كسرة تاع الزيت من مطبخي

[السلطانة]

السلام عليكم ورحمة الله وبركاته

جبتلكم اليوم وصفة الكسرة لي نخدموها في الشرق
بما انو عندنا انواع بزاف تاع الكسرة منها المطلوع ومنها الما وملح ومنها هاذي لي لازم تكون في مائدة العائلات تاع الشرق (قالمة.عنابة.قسنطينة.ام البواقي..سوقهراس ..تبسة..باتنة ...)
ولي تعلمتها في دارنا تحت اشراف والدتي الله يحفظها

لي هي الرخسيس ولا الرخساس ولا الخسيس ولا تاع الزيت كل واحد واش يسميها

:Love::Love::Love:

كيلة تاع دقيق

كمية ملح عينك ميزانك
مغرف صغيرة تاع قهوة من الخميرة
فنجان زيت هنا كل واحد واش يحبها لي يحبها مبسسة بزاف يزيد ولي ميحبهاش ميكثرش الزيت

ندفي الما ونبل الخليط ندخل المكونات جيدا في بعض

نلم العجينة منطريهاش بزاف يعني نص نص

وجات بنتي تحوس تعجن معايا
لاحت يدها

نلف العجينة بالمنديل ونخليها تخمر شويا
على خاطر البرد

مباعد نطيح عليها اعجن اعجن
هذا النوع من الكسرة لازم تعجنيه مليح ولامتجيكش مليحة :p
كان عندك عجانة حطيها فيها خير تتعجن مليح
مباعد كوري وقرصيها وطيبي في نفس الوقت
كاين لي يحبها غليظة وكاين لي يحبها رقيقة gرصيها كيف تحبي

نتمنى تعجبكم الوصفة

يلا بنات اللمة متحشموناش وحطو مواضيع في منتدى الطبخ
راه راقد هاذ الوقت التالي

شباب اللمة قولولي برك
تحبو الكسرة ؟
متنساوش تشرطو الكسرة في مواصفات الزوجة المستقبلية هعهعهع


تحياتي للجميع

​

 

[Hakan]

صراحة انا ما كليتش هذا النوع من الكسرة غير كيما رحت لباتنة وجاتني صعيبة ناكل بيها نهارات لولين خاصة مع الجواز ومرق الخضر
ايا ومن بعد فورماتاوني الشاوية نتاع باتنة خخخ كي نروح للدار نعيا ناكل المطلوع هذاك نتاعنا شكرا ختي
ونتمنى من الاخوات خاصة العازبات ينشطو خخخخ خخخ​

 

[cosette]

mmmmmmmmmm
يشهي يعظيك الصحه اختي ,هههه ياسمين حابۃ تعحن ان شاء اﷲ تخرح كيما يماها هه
بصحتك اختي
ننتظر حديدك , مين يكملو الاختبارات عليك مني غير نحربو ان شاء اﷲ

 

[ريحـان]

السلام عليكم

والله يا ام ياسمين هذا وين شفتك واضعة صورتو في ماذا ستطبخين سيدتي و سألتك على الوصفة نتاعو هو احنا في المنطقة نتاعنا ندير خبز عادي تع الخميرة و لا مطلوع
بصح الكسرة هذي مرة بعتتها لنا جارتنا عنابية و عجبتني بزاف و تمنيت نديرها مي الوقت ماسعدنيش علابيها كي شفتها اهنا قلت غير نسقسي خير و هي الوصفة ساهلة ان شاء الله برك تطلع معايا

طولت ههه تسلم دياتك
وراكي عارفة راني نحرك في يدي شوي و نزيد ان شاء الله ببعض المواضيع الجديدة والله مرات نصور و الشكل النهائي ما يخرج مليح
لازم نجيبو غير الزين ​

 

[Ma$Ter]

صراحة انا ما كليتش هذا النوع من الكسرة غير كيما رحت لباتنة وجاتني صعيبة ناكل بيها نهارات لولين خاصة مع الجواز ومرق الخضر
ايا ومن بعد فورماتاوني الشاوية نتاع باتنة خخخ كي نروح للدار نعيا ناكل المطلوع هذاك نتاعنا شكرا ختي
ونتمنى من الاخوات خاصة العازبات ينشطو خخخخ خخخ​

احسن كسرة في العالم خخخ
يوم بعد يوم نطيبوها

 

[الامين محمد]

ما شاء الله أختي أم ياسمين كل يوم تجوعينا و تتحفينا بنوع من الكسرة الله يهديك ههههههههههه

حنا نسميها الفطير و تؤكل مع القهوة بالحليب في الصباح او بعد العصر

 

[الحلم الوردي]

جاتك مليحة
بصحتكم اختي
ربي يحفظ البنوتة

 

[أشــواق 19]

السلام عليكم..!
حنا نسموها الكسرة لمبسة..نموت عليها سيرتووووو كي تكوووون سخونة..
والله ديفوا نطيبها مع صباح ونفطر بيها..
مام انا نديرها بهذي الطريقة
يعطيك الصحة اختي ام ياسمين تسلمي

 

[باتنية و نص]

سلام عليكم
والله افتجأت كي شفت بلي كاين لي ما يعرفهاش !
احنا الرخساس هذا زعما اللي ماتعرفش تطيب خلاص وخاطيها الكوزينة تعرف ديرو
هي اسهل انواع الكسرة
جربي كوليها مع البن ولا الرايب ..روعة
مي ثاني اللي يعاني من لحريڨ تع ليستوما كيما حالتي..كي يجي ياكلها يحط حذاه چافيكسون ^^
سلمت الايادي
تحياتي

 

[أشــواق 19]

سلام عليكم
والله افتجأت كي شفت بلي كاين لي ما يعرفهاش !
احنا الرخساس هذا زعما اللي ماتعرفش تطيب خلاص وخاطيها الكوزينة تعرف ديرو
هي اسهل انواع الكسرة
جربي كوليها مع البن ولا الرايب ..روعة
مي ثاني اللي يعاني من لحريڨ تع ليستوما كيما حالتي..كي يجي ياكلها يحط حذاه چافيكسون ^^
سلمت الايادي
تحياتي

والله مام انا حرت يا سعدوش
الطفلة كي تبدا تتعلم وتدخل للكوزينة تبدا بيها هههههه
اوووو مع الللبن عشق من نوع اخر

 

[GI Joe]

darethena mama chafetha fi guelma 3andha benna special bin l matlo3 w l kessra ta3na, doonc khtare3nelha issm ana w khoya kessra matlo3iya hh
chouukran

 

[لؤلؤة قسنطينة]

السلام عليكم
يعطيك الصحة ختي أم ياسمين وصراحة نفس طريقتك نديروها في قسنطينة
عندك حق كي لميتي ناس الشرق كامل لأنو نشتاركو في نفس الكسرة
وتجي بنينة صح تقول قاطو سورتو مع الحليب ولا اللبن :Love: رائعة ماشاء الله
وهي الاسهل كيما قالت الأخت الباتنية ربما الصعب لي فيها فقط هو كثرة العجن كيما قلتي
مع أنو معظم بنات اليوم ماولاوش يعجنو ولاو إما بالعجان أو يعجنو شوي ويرميو لهيه هههه
يعطيك الصحة أختي على الموضوع وصراحة قسم الطبخ هو القسم الوحيد لي مانقدرش نشارك فيه
معرف علاه، خاطر مانقدرش نتخيل روحي نطيب ونصور هههه العام لي فات ماجيت نحط موضوع البوراك بالسيف هههه
يعطيك الصحة أختي وربي يحفظلك ياسمين باينة رايحة تخرج مرأة تاع دار وفحلة هههه
تحياتي
​

 

[Skor m@k]

السلام عليكم
او او حتى حنا معروفة عندنا بزاف هذي خاصة القبايل
حنا يما طيبها بزاف تقريبا نفس الطريقة لي درتيها انت ختي

@لؤلؤة قسنطينة اياي ختي مريم كامل قالو مالفين نطيبوها هههههه
واقيل صح انت كي ختي ماتعرفش طيب ههههه
هذي ساهلا مافيها والو هههههه

يعطيك الصحة ختي ام ياسمين ​

 

[لؤلؤة قسنطينة]

السلام عليكم
او او حتى حنا معروفة عندنا بزاف هذي خاصة القبايل
حنا يما طيبها بزاف تقريبا نفس الطريقة لي درتيها انت ختي

@لؤلؤة قسنطينة اياي ختي مريم كامل قالو مالفين نطيبوها هههههه
واقيل صح انت كي ختي ماتعرفش طيب ههههه
هذي ساهلا مافيها والو هههههه

يعطيك الصحة ختي ام ياسمين ​

ههههههههه وأنا واش قلت؟
راني قلت هي الاسهل، وقلت بلي ماكانش حاجة صعبة فيها إلا كثرة العجن فقط
بصح سهلة، واختك كي تزوجت ولات تعرف تطيب ولالا؟ باه نشوف مستقبلي كيفاه ​

 

[Skor m@k]

ههههههههه وأنا واش قلت؟
راني قلت هي الاسهل، وقلت بلي ماكانش حاجة صعبة فيها إلا كثرة العجن فقط
بصح سهلة، واختك كي تزوجت ولات تعرف تطيب ولالا؟ باه نشوف مستقبلي كيفاه ​

حنا علبانا بلي ساهلا مي ماقلتيش بلي عدتي طيبيها هههههههه
ايه تعلمت طيب تقلي البيض والباطاطا المقلية وتشوي الفلفل ههههههه
ساكنا مع عجوزتها وأخت راجلها هوما لي يطيبو معادش يخلوها تدخل للكوزينة هههه
الحل الوحيد اشرطي لازم تكون يماه صغيرة وماتعجزش طيب هههههه​

 

[أم أحمــــد يــسّ]

يعطيك الصحة حنونة تاكلوها بالصحة والهنا..
ربي يبارك في بنتك هذي الشطورة (ماشي انتي هههه)..اواه خسارة ماعنديش لشكون نخطبها
...

 

[لؤلؤة قسنطينة]

حنا علبانا بلي ساهلا مي ماقلتيش بلي عدتي طيبيها هههههههه
ايه تعلمت طيب تقلي البيض والباطاطا المقلية وتشوي الفلفل ههههههه
ساكنا مع عجوزتها وأخت راجلها هوما لي يطيبو معادش يخلوها تدخل للكوزينة هههه
الحل الوحيد اشرطي لازم تكون يماه صغيرة وماتعجزش طيب هههههه​

ههههههههه والله قتلتني ضحك، يسمى كي عادت تشوي الفلفل معناها كاين أمل ههههه
وخلاص من اليوم نشرط نسكن مع العائلة ومن النهار الأول نجي نطيب نكسرلهم الصحون تاع الماكلة
هكا يهربوني من الكوزينة إلى أجل غير معلوم
هيه راني قتلك ساهلة وكيفاه عرفت بلي ساهلة اذا ماجربتهاش وكيفاه عرفت بلي تعب في العجن اذا ماجربتهاش
أظنه جواب مقنع هههههه​

 

[*رحيق الزهور*]

السلام عليكم
يعطيك الصحة حنونة

 

[Skor m@k]

ههههههههه والله قتلتني ضحك، يسمى كي عادت تشوي الفلفل معناها كاين أمل ههههه
وخلاص من اليوم نشرط نسكن مع العائلة ومن النهار الأول نجي نطيب نكسرلهم الصحون تاع الماكلة
هكا يهربوني من الكوزينة إلى أجل غير معلوم
هيه راني قتلك ساهلة وكيفاه عرفت بلي ساهلة اذا ماجربتهاش وكيفاه عرفت بلي تعب في العجن اذا ماجربتهاش
أظنه جواب مقنع هههههه​

ههههههه مقنع منقنع ههههههه
ضرك جي ام ياسمين تجري مورانا ههههههههه
سلام​

 

[سكون الفجر]

تسلميلي أم ياسمين على الوصفة
ريتو صحتين وهنا على قلبك
​