قالوا ناس بكري

[razan roza]

نآس بكري قآلوا...
شربنا من البير منين كان الماء
فيه زين لكن منين تخلطوا فيه اليدين
خليناه لغسيل الرجلين ​

 

[حفياد آدم]

نزدلك هادي ونروح للفيسبوك اختي روزا
قالو ناس بكري :
زين المراة في عقلها وبيه يكثرو الخطابة ،
والرجال تتقدر بأفعالها.. والثعابين تحمل سمها في نيابها
اللي عينو في الهنى يتزوج مراة فاهمة ،
والراجل بلا مراة كي الشجرة بلا ثمارها

​

 

[razan roza]

نزيدك هادي تاني وروح خويا

نآس بكري قآلو..
عيب الارض قلة المطر و عيب
الراجل في سكاتو والي يحمل كلمة
الذل موتو خير من حياتو ~​

 

[سعد606]

قالو ناس زمان
لا تسرج حتى تلجم وعقد عقدة صحيحة, ولا تكلم حتى تخمم لا تعود عليك فضيحة.

مشاهدة المرفق 148462​

بوركت اخي الفاضل في كلامك
أسعدك المولى وجعل ما تقدمه في ميزان حسناتك.
أزكى التحياتي وأجملها وأنداها وأطيبها.. أرسلها لك بكل ود وإخلاص​

 

[حفياد آدم]

بوركت اخي الفاضل في كلامك
أسعدك المولى وجعل ما تقدمه في ميزان حسناتك.
أزكى التحياتي وأجملها وأنداها وأطيبها.. أرسلها لك بكل ود وإخلاص​

جزاك الله خيرا سرني ردك

 

[حفياد آدم]

قالو ناس زمان
كي يقوى الكذب يسماط الحبيب
والقدر كي يطيح عشرة سنين تروح في الريح
وكي تروح النية ما تستناش النصيب وقد ما تصفي عمرك لا تحط الخاين مع المليح
​

 

[حفياد آدم]

ناس زمان قالو :

قلل ناسك يرتاح راسك

​

 

[بدر شاكر]

ما اروعها سلمت لانامل

 

[حفياد آدم]

ناس زمان قالو
استر سرك يا غافل لا تحكيه ياسر من لحباب راهم غيارة وابني ساسك وعليه ثبت في البنيان ومتن بحجارة غطي عيبك ولا تتفاخر بيه وبيع لي باعك وفي الواد ارميه الرخيس لاتشريه كسيبتو خسارة الكية في القلب تخلي المارة وسايس على قلبك لاتقسيه محاين الدنيا ياسر غرارة
​

 

[حفياد آدم]

ناس زمان قالو:
كي تعاشر عاشر الذيب من بعيد تسمع عواه...
ولا تعاشر بنادم قريب كي الجمل يغدر مولاه...
نوصيك يا ماكل الراس في البير ارمي عضامه...
ونوصيك يا قاعد مع الناس فمك ديرله لجامه..
و ما تخالط وماتقول انا غالط...
وماتعاشر النحل وما تشكي من لسعاتو...
​

 

[حفياد آدم]

ناس زمان قالو...
الخداع يبقى خداع يعيا و يريب ساسو
والبصل يبقى بصل طول حياتو يتغرس على راسو
ناس لسانها عسل
وناس لسانها سمّ
ناس في جرّتها الخير
وناس في جرتها الهمّ
صفي يا ما الڨمح ودريه وخلي الريح يدي غبارو
والڨلب ادا كان مجروح الوجه يعطيك خبارو
​

 

[حفياد آدم]

قالو ناس زمان:
الي ماشاورك ما دبر عليه
والي عايرك ما ترد عليه
والي ما جاوبك غير روح وخليه
​

 

[حفياد آدم]

ناس زمان يقولوا :
كي نهدروا على الذيب تبان كَعَالْتُو .
الكْعَالَة أو الزْعْكة هي الذيل او ذنب الحيوان .
​

 

[حفياد آدم]

ناس زمان قالو
واش يسوى الليل بلا قمر
واش تسوى العين بلا بصر
واش تسوى الدنيا بلا صبر
السماء اذا طاح واش يبنيه
والبحر اذا نشف واش يسقيه
والسلطان اذا فقر واش يغنيه
والحبيب اذا غضب واش يرضيه
​

 

[حفياد آدم]

ناس زمان قالو
ثلاثة ما فيهم الثقة
المرأة لي تاكل وتنكر
والصحة كي تغدر
والدنيا كي تبات عندك تصبح عند واحد أخر

​

 

[حفياد آدم]

قالو ناس زمان
لي دار فينا مزية خيرنا سبق
ولي عطانا تمرة حنا غرسنالو نخلة
واذا بيك الملح كمد بيه ركايبك يا وليدي


​

 

[حفياد آدم]

ناس بكري قالو
إذاملست ملس من طينك لاماجاش قدرة يجي كسكاس أخطيك من الدنيا وتبع دينك وما تتعداش على زرع ناس
إلي نساك متقولوش وينك وماتحوسش على لناس
كول خبزتك بعرق جبينك برضاية والديك تعيش لباس
​

 

[حفياد آدم]

ناس بكري قالو ...
لي يشم الريحة مايعرف البنة
ولي يحكم ع المظهر مايعرف الناس
القناعة الدايمة كنز لا يفنى
والذهب الحر ما يرجع نحاس
النار نار ما ترجع جنة
واللي يسمع لهدرة الناس ما يعيش لاباس
​

 

[حفياد آدم]

كيف ما قالو ناس بكري ما غاضتنيش من الكامل المكمل باش تغيضني من الهامل المقمل

​

 

[حفياد آدم]

ناس بكري قالو
ان شاء الله قدّ الصحّة قدّ النظر حتّى لباب القبر
لا يعجبك كبر العنقود ولا تغرّك كثرة ثمارو قدّاش من حلو شفناه بعد العشرة خرّج مرارو ...
الزّيتونة وقت الحاجة تعطيك وبنت الأصل وقت الشدّة ما تخلّيك
وكي تعمّل على اللّه كل خير يجيك

​