اريد النصيحة.....عاجل

[مشكلتي]

أنا فتاة عمري 25 سنة ، متخرجة من الجامعة ، اعمل حاليا عند الخواص

قصتي هي كالتالي:
تقدم لخطبتي شاب يخدم عسكري
ساكن مع والديه و5 أخوات و3 أخوة
اشترط عليا التخلي عن العمل والسكن مع عائلته
قبلت بيه ورضيت أن يكون زوجي
تمت الفاتحة وكل شيئ على ما يرام
بعد اسبوع من التعارف اكتشفت انه لا يليق بي صراحة
تاع نساء، لا يصلي ، ومشكاك بزااااف ، وما يعرف للمرأة قدر، بالنسبة ليه المرأة هي ألة تنفذ الأوامر فقط
ماعندها رغبات ، ما يحوس يعرف واش تحب أو تكره
أتذكر انو كان مهري 12 مليون وخاتم خطبة
بعد الفاتحة باسبوع قالي 12 مليون هاديك أكثر من حقك نورمالمون 10 ملاين وبزااف عليك
علما أنو المهر عندنا في الولاية أكثر من 15 مليون + الخاتم وووووو
قالي بالحرف الواحد بعد يومين من الفاتحة
لوكان تغبنيلي أمي نغبنك طول حياتك ، بصراحة خلعني بهاد الهدرة
مرة قالي وهو يبكي انا والله ما نستاهلك اجبدي روحك مني خير ليك
قالها وهو يبكي.........لم افهم المعنى حينها
وصل لدجة انو سب أهلي ، وعايرني بالمعقدة ( لأنني لم أعرف قبله رجلا) ولأنني بنظره لا أحسن الحديث مع الرجال وليس لي خبرة في هذا المجال
المهم قعدت معاه 8 أشهر وانا مخطوبة نسمع غير في الإهانات وقاعدة نصبر في روحي ونقول هادا واش كتبلي ربي
حتى جاء نهار وين أنا عيطت لأمو وقلتلها خلاص المكتوب بيني وبين وليدك هنا ويكمل
ماقدرتش عليه
وبالفعل تم فسخ الخطبة وبموافقة واقتناع أهلي
بعد شهر من الفسخ
يبعثلي مساج ويقولي مازالك في القلب وأمك عمري ما نسمحلها
( هو يعتقد أن أمي هي سبب الفسخ)
تخيلو جاء للدار وقالها بنتك تروح وترجع
يعني حتى ولو تزوجت سوف تتطلق
جاء باش يشتكي ويقولها بنتك ماراهيش تحب تهدر معايا ، راهي تغلق التليفون تاعها
الصراحة وليت نكره كي نشوف رقمو ، وليت نكره باش نهدر معاه
لأني دوما نسمع مالا يرضيني

الأأن تقدم لي شاب يخدم عسكر ي كذلك
عندو سكنو الخاص
اختو قالتلي انو يقدر المرأة بزاااف
وقالتلي عااقل بزاقف وحشام كيما نقولو

لكن لا يريدني ان أعمل نهائيا
كي قلت لماما عليه
حسيتها ما حبتش
أنا صليت استخارة في الأاول اللي فسخت خطبتي منه
وصليت كذلك في ألاخير هذا
وما نيش عارفة واش ندير
حاليا عندهم 4 اشهر وهم ينتظرون الإجابة مني
قولولي واش ندير
امي ما راهيش حابة نتزوج عسكري
لأنها اعتبرت من الأول
وخايفة يكونو العسكر كامل كيف كيف
ارجوكن انصحوني راه العمر يمشي بيا وما نيش عارفة واش ندير ؟​

 

[روز]

السلام عليكم

يقلك الخطاب رطاب واذا ماشكراتوش اختو شكون يشكرو
ولكن في نفس الوقت صعب تحكمي عليه أو تظلميه
ماتسرعيش كما تسرعتي في الاول
سقسو عليه مليح اصحابو وين يخدم..وصلي الاستخارة واتكلي على ربي
بعدها ربي هو لي يقدم ولا يوخر
المهم واضبي عليها وصليها بقلب خاشع واكثري من الاستغفا
موفقة
تمت الموافقة
ان شاءلله يفيدوك الاعضاء بالكلمة الطيبة
​

 

[السلطانة]

وعليكم السلام
الاول عافاك ربي منو راه كان باش يدمرلك حياتك
الثاني بعد ماعملتي الاستخارة خليها على ربي
وزيدي ادعي في الايام هادي راهي مباركة قيام الليل والدعاء عند كل صلاة اختي
صدقيني الدعاء راه يفرج عن العبد الكثييير ولي فيها الخير ربي يقربهالك

 

[آمِيْرَتُه]

وعليكم السلام
الآول دقولي عليه مريض واقيلا ربي هناك منه
آما الثاني كيما قالولك الآخوات سقسو عليه و صلي و استخيري مولاك
و نتاع قاع العسكر كيف كيف نقولك برك شوفي لأصابع يدك اذا كانت كلها زي بعضها فالناس كامل كيف كيف
ربي يكون معاك و يرزقك الزوج الصالح

 

[HAMZA USMA]

ربي يجيب الخير ،،،
إن شاء الله تصيبي ولد فاميليا
​

 

[اميرة في مملكة العلم]

ان شاء الله تجدين من يساعدك

 

[اميرة في مملكة العلم]

فقط لا تفقدي الثقة بنفسك و بالله

 

[ماكانش]

ليس كل العسكر كيف كيف وليس كل المعلمين كيف كيف وليس كل ليبومبي كيف كيف وليس كل ليبانتر كيف كيف وليس كل الزلابجية كيف كيف ......

 

[العَنْقَاءُ]

انا نقلك أخيتى
لكن لكل شخص رأيه
انا نظن ارتحت منه
لو نأخذ موجز التعليق لو كان يحبك حقا لما قال امك ما نسمحلها هذا في بداية المشوار قال هذه الكلمة
هل راح يكون أفضل من أمك ؟
ختى الفاضلت التى تقولها أمك أعمليها
اخبريه انك خلاص لا تريدين الاستقرار معاه
انا ما قدرتش مافيها حتى عيب
هذى من البداية كرهتيه فما بالك بعدها الزواج وغيره؟
أما قضية أخته من الطبيعى انا اختى تشكرنى لو اكون شيطان في الزلات هل سوف تقول لك هو شيطان؟
لا لا طبعا عكس ذلك
حاسس فيها إنة الموضوع هذا
لكن الله جنبك من بداية الامر
المعقدة
عيب والله ربما أنت تخجلين منه اليس كذلك هكذا يظهر انك بنت اصل
الكلمة هذه تقال عندما يخبرك ان تخرجى معه او تغامري اكثر..لكن حيائك وطهارتك ما رضت بهذا
اختى الفاضلت الله نجاك
والعسكر ليس كيفكيف لكن ..الحق مر فيهم وعليهم
بطبيعة الحال لن يكونو مثلي ومثل الاعضاء الذين فوقى راح يكونو مختلفين
وامك هى الاساس الرجل هذا من البداية لم يعجب أمك فكيف تريد التواصل معه؟؟
لم اجد تفسير لهذه الاخيرة
أما قضية المهر عيب تقال
لو كان يحفظ اية من قرآن فقط يعتبر مهر
نتجاهل المهر
لكن قضية امك هذه سببت لى حيرة وتيها
​

 

[Only me]

أنا نظن 4 أشهر كافية باش تقري ، ثبتي روحك يا اختي والرجال ماهمش كامل كيف كيف

يعني بالاك ها\ا لي جاك يعوضك على الاول

وربي يهنيك ان شاء الله

 

[حكاية قمر]

الحمد لله لي تهنييتي من هداك اللول لانو خلاص ما يصلحش اما هدا زاوج وكما قالت اخت ادا ماشكراتوش اختو شكون يشكرو نت سقسي عليه وحاولي تعرفي عليه كل شي وادا لقيتيه مناسب كملي معاه وربي يسهلكم ان شاء الله لانو كما قالوا اخوة ماشي كامل كيف كيف
​

 

[mima07]

اختي مادامك صليتي صلاة الاستخارة بربي انشاء الله ما يصير غير الي فيه لخير

 

[samsouma*]

ربي يقدملك الي فيه الخير اختي لازم تقرري لانه فترة 4 شهور باش ترجعو على الجماعة طويلة وغير مقبولة عند الاغلبية ..الاستخارة هي دعاء وليس معنى الاستخارة انك مثلا بعد ماتصليها ترتاحي او ينقبض قلبك او تشوفي مثلا منام مليح او كابوس لا ماش كيما نتوقعو
نتيجة الاستخارة بيد ربي سبحانه الى شافلك الخير فالحكاية رايح ييسرلك فيها ويسهلهالك ويقدمهالك والى العكس رايح يبعدها عليك
وكيما قالو الخاوى العسكر ماشي كامل كيف كيف بغض النظر على ان العمل تاعهم صعيب شوية
ربي يقدملك الي فيه الخير وربي يهنيك ويسعدك وحاولي متجبريش نفسك على قبول شيء انتي ماش متقبلاته وتقدمي تنازلات بسبب انه سنك راه يجري وراه ممكن يفوتك الحال على الزواج لالا ابداااا راكي في سن الزهور وهاذا هو السن الي الواحد يقدر يقرر ويعرف صلاحه مليح:thumb_up02:

 

[Raven Queen]

اسمحولي ليس اختصاصي

 

[Amira28]

السلام عليكم
يا اختي الناس ماهيش كي بعضاها انت فكري مليح قبل ما تخطي اي خطوة لازم تسالي عليه وعلى اهلوا ثاني ادا كانوا ملاح واقتنعتي بيهم هاداك هو المهم اما على الخدمة ماهيش حاجة ضرورية ادا كان هو قادر يوفرلك احتياجاتك ويتهلا فيك
صلي صلاة الاستخارة وانشاء الله ماراح يكون فيه الخير واتذكري كل شيء بالمكتوب

 

[هآجر]

سلام

متقلقيش روحك
صلي الاستخارة و خدي قرار و متتسرعيش وديري الفاتحة
ديروا خطبة اولا لانها مرحلة للتعارف بين زوج ومن داك تجي الفاتحة و العقد مع بعض ثم العرس
كاين بزاف ناس تغلط تزرب ادير الفاتحة بينما الاصح الخطبة تكون في فترة وحدها لانها مرحلة للتعارف بين الطرفين كل واحد يعرف عقليت لخر

اذا شفتي روحك مرتاحة ليه حتى لو محكتيش معاه توكلي على ربي و اقبلي و ننصحك ثاني ان اهلك يسقسيو عليه مش يقبلوا طول
ربي يوفقك و الف مبروك مسبقا​

 

[زهور الشوق]

غاليتي ربي يشفيك ويعافيك عـــــــــــــآجلآ غير آجل
بالاجر والثوآب على تحملك وصبرك ان شــــــآء الله
اما قضية انك تقولي واش مريضة لناس اللمة وللناس اللي حولك ..مانظنش فكرة سديدة
يكفي يا ختي اهلك يعرفو وواقفين معاك والا شفت كاش بنادم قادر يعونك حنا صحا قولي اما تقولي باش ناس تعرف وخلاص ماكالاه
عندك برك الا جا نصيبك خبريه علاجال من حقو يعرف
ومايكون غير الخير عليك زينة​

 

[jijo7]

سلام ختي الاعضاء راهم قالو وفاو وكفو ربي يجازيهم انا نقولك حاجة وحدة برك صلي الاستخارة وقولي مصليتش يعني داومي عليها علبالي الحال صعيب باه تقري يصح تاكدي انو بالاستخارة كلش يبالك وتسهل امورك وتاني ادعي ولوحيها في ايدين ربي وقولي ربي وكلتك امري واخترلي من عندك ورضني بما اخترت لي وكريها وربي يسخرلك خيرة امرككاين حاجة(مش بالضرورة تبالك الاستخارة ممكن تسهل امورك) سلام