- الأوسمة
- 1
السلام عليكم ورحمة الله تعالى وبركاته
اليوم عملت تارت بالفواكه وكرام باتسري ان شاء الله تعجبكم
عجينة بريزي
250 غ فرينة
120 زبدة أو مارغارين
75 ملل ماء بارد +ملعقة صغير ملح + ملعقة كبيرة سكر
كريمة الباتسري
500 ملل حليب
2 حبات بيض + 100 غ سكر عادي + 60 غ مايزينة + فانيلا
للتزين 2 برتقال + 2 كيوي + 2 بنان
التحضير
اول حاجة تحضير عجينة بريزي نحط الفرينة ونضيفلها الزبدة وندخلها مليح بلا عجن وبعدها نضيف الماء كلو بعد ما ضفنالو مغرف ملح وسكر ونخلط مليح باه يذوبو ونتعصل على عجينة نوضعها فكيس بلاستيكي ونخليها ترتاح ليلة كاملة فالثلاجة
فاليوم الموالي نجبد العجينة من الثلاجة تروحلها البرودة ومن جهة نحضر كرام باتسري
نحط الحليب يسخن على نار متوسطة ومن جهة نضرب حبتين بيض مع سكر حتى يضاعف الحجب وفالاخير نضيف مايزينا انحي الحليب على نار ونضيف للخليط باه ميطيبناش البيض ونخلط بكثافة باليد ونرجع الكل على النار ونواصل التحريك باه متلصق
نتحصل على هادي لكرام نحطها فسينية ونرشها بشوية سكر من فوق باه متعمل قشرة من فوق ونخليها تبرد
نرجع للعجينة نحللها بحلال ونوضها فالمول ونثبها ونحطها تطيب فالفور نص طياب ونحمرها من فوق
هنا بعد ما حمرتها نجيب لكرام باتسري ونعاود نخفقها بخلاط كهربائي نتحصل على كرام طرية نضيفها فوسط الطارط
وفي الاخير نزينها وكل واحد واختيارو اليكم الصور
وبعدها رجعتها للفور كملت طيبتها وخرجتها ودهنتها بلجيلي انا دهنتها بمعجون مشمش وضفتلو شوية ماء وحطيتو على نار وكي برد دهنت الفواكه من فوق ولكي الاختار تحبي تطيبها ولا لالا
ان شاء الله تعجبكم
