صرا فيلم لبارح، والسبيطار تبهديلة ....

[ماكانش]

السلام عليكم ورحمة الله وبركاته
واش راكم خاوتي لاباس بخير الحمد لله
البارح في الليل واليوم مارانيش مليح صح صح، والحمد لله ياربي
أيا بلعشية جاني صاحبي خرجنا ندورو ورحنا نديرو تايات ونقصرو، عيطلي واحد اخر قالي اذا نروحو نخرجو شويا بالطوموبيل نشمو لهوا ونحوسو ...
أيا قتلو فوت عليا راني في كذا مع فلان
أيا المهم رحنا حوسنا وروحنا بعد المغرب تقريب بنص ساعة
أيا كي وصلنا للباطيمة شفنا لابوليس وطاكسي ضاربة في القاراج والغاشي أيا قلنا اكسيدو
كي قربنا لقينا طاكسي وحدة برك تاع واحد حال سيبار قدامنا
ايا سقسينا قالنا واحد صغير صاحب خويا الصغير راهو فلان مول السيبار تقابض مع فلان وراح جاب الطاكسي تاعو ودخل فيه وفي صحابو ألي كانو واقفين معاه وراهي فيها خوك يا سفيان _o:
أيا انا راحولي لخيوط ولمشاور ودهشت وحرت هبط من الطاكسي وقتلو واش ياخي لاباس
قالولي راهم في السبيطار ووصلهم خوك، وقالي راهو عيطنا فلان وقانا راهي لاباس
لثم ندمت وتمنيت لوكان كنت حاضر في الضربة هذي، ياي والله ياخاوتي غير نقتلو صح صح
لاحول ولاقوة الا بالله العظيم
قتلو اعطيني النيميرو تاع فلان نعيطلو ، ياخي ماقدرتش نكتبو مديتو للطفل يكتبو ويعيط كي صونا عطاني التيليفون قتلو واش يا فلان لاباس واش لولاد قالي بخير لاباس الضربة ماشي كبيرة ؟؟؟
قتلو فوتلي خويا حكيت معاه وسقسيتو على روحو وعلى لولاد قالي لاباس الحمد لله ايا سقسيتو على الوالدة علابالي مسكينة لوكان تسمع تنضر وادير حالة قالي واقيلا ماسمعتش ؟؟؟
أيا لثم ركبنا ورحنا للسبيطار ...
أيا وصلنا للسبيطار دخلت ديراكت لليزيرجونس ونفتش لقيت صاحب خويا سقسيتو على خوةيا قالي هاهو وين راهو
ايا رحتلو واش راك لاباس قالي بخير راني درت الراديو على رقبتي ومازال تاع رجلي ؟؟؟
زدت سقسيتو على فلان صاحبو قالي راهو مازال دايخ وراح يحكموه يبات ؟؟؟
يا سبحان الله واشي هذا فيلم صح صح
وهذا الي دخل فيهم اكرمكم الله فاملات كون غير جا راجل ماعليهش وهذا واش زاد غاضني ...
أيا قعدت نستنى في السبيطار وراكم تعرفو لبهادل وواش صاري لثم
ياخي لبارح لخميس الناس كامل شاربا الخمر عفاكم الله غير ليزاgريسيو وواحد جابوه مضروب للقلب بموس خرجوه ميت ووو
ايا كي وصلت دالتو يدير الراديو رحت دخلت معاه قالي الفرملي وين رايح قتلو مع خويا قالي اخرج _o:
ونتفلg عليه بالحس قتلو واشي هوا ؟؟.؟ اتربى يا ...
ياخي جا خويا خرجني ومزيا قفلو الباب
ايا دار اراديو ومكر فيه ماحبش يعطيهولو كي عرف بلي خويا
اف واش ندير ندخلو من الطاقة نخنقو ؟؟؟ نقتلو واش نديرلو
ايا بلعناها واستنينا
المهم حالة وخلاص الحس لعياطات كامل يريكلاميو
يالطييييف
المفيد فرزنا امورنا وروحت وخويا خليتو راح مع خاوتي للسونترال ...
جاتو ديشيرير في المuسكل في رجلو ...
وروحت مع الجماعة على 12 تاع الليل وانا نترعد وقلقان وكلش ...
--
هذي هيا الجزاير الناس ادير لقطات كيما هذي محاولة قتل ، لنو ماكانش عدالة وحق وقانون
من المفروض هذا محاولة قتل 5 سنين ماينحيهالوش الطبيب، بصح لتحت لتحت قادر يعطيوه براءة ويغرمو لولاد تاع الكارطي ؟؟؟
وألي قلقتني بزاف كي جات أم ألي دخل فيهم بالطاكسي وقالت الحمد لله الي ماصرا لولدي والو
مزيا قاعد نشهد ونستغفر وزربت خرجت ...
لوكان كانت عدالة وحق وقانون من غدوة يدخلوه للباطة بصح الله غالب الرشوة والمعريفة تطفر غير في الزوالي ...
قلت لجماعة لثم بيناتنا ليامات لوكان يحكمو عليه بيوم واحد ؟؟؟
وصروا امور بزاف وحايات بزاف ...
وهذا وين طلع جارنا الصغير في عمرو 6 سنين قالي نطل على خوك ههههه
قتلني بالضحك ههه

الملاحظة:
ألي تغيض بزاف الناس تاع الكارطي وقفو مع مول الطاكسي ؟؟؟
الله غالب رخاس ويحبو البراني ...
​

 

[mimi.dz]

فيـ بلادنا القانونـ يطبقـ غير على ولاد الشعبـ
الليـ معندوشـ فيـ بلادنا ياكلوهـ الديابة
ايماجينيـ لوكانـ جاو هاذ الناسـ الليـ دخلـ فيهمـ الطاكسيـ ولاد كاشـ شخصية
واشـ يصرا؟؟
علابالكـ يعطوهـ مؤبد بلا تخمامـ
هذيـ هيـ بلادنا
والحمدلله الليـ جاتـ سالاماتـ
وسلمليـ على جاركم الصغير باينـ ولد أصلـ
( يعطيكـ الصحة ..... )
​

 

[Estrella]

قبل كلشي الحمدلله على سلامة خوك والحمد لله الي ماصرالو والو كي هو كي الجماعة الي كانت معاه ..
ولله نحيرو فالزمان الي رانا عايشين فيه تحسب رانا عايشين في غابة و ماشي هاكا
مابقاتش ناس تخافش من ربي .. تجيهم ساهلة يقتلو ...وكيلهم ربي
و لله يسترنا منهم ويبعدهم علينا
شكرا على الموضوع و للمرة 2 الحمدلله على سلامتهم ​

 

[somi]

الحمد لله على اسلامة خوك
وربي يرحم الرجال
راحو بكري
ربي يخليك لماليك

 

[يوسےفے]

الحمد يا خوي على سلامت خوك ولي معاه........يا لطيف.......ما سبت ما نقوووول ..غير..تهلى في خووووك​

 

[الجندية]

الحمد لله لي جات سلامات .. العرب ماترحمش وزيد الدوله ميته

​

 

[الورد الأحمر]

فيلم أكشن ...
على سلامة خوك ... خويا سفيان
ربي يهدي لعباد ... مي هذا رخيس ...
نوغمالمو حبس طول ...
مي معمن تحكي ... بفففف
ربي يبقي الستر برك ...
الله يبعد عليكم الأفلام لي هاك
مغسي سفيان... سلامو
​

 

[الجزائري05]

لا حول ولا قوة الى بالله
خويا ما تستغرب ماوالو هذي هي بلادنا واش نديرو
المهم سلامة راس خوك و صحابو
و كاين ربي ماتخافش
​

 

[ابوندى]

tu est en algerie mon cher sofiane
كون نحكلك واش صاري في ليجيرجونس تاع عنابة عندنا تهرب وماتصدق والله ناس تضرب ناس ويزيدوا يلحقوهم في الصبيطار ويضربوهم ثاني هما ولفراملة والطوبة والله
نحن لغز يعجز الجن عن حلهههههههههههه

 

[ماكانش]

لي عودة للرد عليكم جميعا
بارك الله فيكم ...

 

[نسيم الربيع]

او وشي هذا كامل
الحمد لله على سلامة خوك
والله يشافيه مليح
والله العرب تاعنا ..........
متعمرش راسك واحمد ربي اللي جات سالامات​

 

[DARINE05]

اخاه يخي غير الخير برك واش راهو بلقاسم صافا

 

[meriem150491]

علاه اخويا سفيان هدي بلاد اي مبقاتش بلاد القاوي ياكل الضعيف وهيا رايحة واللي قتل عبد كي شغل قتل ذبانة والله منكر صاري في لبلاد كون كانت العدالة ويطبقو حدود الله اللي قال عليهم وطبقو الاسلام حرفيا والله اللي يجي يدير جاست يسحبلو الف حساب ويقول كون وكون وكيفاش مي شافوها سايبة قالك خلي نديرو واش بغينا واحد محاسبنا + هوما يعرفو القران والسنة غير في الحوايج اللي تخرج عليهم والحوايج اللي ميخرجوش عليهم ميذكروش طول ربي والنبي والسنة والقران , او عليها ربي كاش نهار يسخطنا منعرف بواش

ربي يهدينا ويهدي امة محمد ويصلح حوالنا وحوال هدي لبلاد اللي رجعت كي الغابة

 

[NeيRسNe]

اهلا خويا ماكانش ان شاء الله يكون خوك بخير سلامته
درك نت لي غادي يطرطقلك كاش عرق ماهوما ماعلابالهمش قاع بيك
و الله كلشي بالمعريفة ماكانش قانون غير البزرة خويا لي راها تمشي هادي حالتنا يا خويا واش دير
اما على لي وقفو ضدكم ها يجي نهار وين يحتاجوكم باش توقفو معاهم
بصح واش هاد الفيلم لي داره مول الطاكسي باغي يقتل الغاشي فالنهار القهار ربي يهدي ماخلق كلشي راه يتمشا كي الكوارث لي راهم يتسلطو على الكرة الارضية
سلام خويا
​

 

[ماكانش]

فيـ بلادنا القانونـ يطبقـ غير على ولاد الشعبـ

الليـ معندوشـ فيـ بلادنا ياكلوهـ الديابة
ايماجينيـ لوكانـ جاو هاذ الناسـ الليـ دخلـ فيهمـ الطاكسيـ ولاد كاشـ شخصية
واشـ يصرا؟؟
علابالكـ يعطوهـ مؤبد بلا تخمامـ
هذيـ هيـ بلادنا
والحمدلله الليـ جاتـ سالاماتـ
وسلمليـ على جاركم الصغير باينـ ولد أصلـ
( يعطيكـ الصحة ..... )​

أهلا بيك ميمي
الله يحفظك
والله كلامك صح
لوكان تقاس ولد شخصية ولا جوج اي خلات الحالة وقفلو علينا الكارطي ولاحونا كامل في السيلونا ...
بصح ماعليهش وكيلهم ربي وراهي تخرج في ولادهم ...
يعطيك الصحة وربي يحفظك
يبلغ سلامي ....​

 

[الجريئة]

الي ستحوا ماتوا
ماغاضتوش يدي روح عباد هادا مهبول
على سلامة خوك برك​

 

[AnGeL*dZ]

تقول رانا عايشين في غابة

واللي دار هاكا لمرا أرجل منو
عادو يتبلاو على النآس
ومايحاسبوهمش ربحت


​

 

[amouna.dz]

الحمد لله على سلامة خوك و صحابو

ما بقا لا عدل لا قانون
كلش رشوة و معريفة ....اللي عندو لـgراد يدير رايو واللي ماعندوش معريفة ..ماعندو حتى حق
ربي يهدينا ويصلح احوالنا
​

 

[مسيلية فوور]

تصدق مافهمت والو ههههههههههه
دقولي فلم هندي
فهمت غير خوك كان في السبيطار
الحمد لله على سلامتو
​

 

[redpearl]

الحمد الله على سلامة خوك وهادا هو ليسونسيال
والباقي كي ما تلقاش واش تدير وكل عليهم ربي برك
سلام