منتدى واش راك تهدر راه يشعل ليامات هادو بالمواضيع الكثيرة تع الأعضاء الكرام :up:
والفضل يعود لصاحبة السمو ساندريلا زماني :bravo01:
ألف شكر لها :regards01:
حبيت نشارك بهاد الموضوع فالمسابقة مي بما اني شاركت ديجا ما حبيتش نكون طماعة خخخخخخخخخخخخ :p
المهم موضوعي هاد المرة يحكي على الشيب :-h
ما نقصدش الشيب اللي يصرا فشعر الإنسان لما يوصل لسن الكهولة والشيخوخة:p
انما على الشيب اللي يدير في شعر الشباب في سن مبكرة
كامل الناس رح يشيبو في يوم من الأيام ، مي كاين اللي يشيبو في فترة مبكرة مقارنة مع نتاجهم
تلقى شعرو ابيض أو فيه شعرات بيض
والأسباب تع الشيب المبكر تختلف
كاين أسباب نفسية ،، أسباب تع الغذاء ونقص الفيتامينات،، وقادر يكون مرض عضوي ،، مي معظم الحالات تكون وراثية
:graduation:
المهم مش موضوعنا نحكيو على الشيب ،، الموضوع هو قصة رح نحكيهالكم
اقراوها وتمعنو فيها واعتبروا يا أولي الألباب
الحكاية حقيقة صرات لطفلة نعرفها مليح
هاد الفتاة تقدملها واحد حب يخطبها
الحاجة اللي عجبتني في هاد السيد انو قصد البنت من باب الدار ،،
هو صاحب خوها شافها شحال من مرة مع خوها فالمشفى عجبتو
قرر يحكي مع خوها ،، جى خوها قالها فلان او حاب يخطبك وش قلتي؟
راكي علابالك بيه خدام فالسبيطار حاكم بوسط مليح ،،
طفل واحد عند والديه ،، عندو الفيلا والطوموبيل،،
صغير فالسن يعني فهاداك الوقت مازال ما كملش 30 يعني بينها وبينو تقريبا 5 سنين ،
وما عندو حتى شروط تحبي تخدمي ، تحبي تقعدي فالدار،
تحبي تسكني وحدك تحبي تسكني مع والديه
:bravo01:
والأهم من كل هذا انسان متقي يخاف ربي ،، تربية وأخلاق ما عندها ما تخير عليه :thumb_up02:
قاتلو نخمم ونردلو الهدرة:-r
بون الطفلة جابتها ايامات وهي تماطل باش ترد الجواب ،
وتع دارهم كوم علابالهم الطفل ما فيه حتى حجة تعيبو يحسبو فيها تدلل برك
كي طولت على السيد عيط لخوها يستفسر ،، قالها خوها ايا وش قلتي السيد راه على نار يتقلى
قاتلهم هو الصح الصح ما عندو ما خصو مي الديفو الوحيد اللي فيه هو شعر
شعرو شايب
ااااااااااااااااااااااااااااااااو منك بالصح حبيبتنا؟؟؟:scared01:
تع دارهم كامل تشوكاو فهاد العذر ،، عياو يقنعوها باللي الشي هدا تع ربي
ولكان عندها اعتراض على هاد الحاجة يقدر يصبغ شعرو نورمال وووووو
حاولوا بزاف معاها مي هي يبست راسها ما تقبلش بيه
:smile02::smile02::smile02::smile02::smile02:
السيد مسكين دارتلو خيبة أمل
،، حزن عليها فترة ممبعد قرر يتزوج:bravo01:اي وي الدنيا عمرها ما حبست عند واحد ،، رجلا كان أو امرأة
السيد تزوج بلالات لالاها ،، وحد نهار كانت فالسبيطار عندها كونطرول لقاتو لتما
حبت تحكي معاه ما حبش يشوف معاها :dunno01:
ممبعد شافتو مخرج مرتو من جناح الأمومة ،، هي ما كانتش علابالها بيه بلي تزوج :cray02:
المهم تحكي امها قالت دارت فهديك لعشية حالا بالبكاء
قالتهم كون قبلت بيه كون راني انا اللي زيدت ليوم :very_mad::very_mad:
وهادي هي الحاجة اللي حيرتني : كي جى خطبك ما قبلتيش وكي تزوج ندمتي؟
:s:s:s
المهم بعد مدة تقدملها واحد يخدم تاني فالسبيطار
هو تاني عندو دار وطوموبيل وهو الطفل الوحيد عند امو بين 3 بنات اخوات
وصغير هو تاني مي هو شعرو أكحل :thumb_up02:
وهادو هوما الأمور اللي كانو يهموها :down:
ما فتشتش على الدين ولا على الأخلاق ولا على أي حاجة من هادو:s
تزوجت ،، مي شافت معاه الويل وعاشت معاه اسوء أيامها
ما تهنات بلبسة ما تهنات بتحويسة ما تهنات بالطفيل اللي رزقها ربي
بعدما ولى ولدها عندو 3 اشهر داها راجلها ضيفة عند امها
من هداك اليوم وهي تما ليومنا هدا
دوكا ولدها في عمرو 4 سنين كل يوم تتحسر وتندم اللي تكبرت على (اللي شعرو شايب):$
ولكن ما تنفع لا ندامة لا والو :down:
بزاف بنات يتكبرو على رجال بحجة السكنة والخدمة والعايلة
هادو ذرائع ولو كانت واهية نلقاوها مقبولة معليش
مي انك ترفضي راجل لمجرد أنو شعرو أبيض
اهنا نقولك لا يا حليش
وفي هاد المقام نستحضر قول الشاعر اللي قال
عيرتني بالشيب وهو وقار ... ليتها عيرت بما هو عار
إن تكن شابت الذوائب مني ... فالليالي تزينها الأقمار
نتمنى تكونو استخلصتو العبرة من هاد القصة
وتعرفو باللي اللي يتكبر على نعمة ربي رح يحرمو منها
واللي عندو ولا عندها حكاية تشبه لهادي يشاركنا بيها
سلام
آخر تعديل بواسطة المشرف:
