قالوا ناس بكري

[حفياد آدم]

قالو ناس بكري ...
ضرف الهندي مايجيبش تفاحة
والنخلة ماتجيب غير التمر
وحديثك مع السفيه قباحة
وعراكك معاه تطياح قدر
كاين لي على رزقو خماس يحرث في ارض غير ارضو
ولي بنى بنيان بلا ساس صلى النوافل ونسى فرضو
ولي يقطع في عروض الناس لابد يجي نهار لي يتوسخ فيه عرضو.....

 

[حفياد آدم]

قالو ناس بكري ...
لا ينفع في البالي ترقيع ولا في صاحب السوء عزاره

 

[حفياد آدم]

قالو ناس بكري
الشتا ء هم وغم ،،
والربيع ما تشكر ما تذم،،
والصيف أجري ولم ،،
والخريف محلاه وكان يتم ،،
قال الربيع أنا بزهوري ..
والصيف انا ببقولي ..
والخريف أنا بدڨولي (دڨلة) ..
وقال الشتاء لمو وهاتولي
الشتا شدة والربيع منام
والصيف ضيف والخريف هو العام

 

[Oktavio_hinda]

ما في الشتاء ريح دافي
ما في نساء وعد وافي

​

 

[سعد نايلي]

فعلا ناس بكري لم يتركوا اي شيء لنا اي شيء بدون معني
لكن المشكلة اليوم في هذا الجيل الذي اصبح يتكبر على هذه الاقوال
بحكم المستوى التعليمي وليس الثقافي
تقبل الله منا ومنكم صالح الاعمال​

 

[حفياد آدم]

ناس بكري قالو
الرخيس رخيس يالوكان بالعسل عاجنينو
والحر يبقى حر يا لوكان بالمر خابزينو
الي باعك بيعو لا تسال عليه
والي شراك اشريه بالغالي لا تفرط فيه
في الدنيا هاذي افرز وقلل باه تعيش مدلل
لمحبة عندها ناسها ،وناسها كبار
الي قلك نحبك وخان ،ما يكون غير رخيس وغدار
الي قلبو نظيف وعينو مليانة
ما تشوف منو لا غدرة ولا خيانة
عايشين وراضيين وربي الي عالم بينا
اذا ضاقت بينا ندعو العالي يحن علينا
الي عطاني يديه وقت المحنة
نقولو تزيان ليام ونعطيك عينيا
يا خوتي العشرة ماشي كلام
العشرة توريهالك ليام
ناس كبرو وناس تكبرو وناس علينا تجبرو
ناس كيما الشجرة وناس كيما الحجرة
وناس ما تشوف منهم غير الغدرة
بكلامهم يجرحوك و بأفعالهم يقتلوك
وكي تجبد عليهم تسمى نكار العشرة

 

[حفياد آدم]

يقولوا ناس زمان : ​

يجي جيل مجلجل قطاع الكسرة بالمنجل ياكل بالأرطال ويشرب بالأسطال​

ويسهر الليل وما طال​

يرقد النهار ويقول مازال الحال​

ماكلتو نجارة​

ولبستو خسارة​

وهدرتو دسارة​

مائهم (الماء) في الحيوط​

وهدرتهم بالخيوط​

الراجل يقلع العمامة​

والمرأة تقلع الكمامة​

و روحي يا دنيا بالسلامة​

 

[حفياد آدم]

ناس بكري ڨالوا
ماشي كل اللي ساكن قصر تهنى
و ماشي كل اللي كتم غيضوا صبار
وماشي كل اللي رفع صوتوا غنى
و ماشي كل اللي ركب ڨد المشوار
و ماشي كل اللي كسب عود دنى
و ماشي كل اللي بحر يسمى بحار
و ماشي كل اللي ركع نال الجنة
وماشي كل اللي عصى يدخل للنار
هذي الدنيا غدارة ما بقات فيها بنة.. تتقلب في كل يوم تعطيك أخبار
في الدنيا هذي واحد ما تهنى.. خداعة بعد العسل تسقيك مرار

 

[حفياد آدم]

ناس زمان قالو:
المنافق ما تقدر تسلك من سمو
يالو كان تسقيه العسل في فمو
موحال تنجى من بلاه و همو
مهما دير فيه الخير ما تصيبو
طبع الرخيس جاري في دمو
لي يخطوه الوالدين مايبقالو قلب حنين
صحتك هي راس مالك اذا راحت ماعندو مايبقالك
كاين المرا لي تعليك
وفي وقت ضعفك تقويك
وفي همك تنسيك
واذا كثرو جروحك تداويك
وكاين المرا لي تعييك
وفي وقت ضعفك تضحك عليك
وفي همك تزيد عليك
واذا كثرو جروحك

 

[سعد نايلي]

لي يبيعك بالفول بيعه بالقشور
تقبل الله منا ومنك الصيام وصالح الاعمال​

 

[حفياد آدم]

ناس زمان قالو:
نوصيك ياقاري حديثي على زوح حوايج اذا خطاوك ابكي عليهم بالدم اما الباقي الله يسمح٠٠٠
الاولى:الوالدين "قالك لي يخطوه الوالدين مايبقالو قلب حنين"
الثانية:الصحة" قالك صحتك هي راس مالك اذا راحت ماعندو مايبقالك"
كاين المرا لي تعليك
وفي وقت ضعفك تقويك
وفي همك تنسيك
واذا كثرو جروحك تداويك
وكاين المرا لي تعييك
وفي وقت ضعفك تضحك عليك
وفي همك تزيد عليك
واذا كثرو جروحك تكويك

النعجة تقول حليبي زبدة وصوفي لبدة ومايكسبني غير حنين الكبدة
والكبش يقول صوتي صياح وراسي نطاح ولحمي فواح ومايقدر يكسبني غير الفلاح
البقرة تقول فمي نار وكرشي دار وماتشبع لا ليل لانهار ومايكسبني غير طويل لعمار
المعزة تقول صوتي عالي وحليبي غالي وصوفي شعر وطريقي وعر ومايكسبني غير ملقط دعاوي الشر

 

[سعد نايلي]

السلام عليكم
تقبل الله منا ومنكم الصيام وصالح الاعمال
لا في النساء عهد وافي ولا عقد صافي ...
لا تغرك شمس الشتاء ولا تغرك ضحكة النساء
بالك تنسى وتامن النساء
النساء كيدهم ما يتنسى
أنتوما النساء هدرتكم ما تنحصى ومرقتكم ما تنحسى
ألي يحب الهراج يكثر الجاج والنساء​

 

[حفياد آدم]

السلام عليكم
تقبل الله منا ومنكم الصيام وصالح الاعمال
لا في النساء عهد وافي ولا عقد صافي ...
لا تغرك شمس الشتاء ولا تغرك ضحكة النساء
بالك تنسى وتامن النساء
النساء كيدهم ما يتنسى
أنتوما النساء هدرتكم ما تنحصى ومرقتكم ما تنحسى
ألي يحب الهراج يكثر الجاج والنساء​

صح فطورك
هههه يسمعوك نسا اللمة يطبخوك في بلاصة لبصل​

 

[secret de coeur]

قالو ناس بكري ...
ضرف الهندي مايجيبش تفاحة
والنخلة ماتجيب غير التمر
وحديثك مع السفيه قباحة
وعراكك معاه تطياح قدر
كاين لي على رزقو خماس يحرث في ارض غير ارضو
ولي بنى بنيان بلا ساس صلى النوافل ونسى فرضو
ولي يقطع في عروض الناس لابد يجي نهار لي يتوسخ فيه عرضو.....
مشاهدة المرفق 156634​

متاااااااااابعة
وعجبني الموضوع
وشكون قالك كلامهم يروح
جامي
هادو دروس صح ... استنتاجاتهم من الحياة

 

[حفياد آدم]

قالوا ناس زمان وحديثهم قياس :

ما يرقد الليل مديون ولا يحمل الذل مانع…
ولا يغسل العرض صابون
ولا ينجر القلب صانع.
ناس تصون و ناس تخون .
و ناس العشرة عليها تهون
.ناس تفرحك و ناس تجرحك.
وناس لوكان بيدها تذبحك.
وناس تدعيلك و ناس تكيدلك
.وناس من حقدها تنكر خيرك.
ناس نساو كيفاش كانوا
و ناس في وقت الشدة ما بانوا
. وناس اش ربحو كي خانوا.

 

[حفياد آدم]

قالوا ناس زمان
إذا مريض شوف عسل النحلة هو أحسن غذاء ودواء في الكون​

 

[حفياد آدم]

قالوا ناس زمان
إذا راك خاطب شوفها على أصلها وفحلة في بالك ترتاح ولعرضك تصون​

 

[حفياد آدم]

قالوا ناس زمان
البقرة النطاحة
والنعجة الصياحة
والمراة النواحة
ماتخليهم يدورو في الساحة
والمراة الخبارة والدجاجة الغبارة
كسيبتهم في الدار خسارة
​

 

[حفياد آدم]

قالوا ناس زمان
والسلوڨي اذا نبح والراجل اذا شطح ادي للواد واذبح ​

 

[حفياد آدم]

قالوا ناس زمان
عيب النفس في كثر الخطايا
وعيب العين من قلة النوم
وعيب العقل في موت الخلايا
وعيب الڨلب دسان الهموم
وعيب الروح في خبث النوايا​