مشكلتي هل الفراق هو الحل؟

[مشكلتي]

السلام عليكم
رغم اني لا احبذ مناقشة احدهم لأموره الشخصية في المواقع لكن اليوم سأطرح مشكلة عزيزة على قلبي لتشاركوني الحل وكلي امل بتحكيم العقل ودراسة الموضوع من كل جوانبه..
مشكلة اختي كالآتي متزوجة وام لطفلة، تزوجت من قريب لنا متزوج قبل وكتب له الله ان لا يرى حلم الأبوة مدة11سنة ..خطبها مرتين ورفضت لكن الحاحه والحاح والدتي شفاها الله قررت النظر في الأمر واتى الى البيت واول سؤال بادرها : كون مانضناش انا ثاني تطلقني؟؟
ضحك وقال لها اذا كتب ربي مانضناش مش راح نسالو ...
وعطيناه رغم لوم المجتمع ومشاكل زوجته، المهم بشهادة الكل تغير في كل شيء وللأحسن من كل الجوانب وبعد شهر ونصف حملت وتعبت في حملها وولدت قيصري ...ومشكلتها انها علماتو تتكفل بمصاريفها ديما من لباس وعلاج وواجبات عائلية وغيرو وهو راتبو قليل وحتى مصروف البيت ترضى بواش جاب وتزيد من عندها ومصاريف بنتها ثاني كلش بالحساب...المهم تعبها الكراء اللي كانت ثاني متكفلة بيه وباعت ذهبها باه يكمل بناء البيت ومدة عام وهو يدي كلش ويبني لكن كي تعبت قالتلو نسكن هكاك وفعلا بلا مايرضى هو رحلت لدارها ( نصف دار) وطلبت يكمل النصف الآخر بسرعة لانو كان ساكن في دارو الاخرى وبعيدة عليهم وجات زوجتو الاولى ومن غباء اختي انها كيما تقول دارتها كي بنتها الصغيرة وكبرت عقلها وعطاتها بنتها وولات تقوللهاماما وقالت الله لايحرم واحد من الذرية وخلاتها على ربي وقالت غير اللي تفضل تعيشها مسكينة وكانت حانة عليها ومش علابالها. بكلمة ضرة اصلا الى أن...
المراة تمادات والزوج ثاني وولى يحكي غير بالدراهم وكل شهر هاهو واش لازم بناء والمصروف حيري فيه وحدك هذا واش كاين والمستلزمات انتي وبنتك ماعنديش منين نجيب...رغم انو شهريتو وشهريتها بيدو لكن يمدلها شوي يقلها تصرفي هذي ياسر عليك وحتى بابا مايقلها والو وكي قاتلو ووالديا قراوني وتعبو علاجالي قلها مدي شهر وانسي ثلاثة اشهر ظروفنا صعيبة ..البني..البني....الخ اهلي قالولها ماخصناش طفلة تمدلنا قومي روحك برك بصح هي تحشم كل ماتروحلهم وماتصرفش لانو مايخليلهاش وتكمل ايام غيابو دين ..
المهم ولات تشوف في روحها دراهم برك وكي تقلو لازم نعالجو يقلها كلو بإيد ربي مزال الوقت...والناس ديما يلوموها علاه بنتك كبرت و...و...لازمو طفل يهز اسمو ..
بعد نقاشات ومناوشات دايمة قلها واحد النهار ضرك خلاص كملنا البني هايا نلتاو بالذرية؟؟؟؟ كبرت الطفلة كيما قال فلان وفلتانة من مسيري حياتو و خاصة السلطانة زوجتو والوخز النفسي الدائم ، كانت كل مرة يضربها ولا تفيض تقرر ماترجعش لكن تعفس على قلبها وتراعي ظروفو وتقول بنتي ماتترباش بلا أب..عايلتو كاملة تشهد بوقفتها معاهم ووقفتها معاه وتأثيثها للدار ومكانش مقارنة بين بيتها وكيفاه كان عايش قبل وخلي وخلي..المشكل في برودو وعدم اهتمامو بمشاكلهم وتدخل الكل في حياتهم حتى لبسها وأثاث بيتها واكلها يدخلو فيه وعلاه تشري ذيك وذيك وكون وكون واحنا ناكلو هاك و.....
مشكلتها انها ولات في حالة نفسية صعيبة وغير تبكي عيات ترقي ووالو ولات مفرطة في خدمتها باه ترضيه وتقوم بكل واجباتها وماتبانش مقصرة ، ساعات تمرض نلومها لانها ضاغطة على روحها ومحملتها فوق طاقتها وكي نشوف صحتها اللي ادهورت وذابت نسكت ونقول ماكان لاه نكمل عليها عارفتها تكذب علينا كي تضحك بصح الكل ساكت رغم صغرها كانت كي أمنا وحاملة همنا والله ماتستاهل واش صاريلها
واش رايكم تخرج وتربح عقليتها وصحتها وتربي بنتها وحدها ولا تموت بالهم وترضى ..
نتمنى تتفهمو وضعها وانو كاين اشياء خاصة ماحبيتش نزيد نحكيها
احترامي للجميع

 

[همس الوُرود]

آلسـلآمـ عليگمـ

لي عود‏‏هہ آختي

 

[همس الوُرود]

السلام عليكم أخيتي
المشكل تع أختك وي واعر لكن كاين امور مفهمتهاش مثلا كيفاش دخلت الزوجة الاولى فالموضوع ياك راهي مطلقة ؟!
او اختك هي الثانية ؟!
لكن وش نقولك انا تبانلي انو الطلاق مش هو الحل حبيبتي لازم فقط تحاول تفهم زوجها كيفاش راهو يفكر لانو قلتي شهريتو مش كبيرة اصلا ومع البنيان اكيد رايحة تتأزم الامور

بصح تاني علاش يضربها لازم تفكرو من كل الزوايا وش كاين وش مكانش كيفاش يفكر وكذا ممكن ميحبش امور لازمها تتفاداهم حاولو تفكرو مليح قبل كلشي

وويلا ماقدرتش أختك تصلي صلاة إستخارة شحال من مرة وربي ييسرلها الي فيه الخير اما ماتقررش من راسها ديراكت ومش فحالة غضب لازم تهدي نفسها ومتنساش الدعاء وصلاة الاستخارة
الدعاء يا اختي يغير القدر وما خاب من استخار الله عز وجل

وطمنينا حبيبتي اذا كاش جديد فالموضوع إن شاء الله مايكون غير الخير​

 

[Hakan]

مادام ما جابتش طفل ذكر رايح يصرالها هكاك شئنا ام كرهنا
الرجل لازملو ذكر في البيت لانو طفلة ما تكفيش وهذا شيء اكيد حكم ربي سبحانو ولكن درجات
ضركي بيناتنا الراجل هذا ضمن بين وبالاثاث تاعو يعني يقدر حتى يتزوج مرة اخرى قادر يطلقهم في زوج بالاولى وبالثانية
اما الحل اللي نشوفوا انو تصبر وتحتسب الاجر عند ربي سبحانو حتى يفرج عليها لانو صراحة نظرتكم انتوما من بعيد
ماهيش نفس النظرة تاع الام للابنة تاعها وفي الحياة هذي لازم تكون بااردة بااردة بزااف باش تفوت ازمات مثل هذي
لانو بعض الرجال صراحة لازم المراة توقفلو كيما الجبل باش يتربى وكاين شيء ذكور يشوف في المراة بيت مال او بيت جنس
مهوش يشوف فيها كاع كائن عندو حقوق عند ربي سبحانو ومقدس في الدين ربي يغفرلو ويهنيها ان شااء الله ..
وهذا الفيديو نصيحة ليك ولجميع المشاهدين :

https://www.facebook.com/video.php?v=1849819731740953

 

[أبو عاتكة]

السلام عليكم وربي يهدي الاحوال ان شاء الله.
لا يخلو زواج عادي من مشاكل وصدامات تتكرر وتتجدد فمابالك لما تدخل المادة(المال)+(زوجة عاملة)+ زوجة ثانية+ القبول بهذا الوضع المضطرب من الأول. في الواقع من البديهي والمتوقع حصول مناوشات وخلافات من أول انتقاد او معارضة .لكن هل تدفع للطلاق؟ اغلب البيوت تعاني من مشاكل لا عدّ لها لكنها تكمل الحياة بالرضا بأقل الأضرار وكل انسان راهو حاسبها في دماغو واش اللي يخليه يكمل حياتو الزوجية أو يتوقف. نشوفو مآسي أكثر من هذه الوضعية لكن أصحابها مكملين وصابرين وراضيين بالقليل رغم الهم واليأس والمرض كيما قالو واش حاتمك على المرار قال اللي أمرّ منو...
لايوجد زواج مثالي كما لا يوجد زوج أو زوجة مثالية كاملين الأوصاف لكن زوج عصبي أفضل من زوج عصبي+يتعاطى المحرمات. زوج بخيل أفضل من زوج بخيل ويخون زوجته.زوج نكدي وعامل افضل من زوج نكدي وبطال وجالس في الدار.
كل شيء الان متعلق للأسف بالمادة اللي حاب يتزوج يختار العاملة اللي حاب يشري سيارة يتزوج بعاملة اللي حاب يبني دار يتزوج بعاملة اللي حاب يرتاح من العمل او البطالة يجيبها عاملة ولما تكون المادة هي الطموح الأول وليس الاخير فمن البديهي اي تغيير في هذا الشرط تتخلط الامور وينهار الزواج.
لا أقصد بالكلام على المال هذا الزوج بالتحديد فلا اعرف كل التفاصيل والوضع وأكيد أول شرارة هو هذا البناء للمنزل وربي يعلم. لأنو الناس تتسامح وتتهاون في كل شيء الا المادة وشقاء السنين.واغلب المشاكل سببها شهرية او منحة او ورث او ....
انا أتكلم على ضرورة عدم اشراك المادة خاصة مال الزوجة في أسس بناء العلاقة الزوجية حتى يرتاحو في الاثنين هكذا من الأول اذا اعطت الزوجة من مالها فبرضاها ولا تقعد تحاسب راجلها عليه كل مرة او تعايره واذا اعطى الرجل المال فبرضاه لا يبقى يمن على زوجته وكأنه يتصدق عليها نعم الانسان يحتاج الدعم والحياة صعبة لابأس بالتعاون والزوج لا يسمح لزوجته بالعمل طوال اليوم لاجل تنح ضيقة خاطرها أو للترفيه أكيد هناك مقابل وهو تحمل وتقاسم أعباء المصاريف. وكاين اللي مرغم رغما انفه بسبب صعوبة المعيشة فمتزيدش المرأة بتعاليها او تحاول لعب دور المتسلط والمتحكم في كل شيء.

بناء منزل ليس بالشيء البسيط والمريح فهو يحتاج لأموال كثيرة شطر من المال يروح لمواد البناء وشطر للماصو وشطر للدولة والماصو شغل ابنك يروثك قبل متموت وأي شخص راه يبني حاليا راه جايف ويقطع في شعرو ويكثر تقلاقو وعصبيتو ويتنرفز هذه الامور احيانا لا تقدرها النساء ويضنون ان المال فقط هو اللي يبني المنزل لكن يجب تقدير جهد هذا الانسان.
الوضع يرهق الجميع ويستنزف المال والتفكير والصحة. فصبرا جميلا ويحاولو يهدو الامور بيناتهم وهذا يساعف هذا والرجل يبقى رجل لا تنقص من قيمته والمرأة تبقى مرأة ومربوطة بالرجل لا يهمشها او يحقرها.
واش راح نقول يعني تحسبي لما ينفصلو راح ترتاح اختك؟ العكس راح يزيدها الطلاق هم على هم مع هم يحملوه والديها وهم بنتها وهم مستقبلها وهم طليقها وهم منزلها تسكن وحدها او كيفاش راح تولي رجل ومرأة في نفس الوقت وهذا أكثر من الحالي ...الخ
خلق الله الصبر والاحتساب وجعل لهم ابواب تدخل الجنة والطلاق ليس له باب ولا ثواب.

وماذا تضنون الحياة الزوجية تهرب البنات من الكوزينة توليلهم ثلاث كوزينات كوزينتها ونتاع عجوزها ونتاع دار والديها. تتزوج لترتاح من عدة أمور فتزيد الى قائمة همومها هموم جديدة كليا. أحيانا المرأة تزيد من كثرة حرصها وحيرتها وشكها في الأمور من توتر الاوضاع وتوتر زوجها فتضر نفسيتها وتضر صحتها.ودائما وخاصة اذا كان الخوف هاجس تعيشه يوميا. لماذا الخوف وتطلاع الحسابات الانسان يحتاط ولا يكون مغفلا ولكن لا يضغط على نفسه الى حد المرض. اذا انهار الانسان لا أحد يحمله او ينفعه سوى المولى عزوجل لامال لا راجل لا اولاد لا والدين يبقاو يجرو بيها من مدينة لمظينة بلافائدة فماهو الشيء اللي اغلى من صحتي وصحة بدني وعقلي.

وهاذي هي الدنيا لا أحد مرتاح فيها الانسان الذي لا يقنع بالنعم القليلة يبقى طول عمره تعبان وحيران ومهموم أما من يتأقلم مع متغيرات وتقلبات الحياة فراح يعيش مطمئن حامد شاكر لله. ربي يكمل بيناتهم بالستر والسكينة وراحة البال.

 

[أم أحمــــد يــسّ]

السلام عليكم..
همّ العاملة همّ مايتلم وكأن السكين تنتظرها دوما إما لتذبحها او لتُمسَح فيها..
الوضع متعب حقًا ولا اتكلم عن المادة بقدر الهم النفسي والضغط عليها..
مشكلة اغلب بيوتنا في الحوار والتفاهم من الاول او وضع النقاط على الحروف في وقتها لتعتبر مرجع دائم فحتى لو تغيرت الظروف الحكم العام واضح..
لا يمكن لأحد ان يقول الفراق هو الحل كما لا يمكن الجزم بالعكس لأنه الاكيد يوجد خبايا بين السطور ولكل خصوصيته وحريته في قول اشياء والحفاظ على اخرى..فقط نقول( لا توجد بيوت بدون مشاكل ، ولا احد فينا كامل ، فلتبحث عن نقائص كمّلها زوجها في حياتها ولترجح كفّة ميزان الحب والاحترام والعشرة ووقفات الشدة ولتمضي قدما لخلق اجواء أحسن وأسعد ولتترك كل شيء لله فما كتبه لهما اكيد اجمل )
أسعدها المولى دومًا