الدنيا تجارب.........

[♫الباحثة عن الحظ♫]

سلام عليكم كيراكم غاية

والله توحشتوني اعلابالي نورمال عبرو عبرو هههه

اليوم مانيش جاية نشكي و نهدر على ظاهرة وواش صاير نونو
اليوم راني جاية نحكي تجربة بسيطة حلوة الانسان مش يعرف قيمتها حتى تكمل

تاع الصح وين يقولكم
متعرف قيمة الحاجة حتى تخسرها
ابا انا اهنا اليوم مش خسرت العكس ربحت و ربحت مي راني حزينة

اعلابالي تلفتلكم زيما ربحت و راهي حزينة راح نفهكم

كل واحد فينا كل ما يفوت من مرحلة في دراسة تاعو للمرحلة الي تجي بعدها يموت فرحة

هذا يدي سيزيام و رايح للسيام تبالو عالم جديد
و كبر و هذا من سيسيام يضحك عليه و شايف بلي راهي فترة كره منها و راه فرحان لان راه طالع للثانوي

و تاع الليسي نفس الشىء راه فرحان لان دارلو اكتئاب في من قراية ليسي و باغي يطلع النيفو و يهرب للجامعة ومين تروح تشوف الجامعي تلقاه العكس فيهم الكل يتمنى لوكان يرجع للابتدائي احنا تبدا تحير ههه

مي مكانش منها كل مرحلة في حياتنا كانت ليها اثر و دور كبير و كل واحد فينا مين يتفكر الفترة الي راحت يبكي على ذكريات الشابة و يقول لوكان لوكان

انا اليوم راني راح نودع الجامعة

راح نخرج من تجربة
كبرتني صح و خلتني نعرف واش يعني العقلية الكبيرة
و التفكير تاع ناس كبار

ذكريات ليسي و سيام و ابتدائي ذكريات صغر و طفولة و طيش و حلاوة العمر الصغير

اما الجامعة حاجة اخرى خلاص لان جامعة تعلمك تعتمد على نفسك في كلش في قرايتك في حياتك

تعلمك انك تسير امورك بروحك بحر عليك واحد مراه مريض بيك تقرا راهي ليك مش تقرا تجي عليك

الجامعة تعطيك الحرية تحب تدخل تقرا مرحبا متدخلش مكانش غيابات و مكانش حاجة تجبرك

اهنا راهي تعطيك الامر و قرار بيدك انت باه تختار في النقطة هادي بذات راه خطة باه تتعلم حاجة وهي تاخد قراراتك بنفسك و تكون صقلت شخصية و اكتسبت ثقة شخصية تخليك مرة خلاف تعرف تتاخد الخيار بدون تردد

كلنا نعرفو ان الجامعة فيها les rapports و les exposés اهنا تاني نتعلمو حاجة اولا انسان راح يولي يعرف زيماه يعمل يبحث يحاور الاخرين و يبدي الراي تاعه و يدافع عليه خاصة انك تقف قدام ناس كبيرة في العمر والخبرة

وين يلحق انسان يقدر يواجه ناس هادو ويفرض رايه و يناقش راه زاد كبر شخصية وبناها اكثر واكثر

يعني مهما كرهنا تعب الجامعة
و ملل الجامعة ..
و دروس الجامعة ...
ونقاط الكارثية للجامعة ..
و معريفة الجامعة........

الا ان اكتسبنا تجارب و نقاط كبرتنا و خلتنا نزيدو نحسنو طريقة تعاملنا مع الناس و هكا الواحد يخرج للعالم الخارجي للعمل وين لتم يزيد يكبر صح ويزيد يتعلم

و مش غالط الي قال الدنيا هادي دروس
ابا ادوها من عندي ابروفيتو من اعوامكم من الجامعة لان مين يلحق الوقت وين راح تودعها وتودع الدراسة و كلش لتم راح تعرف صح قيمة الحاجة الي كنت فيها

وكانت هادي تجربتي انا و لعقوبة ليكم

سلامووو​

 

[Skor m@k]

رد: الدنيا تجارب.........

السلام عليكم
والله غير عندك الحق ختي
كل ما تطلع شويا فالقرايا ولا فلعمر تبانلك طلع النيفو
كل واحد وحساب الgوسطو لي لقا روحو فيه
فكرتينا فيمات زمان
مكاش لي مجاهش تخمام هكا
منعرف الى كامل العالم ولا غير حنا ليزالجيريا هههه
شكرا ليك ختي​

 

["Màrià"]

رد: الدنيا تجارب.........

صح ... عندك الحق
انا مزال ما وصلت الجامعة .. بصح نعيشها مليييح ملييييح
كيما يقولك ... عيش اللحظة ​

 

[HAMZA USMA]

رد: الدنيا تجارب.........

السلام عليكم
اختيار رائع وطرح مميز وتجربة مميزة
صافي تخرجتي خلاص مبرووك عليك
بالتوفيق أختي/بانتظار كل ما هو جديد منك​

 

[السلطانة]

رد: الدنيا تجارب.........

وعليكم السلام

الجامعة هي خبرة خلاف تزيدك بزاف عفايس في حياتك ماش تزيد في المستوى العلمي تزيدك في الفهامة تاع الراس بزاف :d
شكرا اختي على النصيحة لي حطيتيها في موضوعك
​

 

[Hakan]

رد: الدنيا تجارب.........

شكراا على الموضوع الجميل والتنسيق الرائع
هيه يااختي راكي عفستي على الجرح
صح الواحد حاب يكمل ويتخرج ويعيش حياتو لكن والله نهار نتفكر تجماع صحابي والشقاء نتاع الليالي البيضاء
والتعب نتاع الاختبارات الواحد يضحك ويبكي
بارك الله فيك على مواضيعك القيمة بارك الله فيك
وان شااء الله نسمعو عليك اخبار جميلة..​

 

[آمِيْرَتُه]

رد: الدنيا تجارب.........

السلام عليك
من أجمل مراحل الدراسة
صح تعلمك الجامعة بزاف صوالح
مرسي على الموضوع

 

[باتنية و نص]

رد: الدنيا تجارب.........

سلـــآمــ عليكمــ

~

أنا من لي نشفا على روحي ونا عاقلة ورزينة وفاهمة الدنيا من ايام الابتدائي،،،أحم ^^^

فعلا هاذي هي الدنيا كل ما تكبر تزيد تتعلم حوايج كثر،،هاذي حاجة مفروغ منها

بزاف فينا اللي يقولو الدنيا تمشي وتبشاع،،لكن كون نجيو للصح نلقاو بلي العبد اللي كل ما يكبار تزيد عليه المسؤولية ويتحلو عينيه على بزاف حوايج (وممكن كاين اللي عندو مشاكل عايشهم من صغرو ) مي كي كان صغير ما كانش فاهم كان وقتو كامل عاطيه للعب ،،،مي كي كبر وفهم عاد يتقاسم هاذ المشاكل مع والديه اللي كانو يتحملو كولش غير باه يخلوه مرتاح ويشوفوه ديما زاهي ويضحك


الجامعة ثاني باصستثناء الدراسة راح تعلمك بزاف صوالح ،،،مثلا نوعية لعباد وكيفاه تتعامل معاهم

راح تصادف الصالح والطالح،،حباب صلاحو واللي يحب يدير الخير
مي انا الحاجة اللي راني مقتنعة بيه انو الواحد لازم يتعامل بمبادءو وشخصيتو مهما كانت طبيعة العبد اللي معاه
وياخذ حذرو من رفقة السوء لانها تهلك

وخاصة البنات واحنا عارفين نظرة الناس لينا كجامعيات
لكن انا على قناعة تامة انو بنت الفاميليا كون تحطها في الف وسط تبقى بنت فاميليا
ويبقى الحذر واجب


رانا كامل في طريقنا باش نودعو الجامعة ،،،وفعلا ربماراح نحسو بشعور مختلط ين حزن وفرحة ،،،واكثر منها حزن لانو عارفين انو اللي جاي اصعب وانو كل سنين التعب و الشقاء و(الكوبياج ^^) ممكن تروح في كيل الزيت في دولة بلخير على قولة جدي

لكن الحمد لله اللي خلق ما يضيع ،،وربي يرزق كل واحد على حساب تعبو وشقاه

ميضوع مؤثر بحق

سلمت يداك

تحياتي ​

 

[Perle Blanche]

رد: الدنيا تجارب.........

السلام عليكم
الصلاة و السلام عليك حبيبي يا رسول الله
مشكورة على مشاركتك لينا هاذي التجربة
بالنسبة ليااا كل جزء ذكرتيه خليتني نتفكر مرحلة عشتها صح
و الاكيد انو مرحلة الجامعة من اهم المراحل لي فت بيهااا لاني صح فيهاا اعتمدت على روحي لا غير
و الحمد لله ديت منها تجارب بزاف
رايحة نقلك مزالت تجربة العمل رايحة تزيد تخليك تعيشي تجارب و انا هاذي تاني لي هزيت منهاا
انك تتعايشي مع اشخاص مضطرة بحكم الخدمة تتعاملي معاهم بشكل يومي
و هاذي لي رايحة تزيد تقويك
مشكورة حبيبتي
تقبلي مروري
​

 

[Nina's]

رد: الدنيا تجارب.........

العآم الجآي ان شاء الله راح تبدآ حياتي الجامعية, ان شاء الله ننجح فالباك و نروح للعآلم لي راكي تهدري عليه ^^ ربي يوفقك
​

 

[LINA LOLO]

رد: الدنيا تجارب.........

مبروك التخرج وشكرا على الطرح الرائع

 

[faith8]

رد: الدنيا تجارب.........

ايه صح والله النهار اللخر تاع لا غيفيزيون فالليسي قبل الباك كامل خرجنا نبكو نودعو فالاساتذة و الأصدقاء
والله خرجت المورال يكركر
مي درت عقلي فراسي وهي سنة الحياة ومهما كان راح تجمعنا المصادفات
وليوم ان شاء الله راح نبداو صفحة جديدة و محور جديد تحت عنوان الجامعة يادرا واش راهي مخبيتلي
ان شاء الله ربي يوفقنا كامل للطريق الصحيحة اللي يرضاها
تحياتي​

 

[faith8]

رد: الدنيا تجارب.........

و انتي بادشونص تستاهلي كل خير ربي ييسرلك ويفتحلك ابواب الخير ان شاء الله​

 

[روميسا]

رد: الدنيا تجارب.........

السلام عليكم و رحمة الله و بركاته
بارك الله فيك اختي على هذا الموضوع هذه اول مشاركة ليا في هذا المنتدى حبيت نعطي راي بكل صراحة انا راني معاك في امور ونختالفو في امور اخرى انا مثلا لا اجد ان les exposés فيها ابداء راي و محاورة مع ناس كبيرة في العمر والخبرة انا واحدة راني على ابواب التخرج ان شاء الله لم ار طوال مشواري في الجامعة استاذ ايناقش و حتى الطلبة مايسقسيوش كل واحد هموا الوحيد النقطة و الكلمة المشهورة انخرج عامي برك قليل وين نرقاو طلبة يقروا من اجل العلم اما التعامل انا ليا في الجامعة كل واحد نفسي نفسي الا من رحم ربي
رغم هذا راني معاك في
و دروس الجامعة ...
ونقاط الكارثية للجامعة ..
و معريفة الجامعة........

 

[mà_dikrà]

رد: الدنيا تجارب.........

كـلآم فـ مـحلـوآآ
يـعطيك الصحه
ومـبروك عـليك الـتخرج
وعـقوبه لـلـعمـل
الـحلآل إنْ شآءَ الله
وَ بآلـتوفيق
حبيبتي بآدشوونص ​

 

[همس الوُرود]

رد: الدنيا تجارب.........

السلآم عليكم ورحمة الله~

كلآم رزين و ظريف و تع وحدة مثقفة ~
شكرآ على الإفآدة أختي ومتحزنيش هدي هي الدنيآ~​

 

[آلاء هبة]

رد: الدنيا تجارب.........

سلام يعطيك الصحة على الموضوع الشباب فكرتينا في ايامات حتى مع النقاط الكارثية والمعريفة و..وو....
بصح الانسان يتعلم بيان ويتعلم كيفاش يتحدى نفسو ويتحمل مسؤولية افعالو
ومباعد كي تروحي لميدان العمل ان شاء الله تزيد تبانلك حوايج اخرى تشوفي الناس كيفاش تتعامل
ربي يهنيك الزينة ويفرح قلبك تقبلي مروري

 

[jiji la star]

رد: الدنيا تجارب.........

أنا خرجت نبكي نبكي نبكي من الجامعة على صحاباتي وعلى الأساتذة وعلى البلاد ...الجامعة ولاسيتي تدخليها تبكي على خاطر حاجة جديدة و خايفة و مشي موالفة وتخرجي منها تبكي عاى خاطر والفناها و بغينا بعضانا و الحمد لله توحشتهم بزاف بزاف

 

[Den DOR]

رد: الدنيا تجارب.........

الدنيا تجارب .. صح وكل يوم الانسان يتعلم حاجة جديدة
أما لازم يعرف كيف يتصرف الدنيا فيها الباهي و الخايب
توري المليح و القبيح
مشكورة على الموضوع
​