ختي يخطبو فيها واش ندير ؟؟

[الورد الأحمر]

السلام عليكم ورحمة الله وبركاته

مبروك مسبقا على خاطر من كلامك يبان إنسان طيب ورح تكمل لحكاية ونفرحو باختك ان شاء الله وربي يجيب لي فيه خير .

أنا كيما قالت @ليليا مرام ما تكبرش الموضوع وسقسي برك عليه الناس رح يجيبولك خبرو ديجا والديه تعرفهم هذي لخصت حوايج بزاف وحط روحك في بلاصتو تمشي تخطب يولي خوها يحوس عليك ويحطك حداه ويتعرف عليك وتولي تحس روحك مدري كيفاش.

مطلوب من أختك تاني تعمل استخارة وتتكل على ربي اذا فيه خير رح يمشيها ربي ع طريق القبول ويسهل في كلش اذا كا فيهش خير ليها رح ترفض ورح تصرا أمور تخلي الحكاية تتفركش.

الله يتمم على خير ويكون ان شاء الله فيه خير للختك وتفرحوا بيها .

 

[صانعة الإبتسامة]

السلام عليكم ورحمة الله وبركاته ناس اللمة بما انو انتم لافامي الثانية نتاعي حبيت ناخذ رايكم بيسك مهم عندي
المهم هذي الايام عندها تقريبا ثلاث ايام دخلت للدار نتعشى جات ليا الوالدة حطتلي عشايا وكي كملت قاتلي
ياحكيم ختك راهم يخطبو فيها واش راايك ؟
بون اي اخ يقولولو هذا الكلام ديركت قلتلها شكون قاتلي فلان بن فلان صراحة انا ما نعرفش هذا السيد
لكن نعرف الام نتاعو ونعرف الوالد نتاعو عائلة بسيطة كيف عايلتنا الطفل عمرو 28 وختي عمرها تقريبا 21
المشكلة ماهيش هنا يعني انا ارتحت كي سمعت انو والديه هذوك هوما بيسك يقلك الزواج زواج عائلتين ماهوش زواج فردين
يعني الام نتاعي ما قلتلها والو والحمد لله عارف الشرع قلتلها وختي واش راهي حابة يعني اسكو راهي قابلة ولا ماهيش قابلة
قاتلي ختك راهي عاطيتلك انت الحرية يعني انا بعد الوالد نتاعي الي عندي الخيار في يدي اسكو نقبل ما نقبلش
يعني قلتلها واش قلتلكم انو والديه يعجبوني اما هو ما نعرفوش شخصياا لكن سمعت من اطراف تعرفو انو شاب لاباس بيه
انسان متربي ماهوش نتاع مشااكل خدام ذرااع والعمل الحمد لله ما عندناش مشكل معاه المهم ختي تتهنى معاه ولو باللقمة
واكيد هذا الحياة ضرك علاه كتبت الموضوع وهو انو البارح قعدت مع الوالدة نتاعي وجبدنا الموضوع وكانت ختي معايا
وختي يعني عاطيلها حرية التعبير هي تحكي وانا نسمع قاتلي ياحكيم والله اللي تقولو انت يمشي ضرك هنا حسيت بالمسؤولية تجاه ختي
ولازم يعني الواحد يسقسي مليح ضركي كيفاش نسقسي هذي نعرفها ولكن حاب نلتقي شخصيا بهذا الشاب ونعرفو بيسك
نقدر نميز الخير في البناادم وانتوما واش رايكم خاوتي؟؟ ودعواتكم ايضا ..​

أهلا أخي....زواج ليله تدبيرتو عام....أنا شخصيا نقلك لازم تتعرف على هاذ السيد لأنو أختك رايحه تكمل حياتها معاه ماشي مع دارهم ...أنا صراتلي كيما هكا خطبني واحد ...والديه ناس ملاح...وهو سقسينا عليه مي ماشي بزاف....وبعد وقت طويل بان على حقيقتو ... والحمد لله درك كل واحد راح في طريقو...واستنتجت أنو الوحده كي يخطبها واحد لازم أول حاجه تسقسي عليه هو ماشي على دارهم ...دارهم من بعد....خويا زواج صعيب ...قل أختك تصلي ركعتين تستخير فيهم ربي....إذا كان هاذ الرجل فيه خير ربي يلاقيها بيه ...وإذا كان فيه شر ربي يبعدها عليه ويعوضها خير منو ...إن شاء الله...

 

[Princess nour]

كي راك عارف بلي عندك مسؤولية تجاه ختك و خلاتك انت تقرر لازم تسقسي عليه و مدابيك تلقاه و تعرفه انت ولي فيها خير ربي يجيبها

 

[زهور الأمل]

المهم يكون يصلى وخدام

 

[همس الوُرود]

السلام عليكم ورحمة الله وبركاته

إيه فكرة مليحة أنك بعد ما سقسيت عليه تزيد تحكي معاه

وتاني متنساش صلاة إستخارة هي بزاااف تساعدك ومش غير أنت
يعني من الأفضل تصلوها كلكم بش ربي ييسرلكم الي فيه الخير إن شاء الله

~ وبالتوفيق إن شاء الله نسمعوا بأختك متزوجة وهانية فحياتها


ومبارك مسبقا^^​

 

[Hakan]

شكرا وبارك الله فيكم اجمعين على هذه النصاائح القيمة
ان شااء الله يقدم ربي اللي فيه الخير ويفتح على كل مؤمن ومؤمنة بالخير
ربي يهنيكم ​