المُتَزَوِجَــــــة تُفيْد وَ المخْطُوبَـة تَسْتفيْـد { الضيفَـة 3 أم Sanaya}

[sanaya]

راني رجعت مريومة هههههه
مرحبا بعبورتنا الجميلة
1-واش هو اكثر كلمة تجرح المرأة ؟
أكثر كلمة تجرح المرأة في رأيي هي الكلمة التي تطعن أنوثة المرأة فأنا في رأيي أقبل أن يقول الرجل أي شيء و لكن أن لا يمس أنوثتي
فمثلا لو كانت الزوجة سمينة فيعايرها زوجها بالسمينة و هنا ممكن تفقد الثقة في أنوثتها
وممكن يقارنها بغيرها وهنا لا شك تنجرح كثيرا

مثل الرجل لا يجرحه شيء أكثر من أن تمس الزوجة رجولته
كأن تقول له :
أنت لم تحقق لعائلتك شيئا أو تقارنه برجل آخر
هنا ينجرح الرجل أكيد
لذلك يجب على الزوج دوما أن يحترم أنوثة زوجته
و أن تحترم الزوجة رجولة الزوج كذلك
2-واش يحب راجل اكثر حاجة المرأة التي
تهتم بجمالها او ببيتها ؟
الاثنين معا
عندما يدخل الزوج للبيت و يلقا الدار نقية و مارتو مكشردة غير الربعة تاع صباح سير كاين حاجة ناقصة
و كجي الراجل يلقا المرا تبارك الله حطة و مشيكة والدار مقلوبة معندو وين يحط رجلو
سيفو
لازم قي زوج الأناقة والدار
وديما نعطي نصيحة لصحاباتي الأناقة مش حاجة كبيرة
جينز و لا جيب مع تريكو شباب طلعي شعرك ولا ديريه طماطيشة ههه و صباطة شابة تكوني فور
مش لازم تماكيي و تلبسي لأكسسوار إلا معندكش وقت
تباني أنيقة في مظهر بسيط أفضل من لا شيء إلا مكاش وقت
مي كتكمل صوالحها لازم تشيك
و كاين نصيحة نحبها بزاف لازم الطفلة تتعلم تشيك روحها لروحها مام راهي وحدها فالدار تشيك مش غير كتروح لبرا ولا لكاش عرس
كتتعلم تشيك روحها تجيها ساهلة تكون أنيقة قدام راجلها
ونا كنشوف وحدة متستيكيش روحها غير قدام راجلها نحس كللي خسارة فروحها تستيكي
والصح قبل ماتشيكيي لأي شخص تستاهلي لروحك قبل
ومش معناتها ميشوفكش راجلك جامي بالبيجاما البيجاما تاني شباب مي فوقتو
وخلاصة القول :
لازم دار نقية و زوجة أنيقة
الأزواج يحبوا هاك
3-بعد انجاب الأولاد بمن تهتم المرأة اكثر
بزوجها او بأولاده؟
صراحة اللي شفتو بعينيا بكثرة يهملوا الراجل و يطهلاو فدراري
ونا فست شهور لولين لقيت مشكل فالتربية و الطفلة تبكي كل وقت و مبعد تسڨم كلشي
ونا من المهووسات بلتاي غير زيدت بعد 15 يوم بديت ندير سبور و نشيك روحي حمد الله
مالڨري كان وقتي قدقد مي لحقت الحمد الله
مي اللي شفتو فبزاف نسا تزيد و تنسا راجبها وتتقلش وليدك وليدك وليدك
ونا منستعرفش صح كاين اللي تكون ضعيفة و كاين اللي تقلش روحها
هنا الزوجة دير مجهود كل واحد تعطيه حقو مام لوكان ملحقت تريح مع راجلها يجي للدار يشوفها مشيكة خير مللي يشوفها كالربعة تاع صباح
و واجب تطهلا فالزوج والطفل مش طفل وحدو
4-في رايك مريومة واش لي يزيد الحب بعد
الزواج كلام الغزل او المعاملة الحسنة؟
في زوج كلام الغزل من الزوجة مي صراخة نكره الرجل الرومانسي زيادة عن اللزوم واللي يقلش بزاف مارتو لأنو الخشونة هي إحدى صفات الرجل
أما لمرا لازم تكون حنونة ورومانسية و شريرة أحيانا هه
واللي زيد الحب بعد الزواج أشياء كثيرة
أولها :
* العلاقة الحميمية
*الهدية
*مشاركة المواهب والأعمال
*الصلاة معا
*الاحترام
*تكوين صداقة بين الزوجين
والكثير من الأشياء اللي تهلي الخب ينمو بين الزوجين


جاوبي مريومة ونزيدلك قتلك نهبلك هههههههه

ههه معليش مرحبا بك دائما
وشكرا لحضورك

 

[sanaya]

شكرا لكي اختي افدتني كثيرا عندما اصبح في هذه المرحلة ساتبع بنصائحك ربي يجازيك على
فعل الخير

اختي حبيت نضيف حاجة نسيتها المرأة الجزائرية عموما هي امرأة عصبية و خشينة شويا سو كفاه نحبو الراجل يكون كالم
أنا نشوف المشكل تقدر تحلو لمرا بويسك لوكان تجيبي أقسى واحد فالعالم راح يضعف أمام الزوجة الحنونة
هذا شيء أكيد
علاهاديك الزوجة لازم تكون حنينة كيتعصب راجلها متقابلوش بزعاف
علاخاتر
النار باش نطفوها نسحقوا الماء
والزوجة هي الماء
وشكرا لحضورك

 

[sanaya]

شكرا حبيبتي على اجابتي حول مفهوم الزواج
سؤال آخر
كيف أتعامل مع اخوات زوجي و أمه
ماهي نصيحتك لي بخصوص العيش معهم ​

أول نصيحة :
لازم تكون عندك توقعات إيجابية لأقصى حد
مثلا تقولي يمات راجلي راح تحبني وختو تاني راح تحبني راه نعيشوا مهنيين
لأنو التوقعات الإيجابية عندها دور كبير في استقرار حياة الفرد
* ثانيا العفوية في التعامل متكوملكسيش روحك كما تعاملي أي شخص تعاملي معاهم ولا كاش نهار غلطت طلبي السماح نورمال علاخاتر أنا فحياتي وحدة من الناس اللي معندهمش بزاف مشاكل مع الناس والسبب ديما نتعامل بعفوية غلطت كاش نهار نطلب السماح وكاش واحد يديرونجيني نسكت مي لوكان يديباسي لليميت نهدر ودوك نوليلك لهاذ النقطة
* المبادرة في إسعادهم لوجه الله أولا ولوجه راجلك وفاميلتو ثانيا
خمي كفاه تفرحيهم
وكفاه تخليهم مرتاحين
* يصرا ساعات مناوشات بين الحماة والكنة ولا مع أخت الزوج
شيء عادي
نتي المناوشات العادية تقدري تعملي روحك مشفت والو و تسكتي نورمال
مصح لوكان كاش واحد ديباسا لليميت مثلا كذب عليك وقال دارت ونتي مدرتيش ولا مثلا كاين اللي يدخلولك لشومبرتك ومايشاوروكش
هنا تهدري حقك تهدري ولكن بهدوء وابتسامة
نعطيك مثال اخت راجلي ديفوا تدخل لشومبرتي متشاورنيش خترة قتلها طبطبي فالباب تسحقي أي حاجة راني هنا ني مدخليش عليا هاك
وعاودي شاوري ماماك فهاذ اىنقطة
أنا رايي السكات مليح مصح كاين مواقف وين لازم تهدري باش الشخص الاخر توجور يعرف بلي نتي وحدة عاقلة حنينة مي مش ساهلة كي الواحد يتجاوز حدودو
مي توجور توجور توجور
حاجة معجباتكش هدري
مي :
ابتسامة و هدري بالعقلية لأنو زعاف والعصبية ميجيبوش وممكن الشخص الاخر راح يتقبل كلامك غير بسباب تلك المعاملة الحسنة
ونحب نزيد متحاسبيش فكلشي كاين صوالح تقدري تمشيهم و ديري روحك مشفتيهمش
راني عطيتلك عقليتي وعاودي شاوري الأم تاعك وخبريني إلا وافقتني فالراي ولا لا
* أهم شيء الدعاء بأن يؤلف الله قلوبكم فمؤلف القلوب هو الله
صدقيني أنا ومارت خويا أكثر من صديقات وهذا دليل أنو ممكن جدا تكون علاقة أخوة رائعة بين الزوجة وأخت الزوج
وربي يهنيك أختي
وألف شكر لحضورك

 

[sanaya]

السلآم عليكم

الله يبارك من خلال أجوبتك تعلمت حوايج ما كنتش رادتلهم البال ربي يخليلك زوجك و يديم محبتكم ان شا الله
أمين يارب و مرحبا بك اختي
برأيك هل يؤثر عمل المرأة على زوااجها؟
حسب العمل نتاعها و حسب ظروفها تقدري تلقاي وحدة خدامة ومطهلية فراجلها وتلقاي وحدة خدامة وهاملة راجلها
لمرا إلا تخدم وتطهلا براجلها هي الفحلة أنا توجور نحب لمرا تحقق نجاحها وتثبت ذاتها من خلال انجازاتها شرط متهملش دارها
منقدرش نقولك يأثر ولا ميأثرش عالزواج على كل حالة وحدها
مثلا لمرا اللي تخدم و دارها صغيرة و مطولش فالخدمة و ولادها كبروا شويا وتجي من الخدمة فرحانة كجي راجلها تستقبلو بحنانة مش يلقاها هي تاني عيانة
مش كما الخدامة اللي دارها كبيرة تولي من الخدمة وتغرق في شغل الدار و متلقاش وقت لراجلها ولا تاني ولادها صغار
مي توجور كاين مشكل المرا اللي تخدم شويا تقيد راجلها مثلا حاب يسهر معاها ولا نفحتلو يحوسو معابعض متنجمش تصبح خدامة
مي تقدر تعوض صوالح هادو
ونا عندي قاعدة للنجاح :
النجاح يسمى نجاحا عندما تعطين لكل ذي حق حقه
هنا تكوني صح نجحت
إلا تخدمي و تعطي لراجلك حقو راكي توب وفور
و نحب بزاف لمرا تحقق أهدافها ومتكونش حياتها دور غير على الزواج مي لازم متضيعش الحقوق وهنا نتي اللي تعرفي حسب طبيعة العمل نتاعك و ظروفك
ونزيد نقطة كاين نسا ميخدموش ومضيعين زواجهم القضية مش قضية خدمة ولا لا بالدرجة الأولى
وإنما هي قضية حسن تنظيم الوقت و التعامل الجيد مع الظروف

و كيف تستطيع المرأة العاملة تحقيق التوازن بين حياتها العائلية و المهنية برأيك؟
أول شي نركز عليه مالڨري أنا مش خدامة بناتي مزال صغار شوفي:
كتولي من الخدمة مالڨري تكوني عيانة دوشي و شيكي روحك وستقبلي راجلك هو راهو عيان و يسحق مرا متبسمة و فرحانة تستقبلو مش يجي عيان و يلقا مارتو تاني عيانة هنا شكون يخفف على الاخر
* تانيا حاولي توفري لزوجك قدر المستطاع أجواء رومانسية أحيانا مثلا عشاء على ضوء الشموع و لا مفاجأة و لا تحواس باش ميحسش بلي راكي هاملتيه ولاهية غير بخدمتك و ميشكيش من الخدمة مدامك تعطيه حقو
* وكوني فحلة تعرفي كفاه توازني بين دارك و خدمتك و راجلك و سرتو لوكان تنوضي بكري سير تقدري تلحقي كلشي * أنا نحب استعمال المذكرة سرتو ولا تخدمي تعاونك باش متنسايش مثلا يوم فالسمانة تطيبي حاجة يحبها راجلك و تدي وقت ديريها فالويكاندوكشغل رشتة ولا كسكس
ويكون عندك يوم تبرمجي فيه تخرجوا معابعض ولا أي نشاط معابعض كاينة وحدة نعرفها تلعب لجو فبلايستايشن مع راجلها وعندهم دراري وتبرمجي يوم مثلا تزوروا فاميلتو
المهم الأنشطة اللي تعرفي راجلك يحبهم سجليهم فلاجوندا علاه بارسكو ممكن تغفلي وتنساي بسباب ضغط الخدمة مي كتسجليهم توجور راح تفكريهم
ما هي نصائحك لأختك حول الزواج ؟ قصدي كيف تتعامل معه و مع مسؤولياته لتكون الزوجة الصالحة التي حثنا ديننا على أن نكونها؟
في الزواج أول شيء :
العطاء
لاتطلبي شيئا أنت لا تعطينه
وأركز على نقاط بسرعة :
*الدين
*الأناقة
*لجان تاع اليوم يحبوا الطفلة اللي تكون شويا طايرة و مهبولة مش كامل مي لبليبار
*مسؤولية الدار
*الزواج ليس هو القمة كاين بنات عنهم الزواج هو النهاية لا الزواج هو بداية ثانية
تتزوجي و مبعد توجدي روحك من جديد باش تولي لعالمك وطموحاتك و أهدافك
وصدقيني الرجل يمل من الزوجة التي لاأهداف لها وتعيش الفراغ قد مايحب لمرا اللي عندها أهدافها وعالمها الخاص
لذلك الزواج هو الارتباط بشريك يكمل معك مسيرتك نحو أحلامك
وليس هو شريك تنامين معه للأبد على فراش اللأهداف
*كذلك نقطة مهمة تعرفي على ميدان عمل راجلك و كذلك مواهبه والهوايات اللي يحبها وتدعمينه هنا تكوني في مثابة صديقة له
و حاولي تقراي كامل واش كتبت في الردود الأخرى
ولازم تكون غايتك ديما إرضاء الله
فالله لايضيع أجر من أحسن عملا
تكسبي راجلك وتزيدي تكسبي الثواب
وأي سؤوال آخر مرحبا أختي​

 

[ميمي مرام]

أول نصيحة :
لازم تكون عندك توقعات إيجابية لأقصى حد
مثلا تقولي يمات راجلي راح تحبني وختو تاني راح تحبني راه نعيشوا مهنيين
لأنو التوقعات الإيجابية عندها دور كبير في استقرار حياة الفرد
* ثانيا العفوية في التعامل متكوملكسيش روحك كما تعاملي أي شخص تعاملي معاهم ولا كاش نهار غلطت طلبي السماح نورمال علاخاتر أنا فحياتي وحدة من الناس اللي معندهمش بزاف مشاكل مع الناس والسبب ديما نتعامل بعفوية غلطت كاش نهار نطلب السماح وكاش واحد يديرونجيني نسكت مي لوكان يديباسي لليميت نهدر ودوك نوليلك لهاذ النقطة
* المبادرة في إسعادهم لوجه الله أولا ولوجه راجلك وفاميلتو ثانيا
خمي كفاه تفرحيهم
وكفاه تخليهم مرتاحين
* يصرا ساعات مناوشات بين الحماة والكنة ولا مع أخت الزوج
شيء عادي
نتي المناوشات العادية تقدري تعملي روحك مشفت والو و تسكتي نورمال
مصح لوكان كاش واحد ديباسا لليميت مثلا كذب عليك وقال دارت ونتي مدرتيش ولا مثلا كاين اللي يدخلولك لشومبرتك ومايشاوروكش
هنا تهدري حقك تهدري ولكن بهدوء وابتسامة
نعطيك مثال اخت راجلي ديفوا تدخل لشومبرتي متشاورنيش خترة قتلها طبطبي فالباب تسحقي أي حاجة راني هنا ني مدخليش عليا هاك
وعاودي شاوري ماماك فهاذ اىنقطة
أنا رايي السكات مليح مصح كاين مواقف وين لازم تهدري باش الشخص الاخر توجور يعرف بلي نتي وحدة عاقلة حنينة مي مش ساهلة كي الواحد يتجاوز حدودو
مي توجور توجور توجور
حاجة معجباتكش هدري
مي :
ابتسامة و هدري بالعقلية لأنو زعاف والعصبية ميجيبوش وممكن الشخص الاخر راح يتقبل كلامك غير بسباب تلك المعاملة الحسنة
ونحب نزيد متحاسبيش فكلشي كاين صوالح تقدري تمشيهم و ديري روحك مشفتيهمش
راني عطيتلك عقليتي وعاودي شاوري الأم تاعك وخبريني إلا وافقتني فالراي ولا لا
* أهم شيء الدعاء بأن يؤلف الله قلوبكم فمؤلف القلوب هو الله
صدقيني أنا ومارت خويا أكثر من صديقات وهذا دليل أنو ممكن جدا تكون علاقة أخوة رائعة بين الزوجة وأخت الزوج
وربي يهنيك أختي
وألف شكر لحضورك

سلام الله عليك غاليتي
ألف شكر لنصائح القيمة لي قدمتيهالي
رايحة نزيد نسقسي الوالدة و نرجعلك الخبر اخيتي
ربي يحفظك و يرعاك
و ربي يدوم المحبة بينك و بينك زوجة الاخ الكريم
ماشاء الله
و ربي يحفظلك زوجك و يحفظك ليه ان شاء الرحمان

:kiss:​

 

[السلطانة]

اهلا بالضيفة العزيزة

اسئلتي :

هل تسكنين بيت العائلة ام بيت مستقل ؟ بواش تنصحي عرائس اليوم فيما يخص الموضوع
انتي والاولاد ؟ كيف تقضين يومك بين واجباتك الزوجية والابناء ؟
هل تحبي تبدلي اللوك تاع لبستك وشعرك كل مرة او تحافظي على نفس الايستايل منذ زواجك ؟
هل انتي من محبات المفاجآت لزوجك تحبي تغيري الروتين او لا ؟

 

[sanaya]

اهلا بالضيفة العزيزة
شكرا
اسئلتي :

هل تسكنين بيت العائلة ام بيت مستقل ؟
سكنت في بيت العائلة مدة ثمان سنوات والآن أنا في بيت مستقل
بواش تنصحي عرائس اليوم فيما يخص الموضوع
كتكون فاميلة الراجل لاباس بيهم من الأحسن تسكن العروسة فلول فبيت العائلة
مام إلا كاين مناوشات بين العروسة والحماة ولا مع أخت الزوج عادي
ولكن شرط أن لا تؤثر تلك المناوشات على علاقة الزوجين ببعضهما
لأنو بيت العائلة والله من تجربتي يعلم بزاف صوالح للعروسة اللي ينفعوها طول حياتها
سيفري مش حاجة ساهلة
ولكن يعلم بزاف صوالح
مثلا تتعلم تصبر
مش غير واحد غلط معاها ترد لكلام
تتعلم دافع على روحها كيغلط واحد معاها من دون أنو تجرح حتى واحد
تتعلم يكون بالها واسع
و تتعلم تخدم من دون مقابل
هاذي عجوزتها تسحق حاجة اخت راجلها ولا خوه
مصح لازم تكون لعروسة حنينة و ذكية
بحيث متخليش وحدة تبروفيتي عليها ولا تسبب لها مشكل
أنا ضد بيت العائلة ككون سبب في حدوث مشاكل بين الزوجين
هنا الاستقلال أحسن
مي ككون الراجل عاقل وعندو حسن التصرف وفاميلتو لاباس بيهم من الأحسن بيت العاىلة
انتي والاولاد ؟ كيف تقضين يومك بين واجباتك الزوجية والابناء ؟
أول شيء أركز عليه للمتزوجات الأناقة
قد ماتكوني مضغوطة فالعمل وجا راجلك للدار لقاك مشيكة و معطرة ميحسش بوالو
تاني البكور
من بعد صلاة الفجر لوقت لفطور نكمل بزاف صوالح
وكذلك النظام بحيث دراري توجور يرقدوا قبل
واىحمد الله مكانش ضغط فالعمل بويسك راهم كبروا بعد
بقا غير التربية و التوجيه ونعس فيهم هذا ماكان
هل تحبي تبدلي اللوك تاع لبستك وشعرك كل مرة او تحافظي على نفس الايستايل منذ زواجك ؟
باينة نبدل
أنا من المهووسات جدا بالمودا
الشعر منقصوش جامي مي نصبغو ديفوا
وحبيت نوضح حاجة اللوك مش غير الشعر
كاين نسا نعرفهم تبدل شعرها وخلاص ننصحها تلبس حاحة موديرن سيرتو ولا راهي ساكنة وحدها تقولي لا أنا كبيرة وعندي دراري
وهي موصلت حتى 30 سنة هادي غلطة كبيرة
اللوك فالشعر فاللبسة
ونا الشعر صبغتو دوفوا
عجبتني الريسلتا مي شعري تضرر بزاف
المايكاب منستعملوش بزاف نميل للتجميل الطبيعي كثر
ممكن دوفوا فسمانة ندير مايكاب كامل زعما كريم دوباز و مونسيلر وووووو
ليامات لخرين
ندير ماسك نتيرال ومبعد نحط مسكار فغاجو و روجولاف
وستيل لبليبار جينز و تيشرت و لا جيب ديفوا غوب سواري
مي بيناتنا نحب بزاف نلبس منقولش جامي نو سايي عندي بنات ولا كبرت ههههه
نلبس كوستيم جينز جينز مقطع مي مش برا أكيد غير فداري
و ندير سبور يوميا

هل انتي من محبات المفاجآت لزوجك تحبي تغيري الروتين او لا ؟

أكيد شكون ميحبش المفاجآت
ونا صراحة معنديش روتين فحياتي جامي تقلقني حاجة
زعما نوض صباح نطيب نيتوايي نورمال منقولش راني كارهة ديما نتوياج و طياب
وميمنعش أنو نفاجأ العائلة
وألف شكر لحضورك
سلام

 

[ميمي مرام]

سلام الله عليك غاليتي
هاني رجعت هه
بون الوالدة موافقاتك فكامل شاقلتي
بصح عندي سؤال و هذا بزاف محتاجة لييييه
كي نبغي ندير حاجة مثلا نبغي نخرج و لا نروح عند الفاميليا و لا نبغي نخدم
كيفاه ندير نقنع زوجي بهذا الشي لي راني بغياتو
و شكرا لنصائح و للاجوبة لي فادتنا بزااف
جزاك الله كل خير
و
بارك الله فيك و في البنات​

 

[sanaya]

سلام الله عليك غاليتي
هاني رجعت هه
بون الوالدة موافقاتك فكامل شاقلتي
بصح عندي سؤال و هذا بزاف محتاجة لييييه
كي نبغي ندير حاجة مثلا نبغي نخرج و لا نروح عند الفاميليا و لا نبغي نخدم
كيفاه ندير نقنع زوجي بهذا الشي لي راني بغياتو
أول شيء طلبي بحنانة مش بعصبية
2 كتجي تطلبي راجلك خليه يحس أنو راكي تشاوري فيه مش تأمريه و خليه تاني يعرف بلي القرار الأخير يولي ليه مش ليك نتي علاخاتر الراجل كفيق بلي مارتو راح تتسلط عليه يبدا غير يقول لا
كطلبيه تقولي مثلا :.
حبيبي عندي بزاف مشفتش يما معليش نروح نزورها اليوم
ولا مقبلتش معليه نحب نخرج بالرضا نتاعك وكلمات من هذا القبيل تخلي الراجل يعرف أنو هو صاحب القرار ميرفضش ولا رفض متزعفي موالو
علاخاتر كتزعفي راك تشجعي فيه باش ديما يقول لا
كيرفض راجلك قوليلو معليش مدام محبيتش اليوم نورمال نهار وحد اخر
علاخاتر كاين قاعدة تقول :
كلما قبلت المرأة لزوجها أن يقول لا لشيء فتحت له بابا اخر ليقول نعم
علاهاتر الراجل كيتهنا مارتو مراهيش تمشي فيه يولي متساهل مع صوالح هادو
وهاذي مجربة مش قريتها أنا جربتها فحياتي
و كذلك مع الخدمة ولا أي حاجة
* الطلب بلطف
* الوقت المناسب
مش يجي راجلك عيان ولا كنتي برا و غير تدخلي للدار تطلبيه تخرجي
توجور خيري اىوقت اللي يكون فيه الراجل مريح
* الذكاء والألفاظ اللي تخلي الراجل يحس أنو هو صاحب القرار الأخير
وعموما الراجل فبداية الزواج يكون متشدد شويا حتى يتهنا و يعرف عقلية مرتو مليح
نتي عليك توجور تتقبلي كيرفض و تعاودي تطلبيه مرة وحد اهخرى
وشكرا لحضورك
سلام
و شكرا لنصائح و للاجوبة لي فادتنا بزااف
جزاك الله كل خير
و
بارك الله فيك و في البنات​

 

[ميمي مرام]

تسلمي غاليتي ربي يحفظك و يرعاك ان شاء الله
جزاك الله كل خير ​

 

[sanaya]

تسلمي غاليتي ربي يحفظك و يرعاك ان شاء الله
جزاك الله كل خير ​

العفو و مرحبا بك دوما

 

[،كارينا،]

السلام عليكم يعطيكم الصحه جميعا واالله راااااائعه الاسئله والاجوبه ...استفدت جدا منها. ..دخلت وانا ماعنديش كامل علاقه بامور الزواج هادي خرجت معلمه فيعم ههههه والله يعطيكم الصحه هايلين ..
فقط عندي واحد السؤال. لغاليتي مريووومه . .
واش في الزوج الخجول شى سئ ام جيد ؟
وبارك االله فيكم جميعا ..بالتووفيق مريومه ....واسماء يعطيك الصحه كالعاده مواضيعك دائم قيمه ومفيده بوووركتي

 

[sanaya]

السلام عليكم يعطيكم الصحه جميعا واالله راااااائعه الاسئله والاجوبه ...استفدت جدا منها. ..دخلت وانا ماعنديش كامل علاقه بامور الزواج هادي خرجت معلمه فيعم ههههه والله يعطيكم الصحه هايلين ..
وعليكم السلام
فقط عندي واحد السؤال. لغاليتي مريووومه .
مرحبا .
واش في الزوج الخجول شى سئ ام جيد ؟
إذا كان يخجل في الأماكن التي تستحق الخجل
بمعنى آخر يستحي فذلك شيء رائع
ولكن أن يكون خجولا مع عائلته و زوجته صراحة منحبش هاذ الشي ممكن امرأة خجولة ولكن زوج نونونونونونو هههه
وبارك االله فيكم جميعا ..بالتووفيق مريومه ....واسماء يعطيك الصحه كالعاده مواضيعك دائم قيمه ومفيده
شكرا لحضورك أختي ومرحبا دوما
بوووركتي