الدارجة في واش راك تهدر

[Parfum floral]

السلام عليكم
واش راكم اكل لاباس​

راني اليوم حبيت برك نسقسيكم وحد السؤال و ماذا بيا جاوبوا عليه
نتوما كي تدخلوا للمة و تحديدا واش راك تهدر و ديرو موضوع او تحطوا راي بالدارجة
كي تكتب بلهجتك تحاول تبدل كلمات و الا لا تكتب واش جا في راسك
انا شخصيا ساعة ساعة نبدل كي نحس بلي ماشي كامل الاعضاء رايحين يفخموني سيرتواللي ماهومش جزائريين
و كاينة حاجة مقلقتني مي راني شفت الحل نتاعها عند بعض الاعضاء و هي مشكلة نتاع GUAبالنسبة لينا حنا نتاع الشرق و راني دايما نكتبها ق وشفت اعضاء يعوضوها بg
والله فكرة
شكرااا على الدخول و قراءة الموضوع :angel_not:​

 

[هشام رضا]

شكرا لك اخي لكل ولاية وتقاليدها وعاداتها

 

[Parfum floral]

شكرا لك اخي لكل ولاية وتقاليدها وعاداتها

انا راضيةhmy: يا هشام و انت جامي بدلت شوية في لهجتك كي تكون تكتب في رد مثلا
مرسي لمرورك​

 

[Dr.CrAzY]

وي دي فوا نسيي نبدل باه الناس الكل تفهم
كاين كلمات لي يبانولهم بيزار
وحنا في الشرق كيف قلتي نهدرو بالg كل مرة وش نكتبها انا
شكرا أختيــ
​

 

[SO GooD]

انا نموديفي في الهدرة ديالي ديما

و ديفوا نبدلها خلاه

و نظن بلي gاع الناس تعمل هكدا باه تحاول تقرب الفهم

للأعضاء لوخرين

...........................................

بالرد هذا راني خلظت بزاف لهجات القاهم انت وش هوما ؟؟

:biggrin::biggrin:
​

 

[هشام رضا]

اخي والله ديما نبدل في اللهجة تاعي و كيما نعود نشرح في حاجة ندورها هدرة فصحة و هناك العديد من لكلمات لا يفهمها الجزائرييون جميعا كما قلت عند ك حق خو كاينة

 

[سوميثا]

صح كاين كلمات متبدلين بين الولايات نتاع الجزائر مبصح أنا نفهم عليهم كامل و نكتب الي يكون في راسي و ما نبدلش
تقبلي مروري

 

[Parfum floral]

وي دي فوا نسيي نبدل باه الناس الكل تفهم

كاين كلمات لي يبانولهم بيزار
وحنا في الشرق كيف قلتي نهدرو بالg كل مرة وش نكتبها انا
شكرا أختيــ​

شكراا ليك نتا خويا يعني ما رانيش وحدي اللي نبدل شوية
مرسي

 

[السوفي حمة]

يا ريت كون كل واحد يكتب باللهجة نتاعه على الأقل نتعلمو اللهجات الدزيرية السمحة
( لهجة سوفية صافية)

​

 

[Parfum floral]

انا نموديفي في الهدرة ديالي ديما هاذي دزيرية​

و ديفوا نبدلها خلاه عنابية​

و نظن بلي gاع دزيرية الناس تعمل هكدا باه تحاول تقرب الفهم​

للأعضاء لوخرين ​

...........................................​

بالرد هذا راني خلظت بزاف لهجات القاهم انت وش هوما ؟؟​

:biggrin::biggrin:​

[/QUOTE]

مرسي على الرد

 

[هشام رضا]

خلاه
واش معناها خلاه هههههههههههههههههههههه هذي معرفتهاش بصح شاك فيها خلاص ؟؟؟
:angel_not:

 

[N@riM@N]

انا نهدر وش قالي راسي جامي نموديفي في هدرتي
باسكو جابلي ربي مكانش فرق بزاف فلهجاتنا ماعاد لقبيليه هديك
وحدها ولا واش قلتي؟​

 

[هشام رضا]

خلاه معناها ؟ الدعوة خلاتتتتتتتتتتتتت هههههههههههههههههههههههههههههههههههههههههههههههههههههههههههههههههههه

 

[Parfum floral]

اخي والله ديما نبدل في اللهجة تاعي و كيما نعود نشرح في حاجة ندورها هدرة فصحة و هناك العديد من لكلمات لا يفهمها الجزائرييون جميعا كما قلت عند ك حق خو كاينة

علاه يا خويا راك مصر بلي راني طفل راني بنت
معليش و شكرااا على العودة:001_wub:
​

 

[هشام رضا]

واش معنى خلاه

 

[Parfum floral]

خلاه معناها ؟ الدعوة خلاتتتتتتتتتتتتت ههههههههههههههههههههههههههههههههههههههههه

يعني خلاص انا ثاني ما كنتش نعرفها بصح لازم نتعلموا لهجات بعضنا

 

[Parfum floral]

صح كاين كلمات متبدلين بين الولايات نتاع الجزائر مبصح أنا نفهم عليهم كامل و نكتب الي يكون في راسي و ما نبدلش
تقبلي مروري

مرسي ليك نورتي​

 

[SO GooD]

شكون هاذا لي تحرق قلبو على كلمة خلاه ههههههههه

سقسي guilty درك يقلك وش معنتها خلاه

راها خلاص باللهجة العنابية
​

 

[Parfum floral]

يا ريت كون كل واحد يكتب باللهجة نتاعه على الأقل نتعلمو اللهجات الدزيرية السمحة

( لهجة سوفية صافية)​

ماذا بينا هكذا نتعلموا من بعضانا
شكراا على مرورك اخي
​

 

[shahrazad]

انا جامي موديفييت باسكو اللهجة تاعنا يفهموها قااع و مافيهاش حاجة صعيبة
بار كونتر اخوانا الي بعااد بزاف على العاصمة
عندهم شوية كلمات سبيسيال
و فالاخير حنا قاع جزايريين و مليح لوكان نتعلمو اللهجة تاع كل منطقة
و شكراا ليك ختي راضية