النسيان و الفضايح

الامين محمد

:: مراقب عام ::
طاقم المراقبين
إنضم
7 أفريل 2015
المشاركات
10,757
النقاط
2,061
محل الإقامة
الجزائر الحبيبة
السلام عليكم خاوتي و خياتي و احبابي و حبيباتي في اللمة العزيزة
كي نقول حبيباتي بمعنى خواتاتي هكا باش ما يروحش عقلكم هاك و لا هاك و هيك هههههههههههههه
ــــــــــــــــــــــــــــــــــ
خاوتي اليوم نفتح معاكم سوجي جديد و غريب و فيه احراج

النسيان

النسيان و ما ادراك ما النسيان
احيانا تطيح في موقف يطيح عليك النسيان و تفقد الذاكرة تماما في وقت غير مناسب
و تحس روحك قرد بلا عقل و لا ذاكرة
و تحس البالين حبسو في مخك مرة وحدة
و كلش تسكر
104157
و تتحط في مواقف محرجة للغاية

راح نحكي ليكم قصة وقعت معنا انا صخشيا ( شخصيا ههههههه )
واحد النهار كنت نمشي مع الطريق
شفت واحد جاي من بعيد
بديت نتفكر وين راني شايفه
تفكرت انه كان يقرا معايا و تفكرت كيف كانت شخصيتو
و مستواه و ثقافته و ميولاته حتى لباسه تفكرته
اممممممم لحد الساعة كلش تمام
مازال الفضايح ق اصبروا برك

و هو جاي باتجاهي مباشرة
و قال سبحااان الله راني جاي عندك ضيف

سلمت عليه و رحبت بيه
و سألته وين رايح و واش فكرك بيا اليوم

قال والله جيت في بالي قلت اليوم نفطر عند الامين

يا سيدي اهلا و سهلا و مرحبا

هنا طحت في الاحراج
السيد نسيت اسمه تماما ههههههههههههه

104158

و الله ق نسيت إسمه و عييت نعصر في مخي باش نجبد جده لكن والله ق راح تماما

المهم دخلنا للدار و عملنا قهوة و بدات المدام توجد في الفطور

و انا نعصر في مخي و نتحاشى نطيح في قضية راني ناسي اسمه
و الكارثة و الله سقسيته على كل الاصدقاء و حتى البنات اللي قراو معانا
و تفكرت كل اسماءهم إلا هو و الله اسمه راااح تماما

شافتني المدام كأني مرتبك سقساتني
قلت ليها والله ق فضيحة السيد جاي ضيف عندي مشتاق ليا
و الله ق نسيت اسمه واش نعمل مثلا بعد كل هذا الضحك و المزاح و الاسئلة
نقوله كي سموك و الله ق كبيييرة و عيب يااا الفضيحة

قالت المدام سااهلة يا الامين
ياك ميمون كان يقرا معاك تقصد جارنا قلت ليها إييه كان يقرا معانا
الحل ساهل روح عرضه يفطر معاكم و يذكرك باسمه
هههههههههه والله ق صح جبتيها ياا ................

فعلا رسلت له واحد يعرضه و ميمون هذا مضمون يعني لا خدمة لا صدمة كي يبعد يروح للصطاد
الحمد لله ماهوش عنده سيارة او خدمة لو كان تطفرت فيا هههههههه

المهم جا ميمون فتحت عليه قال واش الامين شفتني في منامك
قلت ليه جابك زهرك و المخي اللي راه مبلوكي ههههههههههههه ما فهم
قلت ليه راني محضرلك مفاجأة هكا لأني ما قدرتش نقوله راه عندي واحد نسيت اسمه و يفضحني

الحمد لله ق دخل قال اهلا سيد علي اهلا سيد علي
آآآه سيد علي و انا مصباح ندور في تركيا و انت ق سيد علي خخخخخخخخخخخخخخ

خرجت بالورطة بزوج ضياف و عرضت واحد ثقيل على قلبي رغما عن انفي خخخخخخخخخخخخخخخخ


و انتم كيف انتم مع النسيان
 

sami44

:: مشرف ::
مجتمع اللمة العام
منتدى بيتي وموهبتي
منتدى الألغاز والنكت
طاقم المشرفين
إنضم
10 ديسمبر 2009
المشاركات
10,666
النقاط
751
محل الإقامة
فالفيراج
الجنس
ذكر
خويا الامين
ميضوع باهي وشبيب
خوليلي بلاصتي غدوة نحكيلك حكاية النسيان
ماشي غير انت الي تنسى
تقديري لك
 

quěěŋ ŏŏŏŏf gříěf

:: مشرفة ::
منتدى قضايا الأسرة والمجتمع العام
منتدى المطبخ الجزائري
طاقم المشرفات
إنضم
27 جويلية 2018
المشاركات
2,793
النقاط
1,311
محل الإقامة
من قلب الاحزان
الجنس
أنثى
السلام عليكم ....
والله الموقف لاتحسد عليه اخى ههههههههههههههه طحت طيحة مناكرية صعيبة شويا هههههههههه المهم. والله صراحة عندى واحد الميموار منحكيلكمش مننساش حتى مخلوق حتى الاحاديث اللى تدور بيناتنا مننساهمش يالوكن يفوت عليهم سنين وسنين ميموار وعليها الكلام 😀😀😀😀 بصح نتناساا 😯😯😯😯 المشكل كى يعطونى حاجة ونخبيها عظم الله اجركم فيها الكل يحوس وياربي لالقاها وباه نتفكر وين حطيتها ماتصراش هادى 😂😂😂😂😂😂 حتى مرة دخل الوالد وعطالى المفاتيح تاع السيارة وقالى خبيهم عندك باه ميديهاش خوياا اياا كى جيت عارفة انوو يلقاهم وين نحطهم 😯😯😯😯 خبيتهم في مكان غير ربي دارى بيه 😮😮😮😮 وموراها جاء الوالد باه يخرج وطلب منى مفاتحوو وانا شغل اتمحات الفكرة اكل من راسي 😴😴😴😴 وين راهم الله يعلم ☺☺ وعلابالى بالى اعطاهم لى وخبيتهم بصح وين الله يعلم 😂😂😂😂 واعلنا حالة انتشار واسعة النطاق 😯😯😯😯غير ربي وجاو الجيران يحوسوو معانااا 😇😇😇😇 وبعد تقريباا ساعتين من اعلان حالة التحواس كرهناا ونعلناا بليس اياا منسحقوهومش ودا دوبل تاعهم وراح الوالد قضي صلاحوو وجاء والمفاتح مكانش 😑😑😑😑 حسيت بروحى عالة على المجتمع ههههههههههههه تبااا تبااا
شكراا على المشاركة
بوركت
 

sami44

:: مشرف ::
مجتمع اللمة العام
منتدى بيتي وموهبتي
منتدى الألغاز والنكت
طاقم المشرفين
إنضم
10 ديسمبر 2009
المشاركات
10,666
النقاط
751
محل الإقامة
فالفيراج
الجنس
ذكر
انا عكسك اخي محمد عندي ذاكرة قوية نتذكر حتى اول يوم في الابتدائي وواش قالتلنا المعلمه اما لصحاب ما نحكيلكش نتفكرهك بتاريخ الميلاد ولون الطابلية والتسريحة وحتى الكارتابل
عندي مشكلة وحده صغيرة والي هي
ننسى ادوات العمل مثلا نبكر ونبدل ونشرب قهوة ونخرج زارب للخدمة نهار نوصل نتفكر بلي نسيت حاجة مهمة للعمل في ذاك اليوك مثلا كيتورولا لاميل ولا شينيول المهم حاجه بلا بيها الطيارة ما تطيرش
وهذ الامر وقعلي كثيرا. اليوم برك نسيت لاميل باش نقطع الفايونص ما لقيتش عندي وحدة جديدة في الدار واصبحت نحلل في الغاشي يسلفولي وحدة باش نخدم
البارح نسيت المفاتح تاع السكنة الي نخدم فيها ايبان دبرت سلوم دخلت من فوق كيما السارق والنهار الي كهت روحي تاع الصح جبت حوايج الخدمة للدار ينغسلو ونسيتهم كي لحقت للخدمة تفكرت ما لقيت واش ندير خدمت في حوايجي
وزيد عمر راسك نهار نخدم في الكومبينيزون ما نتوسخش وكي نخدم في حوايجي نولي كي الميكانيسيان والمشكل انو الخدمة كانت بعيدة والروتور في البيس وراك عارف مكاش الي يحب يقرب ليك وزيد الرودسوفير يولي يخزر فيك بنص عين وتحس كامل البيس راهم يستغلوييك
و نسيت باش نقولك غادرت اللمة 4 سنوات ولما رجعت دخلت بالمودباص القديم وعمري ما كتبتو في ورقة وزيد الريبيراتوار تاع الهاتف قريب حافضها
المهم راني حكيتلك كامل حياتي من بعد نولي
تقديري لك
 

السلطانة

:: أمينة اللمة الجزائرية ::
طاقم الإدارة
إنضم
19 سبتمبر 2009
المشاركات
45,823
النقاط
821
محل الإقامة
الشرق-الوسط
الجنس
أنثى
وعليكم السلام ورحمة الله وبركاته
هههه السيد علي واش دار فيك مزية جا ميمون سلكك خخخ كون راك تبهدلت وتهزأت
انا مننساش الاشخاص والاحداث تاع بكري
ننسى الحاضر خخخخ
الاشياء البسيطة لي في الدار
وديما نكتب واش حندير وواش حنشري ولا تصرا الكارثة
كاين الزوج لي ينسى بزاف
يقولي كي، يتعمر الراس بالمشاكل والاحداث يولي الانسان ينسى
وانتي هانية في الدار ههههه الله يبارك وانا نشقى ونخدم وديما بالي مشغول كيفاه مننساش

ربي يثبتلنا العقل
تقبل مروري
 
Top