وعلاش صرالي هكا رقم 2؟؟؟؟؟؟؟؟؟

مشكلتي

كلمة المرور: 4algeria2024
إنضم
19 أكتوبر 2013
المشاركات
777
نقاط التفاعل
4,348
النقاط
51
السلام عليك مشكرا لكم جميعا
http://4algeria.com/forum/threads/421447/

صحيح قصتي ما تتصدقش و اسالة بزاف تدور في راسكم و كاين الي قالي واش اداك تحكي معاه من الأول و كل واحد واش قال المهم نشكركم كامل
نفهمكم بابا و ماما ما يحبونيش و قلبهم ما فيهش الرحمة و كأنهم ما همش عباد افهموني الله يخليكم يشوفوا فيا حامل و ما هدروا والو و ما قالوش نزوجوها ليه لا حابين يمكروا فيا ما يحبونيش ما علاباليش وعلاه و انا ما درت والو صحيح غلطت حكيت معاه من الأول لكن كيما قالي نهربوا و نعملوا لحرام قلتلوا لالا ما قلتش ايه .
و الاخ نجيب نشكرك لكن أخي لو عملت حاجة و رحت برجلي عندوا لكان قلتلكم كلشي لكن ربي يشهد بلي هو اللي تعدى عليا نعم و في ناس يحملوا من المرة الأولى و انا منهم
لكن انا ما نقدرش للبيبي اللي جاي اولا لانني صغيرة و ما نخدمش كيفاش رايحة نعيشوا علابالي بلي ما يقيموش بيه ماما و ماما راني نخمم عليه ثاني لكان عليا أنا حياتي تهدمت
قالي الأخ نجيب بلي كون طيحتيه في الشهر الثالثة و انا نقول حاولت لحد الآن لا جدوى
و هو راهو مزال متمسك بيا لكن ما نخرجش خلاص من الدار و اللي اداوني للطبيب هما والديا و الله تعبت تعبت ما لقيتش حل آخر علابالي نتمرمد كون يجي لدنيا تعرفوا الناس و كلامهم و نقولوا راني جبتوا باش رايحة نعيشوا و كيفاش و الله يا خاوتي الليل ما نرقدوش من البكاء و التخمام
و لقيت واش ندير المشكلة انا خاطيني كون رحت ليها برجليا نقول نتحمل المسؤولية لكن انا ما درت والو نتمنى فهتونا
نزيد نعاود نشكركم بزاف و نحبكم تزيدوا تنصحوني
 
آخر تعديل بواسطة المشرف:
رد: وعلاش صرالي هكا رقم 2؟؟؟؟؟؟؟؟؟

لا حول و لا قوة الا بالله
و كي تكلمت على النتحار معناها خايفة و هاربة من كلام الناس و نظرتهم
و ما يهمكش ربي و نظرتو لك
وش نقولك
خلي الامور تمشي كيما راهي
و مادام والديك هوما لي راهم يعطلو في الحل خليهم
و ما تفركيش في رزق البيبي هذا لانه كل واح يجيب رزقو معاه
ربما كي يشوو والديك بلي كرشك كبرت و الناس هدرت يضربوهم الحيطان
لا الانتحار و لا الاجهاض حل
قدر الله و ما شاء فعل
لا ينعك الا القرب من الله
استغفريه كثيرا و ادعي ربي يفرج عليك و يفتح عينين اهلك
و اذا تحتمت ديري وسيط من اهلك خالة او عمة او اي واحد عارفاتو يوقف معاك
ربما يلقالك حل و يزوجك بهذا الانسان
شوفي ليمن تحكي من اهلك و حاولي تخليهم يعاونوك على الحلال مش على الحرام

ربي يجيب الخير يا بنتي
و الله قبضتيلي قلبي
ربي يفرج عليك و يغفرلك و يهنيك و يرزقك من حيث لا تحتسبين
ان شاء الله نتفكرك بدعاويا اذا كانت لهم استجابة
ربي معاك حبيبتي
و طمنينا عليك و على جديدك
 
رد: وعلاش صرالي هكا رقم 2؟؟؟؟؟؟؟؟؟

والله بالرغم من كلشي منقدرش نحكم على والديك راح نصدقك و نجاوبك
إذا كان والديك صح ميحبوكش أنت راه في عمرك 18 شنة يعني بالغة واحد مايقدر يتحكم فيك
إذان الشخص اللي حملتي منه بالرغم أنه اغتاصبك وربما فعل هذا باش يحط عائلتك في الواقع نقولك إذا كان خذام وعندو بيت ويقدر يرفدك أنت و إبنك سارعي بالزواج بيه خير لك من المذلة هكذا تكوني مستورة
أنت مالأول راكي خاسرة حنانة والديك و رعايتهم منظنش إذا فارقتيهم راح يتغر أي شيء يعني في الأول و الأخير ماهمش معبرينك (تنبيه أنا أتكلم لما فهمته من كلامك ) حتى إضطررت للهروب ولكن الإنتحار حراااااااااااااام
و إجهاض طفل بريء وحرمانه من الحياة أيضا حرام
الله يرزقنا العقل والتربية ومهما كان متفرطيش في إبنك الرزاق هو ربي سبحانو
وتأكدي كل من يخطىء يحاسب الله يمهل ولا يهمل
ســـــلام
 
رد: وعلاش صرالي هكا رقم 2؟؟؟؟؟؟؟؟؟

بصح كيفاه رح يديرو كي يبان عليك الحمل
 
رد: وعلاش صرالي هكا رقم 2؟؟؟؟؟؟؟؟؟

أختي انا لم أقل لك طيحيه في الشهر الثالث


انا نيتي قتلك الطفل كي يوفى في الشهر الثالث و تحبي طيحي هدا خطر عليك جدااا بلاك انت مفهمتنيش

و زيد كلامك لم يكن واضح و علبالي بلي تنجمي تحمل من الاول بصح اختي في شهرك الاول كان علبالك بلي راكي حامل


و لوكان رحتي الشرطة علبالي مشي ساهل على العائلة نتاعك.


بصح لوكان راكي لقتي حل فالشرطة يا يتزوج بيك يا يتعقب على الفعل نتاعو


و راني نحوس نعاونك بصح انت الموضوع نتاعك كان ناقص منجمتش نفهمك مليح


اختي ارجوكي سامحيني بلاك راني غلطت في حقك


و الله ما احكمت عليك بصح اي واحد يقرا الموضوع يحس بلي كاين صوالح مخبين



ارجوكي اختي سامحيني و انا اكثر عضو في اللمة اتابع كل قصص مشكلتي احاول ان اساعد اين كان سواء رجل او امرأة.



واقول لك امام الاعضاء ادا احتجتي الى اي مساعدة اتصلي بالاعضاء لي تضعين فيهم الثقة و سنساعدك


بشرط أن تمحي فكرة الانتحار


و الشرط الثاني ان تمحي فكرة اسقاط الجنين هدا خطر على صحتك و خطر أيضا عليك مع الله سبحانه و تعالى.



أختي أرجوكي للمرة الثالثة ان تسامحيني قد فهمتي تعليقي خطأ.


 
آخر تعديل:
رد: وعلاش صرالي هكا رقم 2؟؟؟؟؟؟؟؟؟

والله القصة نتاعك غريبة
كفاش والديك رافضين لي غلط معاك ولي من المفروض باش هما يجرو موراه باش يسترك ويسترهم من الفضيحة
ونزيد نقولك حاجة كباباك عرف واش كاين وما قتلكش راكي مليحة لاخاطر المجتمع نتاعنا ميرحمش شحال من واحدة غلطت الغلطة نتاعك هربت خوفا من باباها ول خاوتها
وزيد والديك رافضينو والله ما فهمت راني مستغربة
واش نقول انا يبالي يلا الراجل راه حابك روحي تزوجي بيه وستري روحك وحافظي على هداك المخلوق لي راه جاي للدنيا ووالديك من بعد يتقبلو الامر الواقع
اول مرة نسمع هادي
الله يهون عليك ويسهل امورك
هادي نتائج التهور نصيحة للبنات كامل شرف البنت اغلى ما عندها شوفو اختكم كراها تعاني الله يكون في عونها
 
رد: وعلاش صرالي هكا رقم 2؟؟؟؟؟؟؟؟؟

قلبي وجعني من قصتك والله
ياختي هذا كامل مكتبهولك ربي ، عندك حل واحد اصبري وخلاص
مام والديك ماوقفوش معاك ،،، مي كاين ربي ورحمتو واسعة
لا تيأسي
انا حابة نفهم علاه والديك مازوجوكش ليه
هذا التبهديل كامل وماكفاوهمش
هذو مش حابينك تتستري
وآخرتها كيفااااااااااااااه ؟؟؟؟؟
الانتحار مش حل ليك ،مزلك صغيرة وجاية لدنيتك
الصبر ثم الصبر ثم الصبر




 
رد: وعلاش صرالي هكا رقم 2؟؟؟؟؟؟؟؟؟

لا حول ولا قوة الا بالله
والله محيريني والديك وحتى ما يحبوكش وما يهمهمش امرك غي يستروك ويسترو رواحهم من الفضيحة
ومع الوقت راح يبان عليك الحمل كفاش راح يكون الحل
ربي يهديهم ويصلحهم
اختي ديري فبالك بلي الانتحار ولا الاجهاض حتى واحد فيهم ماهو حل
اتوكلي على ربي ولي فيه الخير ربي يجيبه
وزيدي حاولي احكي مع يماك ما تمليش كل وقت قوليلها يمكن راح تفهمك مدام مشي انتي لي رحتي ليه
ربي يكون فعونك ويسهلك

 
رد: وعلاش صرالي هكا رقم 2؟؟؟؟؟؟؟؟؟

مآم تكون هي راحت ليه ولا هو اللي راح ليها نفس الشئ بصح النتيجة واحدة
وهي انو البنت ضيعت مستقبلها وشرفها والحل الوحيد انها تتستر وتغطي على نفسها
انا حيروني والديها ،،،،، ناس اي تقتل الاروااح على جال الشرف
وهوما جايتهم عادي المهم ماتتزوجش بالشخص هذا
ونساو بلي هوما تاني راح يتفضحوا والناس تهدر فيهم ورح يلوموهم
ربي يهديهم
 
رد: وعلاش صرالي هكا رقم 2؟؟؟؟؟؟؟؟؟

اختي اسمحيلي مي انا قصتك مزالت ناقصة لحد الان والله اعلم

...راكي تقولي مزال متمسك بيا و في نفس الوقت والديك رافضين هذا الزواج ؟؟؟؟ في هذي الجملة كاين تفاصيل بزاف !!

شوفي اختي روحي سوي وضعيتك انتي وياه عند القاضي قانونيا .... ولا روحي معاه عند محامية تكون متمكنة في قضايا الاسرة تعطيك حل قانوني او استشارة قانونية تنقذك و ممكن تزوجك عن طريق الدولة هكا باش تضمني حقوق الطفل على الاقل و نروح معاك بعيد الحل على الارجح بيد هذا السيد فقط لاغير لا والديك لا والديه

....و كيما قال الاخ نجيب اي مساعدة اتصلي بالمشرفات يمكن نصيبولك حل عبرهم

...ربي يفرج عليك وعلى الملايكة اللي راه جي في الطريق

 
رد: وعلاش صرالي هكا رقم 2؟؟؟؟؟؟؟؟؟

يا عمري ربي يكون معاك


و الله غير راني حاسة بيك


السيد هذا ما نقدروش نحكمو بلاك ندم بالاك الحب و الشيطان عماولو البصيرة ديالو


صح غلط 100% بصح قادر يتوب


المشكل هنا هو الوالدين -_- رانا في 2015 مازالو عباد هكا ؟ كيفاش ما يخافوش عليك و على المستقبل ديالك ؟ علاش راهم شادينك عندهم ؟ انا من رأيي توقفيلهم حتى يوافقو صح رضاية الاله من رضا الوالدين بصح ماشي هكا


راهم يغلقو على الراجل أبواب التوبة و الرجوع لربي و راهم يضيعو في حياة فتاة في عمر الزهور و وليدها لي مازال ماشافش الدنيا حرام عليهم


و فيما يخص الانتحار.. اخطييك يا حنونة ربي قادر يقلب حياتك في رمشة عين لهذا اهربي لعندو ما تهربيش منو.. الطفل رزقو يجي معاه و انت صلي و اطلبي ربي صباح و عشية يفرج عليك و يهدي والديك لطريق الحق


و اذا صح ماراكيش غالطة ولا غلطتي و تبتي ربي ماشي ظالم لعبدو الضعيف راح ينصرك و يجعلك حياتك و حياه وليدك منارة ان شاء الرحمان


ربي يحسن عونك
 
رد: وعلاش صرالي هكا رقم 2؟؟؟؟؟؟؟؟؟

اختي ديري في بالك بلي ماكاش حاجة صعيبة كيما غضب رب العالمين نتي لا خممتي في الانتحار تكوني هنا غير مؤمنة وفي مشكلتك واعذريني على الصراحة انا صغيرة عليك بصح على بالي شا راني نحكي ولي يعارض كلامي يقوليوالديك عندهم لحق يزعفوا هذا شرف تاعهم وما يسمحوش فيه حتى واذا اغتصبك تعرفي مجتمعنا وكلام الناس ماغاديش يصدقوك محااااال
نتي دعي وديري ربي في خاطرك وكل شئ ليه حل طلبي سماح من والديك عاودي وعاودي فهميييييهم حكيلهم في الدنيا هادي عندك غير هوما وما يدوملك حتى واحد شوفي هادا يجي يخطبك وقنعي والديك وتزوجي كي شغل حاجة وما صرات
انا هذا لي نقدر نقولهلك اختي ربي يسامحه لي ضيعلك حياتك وكلي عليه مولانا
وربي يهدينا كاملين
ان شاء الله ن سمعو خبار عليك تفرح ونتمنى مشكلتك تتحل في اسرع وقت
 
عاشقةالورود، تم حظره "حظر دائم". السبب: مخالفة القوانين
رد: وعلاش صرالي هكا رقم 2؟؟؟؟؟؟؟؟؟

يا لطيف قصة مؤثرة جدااا فتاة في عمر الزهور في دقيقة حياتها تنهار وتتهدم بكاملها بسبب لحظات رومنسية عشتيها في ساعات ولا تعرفي انو راكي في هاوية الطريق تروح هذه اللحظات ويبقى العار ملازمك طول العمر بسبب بسيط لانك انت الفتاة لاحول ولا قوة لك و الراجل يعيش عادي ولاباس عليه وينساك في لحظة
ربي يكون في عونك اختي وربي يعاونك في ايجاد حل مناسب يرضي ربي اولا ومبعد يرضيك
لا أضع الغلط على الرجل العاشق وحده فقط بل انت ايضا عندك نسبة 70 بالمئة من مشاركتك في هذه المشكلة الكبيرة جدااا واصلا هذا العاشق المزعوم ليس رجلا بمعنى الكلمة لو كان رجل ويحبك مثلما قلتي ماصرالكش واش صرى احب جسدك لا عقلك
من المستحيل ان امك وباباك يكرهوك ماكنش والدين يكرهوا ابناءهم من المستحيلات السبع يكونو والدين هك الا اذا كنتي انت مكرهتلهم حيااتهم بطبعك او عندك اسلوب معين تقومي بيه ماهوش عاجبهم
وألوم على والديك او بالاحرى أمك لانها قبل ماتكون امك هي صديقتك واختك وكل شئ وعلاه لم تنتبه لك كي تعرفتي على هذا الراجل تصرفاتك تبدلت ووو لو انتبهت امك لما حصل لك ذلك
وشئ اخر مهم لم ينتبهوا لهم اعضاء اللمة انت قلتي انه خطفك ؟؟ كيف عرف مكانك لي كنتي فيه ساعة ماخطفك ؟؟ اكيد كنتم متواعدين مع بعضكم ومتفاهمين على مكان معين بالهاتف من المستحيل انو يعرف مكان الذي كنتي فيه ويجي عندك ويخطفك لازم يكون عارف انت وين
وحاجة اخرى هل عندما خطفك ماكنش الناس في ذلك الشارع ؟
هل طلبتي مساعدة من اي واحد في ذلك اللحظة ولم يساعدك احد ؟
هل تتذكري مكان الذي اخذك اليه وقام بفعلته الدنيئة ؟ اذا تتفكري المكان باستطاعتك ان تقدميه كدليل ضده امام العدالة وتصفي كل صغيرة وكبيرة في ذلك المكان وهذا الشئ يكون ضدو ولايقدر انكار ذلك
هل الرجل العاشق قلتي له انك حامل ؟ لازم يعرف وانت هديه وخوفيه بابلاغك لللشرطة

وعلاه والديك ماشكاوش بيه للشرطة والعدالة تقوم بعملها ويكون في علمك هناك تحاليل طبية تثبت نسب طفلك ومايقدرش ينكر ذلك

والانتحار ماهوش حل هك راح تضيعي حقك والظالم عايش لاباس عليه لازم تجيبي حقك لانو لو سكتي عليه راح يزيدو يتمادو اصحاب العقول الصغيرة على ابرياء مثلك لازم والديك يوقفو معاك في هذه المشكلة باباك يهدر معها ويلقاو حل وهذا الراجل لي فعل فعلته لازم يوقف معاك سواء بارادتو والا غصب عليه -

اللهم استرنا من اولاد الحرام
واختي يارب يفرج عليك وان شاء الله يجي لعندك وتتفاهمو بالتي هي احسن خير من العدالة ويعقد عليك ويتحل مشكلك بحول الله
اختي صلي كل يوم وادعي ربي يفرج عليك وتوبي لله وارمي همومك على الخالق ربي يسر امورك
 
آخر تعديل:
رد: وعلاش صرالي هكا رقم 2؟؟؟؟؟؟؟؟؟

السلام عليكم
و الله قصة تحير كاين في الوقت هذا والدين هكا ؟؟؟؟؟ مانيش مصدقة ربي يهديهم
اختي الأعضاء ما شاء الله عليكم كفاو و وفاو لكن نبقا نقلك بلي الانتحار و الاجهاض ماشو حل
الدعاء ثم الدعاء و ربي ماش راح يخيبك
اختي ربي رح يخذلك حقك ما تخافي لا والو غير كوني متمسكة بريي و خلاص و الله قصة تبكي صحيح انت تفكري تقولي حياتي تهدمت و حياتي و حياتي لكن لا مازالك صغيرة و الدنيا هذي ما شي غير واش نفكروا حنا لبنات و خاصة في السن هذا تكبري و تفهمي مليح و لكان طيحتي البيبي يجي النهار و تندمي انت الله غالب عليك نلومك في حاجة وحدة فقط هو انك حكيتي معاه و هو ما حقوش يعملك هكذا لكن كاين ربي سبحانو
نقلك ربي يفرج عليك و ماننساك باذن الله بالدعاء لك في كل صلاة و ربي يجيبلك اللي فيه الخير و هذا قضاء الله و قدره ما تقدري تعملي والو غير الصبر
اختك في الله
 
رد: وعلاش صرالي هكا رقم 2؟؟؟؟؟؟؟؟؟

السلام عليكم اختي
لا حول ولا قوة إلا بالله العلي العظيم
انتي تقولي ما درت والو ،، لكنك نهار اللي قررتي تحكي مع واحد متعرفيهش فالبورطابل تما اللي درتي كلش
منكدبش عليك بزاف بنات حكاو مع شباب ما يعرفوهمش فالتلفون مي قليل لي صرالهم وش صرالك (قدر ومكتوب)
مي بصراحة الحاجة اللي حيرتني والظاهر انها حيرت كامل الاعضاء اللي ردو عليك
علاش والديك ما قبلوش بيه نهار جى خطبك؟
وعلاش قلتي باللي يكرهوك؟
خاطر انا نعرف الوالدين جامي يكطرهو ولادهم مهما دارو،، ولكان عادو يكرهوك صح نورمالمو نهار جى السيد خطبك يمدوك يتهناو منك (وسامحيني عالعبارة)
وهدا اللي يحبك ما دخلتش في راسي انو يخطفك ويغتصبك بالسيف عليك حتى لو كان يموت عليك
لأتو اللي يحب جامي يأذي اللي يحبها ،، يفضل انو ضحي بسعادتو معاك باش ما تتحقريش
علابيها استنتجت انو ما يحبكش أو لعله كيما قالولك الأعضاء يحب جسدك فقط
هادي تاني بقاتلي علامة استفهام
دوكا انتي ما سقسيتيش امك وعلاش لدرك مش حابين يزوجوك بيه رغم ان الامور اصبحت لا تحتمل الانتظار

يعني لو وضحتيلنا الأسباب هادي الكل ممكن نقدرو ننصحوك نصيحة تنفعك

أما فكرة الانتحار نحيها من بالك نهائيا ،،
استغفري ربي وتوبي في كل دقيقة وثانية ان شاء الله يسامحك ويسخرلك اللي يوقف معاك ي محنتك من حيث لا تدرين
أما إذا قتلتي نفسك وقتلت طفلك كيفاش رح تقابليه وتقدري على عداب جهنم؟؟؟
 
رد: وعلاش صرالي هكا رقم 2؟؟؟؟؟؟؟؟؟

السلام عليكم ورحمة الله وبركاته وبعد:لي قول أقوله لكي أختي الكريمة ولست أدري أهو مواساة لكي أو شيء من الرأفة مني لكي لكني أرى بعين العقل لكي وأقول: أنتي وابنكي الذي لم يرى النور رزقكما على الله ولا تكترثي على الرزق أما كلام الناس عليك فقد سبقتكي مريم عليها السلام لما جاءها المخاذ وقالت يا ليتتي مت قبل هذا وكنت نسيا منسيا بالرغم أنه روح من الله وكلمته التي القاها الله فيها ولم يتركها قومها بالقول الجارح حتى أنطقة الله من كان في المهد صبيا
أما أبويك فكان الله في عونهما فهما لا يزالان تحت تأثير الصدمة ولا يعرفان ماهو الصحيح من الخطأ لكن أقول والله اعلم أنه لما يجد الجد سيوافقون على زواجكما وهذا أخر الدوء وهو الكي بالله عليكي من الذي يوافق بزواج ابنته قرة عينه لشخص خطفها واعتصبها وحملت منه حملا غير شرعيا نسأل الله العافية ,,,فعلا حكايتك تركت الدموع على الخد جرباية وعند سائر الخلق رغم جراحها حكاية فلو كان بيدي لأخذت بيدكي حتى ولو كثر كلام الناس على وأصبح رواية ولست فضا غليض القلب بردي السابق عليكي بل من هول مصابكي انفعلت ...كان الله في عونك وتذكري قول الله عزوجل(قل لعبادي الذين أسرفوا على أنفسهم يا عبادي لا تقنطوا من رحمة الله فإن الله يغفر الذنوب جميعا)
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top