السلام عليكم
اليوم حبيت نتكلم على ظاهرة لطالما ازعجتني ولابد انها ازعجت الكثيرين
ولطالما اطلعتلي الغاز والدم
هذه الظاهرة هي قطع الطريق :busted_red:
ماشي قطع الطريق من ممر الراجلين :scared:
قطع الطريق او الرصيف من هاذي المظاهر المقلقة والحقيقة احيانا اتمنى نكون شرطي اللي نلقاه غالق الطريق نهزو نرميه في الحبس 24 ساعة ونطيح ليه بالفلاقة حتى يكره يخرج للشارع .
من المظاهر الكارثية واللي هي اصلا عدم تحضر ورعونة ولا مبالاة وبزاف من المرات تفرعين ربي يحفظنا واياكم .
تمشي في الرصيف تلقى جماعة الخضرة حاط الكرويلة ولا الشريطة نتاعو والوسخ والذبان ماكلها تتحتم انك تمشي في وسط الطريق والسيارات والازدحام هذا اذا كنت وحدك منحكيش يكون معاك العائلة ولا امك او اولادك .
وفي اخر النهار جبيبنا يسوق الالكرويلة نتاعو ويخلي انواع الحشرات والفضلات مرمية
وتقول لوكان نحكمو نوكلهالو ومن بعد يقدر يروح .
ايضا احاب المحلات تلقاه مستأجر محل 1م×1م وعامل الشارع كامل حانوت ومخزن وخاصة خاصة جماعة الميكانيك والطولي تشوف المحل تلقى ياربي يهز مفتاح وكريك وتورنوفيس
وفي الشارع انواع السيارات تقول معرض دولي وهنا تكثر الحوادث لانو اللي جاي في الطريق ميفيقش كيفاش يخرجلو ولد او شخص من وراء سيارة مركونة على الجنب .
وخلينا من باقي المحلات تصيبو حاط صنادق ومعلق الالبسة على طول الشارع طولا وعرضا وارتفاعا حتى انك متقدرش تشوف قدامك ميترة .والمصيبة معلق ملابس داخلية للنساء تحشم وانت تمشي مع واحد مقادرو .
ايضا كاين عباد متحلالوش القعدة الا في وسط الشارع تلقاه حاط كرسي ومجمع مع صحابو واللي يجي يفوت ميصيبش منضيق الشارع وربما امراة تحشم لازم تبدل الشارع رغم انو الحشمة مبقاتش الا القليل الا نساء نتاع الزمان والله متصيب تفوت المسكينة وتروح تحوط للشارع الثاني .
ايضا ركن السيارات كل واحد حاب يستقهوى لازم سيارتو ايضا تستقهوى معاه تلقاه راكن السيارة على فم المقهى ولا في منحنى شارع ولا في شارع شعبي ضيق ياربي يفوت حمار حاشاكم .
اسمحلنا زومبريرو أنت متحضر عليه
وكاين اللي يركن السيارة في وسط الزحام راه شايف الشارع ميحملش زوج سيارات هو ولا علابالو المهم يشوف لروحو والناس تطيح في بير .
كاين ناس تقعد في الرصيف تصيب حديقة ولا مقاهي على طول الشارع ولكن هو لا لا يجلس في الرصيف ويجي صاحبو يجلس بحذاه ويزيد الثالث وهكذا يعملو حائط صد لضربة مخالفة .
رونالدوينو ومانعرف يقدر يفوت بيناتهم .
عيب عليكم نوضو خلو الناس تمشي براحتها
يقلك كاين الطريق واسعة
ياعبد كاين اختراع اسمو رصيف الراجلين والطريق وانت راك في قاعد في رصيف الراجلين نوض اقعد في الطريق يديك كاميون ان شاء الله تلصق في الروض
كاين في المساجد انا عقلي يطير من بلاصتو لما يخرجو الرجال من المسجد تحلالهم في التجمع امام باب خروج النساء حتى النساء يبقاو ساعة حتى يقدرو يخرجو والمصيبة تلقى الامام معاهم .
منحكيش على الاعراس وليكورتاج نتاع السيارات لانو اللي يتزوج ويعمل عرس لازم الحي والشارع كامل يتوقف عن الحركة حتى تخرج لالة العروسة
يقلك واش يخرج العروسة من دار باباها واحنا نقولو واش يفوت الناس من قدام دار باباها
كاين اللي يبني في المنزل او يزين في الواجهة لما يزين الواجهة والبيت الطريق كلاها البحر وتبقى فضلات البناء والتراب والحديد مرمية في الرصيف وكانو لا شيء حاصل .
كاين قطع الطريق من طرف البلدية وعمال البلدية كل يوم يتم حفر حفرة مانيش عارف علاش بلاك يفوتو في الوقت ولا يتراهنو على كنز علي بابا واللصوص الاربعين
البلدية تحفر وتخلي الحفرة الى اجل غير مسمى حتى انو يسقط فيها بمعدل كل يوم 3 اشخاص .
كاين قطع الطريق من طرف المتسولين والمشردين كذلك ينصب الخيمة في وسط الشارع والرصيف ويتكسل وتبدى تفوح انواع الروائح وحاشاكم يعمل كل شيء في مكانو وميتحركش
والسلطات تخليه ربما يعتبروه ثروة للبلاد لا تقدر بثمن او مكان سياحي او نصب تذكاري يذكرنا بالرهج والغم والهم
كاين مقاولين يفتح قلب الطريق ويخرج مصورها ومن بعد ما يضهر عليه حتى خبر ويخلي الناس تعاني وتسوفري
كاين كذلك اللي يرمي الاوساخ في الرصيف وفي الطريق والله شفتها بعيني
رغم انو كاين صندوق القمامة
يخرج صاحبنا بزوج شاصيات او بوسات ويرميهم في الشارع ويتوجه للمسجد باه يصلي في ذاك الحال كالراجل .
اليس النظافة من الايمان
بحالك الصلاة تقبل لانو الصلاة تنهى عن الفحشاء والمنكر
ورمي الاوساخ اكبر منكر
اخواني هذه الظواهر غير حضارية خلونا من الحضارة
نقولو غير اسلامية اولى
يعني عندنا في الدين باب حق الطريق
عن أبي سعيد الخدري رضي عنه قال : قال رسول الله صلي الله عليه وسلم " إياكم والجلوس في الطرقات . قالوا يا رسول الله مالنا من مجالسنا بد نتحدث فيها ؟ قال : فإذا أبيتم إلا المجلس فأعطوالطريق حقه . قالوا وما حق الطريق يا رسول الله ؟ قال : غض البصر و كف الأذي و رد السلام والأمر بالمعروف والنهي عن المنكر " .
وخير ختامها مسك حديث نبينا الاعظم صلوات الله وسلامه عليه
-------------