-
| | [ طبخ ]: ماذا ستطبخين انستي سيدتي | [ إهداءات ]: راديو اللمة ألووو ألووو | [ نقاش ]: عزوف كبير عن المنتديات ما السبب؟ | [ دورة تعليمية ]: إتقان الاستخارة
المرضى النفسيين كثرو
- كاتب الموضوع الورد الأحمر
- تاريخ النشر
السلام عليكم ورحمة الله
يا يما وليت نعاني باه نقرا الدارجة بلفرونسي هههه مي معليش أهلا بيك أختي منورة.
والله يا أختي الشي لي قلتيه صح هي من جهة نقولو جابتها لروحها ومن جهة أخرى بذاتي مرات نضحك عليها مبعد نقولو أي باينة مريضة مستحيل تكون عادية وتدير هك مرة حبيت نقرا على حالتها بديت هك نحوس على الأعراض هذو لقيتهم داخلين في مرض الكذب القهري وين الانسان يكذب ويأمن كذبتو ويدافع عليها ومرات تجيه شكوك أنو ممكن يفيقو بيه مبعد يقول نو راني كذبت كذبات معقولين ويصراو دونك مش رح يفيقو بيا.
مشكلتها سمعت الناس الكل بلي رح تتزوج والناس الكل يعرفوها ويعرفو معارقها وعايلتها بالذات نفاو الموضوع مي هي مكملة في الفيلم وين رجعت ضحكة بين الرجال على خاطر تروح هي تحكيلهم بلي راجلها قال وراجلها عمل وهي قالت وهي دارت وراهي بالحمل ومدري واش يعني هي وصلت روحها ترجع مهزلة بين الرجال ودرك رجعت مضحكة كبيرة كي موفتة روحها بالحمل وفي فترة الوحم علابالك رجعت مهزلة كبيرة والمهزلة الأكبر لي عارفينها مش متزوجة تولي ما تلقى تضحك ولا تبكي وفعلا شر البلية ما يضحك.
والشي لي قلتيه صح المجتمع تاعنا ما يرحمش وعلابيها عملت الموضوع مش لازم الوحدة تحط بالها لواش يقولو الناس تزوحت حاجتي ما تزوجت حاجتي حياتي وانا حرة فيها وزيد الشي هذا مكتوب ربي ولي تزوجو او مش قررو يتزوجو وتزوجو نو كتبلهم ربي يتزوحو تزوجو على خاطر ما يجيش بقرار من العبد يجي بحكم وبقرار من الله مي الله غالب شعبنا تافه وسطحي وتفكيرو رجعي وخاصة النسا بين بعض مهما قراو مهما تعلمو مازالو شايفين الزواج قفازة في الوقت لي ماهوش قفازة وحكايتو حكاية مكتوب وزيد ما خلقناش ربي باه نتزوجو صح نصف الدين مي هذو لي يظلو يتغناو بنصف الدين تلقاهم ناسيين النص اللول والصلاة ما يصلوهاش وناسيين بلي كاين الصوم للي ما يقدرش يتزوج.
موضوعي مش معايرة للي ما تزوجوش مي باه لبنات يفيقو مع رواحهم بلي الدنيا مش زواج ولي تظل تندب ع الزواج تبطل تندب عليه او يجي بحكم ربي مش بالنداب وزيد اذا ما جاش مش نهاية العالم كاين بزاف أمور تقدر تديرهم الوحدة وتبروفيثي كي ما تزوجتش مش لازم تتزوج وتمرض بالزواح لدرجة ترجع تكذب وعايشة دور خاطيها.
مشكورة ع التعقيب بارك الله فيك.
السلام عليكم ورحمة الله
يعطيك الصحة ع الرد هذا بردتيلي قلبي بيه على خاطر هذا هو التفكير بالضيط لي حابة نمحيه من خلال الموضوع ويبطلو لبنات يشوفو الدنيا زواج وراجل وصح عقلية المجتمع تافهة ولي تتعطل ما تتزوج يكرهوها بالأسئلة شبيك ما تزوجتيش زيك تتشرط زيك معرف واش حتى يعقدو الوحدة.
بصح كومام الوحدة مفروض عندها عقل تفكر بيه خاصة إذا وحدة قارية ومثقفة نوغمالمون تعرف بلي ماشي هذي هي الدنيا وشحال من طفلة متزوجة كارهة حياتها وحابة ترجع للعزوبية ومش كل من تزوجت اي عايشة في الربح رانا نشوفو فيهم.
مشكورة ع التعقيب والرد وراكي في الموضوع ما خرجتيش عليه وردك يخدم الموضوع بطريقة كبيرة يعطيك الصحة.
السلام عليكم ورحمة الله وبركاته
ايه هي تاع تغيض أكيد تغيض وحالتها صعيبة بصح يعني ما قدرتش تتحكم في نفسها ؟ أي كبيرة يعني مش تاع تصرفات هك !! عموما الموضوع مش باه نضحكو وإنما باه كل وحدة تتوله مع روحها بلي الزواج مش كلشي ومش لازم الوحدة تكرس اهتمامها للموضوع هذا واذا ما كتبهولهاش ربي تدخل في دوامة تاع مرض وكذب.
كاين بزاف أمور الأولى الوحدة تخمم فيهم أنها تقرا أنعا توصل لمستويات عالية في العلم انها تتثقف أنها تكون ناجحة أنها تبني حياة لنفسها بعيد ع الزواج و ع الرجال.
أنا يا أختي حدي معاها صباح الخير مساء الخير واعطيني الدوسيي لفلاني والمدير هنا ولا ماكانش لا نقعد معاها لا نشاغلها لا ناغمها لا نحكيلها عليا لا على حالتي متزوجة ولا مش متزوجة كل واحد حياتو يحكمها ليه رانا نخدمو مش نحكيو قصص بعضانا.
مشكورة أختي بارك الله فيك.
أهلا ...
مالا يعطيني الصحة جبتك ودخلتي للمة وخليتي رد استفزيتلك الستيلو تاعك في اللمة هههههه.
والله يا لولو أو قررت نعيطلك لولو
هذي لي تخدم معايا كيما حكايتها تضحك كيما حالتها تغيض أكيد على خاطر المجتمع وصلها للدرجة هذي بصح هي لي حطت بالها للهدرة تاع الناس وممكن لا الناس لا والو هي برك هك عجبها موضوع الزواح وبدات بكذبة تخطبت مبعد دخلت مليح في الدور وتطورت الحالة عندها زوصلت للزواج بلكذب.بالنسبة ليا مازال الحال عليها باه تدير الانتحار هذا ومازالت فرصها في الزواج قايمة بصح حرقت روحها يحكاية تزوجت درك حتى ويحب واحد يتقدملها رح تمشي عليها هدرة بلي تزوجت وهي كوندانات روحها بروحها هذا لي زاد قلقني
.عموما الله يهديها وربي يرزقها بالاك تتزوج ما دريناش انا نهار قالولي رح تتزوج بلكذي قلتلهم كون غير نكونو غالطين فيها وتكون صح رح تتزوج بالاك تبرا علينا وتبطل كذب مي ظهرت اونكوغ تكذب ودرك رانا نسناو في البوبو تاعها لي عن قريب اكيد تخرج كونجي وتقولنا طاحلي
مغسي سنفورة ع المرور يعطيك الصحة :kiss:
السلام عليكم ورحمة الله وبركاته
والله يا اختي مجتمعنا برك تافه ومش كامل او صافا بدا يتطور في تفكير الزواج مي مازالو كاين ناس تقليديين هوما لي جرو ع المجتمع وكيما قلتي في الغرب ما سامعينش بالزواج خلاص تضرب ربعين سنة ومازالت فخورة بنفسها لي ما تزوجتش وعندنا مع تكبر تبدا تعرف صلاحها تقولك انا كي نتزوج ندير وندير ولا تقوللها واش حلمك تقولك نتزوج
.نصيحتك أني نبهها والله ماني قريبة منها لدرجة أنبهها ونقوللها راني علابالي فيك تكذبي وبطلي كذب او ما تقدريش تتخيلي قدماه عدائية مع الناس لي يحسسوها بلي راه يستهزؤوا بيها وكيقاه تعيط فيهم تسمى أنا ما مناغمتهاش نروح نصارحها تقدر نوغمال تقفز معايا تخنقني
.مغسي أختي يعطيك الصحة.
اممم انا اختك مش خوك يعني الورد الأحمر كامل ومبعد نطلع راجل
هااا شويا كيما قلت ربي يجيب الخير والأمراض النفسية ولا العضوية كثرو لعدة أسباب.
مشكور ع المرور.
المواضيع المشابهة
