه مرحبا بيك اختي ماذابينا نستفيدو من بعضانا
راح نجاوبك على حسب خبرة عامين ونص زواج
أقرب الطرق للوصول لقلب الزوج الاحترام مع التفاهم
لازم المرأة تكون متفهمة لزوجها ومحتارمتو
باه يحبها حب حقيقي لازم يحس بالراحة معاها

 

[{مُدَلَّلَتُهُ}]

السلام عليكم

أحسنت الإختيار أسومة

شوشو معروفة ببشاشتها وسعة صدرها و ان شا الله نستفادو منها

أم ياسمين شاهوما الأخطاء الي مالازمش تطيح فيهم العروسة ؟

من خلال تجربتك كيف تجعل المرأة زواجها ناجحا ؟

ما عندكش بزاف ملي كنت عروس ماهي نصائحك للعرائس الجدد؟

عندي ألف سؤال و سؤال كل ما نتفكر راني نجيك

 

[cosette]

اوووو

راح نجاوبك على حسب خبرة عامين ونص زواج

معندكش بزاااااف حنونة في بالي حسبالي عندك وحد 15 سنة ولا أكثر
لكن معليش ربي يدوما لعشرة حنونة

 

[آمِيْرَتُه]

السلام عليك
مرحبا بالخالة هي قالت ماشي آنا هههه
إن شاء الله يستفادو منك المخطوبات
اكيد عندك خبرة مدمتي انسانة مثقفة

 

[ضآحكة مستبشرة]

السلام عليكم
مساء الخير شوشو وآش راكي صافا ؟؟

اسئلتي هي :

واش تنصحي عروس جديدة من ناحية اللباس ؟؟
واش هوما الحوايج لي متكثريش منهم في الجهاز ؟؟
كيفاش تقدر المرأة المحافظة على الحب بين الزوجين ؟؟

و بواش تنصحي الزوجة تدير في الدار كي تكون متخدمش و راجلها يخرج الصباح ميرجعش حتى للعشية ؟؟؟


و بارك الله فيك

 

[ضآحكة مستبشرة]

@أم ياسمينdz يا الهرابة وراكي هههههه

 

[السلطانة]

السلام عليكم

أحسنت الإختيار أسومة


شوشو معروفة ببشاشتها وسعة صدرها و ان شا الله نستفادو منها
اهلا نونو
ولو تضالو تمدحو فيا ههه ايا خلاص حشمت
ماذابيا نفيدكم ^^

أم ياسمين شاهوما الأخطاء الي مالازمش تطيح فيهم العروسة ؟
بون كاين بزاف اخطاء راح نحكيلكم على الاخطاء لي شفتها قدامي
اول حاجة الاحترام والقدر لعايلة الراجل
وسورتو امو نوصي كل وحدة متغلطش فيها مهما يصرى تصبر وتتحمل
لأنو كون يطيح لقدر خلاص تعود كي شغل كاس وتكسر
الاحترام مع الراجل تاني مهما يكون فترة الخطوبة ولا الزواج لازم عليك تحترميه
وفي نفس الوقت تكوني ذكية تكسبيه ديما العقل يخدم مع الراجل القلب صحا مي العقل هو الاساس ههه
فترة الخطوبة علاقتك مع ناس راجلك من الافضل تبقى سطحية باه متصراش عفسات ممكن تهبط من قيمتك عزيزتي العروسة ولا يفهموك بالغالط ومتتدخليش معاهم في احاديث طويلة بلاكي



من خلال تجربتك كيف تجعل المرأة زواجها ناجحا ؟
الزواج الناجح يكون من عدة نواحي
توفير الراحة النفسية بين الزوج والزوجة يعني ديما توفري جو بينك وبين راجلك متخليش المشاكل والظروف تتغلب عليك
الاتكال على الله والصلاة والقرآن لازم تواظبي عليهم وتدعي راجلك ليهم ومنها ربي يباركلكم
خدمة الدار وحدها غير تخلصيها انساي كلش
عندك غرفة نومك ليك ولراجلك هاذيك الغرفة لي ترتاحو فيها
احكي معاه ناقشيه اضحكو قصرو
لازمك تفهميه ومتخليهش يروح لناس خلاف يفشفشلهم ولا يفضفضلهم ويخليك انتي غير لوقت النوم


ما عندكش بزاف ملي كنت عروس ماهي نصائحك للعرائس الجدد؟
التواضع تكسبي بيه نفسك ومحبة غيرك
الصبر ممكن راح تواجهي مشاكل خاصة مع اهل زوجك كون تسكني في بيت العايلة لازم تتأكدي انو العقل في هذه الامور هو الاساس تفكري بعقلك وتلقاي الحل باه توصلي للراحة النفسية مع زوجك
الاحترام كيما قلت مع عجوزتك وعايلتو بلاكي تغلطي فيهم خاصة امو

عندي ألف سؤال و سؤال كل ما نتفكر راني نجيك

مرحبا بيك هدهد في كل وقت نتمنى نكون افدتكم ^^

 

[السلطانة]

السلام عليك
مرحبا بالخالة هي قالت ماشي آنا هههه
إن شاء الله يستفادو منك المخطوبات
اكيد عندك خبرة مدمتي انسانة مثقفة

وعليكم السلام اهلا منمن
ههههه وليت خالة
الكلمة لي عمري راح نكونها ههههه
ان شاءالله نفيد الجميع

 

[السلطانة]

السلام عليكم
مساء الخير شوشو وآش راكي صافا ؟؟

اسئلتي هي :

واش تنصحي عروس جديدة من ناحية اللباس ؟؟
واش هوما الحوايج لي متكثريش منهم في الجهاز ؟؟
كيفاش تقدر المرأة المحافظة على الحب بين الزوجين ؟؟

و بواش تنصحي الزوجة تدير في الدار كي تكون متخدمش و راجلها يخرج الصباح ميرجعش حتى للعشية ؟؟؟


و بارك الله فيك

اهلا حبيبتي
الحمد لله كان عندي عرس عليها غبت عليكم هههه
واش تنصحي عروس جديدة من ناحية اللباس ؟؟
تلبس قشها لي داتو معاها في الجهاز تتمتع بيه
ولو انها تخبي منو ماش راح تلبس كلش كل مرة تبدل اللوك
واش هوما الحوايج لي متكثريش منهم في الجهاز ؟؟
الكوسميتيك لانو تم تم يتبريما وزيد ماكانش قد الحاجة البسيطة


كيفاش تقدر المرأة المحافظة على الحب بين الزوجين ؟؟
كيما قلت سابقا لازمها تكبر عقلها وتصبر وتوفر جو ليها ولراجلها

و بواش تنصحي الزوجة تدير في الدار كي تكون متخدمش و راجلها يخرج الصباح ميرجعش حتى للعشية ؟؟؟
تحاول تجيب الجديد
تلهي روحها تخدم شغل يدوي تدوش تبدل اللوك تعمل رياضة تقرى كتاب
تكون انسانة ايجابية

 

[السلطانة]

اوووو

معندكش بزاااااف حنونة في بالي حسبالي عندك وحد 15 سنة ولا أكثر
لكن معليش ربي يدوما لعشرة حنونة

ايا مليح كي عدت نبان كبيرة في عقليتي
حاجة تشرفني
:kiss:

 

[Only me]

السلام عليكم أختي
واش هو أول سؤال سألتي خطيبك نهار الشوفة ؟؟؟؟

 

[السلطانة]

السلام عليكم أختي
واش هو أول سؤال سألتي خطيبك نهار الشوفة ؟؟؟؟

وعليكم السلام ورحمة الله وبركاته
سألتو بزاف
منها على الصلاة ومنها على الوالدين وعلى الاحترام والخدمةووو