مسمـن محـشي بالدجـاج والفرماج بالصور من مطـبخي

[روز]

السلام عليكم ورحمة الله تعالى وبركاته

كنت من قبل عملت مسمن معسل وبنات اللمة عجبهم
والغالية عفاف سجلته في موضوع مشكورة

مسمــــــــن الغـــــــــــــالية روز22 اللي طلبوه الاخوات بالشرح المفصل ‏

البارح جاتني فكرة اني علاه مانعملوش مالح بحشو مختلف
فاخترت يكون الحشو دجاج وفرماج روجي وصوص حمراء ونحتفظ بنفس طريقة عمله
وعملتو وجا بنين ياسر وخفيف
بدون اطالة نبدا طريقة عمله
،،،

أولا عملي عجينة المسمن العادية انا عملتها فقط بالفرينة
ولي تحب تعملها بالسميد تجي تاني مليحة المهم تدلكيها مليح

فرينة + ماء عجنتهم وخليتها ترتاح
بعدها اضفتلها الملح ودلكتها مليح وخليتها ترتاح
بعدها عملتها كريات متوسطين مش صغار لاننا نحتاجوهم كبار
وخليها يرتاحو باش يساعدوني في الخدمة

وحضرت لاصوص فيها:
2بصلة مقطع رقيق + ثوم + 2جمبو أو ملح مش مهم + زيت وخليتهم فوق النار حتى ذبلو
زدت قطعت 1 فلفل أخضر حبة كبيرة طرشي أو حار حسب الرغبة مقطع رقيق
+ 2حبات طماطم مقطعة رقيق + التوابل فلفل أحمر وفلفل أكحل زنجبيل وشوي قرفة
وخليتهم فوق النار حتى ذبلو مليح
درت عليها كاس ماء وخليتهم فوق النار

وامبعد عملت عليه 2 مغارف طماطم مصبرة ولما خثارت طفيت عليها

من جهة أخرى طيبت الدجاج في الماء والملح وفتتو
واذا حبيتي تشوحيه مع شوي بصل يكون مليح
ورابيت فرماج وخليتهم

وحضرت كريات المسمن نسيت ماصورتهاش جبتها من موضوعي الاخر :$

المسمنة الاولى تكون صغيرة ومانفتحوهاش بزاف لانو امبعد الخبزة رايحة تكبر
باش ماتغبناش

نفتحوها ونوزعو عليها لاصوص تومات مع الدجاج والفرماج ونطبقوها ونديروها طيب

وبعد ماطيب نزيدو نفتحو كرية اخرى ونديرو عليها لاصوص تومات والفرماج والدجاج ونطبقوها عليها كما الصور

ونرجعو نطيبوها ونرجعو نغلفوها بعجينة اخرى
نكرر هذ العملية قد ماتقدري على الاقل تكون 5مرات

الكريات الاخيرة مانعملولهاش لاصوص تومات
نكتفو بالدجاج والفرماج كما في الصورة

ونصيحة فقط :
لو طيبيهم في مقلة تيفال كبيرة يكون احسن
باش تساعدكم في تقليبها وتحريكها احسن من طاجين المسمن
واذا عجزتو تقلبوها لانها رايحة تكون ثقيلة وسخونة
تقدرو تستعينو بغطاء الطنجرة

وواصلو العملية

وهاذي النتيجة في شكلها النهائي
راكم تشوفو في الفرماج كفاش ومقرمشة ورقيقة

وهنا لما قطعتها

وهنا شوفو الطبقات كفاش رقيقة وحشو الفرماج والدجاج بينهم

صحة وهنا
ان شاءلله تجربوها في اقرب فرصة واكيد تعجبكم
دعواتكم
​

 

[الحق سلاحي]

السلام عليكم ورحمة الله
اممممممم فنانة في المسمن =)
ميرسي ليك روز

 

[Pyar]

السّــلآام علييكم..
وآو قمــة في الروعـــة
يشهي، يعطييـك الصحَة طآطآ هبــة
تحيـآاتي ^^.
​

 

[آمِيْرَتُه]

السلام عليك
يعطيك الصحة على الطريقة
يسخف مع البرد لي رانا فيه
بارك الله فيك

 

[la_safa]

السلآم عليكم ^^

يممم الله الله بآينة تشششهي
يعطيك الصحة ^^
​

 

[قوقا]

قلتهالك ونعاود نقولها مبدعة
ماشالله يشهو
نشاء الله راح نجربهم

 

[{مُدَلَّلَتُهُ}]

شهيتيينيي ♥ الله يبارك شكلها هايل و أكيد طعمها تاني

يعطيك الصحة ! فنانة الله يبارك عليك
​

 

[السلطانة]

وعليكم السلام
مسمن هايل راكي مبدعة في المسمن
الله يبارك
​

 

[ام اشراق]

وعليكم السلام
خرجلك هايل يسلموا ايديك على هذا الابداع
بوركتى سيدتى

 

[الحلم الوردي]

اممممممممممممممم
الله يبارك ماشـآء الله عليك اختي
مسمن وعليه لكلآم جاك روووووووووعة
بصحتك اختي​

 

[روز]

بارك الله فيكم
مليح لي عجبكم ولما تجربوه راح يعجبكم اكثر ان شاءلله

شكرا على المرور

 

[ندى الورود]

امممممم مسمن يهبل ويسخف ريوقي سالو
يعطيك الصحة ياروز دائما تتحفينا بجديدك المميز

​

 

[الحياة كلمة]

ماخليتي فيا والو يا اخت روز

راه عندي دقيق تع المعارك قلت ندير بيه بغرير

ساعة راكي تلفتيلي رايي

نعاود ندير محاجب كيف تاوعك والله شهيتيني

تسلميلي على هالطبخة

تاكليهم بالصحة والهناء

 

[روز]

شكرا أختي ندى الورود بارك الله فيك

الحياة كلمة جربيه وان شاءلله يعجبك
شكرا على الردود

 

[AnGeL*dZ]

ما شاء الله راكي معلمه يا طاطا روز
خرجلك يشهي اني نقرا ونعاود باش نستوعب لعل وعسى نفحال ونجرب

 

[روز]

راه ساهل عزيزتي كوثر انتي جربي خبزة وحدة برك وشوفي
واذا اي سؤال راني هنا
شكرا علي المرور

 

[بنت الـ25]

كرهتيني فالمحجوبة وشهيتيني فالمسمن خخخخخخخخ
وزيد بالدجاج يا عيني يا عيني
آرتيست وش نقولك قتلتيني
يعطيك الصحة روزااا
​

 

[أم منيــــــر]

السلام عليكم
والله غشابة بزاف نجربها ان شاالله
يا رب تخرجلي كما نتاعك
شكرا لك

 

[روز]

منوت راهي فرصة للتغير من المحجوبة
راح تعجبك اذا ذقتيها
جربتها عفاف الجزائرية و عروستنا راها فرحانة بالنتيجة

ام منير تبعي الخطوات برك وهي تجيك كما شفتيها
ان شالله تعجبك
شكرا علي المرور

 

[الحياة كلمة]

اخت روز عاودت رجعت فرايي ودرت ليوم بغرير بصح غير مسمن لي درتيه نجربو ان شاء الله


تحياتي يا شاطرة