نحلي يا الارض و خبيني......

[وطني]

بسم الله الرحمن الرحيم و الصلاة و السلام على اشرف المرسلين....
حبيت نحكي على وحد السيتواسيون طحت فيها ليوما برك.....و الله العظيم تبهديلة كبيرة بالنسبة ليا....كيما يقلك كنت لقيت لرض تنفتح و تخبيني .....كنت لقيت اني كنت مت قبل ما نلحق لهاذ الوضعية........
ليوما الصباح رايح للخدمة_ماشي خدمة ستابل..غير اعمال شاقة باش نوجدو مصروف الجيب..في انتظار خدمة ستابل تضمن المستقبل_
راكب في البوس....و في جيبي 50 دينار _ 30نخلص بيها الترانسبور..و 20هو كان يقصر برك_قهوة و دخان باش نبدا النهار كي العادة _.....
من بعد حبس البوس و دار لاري باش يركبو 2 من الناس...مرا و راجل...و هنا بدا المشكل ..
تخيلو شكون هوما...سمير و نعيمة ..هادو في زوج صحابي تاع الدراسة.....اكثر من 6 سنين قراية مع بعض.....من بعد انا كملو معايا...و هوما الله يبارك جابو الباك و قراو في الجامعة....سمير خلاص..تهمى لقى خدمة ستابل..بيرو و ستيلو _على حساب قلبو_ و نعيمة جابت لاليسونس ديالها و دوكا راها حاكمة دار راجلها_على حساب قلبها تاني_
نسيت نقلكم بلي سمير و نعيمة صافي عام زواج _ الله يبارك_ ربي جمع بيناتهم...ياخي من ايام الدراسة كنت حاس بلي مخلوقين لبعضاهم........و ديجا راهو قريب المزيود _الله يبارك_
المهم انا مامنت و هوما ما امنو كي تلاقينا....فرحة كبيرة........
سقساوني واش راك داير فيها_ ماحبيتش نقول الصح_ قلتلهم الحمد لله ...راني خدام خدمة ستابل و كلش لاباس..._كذبة بيضاء_.....
هنا بدا المشكل...عاخاطرش سمير هادا كي كنا نقراو و نروحو للمسيد في البوس كان ديما هو يخلص عليا _ لاباس بيه الله يبارك_....سمير تفكر هاد الحالة و قلي ...ليوما تورك باش تخلص_هو كان يقصر برك_....3 اشخاص يعني 90 دينار...و انا كان معايا غير 50 دينار...مديتها للروتسوفار باش يخلص 3 بلايص ..و غمزتو _بلي من بعد نكملك 40 دينار...ديجا اليوم يخلصونا في هاديك الخدمة الزينة..._ الروتسوفار فهمني...
مي نعيمة تحلبتلي عاخاطرش كانت قاعدة حدايا.......ايا قال ت لراجلها خلص نتا....._تبهديلة_ ...قلها يا خي خلص حمزة.....قتلوا انا خلاص خلصت....سكتت نعيمة..و خباتها في قلبها...
واش رايكم....ماشي تبهديلة تاع الصح....؟
انا و الله العظيم ماغاضتني لافار تاع الدراهم......_ديجا وليت من بعد و خلصت الباقي_
انا غاضتني..ليام...الحالة لي راهم هوما فيها و الحالة لي راني انا فيها......و كيفاش ليام تتبدل و تمد لهادا و ماتمدش لهادا....... علاش هوما خلاص وصلو لمرحلة الاستقرار ...و انا مازال شاعلة فيا النار...؟
ما يعنيش بلي راني ساخط على المكتوب.....لالا ..جامي ....يا خي الايمان بالقضاء و القدر خيره و شره من اركان الايمان و انا راني مؤمن ؟؟؟؟؟؟؟؟؟؟؟؟؟؟؟

 

[mimi.dz]

والله يا خويا رانيـ حاسة بيكـ
ميـ كلشـ بالمكتوبـ كيما قلتـ
والعبد جاميـ يحشمـ منـ نفسو ولاّ خدمتو اذا كانـ انسانـ شريفـ و بقيمتو
ميهمشـ الدراهمـ و ميهمشـ شكونـ عطاتلو الدنيا و شكونـ مزالـ يدمر
و متهمشـ الدنيا أصلا
المهمـ شكونـ الليـ يكسبـ الآخرة
متحيرشـ روحكـ خويا لعزيز
و بربيـ انشاء الله تحققـ الليـ تتمناهـ
صحـ العبد شويـ يتجرحـ كيـ يلقا روحو أقلـ منـ غيرو
ميـ ,,,,
الشدة فيـ ربيـ ,,,,,,
​

 

[nina bonoise]

لـــــــــــــي عودة

 

[منايا الجنة]

ربي كتبلك حياتك هكدا خويا نقولو الحمد الله اصبر برك وربي يفرج عليك ان شاء الله ويحققلك ما تتمنى
سلام

 

[ابوندى]

نقولك خويا العزيز كل واحد يرضى واش كتبلوا ربي هادي مافيهاش عيب ونشوف بالي كثير من الناس تحشم في مثل ها الامور الصراحة مليحة حتى انت لازم تكون مول برنسيب علابالي بالي الجزايري تاع نيف وقلبوا كبير والكل مرينا بهاد المرحلة والحمد لله ربي فرجها علينا ولات من الدكريات وكي نتفكرها نولي نضحك ..
كل واحد يلبس صباط على قدوا ولاعمروا كان الفقر عيب ولا التحراق عيب هادي مكاتيب من عند رب العالمين وعادي لو قلتي اني ماعنديش باش نكمل الباقي راح يتفهموك خاوتك وراني علابالي كون جيتي علابالك بيهم طالعين في البوس راك تخبيتي ولا هربتي منهم هههههههههه لان الجزائري معروف بالكرم
مايدوم غير الصح ومابقيتيش تطيح روحك في مواقف محرجة لانك انت الي حطيتي روحك في هاد الكا ....ومادام صحابك كيما قلت راح يعدروك عادي ويحشموا هما ثاني
الصراحة راحة وربي ينوب على خويا ان شاء الله بخدمة زينة وباي مليحة ربي يهنيك

 

[DARINE05]

والله صح موقف محرج عيت ما نقول

 

[sissi-jijlya]

خويا أنا واش نقولك لازم ما تحشمش بروحك و الخدمو ديالك لازم تتقبل واش مدلك ربي سبحانه و جامي تفقد الأمل و انشاء الله يفرج ربي و تعيش حياة كريمة و نقولك حاجة استغفر مولاك و ما تندمش
ربي يوفقك و يضويلك طريقك و يجيبلك بنت الحلال هههه انشاء الله و يرزقك بذرية صالحة برك ما تنساش
الله يمهل و لا يهمل
تقبل مروووري خويا العزيز

 

[الورد الأحمر]

والله يا خويا غاضني الكا لي طحت فيه ...
مي واش نقولك ... معليش ربي مغير الأحوال ...
اليوم دالتهم غدوة دالتك ...
شد فربي ولا تقنط من رحمته ...
يجي دورك ان شاء الله ...
ما تحيرش روحك ... سلامو
​

 

[kadysom]

غضتني تاع الصح خويا

على خاطر موقف محرج

بصح كلشي مقدر من عند ربي

مول التاج ويحتاج

مرات مالقري عندك في الكونت بصح الطيح بيك

ربي خير خويا

 

[Orodent]

حكاية تقيس صح واش نقلك خويا
الدنيا مكاتيب ماراناش عارفين كل واحد كيفاش تجيه
واحد عطاتلو الدنيا مال قارون بصح نحاتلو العزيز لي عندو
وواحد قدو قد روحو مي حبابو ملمومين عليه وهادي هي الدنيا وما فيها
وواحد جاتو في صحتو ما تدري خويا والله يا وراء كل عبد حكاية تنسيك في اختها
اهم شي الواحد يكون قانع بالشي لي عندو وما يشوفش للي كتر منو
ديما العبد لازم يشوف للي قل منو ويحمد ربي على كل شي
المهم كي يكون عندك بلاصة تخبي فيها راسك كي يطيح الليل
ولقمة تاكلها وكسوة لابسها وخدمةعايش منها
ما تنساش بعد العسر يسر
يعني الدنيا دوارة بالاك يدور الزمان وتولي خير منهم
الله يرزقك على قد نيتك خويا ويفتحها في وجهك ​

 

[hannsg]

عادي يا خويا ما تقلقش روحك كلشي بالمكتوب يا خويا و ربي يرزقك ان شاء الله
شد في ربي و يرزقك من حيث لا تدري
ربي يعاونك خويا

 

[بنـ MaPa ـت]

وعليكم السلاام

خويا كيما قلت نتا راك مؤمن ومالازمش تحكي هكدا ربي مافيه غير الخير في اي وقت قادر يرزقك بالمال لي واحد ماكسبو مسالة وقت وصبر برك....نتا احمد ربي لي راك عايش بخير....واصبر حتى تلقى خدمة مليحة....اضحك للدنيا تضحكلك وارمي عليك كل الهموم والله تعيش سعيد حتى وايدا كنت معدوم + ماتهتمش لمعيشة الناس ودير واش يخرج عليك نتا...ونزيدك حاجة خويا حمزة ماكانش لي مايوقعش في مواقف كيما هادي كامل الناس هكدا
مرسي على الموضوع
​

 

[حذيفة بن اليمان]

خويا ماتزعفش راك راجل يا خو والشيء لي درتو اكبر بزاف من 50 دينار.

حاس بلي انت انسان نبيل, ربي يوفقك خو في حياتك واصبر برك انت ماعليك غير تجري وربي رح يرزقك كي تكون حاب.

بربي يدور الزمان وترجع ليك الدالة.

 

[nina bonoise]

حكايتك تقيس بزاف
معليش خويا اليوم دالتك غدوة دالم غيرك
المهم شد في ربي سبحان
و ربي يعطيك ما تتمنى ان شاء الله

 

[l'espoire.h]

الصبر مفتاح الفرج، و ربي كي بلع باب يحل عشرة، ما عليك غير بالصبر و الايمان ،و ان شاء الله ما يكون غير الخير، ربي يوفقك و يهنيك في حياتك ان شاء الله
​

 

[مشاعر كاذبة]

معليش خويا انت متخمم ماوالو هو حقا موقف محرج لكن مدامك انسان شريف ما عندك ماش تحشم المهم تجيب دراهمك بعرق جبينك هد هو الصح
وانشاء الله تلقا خدما مليحة

 

[mira bey]

متقلق روحك يا خويا ماوالو يعني هو صح موقف محرج بصح نورمال راه يجي نهار وين تولي لاباس بيك وتعود تعرض فيهم على عشاء ماشي غير تخلص في البوس برك شد في عروة ربي هدا مكان
مراكش غير انت برك لي طحت في مواقف هكا ولله قداش واحد يجي يحكيلي صراتلو كيفك
هادي هي دزاير مخليا ولادها لا خدمة ولا والو و الخير تاعها يطايش منا ومنهيه

 

[kojak]

وطني
خويا لعزيز عبالك حزيتي في قلبي ياسر....
راني اتيديو وضقت الميزرية في بلاد الناس وحاس بيك ياسر
اسمع نقلك حاجة احبيبي
لي خلق عمرو ولا يضيع عبدو
وكل واحد واش عطالو ربي سبحانو
واحد عطالو في قرايتو واحد عطالو في يدو والميتي وواحد عطاه ربي في صوتو يغني بيه.. وكل واحد كيفاه...
يفرج ربي نشاله
معليش اصبر هدي بلادنا وواقعنا والدنيا ديما مع الواقف
نشاله يفرج ربي
وتخدم
وصحيت هدا موضوع هايل يحكي على واقع معاش

​