السلام عليكم
ربي يبارك ويزيدكم من فضله
كما سبق وعلقت على احدى الاخوات لو حطيتو المكونات والطريقة
اهلا وسهلا بيك
هههه احم احم جات جات ربي يستر
في الحقيقة غير صورت وحطيت وصفة الطبق الجانبي في موضوع وحدو
مطلوع تعك الله يبارك حسيته طايب فالكوشة تع الطين تع زمان ،كولار تعه تقول طابب فالحطب مي مادامك صورتي زوج مطلوعات كنتي تقسمي وحدة فيهم نشوفها من داخل
الله يبارك فيك حبيبتي هههه صح نسيت باه نقسمو لانهم هجموا عليه 
يعطيك الصحة مادام خممتي في جماعة الكولون مي ماقلتيلنا لا واش فيه هد البيون لا كفاه درتيه ووش لا خلاك تقولي انه ينفع الكولون ؟؟؟
من عيوني انا في رمضان متناسبنيش الشربة فريك توجعني بزاف فنضطر نطيب بويون - بزيت الزيتون ونحط عليه كورجات وزرودية بطاطا بصل ملح نقليه مليح ومباعد نزيد عليه الما سخون ونرحيه وفي الاخير عصرة ليمون
مليح البوراك راكي جايباته حبة وحدة
السلطة منحكيش عليها فالتقديم كرفستيها قاع ما فرقش بين وش موجود فيها عمرتي الطبسي شارجيتيه بزاف
هههههه واش نحكيلك واش نخلي كي كنت نصور وعجوزتي تساربي معايا وانا خايفة يبداو ياكلو ومنصورش
الطبق الجانبي كذلك فكرة مليحة انك تعملي اشكال مي راهم بزاف كبار كان عندك طرق كثيرة لتقديم احسن
كون جا عندي الوقت هههه ايييه واش نحكيلك واش نقولك نهار نعودي في داري وحدي نتهلى اكثر هههه
شهيتيني فالعصير ياجدك هه
ياه نعاود نخدملك اليوم درت تاع التشينا والقارص ماشي خسارة فيك
الله يعطيك الصحة ختنا ام ياسمين
بالتوفيق في المسابقة وصح فطورك
