واش نقولكم ....غرقت

[مشكلتي]

السلام عليكم
المهم ندخل في الموضوع ديراكت انا شاب في عمري 25 سنة جبت الباك و عمري 18 سنة كنت نحب العسكر بزاف دخلت للاكاديمية العسكرية لمختلف الاسلحة بشرشال تكونت 3 سنوات تكوين اساسي و الشبية تعرف واش معناه
ايا تخرجت و علقت رتبة ملازم و قاسوني نخدم في وهران المدينة الجديدة بالذات ايكول تاع الادارة العسكرية
المهم كلش نورما ايا حبيت ندير دار كيفي كيف الرجال قررت نتزوج و انا في عمري 23 سنة اي تقريبا 6 اشهر بعد ما رتبت في الخدمة تاعي وليت خدام نورمال....في الدار احنا 3 اولاد و بنت هذي البنت بنت خالي و مربيتها الشيبانية تاعي ملي كانت عمرها شهر يتسمى اختي و متراضعين معاها نحبوها بزاف قاتلي كاينة وحدة تقرى معايا في الجامعة طفلة عاقلة ماشاء الله قلتها نورمال معنديش مشكل هذي الطفلة في هذاك الوقت تقرى اولى جامعي قلت لشيبانية قالتلي الله يسهلك المهم العشرة
هدرت اختي مع الطفلة و هي راحت قالت لامها و بوها قالو معليش يجي يشوف الطفلة راح خويا الكبير و تفاهم مع بوها و عطالو الموعد و من بعد يديرلها ربي حل.
انا نهار الوكاند منخدمش و هبطت لدار و ديت الولدة و رحنا لمستغانم وكيما يديرو قاع الخطاب شافت امي و شفتها انا طبعا بحضور خوها الكبير عجبتها امي قالت لي شابة و تبان زدكة هههه .......انا الطفلة عجبتني
على فكرة انا لم ادخل في اي علاقة مع بنت قبل دخولي للجيش..اي لا اعرف حنونتي هذي و حبي و مانيش عارف كيفاه ......درنا موعد اخر باش نديرو حاجة رسمية ومابين الشوف و الخطبة تقريبا 4 اشهر ماكنتش نحكي معاها على الاطلاق نسقسيو على بعضانا عن طريق اختي لي معاها في لشومبر .....المهم دارو موعد و راحو خطبوهالي و و عقدنا بعد ما خرجت لونكات راكم عارفين العسكر ولات زوجتي بعقد رسمي و فاتحة خاص غي العرس هذا مكان...اسمحولي نحكي راني معمر و المشكل راهو جاي كبير وكبير
قلتلها نديرلك بورتابل و نحكي معاك مني داك بلا سماطة قاتلي اوكي و تفاهمنا باش تبلع عامها و من بعد تبلوكيه.قالت معليبش قابلة و هاذي تفاهمو عليها نهار الخطبة اي كل حاجة بموافقة بوها و خوها و هي اكيد كنا نحكو بصح ميش بزاف لباس الامور عادية صبت روحي انا وياها تقريبا نتشاركو في امور و نختالفو في امور و هذا عادي ربي خلق و فرق انا مكنتش غاصب على العرس و خليتها هي دير la date كي تصيب روحا واجدة مليح مورالموا و تكون وجدت قشها كامل راكم عارفين
وحد النهار خدام في الليل ضاقت بيا عمري راكم عارفين العسكر قلت في قلبي نعيط نحكي معا مرتي شويا بلاك تgلع عليا الغمة...حتا انا توحشتاها بزاف......كيماهاك بهذ الكلمة...درت النيميرو تاعها و عيطت صبتها en attente نخلعت عاودت كيف كيف en attente عاودت...محبتش ترفد و ليت النعيط و نعيط حتى رفدت المهم ....معامن كنتي تحكي قاتلي و الله والو و تبكي و كنت نحكي مع صاحبتي ....كانت تحكي معا صحبتها على 03:00 تاع صباح شكون يصدقها هاذي
كوبيت عليها و عيطت لاختي في هذاك الليل قلتلها وين راكي قاتلي راني في الدار مطلعتش للجامعة مكانتش معاها في لاشومبر.....ولات تعيط طفيت البورتابل مانكذبش عليكم جاتني حاجة وحدة في هذيك الدقيقة راسي نقتلها و نريح وكان سلاح في يدي المهم هذيك الليلة بايت حي نخمم كيفاش نخرج سلاح معايا....نقولكم على شخصيتي شوي انا انسان نارفو بزاف و كيما تقولوي الشيبانية نقباح بزاف و شحال دخلت للحبس العسكري "الكانزينة" كي كنت في stage علا جال حوايج بزاف
المهم رحت maison موبيليس و اجبدت relvu بطريقي الخاصة وصبت نيميرو جديد حاكيا معاه تقريبا 13 خطرة لمدة 5 ايام عيتلوا و طلبت نشوفوا مي محبش و سكر عليا الموبيل و من هذاك النهار النيميرو هذاك معادش يمشي دروك اتاكدت مليح شكون هو صاحبي محبش يخرجلي face a face
ماسبتش كيفاه ندير الدعوة مزيرة بزاف في الكازيرنة المهم كنت في حالة كبيرة من الزعاف قلت لوكان نحكمها نمصلها دمها وهي حية درت مشاكل كبار في الخدمة منها اكبر مشكل عملتو وهنا اقتلت روحي بروحي الي هو معا الكولونال في administration معجباتوش وحد الــpoint في الخدمة ولا يعيط و يسب مانكذبش عليكم هنا حسيت انو رايح نطرطق سبني رجعتلو الهدرة سبيتو دمرتو مانكذبش عليكم خرجت فيه زعافي حبيت نقتلوا هددتو بالسلاح ...حبسوني وحد الجنود و صف الضباط بغيت نكتلوا المهم القصة طويلة داوني للحبس العسكري ومن بعد فوتوني للـــ tribunal militaireو حكمولي سنتين حبس في البليدة مع الفصل الفوري من الخدمة العسكرية و عدم مزاولة نشاط اخر في سلك الامن او الجيش مجددا
كملتهم عندي عام وخرجت امي راهي في حالة كبيرة الدار تخلطت سمعوا انسابي في هذيك الوقت كنت في الحبس قالولي لخويا اذا رجع للخدمة اوكي اذا مارجعش نبطلوا ...وهذي النار راهي كاويتني مانيش حاب نخبر خاوتي و الوالدة غي اختي لي علابالها منكذبش عليكم دخلت في وحد الطريق مانتمناها لحتى مؤمن ان شاء الله ....دمرت حياتي كملت دراهمي لي دسيتهم غي فالشراب
كرهت الدنيا وبما فيها مانيش نخرج من الدار والديها قالولي مبطلو ارواح طلقها انامانيش باغي نفضحها واش رايكم ياناس انا حياتي راحت بالكل قلت نطلقها و نخلي كلش في قلبي شوفو الزهر تاعي كيفاه داير في لحظة خسرت كلشي مرأة و خدمتي
صدقوني نجي قاع نروح لوالديها و من بعد نبطل مانيش عارف علاه..... قولو عليا مذلول قولو خواف قولو لي تحبوا راني نقولكم واش كاين في قلبي راني حاب نطلقها عادي كيما طلبوا مني بلا اي فضائح و كي نتفكر نموت بالزعاف و الله انا راني في حيرة كبيرة
انا راني مابين حلين نطلقها و نفضحها و لا نطلقها بلا فضايح ؟ اسمحولي بزاف بلاك طولت عليكم اظطريت باش نختصر باش ماتسماطش عليكم القصة ولكن غرقت يا خاوتي
الان رايني منحرف بمعنى الكلمة خسرت كلشي كرهت الحياة عاديت اختي
باش نعاود حياتي من جديد بشهادة بكالوريا صعيب عليا بزاف بزاف بزاف بزاف كلمة وحدة نقولهالكم غرقت ...غرقت

 

[راضية حامدة]

تم الاعتماد
راني حايرة علاش عملت في روحك هكا من اجل وحدة بالدليل خادعاتك
و مليح خبيت و ما فضحتهاش انا نشوفها رجلة منك
لكن ان تكمل معاها و تعاقب نفسك و خربت خدمتك مش حل ابدا
المهم الكلام الان مش رح يبدل الاحوال
لكن نصيحتي ليك خويا العزيز
اتوكل على ربي و افتح حياة جديدة و اخطيك منها خاصة اذا هي ماهيش تحوس عليك
يعني بمعنى اخر
ما تقدرش تفرض روحك على اي واحد و لو خطيبتك
شوف وحدة اخرى و بالاك تعاملها مثل الاولى لانو مش كل البنات كيف كيف
ما خلاصوش البنات و بنات الاصل مازالو
و انت ولد حلال و فحل
ما تبكيش على اي واحد و ما تخسرش حياتك من اجل اي واحد
ماكانش في الدنيا حاجة تستهل انك تخسر امور على جالها مهما كانت
اعرف قدر نفسك و قيمتها
و شوف وحدة على حسابك و على حساب نيتك
و اتوكل على ربي
تستهل تعيش حياة كيما كل الشباب
تستهل تحب و تنحب
تستهل تفرح و تدير بلاصة في المجتمع
تستهل تفرح يماك و تخليها تفتخر بيك
و يماك تستهل تشوفك فرحان و مهني
و تاكد انها لما تشوفك تتالم هذا الشي يضرها بزاف
اقعد قعدة مع نفسك و فكر مليح
و فكر في مستقبل شارق
و اسعى ليه اسعى باش تعيش حياتك
حنا ما نقدروش نزيدو يوم واحد في حياتنا
لكن نقدرو نزيدو الحياة لايامنا
عش حياتك و خلي لي فات فات
خذ بالاسباب و راني متاكدة انك راك رايح تبشرنا قريبا
و بلي ربي رح يعطيك على قد ما خسرت ان شاء الله
ربي يفرحك و يفرح ميمتك

 

[العَنْقَاءُ]

اللى عجبتنى فيك أنك إبن فلان بن فلان
انا تجاهلت الشراب والمشاكل كلها
لان في قلبك فيه إيمان عظيم
اى قارئ لحرفك هذا سوف يعى ما في قلبك
كل ما اقوله لك اعانك الله على الخير ووفقك لما هو افضل
المهم انت صحتك بخير؟
فالامر إذن ليس نهاية العالم
أخى فيه ناس أعمارهم 30 سنة لهم كل المقومات ولم يتزوجو لان مشكلتهم العسكر
وانت عمرك 25 سنة فقط وانتهيت إذن شوف شغل وتوكل على الله
اما اقول لك اترك البنت او استمر ...الصراحت لا اعرف
اضرب فيها زوج ركعات وقول يارب
أنا أنا وأنت أنت أي طريق اسلك.
أخى مدام خاوتك معاك أنت في نعمة عظيمة


​

 

[♫الباحثة عن الحظ♫]

خويا نقولك حاجة برك صح يمكن انت خسرت وخسرت لكن اثبت بلي انت راجل للاسف كنت قادر تحكم روحك شوي مي الله غالب
انت مش فاضحها طلقا و تهنى منها وخلاص وهاك انت تطلع احسن منها وهي يجي زمان وتندم
افتح صفحة جديد هدا كل اختبار من ربي عاود ارجع لحياتك و عيش ومش ناس كل زي بعض
ربي يفرج عليك ويفتح عليك
​

 

[الباندي]

انا علا حساب مافهمت من قصتك راك مصمم على الطلاق ولكن راك تقول انا مطلق مطلق يعني نقول واش كاين على بنتهم
و لا نخلي سبة تاع خرجوك مل خدمة هي لي tezisté
بزاف عيك خويا اذا دير عليا روح طلقها عادي و كان شيئا ولم يحدث و متفضحاش و خليها على ربي و مع الضمير تاعها و خرج راجل و مايسالك ربي غير الخير
راني معاك صعيبة مي محبيتش منك كلمة مذلول ياو راك خرجت سيد الرجال صحيح الجزائرين منارفيين ودايمن غاصبينها بصح كاين وحد القرارات ندوهم تاع رجالة بمعنى الكلمة
اسمعني .....كل محنة تزيد في الراس فهامة
اذا تقدر عاود ادخل و راني معاك نجي ليك وين راك و نعاونك ولا نجيبـــك عندي للــدار و صدقني قصتك دوختني راني صادق معاك عاود ادخل و نتراسلوا و نديرولها حـل ان شاء الله ربي معاك و كاش جديــد رانـي هنا بلــي نقدر ربي يفرج عليك خويا متنساش راني نستنى فيــك...

 

[السلطانة]

وعليكم السلام

خويا انت صح غلطت كي تقلقت وعكرت حياتك على جال وحدة متستاهلش
لكن تقدر تعاود تفتح صفحة جديد توب الى الله وصفي نيتك برك ربي يرزقك كل خير ويرزقك بلالات النساء ان شاء الله

 

[الحلم الوردي]

وعليكم السـلآم والرحمة
صح غلطت باسكو ضيعت خدمتك على جال وحدة ماتستاهلش
وزيد انت حكمتها بالدليل
ومن الافضل لوكان صارحت والديها احسن
مي انت حبيت تستر عليها
ياك يقولو الدنيا هديا تعلمك حوايج بزاااااااااف
المهم خليها عبرة ليك وخلاص ماشي كامل الناس كيف بعضاهم
افتح صفحة جديدة وتوب عند ربي عاود
ارجع لحياتك و عيش نورمال باسكو حاجة ماتستاهل في هد الدنيا
ربي يفرج عليك ويفتح عليك ان شاء الله​

 

[آمِيْرَتُه]

السلام عليك
ربي معاك خويا
بدا حياتك و نسى كل شي
و ديك طلقها و تهنى منها ماهي متربية ماهي بنت فاميليا خدعاتك و مازال متوصل لدارك كون توصلك شادير تاكل السماء و الارض
ربي يفرج على خويا و يكتبلك حياة جديدة هانية و يرزقك الزوجة الصالحة

 

[عيشة مرة قدور]

سلام عليكم خويا نتمنى ترجع لطريق الصح بسكو هدي بنت متستاهلش ضيع حياتك على جالها ونقلك متغضبش ربي على جال امر مثل هدا ونقلك كما دارتلك هاك قول والديها بسبابها راك هاك ومن احسن مراة لي متصونش سمعت رجلها مهيش مراة والله ينعلها خويا فهم والدة تاعك وقول والديها واش دارت بسكو من بعد يولو يحكو بلي نت مش مليح وهيا مليحة

 

[ياسمين السطايفية]

قصتك مؤثرة اخي لكن هذا ابتلاء من الله عز وجل تب توبة نصوح يفرج لك ربي همك ولابد ان تخرج هذي الطفلة من راسك واحد ما يستاهل تغضب ربي على جالو صدقني و انا نشوف من الافضل ما تقولش لوالديها خير ما يهمكش رايهم فيك المهم نيتك صافية مع ربي و ابدا بداية جديدة مازال ما راحش الحال وربي يقبل التوبة من الناس اجمعين. واذا جوزت هدي المحنة ايمانك رح يزيد واحمد ربي انك فقت دوك خير من مبعدا.

 

[التائب الخاشع]

خوياا احسنت الفعل كنت رااجل وسيد الرجال والي انك استرت مااستر الله برااافو عليك ...
أما بمناسبة التقلاق والزعااف يخوياا قلل منو شوية لازمك مايصيبكش بوقلالق اطلاقاا إذا كنت هاااك هههههههه
اما بمناسب الطفلة هاي فتاكد ربي فضحها قبل لاتتزوج بيها وهذاا لانو ربي يحبك وحب يوريلك الحق ويرزقك اتبااعو لكن انت عمااتك العامية وروحت في طريق مسدود المهم الفائدة تعلمت حااجة في الحيااة وعلمتهانا معااك نتمنى ربي يرزقك بنت الحلال كما انت قدقد وربي يعطيك على حسااب قلبك ارجع اربي واستغفر مليح فما خااب مستغفرر وتااكد بانو الصلاة في جنااح الظلام من اعظم القرباات وابكي فيها وتضرع وصدقني راايح تشوف العجب سييي ورجعلي بالخبر حبيبي نتمنالك السعادة الابدية في الدنيا والاخرة
تحياتي ليك --التائب الخااشع ---

 

[ثَسْكُورْثْ نَثْدُوكْلِي]

السلام عليكم خويا والله غير بكاتني القصة تاعك وتاثرت بزاف ^حسبي الله ونعم الوكيل فيها *
المهم واش نقولك خويا مازلت صغير واللي صرالك كامل امتحان من ربي سبحانه باش يمتحنك على ايمانك ومدى صبرك
وبالنسبة للطفلة مادام عازم اطلقها تعمل صح طلقها وخليها مع الضمير تاعها اذا عندها ضميروخليها لربي يحاسبها انت ما تفضحهاش استرها *من ستر مسلما ستره الله في الدنيا والاخرة* وطلقها مليح ليك باش تنسى كامل الحكاية وغلق الصفحةوحل صفحة جديدة وبدى فيها راك صغير الله يبارك 25 سنة وماتخممش بزاف ربي يجيب الخير وصلي صلاة الاستخارة وادعي بزااااف لربي وماتنساش خويا تحافظ على صلاتك هي لتفتحلك ابواب السعادة في الدنيا وربي يرزقك بخدمة مليحة ومازال بنات فاميلية ربي يرزقك بزوجة صالحة وتعيش حياتك ولاروع برك شد في ربي وحافظ على صلاتك,,,,,دمت في رعاية الله
​

 

[*amina*]

السلام عليكم
من ستر عبجدا في الدنيا ستره الله في الاخرة
خويا انا منزيدش عليك اللوم و نقلك تقلقت و خسرت حياتك هدا امر مفروغ منو لانو صح واي واحد مكانك ميرضاش الخيانة سيرتو الا كانت نيتو صافية
المهم كيما قالو الاعضاء حاول تتقرب من ربي سبحانو و توب ليه هو لي يخرجك من الهم
"اني قريب اجيب دعوة الداعي"
وهدي الطفلة يا خويا كيما قتلك في الاول لي ستر عبد في الدنيا سترو ربي في الاخرة
طلقها بلا فضايح و عطيلهم سبب مقنع كأنك متقدرش تعيشها ولا حاجة كيما هكدا
المهم الفضايح رايحين يضروك انت تاني ماشي غير هي و راك تعرف مجتمعنا وواش راني نقصد
فرج الله همك اخي

 

[Hakan]

انا اللي مدوختني انو لوكان جيت تخدم راسك شوي برك وتخخليك من العصبية التي متاكد ان الجيش سببها بسبب ما يحصل هناك من اذلال للعامل يعني القوي ياكل الضعيف الطفلة معليش هدرت مع واحد يااخي البنات بزاااف طلق جدها وشوف وحدة اخرى انت كنت رايح تقتلها يااخي الطفلة ما هيش زوجة ليكك يعني مازال ما دخلتش عليها كيفاش تقتلها مهار تكون خاطب راك مازال قيد الاختبار وهي كذاللك مالا كنت ببساطة طلقها وتشوف غيرها وهذي قصة الشراب غير فوتها انت مومن نورمالمو كاين ربي سبحانو وانا نقلك حاجة والله ثم والله غير ففيها خير اولا فصلك من الخدمة باسكو من نظري الخدمة في الجيش باي رتبة كانت مذلة وهوان لاخاطر اللي راهو يصرا في الكازيرنات ما داروش النبي عليه الصلاةة والسلامم مع الصحابة كي تشوف الذل تقول رايحين يحرو فلسطين وهوما انفسهم ما حروهاش عندي شحال من صديق يخدمم في السلك العسكري وبرتبة مشرفة لكن دايما يقولولي اقرا في الجامعة وشد الحيط خير من ان تخدم جنرال في كزيرنة المهمم واش نقلك رب يسهلك خويا وندعيلك ربي سبحانو يهديك وان شاء الله ربي يتكفل بالعايلة وفيها خير ان شاء الله.​

 

[رابح66]

السلام عليكم

في الحقيقة هي قصة ماتبكي ماتفرح لكن تخلي الواحد مع أفكاروا يسرح
قضية الخدمة مكتوب ربي وإن كانت هناك أسباب متعددة أوصلتك لها
كما يقول المثل تعددت الأسباب والموت واحد. ربي يرزقك عمل شريف آخر
وكذالك قال الله * وعسى أن تكرهوا شيئا وهو خير لكم وعسى أن تحبوا شيئا وهو شر لكم*.
أما من تقول عنها زوجتك أنت لم تختارها هم من أختاروها لك ولم تسعى للتعرف عليها قبل الخطوبة
ولعل سبب كل المشاكل هو تسرعك وتهورك وعدم التراجع عن الشجارات والمنازعات هي من أفقدتك كل شيئ
أما عن التمسك أو الطلاق لا أقدم ولا أؤخر فيهما أنت حر وضميرك يمل عليك ما يناسبك
الذي أنصحك به هو مادمت حيا ترزق كل ماضاع منك يهون ويستخلف بخير منه إن أتقيت الله.*فأتق الله*
وفي الحديث جاء عن الرسول (ص) * أتق الله حيثما كنت وأتع السيئة الحسنة تمحها وخالق الناس بخلق حسن*​

تقبلوا تحياتي

 

[adel._dz]

السلام عليكم
سنة كنت نحب العسكر بزاف دخلت للاكاديمية العسكرية لمختلف الاسلحة بشرشال تكونت 3 سنوات تكوين اساسي و الشبية تعرف واش معناه

:s

؟؟؟؟؟؟
أنا لم أكمل قراءة هذا الموضوع التافه
​

 

[stelllo]

عسى القادم افضل ثق بالله

 

[دعاء الجنات]

بعد بسم الله الرحمان الرحيم
انت تسرعت شويا وماخممتش في مستقبلك
لانو ماشي كامل المستقبل متعلق بطفلة
واحدة كاين بزاف بنات في هاذ الدنيا
وانت صلح حوالك وبدا صفحة جديدة
اما هي ماتفضحهاش وكل ربي
هو علابالو علاش كانت تهدر
بالاك عندها مشكل ما او اي شيئ اخر
وتب الى الله تعالى راح يتوب عليك
ويرزفك من حيث لا تحتسب
​

 

[ROUAKIMOURAD]

وعليكم السلام ورحمة الله اخى العسكرى
اولا انت قالت ان هدى البنت من طرف اختك من الرضعة وهى مقيمة معها فى نفس الغرفة يعنى تعرفها مليح اختك!
2شىء انك قالت عيطلتها وكانت تحكى على 3وعلاش تعيط انت على 3!
3شىء انك قالت عرفت مدة المكلمات والرقم الدى كان يحكى معها بطريقتك الخاصة وما الدى منعك من معرفة صاحب الرقم بطريقتك الخاصة!
4شى انك قالت عملت مشكلة فى العمل العسكرى وانك كونت نوى تخرج السلاح ووو حتى ضرب مسوال اكبر منك فى الرتبة من اجل مشكلة شخصية يعنى انك لا تستحق ان تكون فرد فى الجيش الوطنى الشعبى مع احترامى لك انت مستهتر
المهم اخى الان انت بين مفترق الطرق تكون او لا تكون عليك بالجلوس مع نفسك والتفكير الرزين المبنى على العقل

 

[RoseBonbon]

وجعتلي قلبي يا خويا

مزالك صغير وجاي للدنيا بصح بسبب التهور تاعك وعدم تمالكك لاعصابك خسرت عملك وضيعت شحال من عام في الحبس وكويت قلب يماك

ومزالك تزيد تعمي فيها بتعاطيك الخمور..الله يهديك ياخويا

خسرت حياتك على وحدة ما تسواش زوج دورو

بالنسبة لهاد المرا

انت ورايك... الا حبيت تستر عليها .. ربي رح يستر عليك

والا حاب تفضحها وتخبرهم الحقيقة باش تبرد قلبك..هي اكيد راح تنظر

حاول تهدر معاها باش تخبرك علاش عملت هاد الشيء وتوصلو لحل ماشي مليح تخليها معلقة

ومن المفروض ان السجن يكون علمك ان التهور والتصرف الطائش اثناء الغضب راح يضيعك

حاول تحوس على خدمة وحبس هاذ السم القاتل واتقرب من الله بالصلاة والدعاء رح يرتاح قلبك

وحدة ما تستهل تخسر حياتك على جالها

ربي معاك.. وربي يعوضك بما هو خير مما سبق