السلام عليكم ورحمة الله وبركاته
أنا فتاة جزائرية عمري 23 سنة،كي كنت صغيرة في عمري عامين طحت من كرسي مرتفع وذلك أدى إلى ميلان في عينياي بمعنى "حَوَل"،ماتولهوش ليه في دارنا إلى بعد يومين أو أكثر طبعا الأحداث هاذي أنا نحكيها بناء على واش حكاولي في دارنا،المهم بعد حادثة السقوط أخذوني والديا لعند طبيب مختص ولتما بدات حكايتي مع النظارات الطبية اللي كنت نكرهها و مع هذا تحملت ولازَمتني من سن الثانية إلى غاية يومنا هذا،خلال هاذو الأعوام كملت في المعالجة أطباء العيون اللي في ولايتي كامل رحت ليهم ورحت حتى خارج الولاية والحمد لله عينيا تحسنوا بزاف العين اليسرى شفِيت تماما وبقى ميلان قليل جدا في العين اليمنى في ولايتي لقيت طبيب مختص بقيت نسويvـي عندو هاذي مدة 4 سنوات أو أكثر،رحت مرة لكونترول قالي أن الرؤية تاعك سليمة 100/100 وهذا بعد التاست اللي دارهولي تاع الحروف،ونظارات خاصة وغيرها يعني المشكل بقى في الميلان تاع العين،قلتلو دكتور آني حابة نحي النواظر بشكل نهائي مانزيدش نلبسو حتى لو تطلب الأمر ندير عملية جراحية،بعتني للجزائر العاصمة عند دكتورة خاصة ورحت تاني لمستشفى مصطفى باشا وبعد ليتاست اللي داروهملي قالولي ماتقدريش تديري العملية الجراحية لأنو هوما يقيمو الحالة قبل وإذا توفرت مقاييس معينة لتم يديرو العملية وأنا حسب قولهم مالحقوش عينيا للمقاييس اللي تتطلب العملية،درت بعدها عدسات لاصقة طبية بمبلغ تقريبا زوج ملاين فالبداية لبستهم وممبعد ماقدرتلهمش خاصة أنو يلزملهم عناية من نوع خاص وأنا خدامة ماعنديش الوقت بالإضافة ألى أنو يحكمو عام ونص هكذاك ويوليو غير صالحين للإستعمال،حتى حسيتهم يأثروا على العين ممبعد.
أفريل 2014 زدت وليت للطبيب قالي أنو كي تلحقي لسن 24 كاين حل طبي تقدري تنحي من بعدو النواظر كاين ليزر وكاين عفسة أخرى قالهالي بمصطلح طبي من شدة إنفعالي نسيت نسقسيه واش هي ماكانتش تهمني الطريقة، صدقوني كانت أمي معايا فرحت فرحة رحت للدار نبكي حسيت أنو الصبر اللي صبرتو مش راح يروح باطل والحلم اللي كبر معايا من الصغر أخيرا راح يتحقق،لكن صدمني بابا وردة فعلو كي قالي أنا مانيش معاك فالعملية وحتى فالليزر صدقوني أنا فاهمة بابا ومقدرة حرصو وخوفو عليا،خايف كون لاقدر الله كشما يصرالي ..
أنا خدامة فالشبكة الإجتماعية ملي قالي الطبيب هكاك وأنا دراهمي رغم قلتهم كامل نخبيهم قلت باش نطلع للعاصمة وحتى نجمع تكاليف الطبيب خاصة وأنه خاص،مازالني بالنواظر لدوكا اللي يشوفوني يحسبوني دايراتو للزينة لأنو حسب قولتهم مانبانش بصح أنا تشكلت عندي عقدة بالنقص كون نحي نواظر نحشم نشوف في حتى واحد حتى أفراد عائلتي،شحال من واحد حاب يقدم للدار يخطب وفي كل مرة نرفضهم بحجة أني مازلت صغيرة وأنا نخاف كون يقولي نحي النواظر ونتحرج وليت ندير في راسي ألف حساب،كون نتزوج كيفاش نجي بلا نواظر وووو ..!
كاين واحد إذا كتّب ربي ناويني للحلال(لاتربطني به أية علاقة) الإنسان هذا ماشاء الله علابالي بروحي لوكان نرفضو صعيب باش نلقى إنسان كيفو كلش فيه مليح خاصة التربية والأخلاق وفي كل مرة نخمم ونقول إذا جا نقول لالا نتفادى أي إحراج ممكن نوقع فيه ممبعد..خاوتي تعبت من هذا الموضوع اللي أرقني وكل يوم نبات نبني ونريّب كيما يقولو،بين حلم حياتي وبين بابا اللي مش راضي على الموضوع مالقيت واش ندير خاصة أني حابة فالصيف إذا قدر ربي نطلع للدزاير بصح من غير بابا ماعندو شكون يديني ويوقف معايا خاصة انو مانعرف ولا واحد فالعاصمة.
سمحولي بزاف خاوتي طولت عليكم،أدعولي ربي يفرجها عليا الله يستركم،دبروا عليَ واش ندير،أي إقتراح،رأي،سؤال ماتبخلوش عليا قصدتكم بعد ربي سبحانو ممكن نلقى عندكم حل.
