كاميرا كاشي {لمّة خير} الحلقة الثالثة

لؤلؤة قسنطينة

:: عضو بارز ::
أحباب اللمة
إنضم
13 أفريل 2013
المشاركات
14,618
نقاط التفاعل
54,535
النقاط
1,756
العمر
31
محل الإقامة
قسنطينة
الجنس
أنثى
84586

السلام عليكم أهل اللمة الكرام وأسعد الله أوقاتكم
do.php

وملأها بركة وسعادة، وصح رمضانكم وربي يتقبل منا ومنكم الصيام والقيام وصالح الأعمال

كالعادة مستحيل يعدي شهر رمضان المبارك على اللمة الغالية بدون كاميرا كاشي وبدون ضحك وبدون مقالب
do.php

وهاد العام خممنا أنا وشريكتي في الإجرام @عآشقة الجنـة باه نديرو كاميرا كاشي لأعضاء اللمة كيما كل عام ونطيحوهم في الفخ

ونعرضو المقالب هادو في حلقات باه نغيرو الجو ويكون لرمضان داخل اللمة طعم مختلف وجميل ;)
لكن هاد المرة فكرنا أنا وأسماء وقلنا بعيدا عن كاميرا كاشي تاع فلان هدر فيك وفلان قال فيك ووين نخلي العضو هاداك يهز في قلبو

ولا نخلي العضو يغضب من عضو خلاف علاه مانديروش حاجة مختلفة يكون فيها عبرة ورحمة وتعاون :giggle:
بالأخص والمعروف على ناس اللمة أنو مايجمعهمش عالم افتراضي فقط بل تجمعهم محبة وتواصل وترابط رغم أنهم داخل عالم افتراضي
فيفرحوا مع بعض ويبكيو مع بعض ويحسو ببعض، فهل يا ترى صح كامل هاد الكلام؟
نخليو الحلقات القليلة في عددها ولكن الكبيرة في معانيها وقيمها هي تخليكم تحكمو على أهل اللمة وأخلاقهم
إذن تابعوا معنا حتى الأخير، وبالاكم تنحيو التيليكوموند من يدكم وشاهدوا معنا كاميرا كاشي بعنوان

{لمة خير}

84578

ثالث ضحية معنا في الكاميرا كاشي هي العضوة @أشرقت نفسي أو المعروفة سابقا بعضوية صفاءdz
صفصوفة مؤخرا منذ دخول الشهر الفضيل بدينا نحكيو ونتعارفو وهي تقريبا دائما متواجدة في اللمة وفي الوقت لي يناسبني بالضبط
قلت كيفاه نخليها تروح من يدي مالا؟ هيا قلت صفاء أنتِ ضحيتي التالية
do.php

لكن السيناريو تاع هاد المرة شخصي وأنا لي رايحة نلعب فيه دور الضحية فلازم نعرف كيفاه نتصرف ونعيش الجو الدرامي
لكن كيفاه ندخلها في الموضوع يا ترى؟ :unsure: فجأة جاتني فكرة أو طعم صغير قلت نرميه ونشوف نتيجتو

شوفو معايا واش صرا

لؤلؤة قسنطينة
مساء النور صفصوفة واش احوالك حبيبتي؟
واش مدايرة فيها
غلبك رمضان ولا غلبتيه هههه

(بديت المقلب مع صفصوفة بضحكة وبسؤال على الأحوال ولحد الآن مازال مارميتش الطعم
نستنى ساع صفصوفة ترد ونشوفو الخطوة القادمة
وصفصوفة في دقيقة ردت عليا) ;)

صفاء
اهلا حنونة يسقسي عليك الخير
انا لاباس ورمضان غالباتو الحمد لله ههه
واش راكي انت؟؟
(راني بخير يا صفصوفة يا درا نتي بعد هاد المقلب إذا رايحة تكوني بخير
do.php

هيا رديت عليها ورميتلها طعم صغيير)


لؤلؤة قسنطينة
الحمد لله حبيبتي يسقسي عليك الخير
واش دارتلنا الفحلة اليوم للفطور؟
(راكم تشوفو آخر سؤال؟ لي طرحتو عليها؟
هاداك هو لي رايحة نستدرج بيه صفصوفة
do.php
لأنو من البديهي أنها رايحة تعاود تسألني واش طيبنا للفطور

ومن تم نبدا الدراما ونتوغل داخل الملعب:LOL:)

صفاء
هههه
مازل الفحلة متكسلة في فراشها ههه
انا نبدا نطيب مور العصر هههه
وانت واش درتي
(وأخيرا صفصوفة عطاتني الكلمة المفتاحية
افتح يا سمسم :LOL:
وحان دوري لتمهيد السيناريو)

لؤلؤة قسنطينة
هههه ربي يكون في عونك الزينة اصلا مازال الحال لا عندك فطور خفيف يكفيك الوقت
والله يا ختي درنا الشي لي كتب ربي سبحانو (أكدولي على هاد الجملة) :sneaky:
وعلى هادي جيت نتكلم معاك اذا عندك وقت راهي ضايقتلي ولقيتك كاينة قلت نحكي معاك
قلت ربما عندك فكرة ولا تعاونيني يخي مانديرونجيكش؟
(صفصوفة حست بلي راني ماش مليحة صح وفتحتلي بابها وقاتلي راني هنا نسمعلك واش مضايقك
وزيد فرحت كي راسلتها، ربي يحفظك صفصوفة) :giggle:


صفاء
مممممم حنونة علاه والله فرحت كي بعثتيلي مممم والله نحبك بزااف ومن سجلت وانا نتبع في مواضيعك وردودك شخصيتك رااائعة ماشاء الله عليك
(وانتِ أروع بأخلاقك غاليتي صفاء :love:
بعدما صفاء قررت تسمعلي ونفتحلها قلبي تما بدا اللعب الصحيح
وجدو البابي موشوار راهي بدات الدراما)
do.php


لؤلؤة قسنطينة
ربي يحفظك حبيبتي وربي يعزك وربي يعطيك ماتتمناي
الحكاية ومافيها يا ختي
شفتي موضوع تاع اليوم رايحين تفطرو عند فلان وفلانة عرضو عليا مشرفات الطبخ اني نقدم موضوع ونعرضهم
انا في الاول قلتلهم رانا نطيبو حاجة قليلة ونحشم نعرضكم على حاجة قليلة قالولي معليش المهم حاجة منك
بصح انا ماعنديش ختي صفاء غير ربي لي عالم بحالتي من لي دخل رمضان للدرك شربة مادخلتش لدارنا
نفطرو على حليب وفلون واذا كترنا نقليو معاه بطاطا وساعات ماكانش خلاص :cry:
حشمت نقولهم ماعنديش واش نحطلكم، ماحبيتش نفضح روحي
(يدهرلي راني جايبتها قدقد
do.php
وهاد التمهيد رايح يفيدني في الشي لي جاي

وباه نخلي صفاء تتجاوب معايا كتر دخلتلها في الصحيح)


ولي خلاني نحكيلك
خاطر كاينة عضوة قريبة ليا حكيتلها في بالي تفهمني ساع طيحت بيا قاتلي لو ماعندكش صح ماراكيش تكونيكتي
قاتلي بركاي ماتتسولي، وانا اصلا الكونيكسيو يخي قتلك تقيلة خلاص (طُعم آخر:LOL:) خاطر اصلا ماش تاعنا تاع الجيران
ندخل دقيقة غير باه نشوفكم ونشارككم ونضحك معاكم
(هيا كي زدت شفت الإداريين حطو جائزة مالية لأفضل مشرف لمعت في رأسي فكرة)
do.php

واللخرة خلاص كي دارو جائزة مالية للمشرفين لي منشطين الحالة في رمضان
قاتلي على هادي راكي تشاركي في الاقسام الدينية وتلعبي فيها ونتي ناوية تربحي جائزة مالية
وانا اصلا ماعلاباليش بلي كاين جائزة مالية راني نشارك بحسن نية ولمحبتي ليكم
قوليلي هادي هدرة؟ الناس ماتحسش ببعضاها راني نكتب و نبكي قلبي تحرق
وسامحيني طولت عليك
(صفاء مسكينة تأثرت بالسيناريو وأول ردة فعل ليها طاحت دمعتها
سامحينا على دموعك حبيبتي صفاء) :(


صفاء
:cry::cry::cry::cry:
والله بكيتني علابالك ممممممممم
الله يهديهم والله وعلاش لي عندو نت غني؟؟؟؟ شكون هادي الله يهديها وانت متبريلهاش واش دخلها فيك أوووه علاااااش جرحتك متخافش ربي والله قاستني حكايتك يالحبيبة ممممم
ناس صايمة غير على الماكلة رحمة في القلوب راحت والله احتسبي لله هو يجبلك حقك ممممم حرااااام عليها جرحاتك
(ربي يحفظك حبيبتي صفاء وعندك حق الناس ولات صايمة غير على الماكلة مابقاش واحد يحس بواحد
ربي يحفظلك قلبك الطيب :giggle:
أنا أول ماقاتلي صفاء بكيتيني دمعو عينيا هههه وكنت رايحة نبطل لأنو دموعها عزاز عليا

لكن قلت نكمل شوي برك ومن بعد نكشف اللعبة)

لؤلؤة قسنطينة
ربي يحفظك ختي وربي يعزك ويعطيك ما تتمناي
الكلافي تعمر بدموعي خاطر تقست صح (هنا مستحيل ماتأمنيش يعرفوني أكبر بكاية في العالم)
do.php

انا ماقلتلهاش اصلا لا ساعديني ولا عاونيني
كنت رايحة نقولها دبري عليا برك كيفاه ندير فيما يخص الموضوع تاع العرضة
لكن الناس ماترحمش ماتعرفش واش معناها والديك يشربو دواهم على فراغ ومايعرفوش واش معناها
ختك تروح تقرا وتجوز امتحانات وكرشها فارغة، يخي زعما حنا لماويين ويد وحدة وخاوة
كي يتقاس فينا واحد لاخر يتقاس معاه ويحس بيه ماش هكا والله
المهم ربي يهديها في هاد العواشر انا راني مسامحتها، واش تنصحيني حبيبتي كيفاه ندير مع تاع العرضة تاع الطبخ
بصح شرط ماتخبريش المسؤولات تاع الطبخ يعني بيناتنا برك علابالي بيك نتي بنت ناس على هادي شكيتلك
(راني نأكد باه ماتخبرش مسؤولات الطبخ وإلا تتكشف لعبتي ههه)
do.php


صفاء
ربي ياخدلك حقك نشالله
حنونة اذا كان معندكش واش طيبي انسحبي ماتقبليش وادا كنت مش حابة تشاركي ماتشاركيش انا والله تقلقت بزاااف كي جرحتك زعما هادا صايمين
اما اذا حشمتي وقلتي نشارك طيبي حاجة خفيفة وصوريها وبعتيها الفقر ماشي عيب يامريومة انا ثاني كيفك زوالية ساعة كاين ساعة مكانش المهم الانسان غني بأخلاقو ماشي بدراهمو
وراني هنا اذا سحقتي حاجة حنونة
(ربي يحفظك حبيبتي وربي يرزقك ما تتمناي، فعلا الفقر ماش عيب
والانسان غني بأخلاقو ماش بمالو، صفصوفة مسكينة تجاوبت مع السيناريو وبانت بلي إنسانة فحلة
تقيم الناس على أخلاقهم وتحبهم كيما راهم وفي الأخير قاتلي إذا كاشما تحتاجي راني هنا
سلامتك حبيبتي وربي يهنيك هذا مانحتاج منك :giggle:

تأثرت بوقفة صفاء معايا وخبرتها مباشرة بلي كانت مجرد كاميرا كاشي وبلي مجرد مقلب)
do.php


صفاء
فرحتني والله درك تبدلو دموعي الفرحة والله مممممم مزية المهم تكوني بخير هدا واش نحوس والله انت غااالية على قلبي ❤
وكاميرا كاشي ناااااجحة يعطيك الصحة بسكو بكيتني نتاع الصح والله???
الحمد لله كانت كاميرا كاشي بسكو غاضني الحال عليك وقلت ماتستاهلش ???
درك راني فرحاااانة والله ???
مرسي حنونة بكيتني اليوم ههه

في النهاية وضحت فكرة الكاميرا كاشي للأخت صفاء واعتذرت منها وكيما شفتو تقبلت الموضوع بصدر رحب
واستأذنتها في طرح حلقتها طبعا قبل عرضها وهي وافقت، ونعتذر من مشرفات الطبخ جبنا سيرتهم دون علمهم ههه
لب المقلب كان على العضوة الافتراضية لي جرحتني وفكرة قسم الطبخ ماكانت إلا تمهيد فقط :giggle:

84578

في نهاية الحلقة نقول للأخت صفاء نتي نعم الناس وبارك الله فيك على وقفتك وعلى قلبك الطيب
ربي يجازيك الجنة وربي يعطيك ما تتمناي، وكيما شفتو مسكينة فرحت كي كانت مجرد كاميرا كاشي يعني ماعطاهاش قلبها أنها تشوف ختها
في حالة سيئة وغاضتها أنهم جرحوني لدرجة دخلت لأحد مواضيعي وكتبتلي في رد "أنت انسانة رائعة" غير باه تطلعلي المورال :love:
ربي يحفظها رغم أنو جمعتنا رسائل قليلة وماتعرفني مباشرة مانعرفها جمعنا عالم افتراضي فقط

ولكن القلوب لا تزال حقيقية وتنبض بنبض حقيقي ولهذا سميناها "لمة خير"
وهادو هوما أبناء اللمة الأحرار لي يساعدو غيرهم حتى بدون ما يحوسو يعرفو شكون هوما المهم يجري في عروقهم دم جزائري
نتمنى تكون هاد الحلقة عجبتكم

ماتنساوش تخليولنا رايكم في هاد الحلقة ونلتقي في حلقة أخرى ومع عضو آخر ان شاء الله
سلااام
do.php


84581



 
السلام عليكم
هههه والله يا مريومة جبتيها تاع الصح
دراما مؤثرة حقا ..??
نعم صفاء والله ..تبارك الله عليها وعلى وقفتها واخلاقها العالية ?
ربي يجازيها الخير ويباركلها ان شاء الله
شكرا اختي مريم على الحلقة كانت في القمة ??
 
السلام عليكم
و الله اختي لؤلؤة انا و قريب بكيت ههه جبتيها سيريو علخر
تستاهلي تمثلي في كاش كاميرا كاشي ردو بالكم تاع قناة البلاد في بلاصة ديك لمزطولة مولات الشعر الاصفر خخخخخ(ني نتمسخر برك)
و اختي صفاء ما شاء الله عليها قليبها رهيف و حنين ربي يبارك فيها و يعطيها على قد قلبها و اهديها تحية عسكرية على موقفها و ردة فعلها
و اجدد لكي التحية اختي لؤلؤة
ربي يحفضكم
في امان الله
 
السلام عليكم ورحمه الله وبركاته
الضحية الثالثة
بابابا هذا واش تصلحي كاتبة سيناريوهات يا ختي هههههه
هههههههههههه الأخت صفاء ما لڨات ما تدير كون صابت طارت وجات لعندك
أخت طيبة وتحب الخير للناس ،ڨلبها حنين من خلال ردها عليك تبان طيبة بزاف
بصح يعطيك الصحة نتي والاخت
صح فطوركم كامل
إحترامي وتقديري
 
يا عيني على الطيوووبة صفاء وعلى براعة مريومة والله تليقي سيناريست هاختي يعطيكم الصحة خدمة شابة
ونحيي صفصف ونقوللها ربي يحفظك اختي حتى حنا جمعتنا عدة رسائل مي والله باين عليها بنت ناس وعاقلة وحساسة و تحب الخير ❤
ربي يحفظك اختي
 
وعليكم السلام ورحمة الله وبركاته
شو أنا وقريب صدقت ههه ودخلت في الدور وقاعدة نيماجيني صح في الموقف وفي الطفلة المجهولة لي دارت بيك خخخ
واخرتها صفاء ظهرت حنينة وقلبها رهيف
ومن اليوم نسميوها بكاية اللمة خخخ
نضحك برك
طيبة اللمة
يعطيكم الصحة صبايا
 
سلام عليكم
صح فطوووووركم
مريومة ودرتيها بيا هههه
ياجماعة متبداوش تشكرو فيا ههه لوكان جيتو في بلاصتي ديرو اكثر من هاك لوكان شفتوني من كنت نبكي وداخلة في الجو ههههه والله غاضني الحال على مريومة بزاااف حتى شافتني ماما وقريب فاقتلي نبكي غير لعبتها راقدة ههههه المهم درتي كاميرا كاشي ناجحة والله يعطيها الصحة @أم ياسمينdz ضحكتني كي قلتي بكاية اللمة ههههههههه
صح فطوركم وشكرا لكامل الاعضاء لي شاركو في الموضوع
 
وشحال تبكوووو انتم يالبنات وتبكونا معاكم:cry:
قريت الحلقة بموسيقى الحزن ألفتها في راسي:rolleyes:


والعبرة نقولو انو صحيح الفقر والعوز يقطّع القلب ويُشعر بالحزن والأسى والفاقة ولكن أكيد عدل الله ورحمته وحكمته واطلاعه وجبره للخواطر ولطفه في العباد أغنى وأسمى وإنما العوز هو عوز الاخلاق والدين وكل الناس عند الله فقراء الا من أتاه بقلب سليم.فاللهم غنى القلب مع الفقر ولا فقر القلب مع الغنى.وان أغنيتنا بين العباد فلا تفقرنا عندك.

يعطيكم الصحة جميعا الشريرات:alien: الاخيار والضحايا الابرار.(y)
 
السلام عليكم
هههه والله يا مريومة جبتيها تاع الصح
دراما مؤثرة حقا ..??
نعم صفاء والله ..تبارك الله عليها وعلى وقفتها واخلاقها العالية ?
ربي يجازيها الخير ويباركلها ان شاء الله
شكرا اختي مريم على الحلقة كانت في القمة ??

وعليكم السلام ورحمة الله وبركاته
اهلا حبيبتي أماني مساء النور
هههه شفتي نليق نمثل في المسلسلات :cool:
أنا وقريب بكيت كي قريت السيناريو :LOL:
وصفصوفة والله انسانة ماشاء الله قلبها طيب بزاف
وعرضت علي المساعدة وبينت بلي انسانة جوهرة بأخلاقها
ربي يحفظها وربي يعطيها ماتتمنى
شكرا حبيبتي أماني على كرم مرورك

تحياتي
 
السلام عليكم
و الله اختي لؤلؤة انا و قريب بكيت ههه جبتيها سيريو علخر
تستاهلي تمثلي في كاش كاميرا كاشي ردو بالكم تاع قناة البلاد في بلاصة ديك لمزطولة مولات الشعر الاصفر خخخخخ(ني نتمسخر برك)
و اختي صفاء ما شاء الله عليها قليبها رهيف و حنين ربي يبارك فيها و يعطيها على قد قلبها و اهديها تحية عسكرية على موقفها و ردة فعلها
و اجدد لكي التحية اختي لؤلؤة
ربي يحفضكم
في امان الله

وعليكم السلام ورحمة الله وبركاته
اهلا حبيبتي مروة، يخي اسمك مروة هكا؟
هههه سلامة عيونك ديجا أنا وغاضتني روحي وتأثرت :LOL:
من اليوم نبدا نحط العروض باه يديوني نمثل في كاش كاميرا كاشي هههه
وصفصوفة انسانة طيبة وحنينة بزاف وتحمل كنز بداخلها
مسكينة تفاعلت معايا وبكات رغم أنها ماتعرف عليا والو
ربي يحفظها من كل سوء وربي يهنيها
شكرا حبيبتي تحية متبادلة ;) وربي يحفظك كذلك
وشكرا لكرم مرورك

تحياتي
 
السلام عليكم
مسكينة سقطت في الشراك
ههه

وعليكم السلام ورحمة الله وبركاته
اهلا أخي ومساء النور
نعم صفصوفة مسكينة من أول كلمة طاحت في الشباك ههه
لأنو قلبها حنين وطيبة وبنت ناس ربي يحفظها لأهلها
وربي يحميها من كل سوء
شكرا أخي لكرم مرورك
تحياتي

 
السلام عليكم ورحمه الله وبركاته
الضحية الثالثة
بابابا هذا واش تصلحي كاتبة سيناريوهات يا ختي هههههه
هههههههههههه الأخت صفاء ما لڨات ما تدير كون صابت طارت وجات لعندك
أخت طيبة وتحب الخير للناس ،ڨلبها حنين من خلال ردها عليك تبان طيبة بزاف
بصح يعطيك الصحة نتي والاخت
صح فطوركم كامل
إحترامي وتقديري

وعليكم السلام ورحمة الله وبركاته
اهلا بيك أخي حليم ومساء النور
ههههه شكرا شكرا، ترقبوا المسلسلات الجزائرية القادمة كامل من اخراجي هههه
والاخت صفاء ماشاء الله عليها طيبة وحنينة بزااااف
وعجبتني بزاف لما قاتلي الناس تصوم على الماكلة وتحاسب الناس على الماكلة
يعني هي انسانة بسيطة وتحمل كنز داخلها
ربي يحفظها وربي يهنيها
بارك الله فيك خويا حليم وصح فطورك نتا تاني

تحياتي
 
يا عيني على الطيوووبة صفاء وعلى براعة مريومة والله تليقي سيناريست هاختي يعطيكم الصحة خدمة شابة
ونحيي صفصف ونقوللها ربي يحفظك اختي حتى حنا جمعتنا عدة رسائل مي والله باين عليها بنت ناس وعاقلة وحساسة و تحب الخير ❤
ربي يحفظك اختي

وعليكم السلام ورحمة الله وبركاته
اهلا حبيبتي إيمانو ومساء النور
ههههه الله يسلمك حبيبتي كي يجي رمضان الافكار الشريرة تنشط هههه
وصفصوفة حقا انسانة مافي مثلها كيما يقولو السوريين
طيبة وخلوقة وحنينة وسعيدة انو تعرفت على انسانة كيفها
شكرا ايمان حبيبتي على تشجيعك بارك الله فيك

تحياتي
 
وعليكم السلام ورحمة الله وبركاته
شو أنا وقريب صدقت ههه ودخلت في الدور وقاعدة نيماجيني صح في الموقف وفي الطفلة المجهولة لي دارت بيك خخخ
واخرتها صفاء ظهرت حنينة وقلبها رهيف
ومن اليوم نسميوها بكاية اللمة خخخ
نضحك برك
طيبة اللمة
يعطيكم الصحة صبايا

اهلا حبيبتي ام ياسمين
مساء النور
ههههه دخلنا في الدور وعشناه حتى صفصوفة مسكينة
صدقت وبكات وتأثرت بالموقف
وفعلا قلبها حنين وطيب بزاااف
ربي يحفظها من كل سوء وربي يعطيها ماتتمنى
شكرا أختي لتشجيعك بارك الله فيك

تحياتي
 
وشحال تبكوووو انتم يالبنات وتبكونا معاكم:cry:
قريت الحلقة بموسيقى الحزن ألفتها في راسي:rolleyes:


والعبرة نقولو انو صحيح الفقر والعوز يقطّع القلب ويُشعر بالحزن والأسى والفاقة ولكن أكيد عدل الله ورحمته وحكمته واطلاعه وجبره للخواطر ولطفه في العباد أغنى وأسمى وإنما العوز هو عوز الاخلاق والدين وكل الناس عند الله فقراء الا من أتاه بقلب سليم.فاللهم غنى القلب مع الفقر ولا فقر القلب مع الغنى.وان أغنيتنا بين العباد فلا تفقرنا عندك.

يعطيكم الصحة جميعا الشريرات:alien: الاخيار والضحايا الابرار.(y)

اهلا بيك سيدي الكريم ومساء النور
ههههه حتى أنا كي ألفت السيناريو جربت معاه موسيقى الحزن :LOL:
شفت إذا صح السيناريو مؤثر ولالا هههه
واللهم آمين اجمعين شكرا للدعوات الطيبة
وفعلا الفقر يوجع الانسان ولكن قليل وين نلقاو الناس تتأثر ببعضاها
درك الناس قلوبهم قساو وكل شخص ولا يخمم في نفسو برك
لكن ماشاء الله اهل اللمة مازال فيهم الخير الله يبارك
شكرا سيدي لكرم مرورك بارك الله فيك

تحياتي
 
:ROFLMAO:
:ROFLMAO: :ROFLMAO: هذو خدايمك @لؤلؤة قسنطينة الله يعطيك الصحة او راكي تفيلمي تع صح هههههه خصك تبعثي سيناريوا لكش قناة يديروا و خلاص ههههه و الاخت صفاء الله يبارك عليها طيبة و رزينة (y) مي قدرت تلعبهالك هههه الله يحفضكم
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top