الهُــدوء المزعج ~''

[لمعانُ الأحداق]

كاين جملة تقول :
" متخافش تبدا من تاني، يمكن قصتك الجديدة أحلى "
ساو مهما كانت النتيجة تقدر تبدا من جديد
و اذا حُرمت من حاجة دير في بالك انو ربي كاتبلك أحسن منها
جرب برك أول خطوة

 

[لمعانُ الأحداق]

الشهر الأصب شهر رجب
الأشهر الحُرُم يُعظَّم فيها الخير و الذنب.. مش كيما اي شهر آخر ، ماهيش مجرد أيام عادية ، راه وقت للتأمل والرجوع لله ، حافظ على طاعاتك ، سامح ، اصفح ، و تعامل بلطف ، بَعّد على الحاجات لي مش مليحة ، راجع أفعالك ، وابدأ صفحة جديدة ..
تأدب مع الله ، مع الناس و مع نفسك ..

الشهور هذي راهي رسائل و فرص للتوبة والتغيير ، ماتضيعهاش

 

[لمعانُ الأحداق]

الناس لي يسجلو اللحظات الجميلة و يشفاو على التواريخ و يحتفظو بأي حاجة تفكرهم في الايام مثل تذكرة القطار ولا حديقة الالعاب >>>>>>>

 

[لمعانُ الأحداق]

نقولك حاجة ؟
مع مرور الوقت تعرف أنك تستحق الافضل و ماخسرت والو حرفيًا

 

[لمعانُ الأحداق]

علابالي بزاف منكم عندهم مشكل التفكير المفرط - الoverthinking - ، و انا معاكم ، هو صح يخلينا نشوفو الجوانب الصعيبة و الدقيقة من المواقف لي أحيانا مانقدروش حتى نتحملوها و تأثر على كامل نهارنا و مزاجنا ، بصح من جهة اخرى نعرفو شحال النظرة السطحية و عدم الغوص في التفاصيل رحمة و راحة ..

 

[لمعانُ الأحداق]

لو كل واحد يتقبل الاعتذار " ببساطة " و يدير في بالو انو حنا مجرد بشر ، رح تكون الحياة أسهل ، و يكون ديما فرصة نتعلمو من بعض و نصلحو اخطاءنا مش نهربو منها
الاعتذار جامي كان عيب بالعكس دليل على ان الانسان هذاك واعي و شجاع و يعترف بالغلطة لي دارها
المشكلة فينا اذا ماقبلناش الاعتذار و دورناها محاكمة و نلوموه و كذا منا ، على اساس حنا مثاليين و مانغلطوش .. علابالكم كي نديرو هكا رانا نرجعو الاعتذار خطوة صعيبة و الانسان يولي يخاف يعتذر لانو رح يتحط في موقف هذاك تاع إلقاء اللوم و تضخيم الموضوع و يحس روحو ضعيف ..

الاعتذار و تقبل الاعتذار ثقافة

 

[لمعانُ الأحداق]

{ وَآتَاكُم مِّن كُلِّ مَا سَأَلْتُمُوهُ }
شحال من حاجة كنت متمنيها من قبل تكون عندك و اليوم راهي بين يديك .. حتى و انت في عز يأسك و تعبك ، دير في بالك ديما انو رح تجيك فرحة ماكنتش منتظرها ، غير متوقعة ، عوض من الله لك على كل ما مررت به ، ثق بالله و لا تيأس ..

 

[لمعانُ الأحداق]

حبيت نفكرك في حاجة .. نتيجة السعي رح تكون واحدة من هذو الثلاثة ، يا تنجح و توصل من أول مرة ، يا ماتنجحش و تكتسب خبرة تفيدك في المحاولة الثانية ، يا تتعلم انو مش هذي هي البلاصة لي يليق تكون فيها و مش هو الطريق لي تحط فيه مجهودك ساو تروح تشوف عفسة اخرى خلاف
باختصار ماكاش مجهود يضيع فالباطل

 

[لمعانُ الأحداق]

صبرك على دراستك و تعبك ، على ظروفك و حتى على الأوضاع لي مش عاجباتك و قاعد تحاول تتأقلم معاها .. ماراحش يضيع هكا كأنه لا شيء
كاين رب من فوق سبع سماوات رح يعوضك و يجبر خاطرك و يراضيك .. دير برك في بالك و كن متأكد انو ما بعد الصبر إلا خير و لطف ، حتى اذا ماكنتش تشوف الخير هذا حاليا ، مي يجي نهار و تتفاجأ بتدبير الله سبحانه

 

[لمعانُ الأحداق]

شفت واحد كاتب " بعد هذا العام، أريد حقا أن أعانق نفسي عناقًا كبيرا لأنني ما زلت أقف "
بالتفكير في الامر و انك مازلت واقف بعد سنة مريت فيها ببزاف صعوبات و تحديات راه بحد ذاتو انجاز كبير صح .. العبارة هذي ماهيش مجرد عبارة تقالت و إنما راهي تصف احساس حقيقي ..
تقديم عِناق لنفسك هو اعتراف بقوتك ، بقدرة تحملك لهذيك الضغوطات و خروجك منها .. خليك فخور بواش عملت و ابدا العام القادم بثقة أكبر لانك نجحت و اخترت تكمل رغم كل شيء

 

[لمعانُ الأحداق]

اقتنعت مؤخرا بجملة " ******* life always wins "
في الوقت لي رانا فيه ، كلما تبعد حياتك عن الناس ، كلما تحافظ على صحتك النفسية و هدوءك و حتى قيمة تفاصيلك
مام في العلاقات .. نشوفو انو لي تكون في الخفاء منها و مايسمعوش بيها الآخرين هي لي تكون أقوى و أنجح ..
من التالي حياتك الخاصة هي منطقتك الآمنة إن صح التعبير ساو خليها في الظل تلقى روحك مرتاح

 

[لمعانُ الأحداق]

لازم تتصالح مع فكرة انو ماكاش بنادم يحس بيك كيما تحس انت بروحك .. مهما كان قريب ليك
صاحب الشعور هو الوحيد لي يعرف مدى تأثيرو عليه
ماتقدرش تجيب واحد تحطو داخل عقلك باه يشوف الفوضى لي ثم و يعذرك و لا تحطو في قلبك باه يفهم قلقك و حزنك ..
كاين حاجات بزاف داخلك ماكاش لي يقدر يعرفها و يحس بيها غيرك

 

[لمعانُ الأحداق]

النفسية - المورال - هي فعلا المحرك الاساسي لكل تصرفاتنا و قراراتنا ، كي نكونو مرتاحين كل حاجة تكون برفكت ، حتى الصوالح الصعاب يولو أسهل ، مي اذا جا الحزن و لا الهم.. الحاجات الخفاف يولو ثقال علينا
علاجال هذي يليق ديما يكون ضمن دعاءنا " اللهم إنا نعوذ بك من الهم و الحزن "

اهتم بنفسيتك و حافظ عليها ، كيما تحافظ على صحتك ، و خلي ديما ربي في قلبك و كون قريب ليه ، لانو الوحيد لي يقدر يريح بالك و يخليك تشعر بالطمأنينة

 

[لمعانُ الأحداق]

كاين حاجة لازم تعرفها
انك مهما حاولت و مهما ضحيت باه تفرح و ترضي الناس لي حولك ، مع التالي كل واحد رح يشوفك كيما حاب هو يشوفك
كيفاه هذي ؟
يعني لو الشخص هذا ما يحبكش ، يا لوكان تجيبلو نجمة من السما ، مش رح يحبك
و لو كان يحبك ، اذا قصرت معاه و لا ماعاملتوش مليح ، رح يلقالك سبعين عذر و يعذرك لانو يحبك و مايقدرش يشوفك بصورة مش مليحة
لهذا ماتحاولش مع واحد ماشي حاطك في المكان لي حاطو انت فيه و لا ماهوش حاسس بقيمتك ..
و ماتحاولش تحسن من صورتك في عين اي واحد .. خليه يدي عليك النظرة لي تساعدو و لي تريحو

 

[لمعانُ الأحداق]

عوّد نفسك ماتتعلقش .. لا بفكرة و لا بقرار و لا حتى بشخص .. الفكرة تتبدل ، القرار يتغير و الشخص يفارق
الدنيا مافيهاش ضمانات و لا حاجات ثابتة ، التعلق يخليك ديما تخسر ..

 

[لمعانُ الأحداق]

الشي لي شايفو صعيب ، لي حاس انو بعيد و لا مستحيل ، عند الله " لا شيء " ، كل حاجة ممكنة عند الذي يقول كن فيكون ..
قدرتك محدودة ، لكن قدرة الله لا حدود لها ، ادعي و احسِن الظن بالله ، ادعي بيقين .. المستحيل تاعك رح يكون ممكن و يولي واقع - جميل - في وقته المناسب

 

[لمعانُ الأحداق]

كل واحد فينا يستحق الخير ، الحب و الراحة ، مهما كانت ظروف حياتو صعبة و لا فيها تعب ..
حقيقة انو انت ديما تستحق الاشياء الجميلة ماكاش لي يغيرها و ماعندهاش علاقة بشخص و لا بشيء معين ، كن على يقين انو رح يجيك ما تتمنى في الوقت الصح

 

[لمعانُ الأحداق]

كاين عبارة قريتها " من هان عليه حزننا هانت علينا ذكرياته و لو كان عزيزا "
العِشرة تاع الصح و الاهتمام يبانو في لحظات حزنك ، أي واحد تجاهلك في وقت ضعفك يخسر مكانتو عندك و مايستاهلش انك تبقى محتفظ بذكرياتو ..
اختار لي يوقف معاك و يسندك في وقت حاجتك .. و دير في بالك ديما انو لي يحبك مش رح تهون عليه و مايقدرش يشوف خاطرك مكسور

 

[لمعانُ الأحداق]

اذا كانت عندك فرصة انك تختار الناس لي يكونو حولك ، اختار انك تتعامل مع الناس لي " كيما نتا " ، مش شرط عندهم نفس صفاتك و اسلوبك اي باينة مستحيل تلقى زي هكا ، مي نحكي على الاخلاق و البيئة لي كبرو و عاشو فيها .. لانو هذا الشي الوحيد لي ماراحش يتغير فيهم

 

[لمعانُ الأحداق]

تعلمت انو المسافات هي الوسيلة الوحيدة لي تخليك تحافظ على نفسك و تحميها من الألم و التعب النفسي .. الاشياء القريبة منك سواء كانت علاقات و اشخاص او مواقف ، قادر تأثر عليك و تؤذيك بشكل كبير ، علاه ؟ لأنو اي حاجة قريبة ليك راهي أكيد قيمتها كبيرة عندك و بالتالي التأثير تاعها رح يكون قوي خاصة في الخيبات ..
ساو خلي ديما مسافة بينك و بين اشياءك