maryama louma
:: عضو مُتميز ::
- إنضم
- 17 جوان 2015
- المشاركات
- 651
- نقاط التفاعل
- 1,011
- النقاط
- 51
بسم الله الرحمان الرحيم
الحمد لله نحمده و نستغيثه و نعوذ به من شرور انفسنا و سيئات اعمالنا
الاخت بنت الـ 25 اعطتنا فرصة لنفرغ ما كتمه القلب و ادماه
من بين ملايين القصص التي صادفتني قصتي مع السارق و بداية المصائب التي سقطت على رأسي
القصة التي بسببها اصبحت على شفا حفرة من الجنون و دخول المصحة العقلية
حكايتي طويلة و اتعبت يداي من الكتابة اصبروا و صابروا معي و خذوا العبرة
في يوم من الايام كنت ادرس سنة ثالثة ثانوي كان عندي باك
خرجت كعادتي في الصباح على 8سا و خرجت امي للعمل و ابي ايضا و اخواتي صغيرات الى المدرسة
كان عندنا فترة اضراب لذلك قررت نرجع للدار لاخاطرش مانيش من هواة الزنقة
و فعلا رجعت للدار كانت العاشرة تاع الصباح
حليت الباب و ما حبش يتفتح زيرت عليه و فتحتو بسيف
و لقيت الباب الدخلاني مفتوح
تما دخلني الشك و عرفت بلي دخل سراق للدار
دخلت غير بشوية و رفدت فأس تاع الجنينة و فالدورة حكمني واحد و لوا يدي في زوج حتى طاح الفاس
ما نحكيلكمش الخلعة اللي كنت فيها
دخلني و غلق عليا فالخزانة و مزية كانت خزانتي فيها مراية كسرتها و خرجت
و السراق كان مشغول يعمر فالساشي الذهب و لي تابلات و تيليفون تاعي غالاكسي بلا ما شافني ضربتو للراس تغاشى و خبيت الذهب في مكان الجنون و ما يلقاوهش و كي جيت نخبي الصوالح لخرين ماعلاباليش وش دارلي ضربني لقيت روحي مكسرة فالسبيطار ,, و السراق دا الالكترونيات و هرب ,,
اففففففف كي نتفكر
المهم بابا راح ديبوزا بلانت عند الشرطة و انا بقيت مكسرة تقريب شهرين ,,
المصيبة ماشي هنا
المصيبة واحد النهار بابا راح للشرطة باش يشوف التحقيق وش فيه
ايماجينيو وش قالولو :
اعذروني على المفردات
""" بنتك هي اللي ورطتكم و السراق صاحبها و ماعندك والو عندنا روح ربي بنتك """
اااااااه حسبي الله و نعم الوكيل
و بابا جا عندي ,, يا جماعة كون غير ضربني كون غير قتلني قبل ما يقولي
"" شكون هو صاحبك ؟؟ ماتحشميش تفضحينا ؟؟ بالاكي تزيدي تقربي من خواتاتك تفسديهم روحي و والله ماتزيدي تشمي الهواء تاع برا """
امنوني يا جماعة راني نكتب و نبكي ,,
ماما تعرفني مليح و عارفة اخلاقي و صفاتي و وقفت معايا
و دارت التحريات تاوعها راكم عارفين حنا النسا نجيبو الرسمي
لقات بلي الضابط اللي خبر بابا هو نفسو وحد الراجل حب يخطبني و بعثلي اخته اللي عنذنا فالليسي و انا رفضت بلا ما نخبر بابا على خاطر مازالني صغيرة و عندي الباك
و تبين بللي الهدرة اللي قالوهالو عند الشرطة كذب في كذب باش يفسدلي السمعة تاعي و حتى واحد ما يرضى بيا
المهم قعدت شهر و انا كل يوم نستسمح بابا على الرغم اني ما غلطتش حتى سامحني بابا و رجعت المياه لمجاريها
و في هاداك الوقت لقيت في صاكي حوايج و حجابات و الله يستر عمل الشياطين
هاد الضابط بيه بالعايلة تاعو حبولي الخسارة و حبو يخسرولي حياتي الله ينتقم منهم داروني بين عينيهم
المهم روح يا زمان هاذي اخته دارتلي قضية فالليسي تاعي بللي انا لقات عندي مخدرات الله يستر و دارتها مع المستشار و حطولي مخدرات فالماء اللي تعطيهولنا المؤسسة كي نديرو الرياضة
و عيطو لبابا و قالولو كلام الله لا يسمعكم
جاء عندي للدار و كانت اول مرة يرفد يدو عليا و اعطاني صفعة لأول مرة و تخيلو يا جماعة
قالي راني غاضب عليك الى يوم الدين
و انا وش يبقالي من بعد غضب الوالدين اااااااااه
طحت و تألمت و بكيت و في لحظة ضعف حاولت نقطع الشرايين تاوعي
و بالفعل قطعتهم و دخلت للمصحة و تعالجت 3 شهور
و في هاد المدة و هاد المشاكل الكل وقفت معايا المعالجة النفسية تاع الليسي تاعنا
و فالوقت اللي كنت فالمصحة دارت تحقيقاتها و جابت دليل ملموس على برائتي و رفع بابا قضية على هاذ العايلة الضابط و اخته و بالفعل حكمو عليهم 6 سنوات حبس
و قاع هاد المشاكل على خاطر هو كان يحبني و مجنوون بايا و اخته كانت تغير مني
علاواه ؟ ما نعرف حسبي الله و نعم الوكيل
و في اخر يوم تاعي فالمصحة كنت حزينة لأني مانيش رايحة نلقا بابا و حنانتو عليا
و المفاجأة أني حليت باب الغرفة و لقيت عايلتي الكل معايا و هبطت لرجلين بابا و بستوووو بالدموع و هاديك المعالجة النفسية ربي يذكرها بالخير ربي يجزيها الخير
انقذت حياتي و مستقبلي
و الان راني نقرا علم النفس سنه ثانية رغبة باش نكون كيما هي و نحرر الناس اللي فقدت الامل
ان شاء الله ربي يبعد عليكم البلاء
ربي يخليكم
و نشكر الاخت بنت الـ 25 فتحت قلبي و الله
