ارجو المساعدة في اقرب وقت

[اشواقى الى الفردوس]

السلام عليكم راح ادخل في الموضوع انا اليوم زوجي زعلان مني لاني مارحت لبيت اخته حتى ابات عندها لاني ماحب انام في بيت غير بيت اهلي او بيت زوجي هو قالي لاتروحي لبيت اهلك وبعدين قالي قولي لاخوك يجي يديك والحين انا في بيت اهلي وماحد راح يرجعني لبيتي من اهله مش عارفة وش ندير هل نقول لخويا يرجعني ام لا مع العلم انه اهلي مش عارفين بس انا والله ماحب المنطقة الي تسكن فيها اختهياريت تجاوبوني بسرعة

 

[بنت الـ25]

السلام عليكم اختي
اختي انتي غلطتي غلطة كبيرة لما عصيتي أوامر زوجك
هو ما طلبش منك الشي تع الموحال
وش فيها كي تروحي عند اختو تباتي عندها؟
الرسول عليه افضل الصلاة والسلام قال :
( لو كنت آمرا أحدا أن يسجد لأحد لأمرت المرأة أن تسجد لزوجها)
وهذا يبين مدى خطورة موضوع عصيان الزوجة لزوجها ولو في أتفه الأمور
وعلى كل حال، فاحذري وخافي ربك في أمر الزوج، ففي الحديث الشريف:
" والذي نفس محمد بيده لا تؤدي المرأة حق ربها حتى تؤدي حق زوجها كله حتى لو
سألها نفسها وهي على قتب لم تمنعه"
أختي الكريمة لي صرى صرى وانتي الآن في بيت أهلك
ننصحك تتصلي بزوجك تطلبي منو يجي يرجعك لبيتك واوعديه متزيديش تعصاي أوامرو
(مع الأخذ في الاعتبار انو لا طاعة لمخلوق في معصية الخالق)
وإلا تطلبي من أخوك هو اللي يديك
خلاصة القول يلزمك ترجعي لبيتك وزوجك وتتعلمي من هاد الموقف وتاخدي العبرة
وربي يقدم اللي فيه الخير
​

 

[M3TaZ eLLMa]

السلام عليكم

أخت الطيبة مرحبا بيك في بيتك وقسمك ومنتداك وناسك وأهلك

ما عندي ما نزيد على كلام أخت مينات لقد قالت الصواب وراح نظيف القليل فقط

أخت الطيبة ما لا تعرفينه أنو زوجك زعلان منك ليس بسبب عدم ذهابك إلى اخته لا لأنك تفظلين أهلك على أهله وهذا هو الخطاء يأختاه زوجك الان متقلق من هذا التصرف منك يعني أدخله في دوامات كثيرة ومتهات انت من صنعها لنفسك ولزوجك وبكل صراحة عندو الحق يزعف منك لأنك تفظلين أهلك على أهله أعملي العدل بينهم لأنو أهل زوجك راهم أهلك بالدراجة الاولى وراك فرد من عائلتهم ما عليش لوكان طلب منك تذهبين لبيت ابن عمه والمبات عندهم هنا عندك شوي من الحق لكن هو طلب منك بيت اخته . وحبيت نذكرك لا شيء لازم تنتبهي له هو انو زوجك عندما طلب منك الذهاب لبيت اخته ربما هي جات من عند اختوا لربما دخلوا في سياق وحديث عنك بأنك ما تزوهمش وبأنك لا تحبي المبات عندهم وووووو وعند رفظك اصبحت المذنبة حقا في نظره راكي تفهمي عليا حكيات نساء يأختاه هذا راه مجرد استنتاج لا غير مني لهذا كما قالت الاخت مينات كلمي زوجك احسن وطلبي منو السماح وانو أهلوا هما أهلك يا طيبة حتى لا تدخلين في صرعات ومشاكل داخلية تتطور مع كل حديث يا طيبة ما عليه «كل ابن آدم خطاء، وخير الخطَّائين التوّابون » .

وإن شاء الله زوجك راح يتفهم وضعك وتعود العلاقة كما كانت يا طيبة

حكيتلك شوي عن الصرعات الخفية التي لم تنتبهي إليها يا طيبة وراه مجرد إستنتاج لا غير مني لكن حطيه بعين الاعتبار

ورنا نقلولك اسرعي بطلب السماح من زوجك


وإن شاء الله نسمعو منك أخبار مليحة


وربي يوفقك وثبتي روحك في كل خطوة

وموفقة​

 

[!≈[سُِـِيٌــِـِفّ اٌڷِخً‘يٌـرُ]≈!]

أختي كان عليك تسمعي هدرتو

في يوم من الايام نفس القصة وين نسكن انا زوج امر زوجته نفس الشيئ و لم تسمع كلامه

في نفس اليوم اتهمها ....

مانيش نلوم فيك

راني نقلك باه تحافظي على علاقتك معاه

ان شاء لله ما يكون غير الخير اختي

حاولي تشرحيلو الوضع

و رايح يفهمك بإذن لله
​

 

[خيرة جانت]

السلام عليكم راح ادخل في الموضوع انا اليوم زوجي زعلان مني لاني مارحت لبيت اخته حتى ابات عندها لاني ماحب انام في بيت غير بيت اهلي او بيت زوجي هو قالي لاتروحي لبيت اهلك وبعدين قالي قولي لاخوك يجي يديك والحين انا في بيت اهلي وماحد راح يرجعني لبيتي من اهله مش عارفة وش ندير هل نقول لخويا يرجعني ام لا مع العلم انه اهلي مش عارفين بس انا والله ماحب المنطقة الي تسكن فيها اختهياريت تجاوبوني بسرعة

السلام عليكم ورحمة الله تعالى وبركاته:
أختي الكريمة أنا شخصيا نقولك الصح بالنسبة لي مش مشكل كي نضحي بنهار وندير حاجة حتى وان كنت مش راضية عليها وماتعجبنيش {ماتخالفش شرع الله} من أجل رضى زوجي باش نكبر في عينو وتزيد محبتي في قلبو، هذي هي الحياة الزوجية مش ديري غير الحاجة الي تعجبك وبرك .لازم انت تتنازلي وهويتنازل
باش يكون هناك توازن في المطالب وتعيشي في سعادة
أنا نقولك كلمي راجلك واستسمحيه ويلا طلب الأمر روحي وباتي بكل رضى وان شاء الله زوجك يرضي عليك لان رضاه من رضى المولى و مايكون غير الخير ربي يهنيك
تحياااااااااااااااااااااااتي
​

 

[־●ـ‗غمــــوض ــالــورد_ـ●־]

اختي لعزيزة انت غلطتي نورمالموا كان عليك تسمعي هدرتوا واوبليجي عليك ديما اديري رايوا باسكوا عندك غير راجلك بعد والديك الحاجة لوحيدة انوا عندك لحق تعصيه ايدا كان طلب عليك حاجة مترضيش ربي مي اpار صا ملزمكش تعصيه ..مام حاجة راكي متبغيهاش مي ديري لpوسيبل وحاولي تاكسابتيها وديريها على جالوا هكدا ترضي راجلك وتكوني ديما عزيزة وكبيرة في عينوا وتاني انت بعد تكوني متهنية وميكونوش بيناتكم مشاكل باسكوا ديفوا على جال حاجة تافهه خلاه بعيد الشر يصراو حوايج كبار ..ولحاجة لي طلبها منك راجلك راهي نورمال وراهي واجب واختوا دركا راهي كيما اختك لافامي تاعوا راهي لفامي تاعك التانية تحتاجيهم ويحتاجوك ونورمالموا انت بلا مايقولك تروحي لأختي تعرفيها وحدك انت بعد لازمك ديفوا تسقسي عليها ولاتزوريها باسكوا ماراهيش وحدة منهيك راهي دركا قريبة ليك كيما لحاجة لي تعني لراجلك راهي تعنيلك...وانا ننصحك دركا تعيتي لراجلك وتطلبي منوا السماح وحاولي تشرحيلوا الوضع ولحاجة لي قالهالك تقبليها وكوني هادئة بالك تزيدي تتسرعي كاش متقولي ولاتزعفي عليه راهوا بالاك يكون متقلق وعيطي لراجلك قبل قوليلوا هو يردك للدار وشوفي وش يقلك وايدا قالك قولي لخوك ولا حاجة كيما هك قولي لخوك مي حاولي هو تاني تفهميه بشوية بالاك كش مايدير في بالوا .....وانشاء الله غير الخير حنونة متقلقيش روحك راهم يصراو ديما خلافات كيما هك مي حاولي متزديش تكرريها اديها عبرة ليك .وانشاء الله يتفهمك راجلك وتوليو مع بعضاكم متفاهمين ومتهنين انشاءالله.​

 

[قناص الغرام]

اختي انتي تعرفي عقلية زوجك ديري الحاجة الي تريحك وتريح زوجك
ربي يصلح حالكم
​

 

[فتاة حساسة]

اختي نورمالمون تسمعي لهدرة راجلك..ربي يفك الاحوال بيناتكم

 

[::أبرار::]

و عليكم السلام و رحمة الله تعالى و بركاته

ختيتي أخطأتي و الله غلطتي غلطة كبيرة في حق زوجك

كان لازم عليك تسمعي كلامو، و ما تزعفيش مني (أنك ما تحبيش المنطقة للي تسكن فيها ختو مهوش سبب اصلا)، أما إذا ما تحبيش اهلو أو عائلتو، حاجة تفكريها دايما و حطيها بين عينيك زوجك هذا زوجك ما جاش للدنيا وحدو و ما كبرش وحدو يعني عائلتو للي رباتو و كبراتو و تعبت عليك، فمهما كنتي ما تحبيهمش فكلمة زوجك دائما لازم تنفذيها فيما يرضي الله، و تأكدي المشاكل الكبيرة تبدا من هاذ الحاجات الصغيرة لا سمح الله، و أعتذر منكي على كلامي ختيتي الغالية

فقط نصيحتي إتصلي بزوجك و إعتذري منو بأي وسيلة كانت و أطلبي منو يرجعك أو يرجعك اخوك، و إن شاء الله ربي يهنيكم و ترجع المياه لمجاريها و ربي يقدملكم كل الخير إن شاء الله

و إعتبري أختاه

سلامي
​