علاه حنا البنات نقراو و علاه نخدمو ؟؟؟ .. الكل مدعو للدخول

Houda Chaouienne DZ

:: طبيبة ::
أحباب اللمة
إنضم
4 جويلية 2010
المشاركات
5,103
نقاط التفاعل
236
النقاط
323
الجنس
أنثى
347499_1312305847.gif



صباح / مساء الخير
واش راكم يا ناس واش راك تهدر ؟
إن شاء الله راكم بخير
هذا زمان مادرتش موضوع هنا
المهم .. ندخل فالموضوع أمس قريت موضوع الأخت hiba14 الي قالت فيه بلي خطرات ماتحسش روحها طفلة .. الموضوع هنا لي حب يقراه


https://www.4algeria.com/vb/showthread.php?t=311093

أنا مارديتش على موضوعها .. مانعرف علاه هههه ربما لأني لقيت هدرة بزاف نقولها .. مالا قلت خلي ندير موضوع مكمل خير
و بالمناسبة نشكرها منا على موضوعها بزاف
طبعا .. مابقاتش ذرك طفلة ماهيش تقرا ..
أنا اليوم حابة نوضح الأسباب في نظري لي يخليو الطفلة تقرا و لي يخليوها دير اقامة و تبعد على دارهم و تقرا
و ثاني الأسباب الي يخليوها تخدم
أول حاجة القراية حتى للقسم النهائي
أنا نعتقد بلي هاذ المرحلة من القراية ولات مهمة بزااااف و INDISPENSABLE في وقتنا هذا علاه :
- لأنو رانا في عصر التطور و عصر العلم
- و الطفلة اذا بقات امية في مجتمعنا ماعندها حتى معنى
- اذا جات تتفرج مثلا و فسدلها التيليفيزيون ماهيش رايحة تفهم و تريقلو اذا كانت امية
- اذا تزوجت و حابة تقري ولادها ماتقدرش و رح يضيعولها
- اذا راحت للطبيب و قالها كاش كلمة بالفرونسي ولا ماهيش رح تفهم و قادر تعرض حياتها للخطر
- اذا شرات حوايج للدار و حابة تستخدمهم و ماتعرفش تقرا كيفية الاستعمال رح تعرض عائلتها للخطر
- اذا حابة دير قاطو و مدولها وصفة ماتعرفش تقراها حتى يقراهالها واحد اخر
- اذا حابة تستخدم البورتابل رايحة تحصل بزااااف و ماتقولوليش ساهل .. اللخرة اللخرة كي يلحقها ميساج مثلا تاع فليكسي ماتعرفش تقراه ............
هذي على سبيل المثال لا الحصر لانو كاين بزااااااف مشاكل تواجههم المرأة إذا كانت أمية و صدقوني مانيش نهدر من راسي راني نهدر من الواقع و هاذو نساء أميات سمعت حكاياتهم بنفسي .. معاناة تاع الصح .. و الله يغيضو
ثاني حاجة القراية في الجامعة
هاذ المرحلة طبعا ماهيش مهمة بزاااف كيما الاولى لأنو الي قرات للنهائي تقدر تسلك روحها ..
مالا علاه الطفلة تقرا فالجامعة ؟
- أول حاجة طلب العلم .. ماكانش حاجة خير من العلم
- الطفلة اذا قعدت فالدار سيرتو في مجتمعنا راني نهدر ع النظرة رح يشوفو فيها كامل ماتصلح لحاجة غير للزواج .. و زواج الطفلة و هي صغيرة ما ينجحش ديما
- اذا قعدت فالدار رايحة تضيع وقتها غير فالمسلسلات و الرقاد و تريح عمرها لي رح تندم عليه و رح تتحاسب عليه .. ّ"كلامي من الواقع"
- الحاجة المهمة ثاني أنها كي تقرا فالجامعة رح تتخرج بديبلوم و رح تقدر تخدم و الخدمة راني رح نهدر عليها مبعد
ثالث حاجة الطفلة دير اقامة و تبعد على دارهم
- طبعا .. مشي كل الفروع متوفرين فكل الولايات .. مثلا نأخذ مثالي أنا ( و أعوذ بالله من كلمة أنا ) ماعندناش DEPARTEMENT DE MEDECINE في خنشلة ألور لازم عليا نقرا في باتنة و هاذا معناه اني لازم ندير اقامة
تقولولي وعلاه ماديريش أي فرع و تقعدي تقراي في ولايتك .. طبعا كنت قادرة ندير هكا .. لكن أنا حبيت هاذ الفرع و ذرك نحكيلكم علاه كي نحكي ع الخدمة
- نطلب من الناس ينحيو هاذيك النظرة الي راهم يشوفو بيها لبنات الاقامة .. كيما كاين بنات ماهمش ملاح ربي يهديهم .. كاين بنات لي اوبليجي عليهم يديرو اقامة و يقراو بعاد على ديارهم لظروف ما كيما انا و عيمان هههههه
رابع حاجة علاه الطفلة تخدم
- كاين لي محتاجة و لازم تخدم باش تسد مصاريف العائلة مثلا ام لازم تصرف على اولادها اذا كانت مطلقة او ارملة او راجلها ما يقدرش يخدم او تخلى على مسؤوليتو ......
- كاين الطفلة لي تخدم باش ماتقعدش فالدار تودر وقتها .. مثلا لي ماهيش متزوجة وش تقعد دير فالدار مع المسلسلات و تودار الوقت فالزهر .. تخدم احسن .. خاصة اذا كانت خدمتها محترمة
- كاين مهن فالمجتمع لازم المرأة هي لي تقوم بيهم .. رح تتساءلوا واشي هوما هاذ المهن لي مايصلحوش للرجال
رح نمدلكم مثال بسيط و على نفسي لاني مانقدرش نهدر ع العباد
انا لوكان مادرتش طب .. مع احترامي لكل الفروع .. كنت رح نكمل اي فرع عادي و ندي ديبلوم من اجل انو يبقالي احتياط لربما نحتاجو في وقت الحاجة .. ونقعد مانخدم ما والو
اما كي خيرت هاذ الفرع .. لازم نخدم و نيتي من لي كنت صغيرة هاذي هي اني نولي طبيبة نساء
صحا قولولي يا ليجان .. لوكان تتزوج و تمرض مرتك .. وين تفضل تديها لطبيب ولا طبيبة ؟ و انتوما يا البنات كي تمرضو اريحلكم تروحو للطبيبة ولا للطبيب
هل من الممكن الاستغناء عن دور المرأة في الطب ؟
عمبالكم بلي كاين نساء يرضاو يموتو و مايروحوش لطبيب راجل .. و خاااااصة بعض الامرااااض الخاصة بالنساء دون الرجال .. ناهيك عن المرأة أثناء فترة الحمل .. و عند الولادة كاين حالات لازم يتدخل الطبيب ... يعني لو تكون مرأة طبيبة نساء أحسن .. بلا ماندخل بزاف فليديتاي .......
و إذا البنات حبسو القراية فالتارمينال شكون رح يداوي النسا تاعنا غير الرجال ؟؟؟
و اذا ما ضحاوش بنات من ولايات مثل ولايتي انا و دارو اقامة شكون رح يداوي نسا ولايتي ؟؟؟؟؟؟
على هاذا انا ضحيت و تحملت كل المشاكل لي وقفو في طريقي و درت اقامة و ادعيولي ربي يعاونني في قرايتي و ينجحني لانو راني حاصلة معاها ........
انا هنا حطيت تجربتي الخاصة و ليس ذلك تفاخرا او اي شيء آخر و لكن باش ننقلكم مثال حي من الواقع المعاش
و نوضح بعض الامور الغامضة و نحط النقاط على الحروف
...
عمبالي راني طولت بزااااااف بزاااااف وانا نحكي
تعرفو مازال عندي كلام نقولو مي معليهش راني اختصرت هههه
اسمحولي بزاااف ع الاطالة و نتمنى تقراو موضوعي
و تشاركوني بآراءكم
و تقولولي وين راني غالطة اذا غلطت
...

تحياتي لكم
ربي يحفظكم خاوتي
كانت معكم
~ Houda Chaouienne DZ ~
سلاااااااام
:re_gards:
 
حجز ولي عودة
 
السلام عليك هدهد مرحبا بك

و الله رزينة و عاقلة و تخمي تخمام وحدة مثقفة

واش نقلك هذي مش مجاملة مني هذه حقيقة

كلامك صح اذا مقراتش البنت و لا مخدمتش و راك عطيتي مهنة الطب

كمثال شكون رايح يداوي النساء

ما زال مجتمعنا ينظر للمراة العاملة نظرة سلبية

شكرا هدى على الموضوع

ربي يوفقك في قرايتك
 
وعليكم السلام ورحمة الله وبركاته
يعطيك الصحة أختي هدى
صحيح أنا قريت وتخرجت من الجامعة لكن الآن وصلت لقناعة تامـة أن ماكانش للمرأة خير من دارها.
وخصوصًا في وقتنا هذا وين انتشرت الفتن والبلايا. رب العالمين لما قال: (وقرن في بيوتكن) أكيد عندو فيها حكمة سبحانه، لأنو أعلم بشؤون عباده.
عن نفسي مانيش ضد أن البنت تتعلم وتقرا على الأقل باش تقري أولادها وتعرف تربيهم لكن الخدمة أنا ضدها جملة وتفصيلا، تقعد المرأة في دارها ما تزاحم رجال ولا تختلط برجال أفضل وأسلم لها.
اللهم إلاَّ مهنة الطب وما تبعها، هاذي ما نقدروش نقولو عليها لا.
عن نفسي مانيش رح نخدم ولا ناوية أنِّي نخدم ولا نخرج من داري بإذن الله. ولي يتكلم على الرزق والظروف، الرزق بيد الله، ما يجي لا بثقافة ولا بقفازة. ناس ياسر جاهلين وما يعرفو حتى حرف وهم من أغنى الأغنياء، وناس عندهم أكبر الشهادات وهم أحوالهم على قد حالهم.
حاجة أخرى المرأة تقدر تبقى في بيتها وتصرف على نفسها دون أي إختلاط ولا مزاحمة رجال، تقدر تخدم خياطة وتقدر تخدم القاطو وتقدر دير حرف يدوية وتقدر تعمل دروس خصوصية إذا كانت متعلمة. يعني كاين ألف حل وحل غير الإختلاط بالرجال.
علابالي طولت بصح حبيت نقول رأيي بكل صراحة.
ربي يحفظك واخلصي النيَّة لله في دراستك باه تنفعي أخواتك النساء ..


 
السلام عليكم
شكرا لك لطرحك هذا الموضوع الحساس ،تحليلك منطقي وتناولت الموضوع من عدة نواحي.
أنا عن نفسي أرى أن عمل المرأة ضروري في وقتنا هذا فهو سلاحها
أما بخصوص الإقامة الجامعية والإبتعاد عن البيت العائلي فهناك بنات ماشاء الله هدفها الدراسة و النجاح وهناك بنات ربي يهديهم ،والسبب يرجع للتربية فبنت الفاميليا وين تحطيها متخافيش عليها .و البنت لماشي مربية حثى لوكان يحبسولها قرايا راح تبقى هي هي فالبعد عن العائلة ليس معيار نحكم به على البنات ،ربي يوفق الجميع. ++++تقييم
 
بالرغم أنو الموضوع طويل شوية بصح عجبني بزاااااااف انشاء الله تتحسن الأوضاع ..وربي يوفقك في قرايتك ..الطفلة تروح تقرى على روحها وتجيب ديبلومها لي هو سلا حها على خاطر هذا الوقت مايطمنش كلش تبدل ممكن اذا حب ربي طيح في راجل ماشي مليح يحقرها كي تطلق منو تلقى سلاحها لي يعاونها في اتمام حياتها وشكرا
 
السلام عليك هدهد مرحبا بك

و الله رزينة و عاقلة و تخمي تخمام وحدة مثقفة

واش نقلك هذي مش مجاملة مني هذه حقيقة

كلامك صح اذا مقراتش البنت و لا مخدمتش و راك عطيتي مهنة الطب

كمثال شكون رايح يداوي النساء

ما زال مجتمعنا ينظر للمراة العاملة نظرة سلبية

شكرا هدى على الموضوع

ربي يوفقك في قرايتك


و عليكم السلام
و بيك منيني يعيشك
في الحقيقة أخجلتني مجاملتك
العفو منمن
مارسي ليك ع المرور
ربي يوفقنا كامل
دمتي
سلامي
 
ايه يعطيك الصحة هدهد بارك الله فيك كفيتي ووفيتي أنا نزيد برك أنو لمرا كي تخدم
مش تخدم باش تخرج تخدم باش تحس روحها عنصر فعال في المجتمع مش تستهلك برك
باش تحس روحها مفيدة وعندها معنى + تحقق طموحاتها وما تبقاش تقول لباباها هاتلي
ولا راجلها ... وتبقى خدمة لمرا صالحة بصلاح المكان لي تخدم فيه ومش أي خدمة
تليق بيها ... ولقراية حاجة مهمة وأول آية نزلت : اقرأ ... يعني في هذي واحد ما يناقشني
ولي ما يعجبوش الحال من لي تقرا يخبط راسو للحيط الطفلة راهي تقرا وتكون في روحها
وغزات المجتمع والراجل يعس فيها حتى تراجعت مكانتو ... والحديث طويـــــــل كالموضوع
هههه ... يعطيك الصحة هدهد ... تمتعت بموضوعك ... هيا سلامو
 
وعليكم السلام ورحمة الله وبركاته
يعطيك الصحة أختي هدى
صحيح أنا قريت وتخرجت من الجامعة لكن الآن وصلت لقناعة تامـة أن ماكانش للمرأة خير من دارها.
وخصوصًا في وقتنا هذا وين انتشرت الفتن والبلايا. رب العالمين لما قال: (وقرن في بيوتكن) أكيد عندو فيها حكمة سبحانه، لأنو أعلم بشؤون عباده.
عن نفسي مانيش ضد أن البنت تتعلم وتقرا على الأقل باش تقري أولادها وتعرف تربيهم لكن الخدمة أنا ضدها جملة وتفصيلا، تقعد المرأة في دارها ما تزاحم رجال ولا تختلط برجال أفضل وأسلم لها.
اللهم إلاَّ مهنة الطب وما تبعها، هاذي ما نقدروش نقولو عليها لا.
عن نفسي مانيش رح نخدم ولا ناوية أنِّي نخدم ولا نخرج من داري بإذن الله. ولي يتكلم على الرزق والظروف، الرزق بيد الله، ما يجي لا بثقافة ولا بقفازة. ناس ياسر جاهلين وما يعرفو حتى حرف وهم من أغنى الأغنياء، وناس عندهم أكبر الشهادات وهم أحوالهم على قد حالهم.
حاجة أخرى المرأة تقدر تبقى في بيتها وتصرف على نفسها دون أي إختلاط ولا مزاحمة رجال، تقدر تخدم خياطة وتقدر تخدم القاطو وتقدر دير حرف يدوية وتقدر تعمل دروس خصوصية إذا كانت متعلمة. يعني كاين ألف حل وحل غير الإختلاط بالرجال.
علابالي طولت بصح حبيت نقول رأيي بكل صراحة.
ربي يحفظك واخلصي النيَّة لله في دراستك باه تنفعي أخواتك النساء ..



الله يسلمك أختي
أكيد المرأة الأفضل لها بيتها
و لكن من الأحسن أن تكون لها شهادتها في يدها
و أيضا هناك مهن من الضروري أن تضحي بعض نساء المجتمع كالمثال الذي أوردته
شكرا جزيلا أختي على رأيك الصريح
آميـــن يا رب
و هو كذلك
شكرا جزيلا لكي على الرد الرائع
نورتي الموضوع
دمتي
سلامي
 
السلام عليكم
شكرا لك لطرحك هذا الموضوع الحساس ،تحليلك منطقي وتناولت الموضوع من عدة نواحي.
أنا عن نفسي أرى أن عمل المرأة ضروري في وقتنا هذا فهو سلاحها
أما بخصوص الإقامة الجامعية والإبتعاد عن البيت العائلي فهناك بنات ماشاء الله هدفها الدراسة و النجاح وهناك بنات ربي يهديهم ،والسبب يرجع للتربية فبنت الفاميليا وين تحطيها متخافيش عليها .و البنت لماشي مربية حثى لوكان يحبسولها قرايا راح تبقى هي هي فالبعد عن العائلة ليس معيار نحكم به على البنات ،ربي يوفق الجميع. ++++تقييم

و عليكم السلام
العفو أخت رنيم
نعم أختي
الطفلة تتربى ماتتعسش
و رأيك رائع أختي
ربي يوفقنا كااامل
شكرا جزيلا على المرووور و التقييم
نورتي موضوع أختي
دمتي
سلامي
 
السلام عليكم و رحمة الله
أولا الموضوووووع في قمة الرووووعة + تقييم
أنا من وجهة نظري الخدمة مهمة بزاااف بزااااف للمرأة في هذا الوقت و إنتي في موضوعك كفيتي ووفيتي ماكالاه نزيد نهدر ........ و أنا في رايي المشكل ماشي في مخالطة الرجال ... خاطر الطفلة المربية و المؤمنة حقا مايقرب ليها حتى وااااحد.. ولوكان تكون خبيثة تقعد فالدار ولا تخدم لاااااا فرق ......هذا من وجهة نظري
سلااااااااااااااااام
 
بالرغم أنو الموضوع طويل شوية بصح عجبني بزاااااااف انشاء الله تتحسن الأوضاع ..وربي يوفقك في قرايتك ..الطفلة تروح تقرى على روحها وتجيب ديبلومها لي هو سلا حها على خاطر هذا الوقت مايطمنش كلش تبدل ممكن اذا حب ربي طيح في راجل ماشي مليح يحقرها كي تطلق منو تلقى سلاحها لي يعاونها في اتمام حياتها وشكرا

هههههه .. وي سهيلة
طويل صح .. عييت نختصر ههه
و رأيك ثاني عجبني بزاااااف
حقا ما قلتي
ربي يوفقنا كااامل ختي
العفو .. الشكر موصول لكي
نورتي موضوعي
دمتي
سلامي
 
لي عودة إن شاء الله​
 
السلام عليكم و رحمة الله
أولا الموضوووووع في قمة الرووووعة + تقييم
أنا من وجهة نظري الخدمة مهمة بزاااف بزااااف للمرأة في هذا الوقت و إنتي في موضوعك كفيتي ووفيتي ماكالاه نزيد نهدر ........ و أنا في رايي المشكل ماشي في مخالطة الرجال ... خاطر الطفلة المربية و المؤمنة حقا مايقرب ليها حتى وااااحد.. ولوكان تكون خبيثة تقعد فالدار ولا تخدم لاااااا فرق ......هذا من وجهة نظري
سلااااااااااااااااام

اسمحيلي أختي خوليتا نعقب على كلامك وعلى ما لونته بالأزرق بالتحديد.
أختي ماكان حتى إنسان يأمن على نفسو الفتنة.
لو كان رب العالمين يعلم أن الإنسان يقدر يمنع نفسو من الفتنة ويقدر يحمي نفسو لما حرَّم الإختلاط.
النفس مهما كانت ضعيفة، وإختلاط المرأة بالرجال أمر محرَّم شرعًا، والفتنة نائمة وقادرة تنوض في أي لحظة.
مهما كان الإنسان تقي ومهما كان الإنسان مؤمن وصالح عفيف لكن قادر يضعف ويُفتتن. لهذا الواحد يدعي ربي بالثبات وما يقولش أنا ما نطيحش في الفتنة.
ربي يحفظك ..


 
السلام عليكم

ماعنديش كلام بزاف

قضية النسا يقراو ويخدمو
هاذي ماكاش لي يفتي فيها
pـويسك ربي اعطى الحق للمراة باش تقرا وتخدم

نحكي على قضية الاقامة
معليش اسيدي طفلة ادير اقامة
مي لازم تكون محاطة ومراقبة من ولي امرها
يعني راجل تكون عندو بنتو دايرة اقامة
ماشي يخليها هكاك بروحها مايحوس عليها مايسغسي مايراقب
وين راها ماعلاباليش ؟
راها تقرا راها مع الشيكور راها ولا راها
غير نهار تولي للدار
انا عندي الراجل لي عندو بنتو تقرا ودايرة اقامة
لازم عليه يراقبها ويحميها يعني مايرخيلهاش الخيط
pـويسك الطفلة راها ترفد معاها عرض وشرف عايلة
ممتدة عبر الاجيال

هاذي راها هدرة سطحية بلا مانخدلو فالصلب
Pـويسك راه صاري فالبلاد العجب المعجب
وواحد ماينكر


ايا صحيتووووو
 
سلام عليكم ختي تحيه خاصه لناس الي تطلب العلم وتفيد بيه الناس للخير ان شاء الله
اما في ما يخص البنت الله يبارك من حقها تتعلم او تخدم بيت والديها رضين عليها او محافضا علي كرمتها سوي في بلادها ولا بلاد الناس ربي يحسن عون كل واحد
نشاء الله
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top