- إنضم
- 13 أفريل 2013
- المشاركات
- 14,618
- نقاط التفاعل
- 54,535
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السّلام عليكم يا ناس لمتي الطيبين والغاليين
ان شاء الله راكم لاباس ؟
المهم مانطولش عليكم لأنو علابالي راكم متشوقين تعرفو الموضوع لي عنوانو غير مفهوم
مالا ندخلكم في الموضوع مباشرة
مالا اليوم الصباح كانت ماما تقلب في القنوات رايحة وجاية , المهم توقفت وإلا استوقفتها
صحة معروفة وهي المسامح كريم - حصة جميلة - الله يبارك :up: , المهم حتى أنا شفت الحصة قعدت وقلت نشوف بالاك الإنسان يستوعب ولا يحن قلبو لما يشوف مشاكل الآخرين , ويحمد ربي شوي
المهم وفعلاً كانت قصة مثيرة للاهتمام , تحكي عن شاب جا يطلب السماح من أمو
و أمو مطلقة وربات ولادها وحدها حتى ولاو رجال ونسا ولكن ابنها هادا حب يبعد على طريق ربي وتبع أصدقاء السوء ودخل في الإلحاد عافانا الله ومن بعد تقابد مع يماه وخرج من الدار لمدة سنة , المهم لحسن الحظ وبسبب التكوين الجيد ولأنو تربى على الدين والصلاة رجع في الأخير للصح ورجع للدين وقال الشهادة أمام الجمهور ورجع ليماه وطلب يعوضها على كل ضرر سببهولها :up:
المهم هاد الحكاية كاملة ماعندهاش علاقة بموضوعي ههه :d
درك وين رايحة ندخلكم في الموضوع, بصراحة هاد المرأة عجبتني صراحتها وقوتها وكيفاه أدت دور الاب والأم في نفس الوقت بحنانها وقساوتها لي في مصلحة أبناءها
وأنا واش لي زاد عجبني فيها هو أنها امرأة منتقبة ما يبان منها غير عينيها والله فرحت لما شفتها هكا وقلت ما شاء الله , بصح هادا الوقت مازال ما قربتش الكاميرا لوجها :d هي قربت الكاميرا, حتى نلقى الشيطان لي في راسي بدا يتوقب ههه , أنا خاطيني :$
نلقى المرأة عينيها زرق الله يبارك وزيد مدايرة هاداك الكحل الله الله وفوق عينيها هاداك اللون الأزرق ولا البنفسجي ما ميزتش مليح , والله بعينيها برك سحرتنا فمابالك لو شفنا كامل وجها ؟ :-o المهم أنا حكمت لساني وبقيت ساكتة ومن بعد لما زادو قربو الكاميرا ونعتوها تعانق في ولدها حتى نشوف في حاجة لي خلات لساني يخرج وحدو هههه :p
يا خاوتي لقيت الأظافر تاعها قريب قدي في الطول ههه ومصبوغين بهاداك اللون البنفسجي لي يبرق والله يبانو من بعيد , تما قلت لماما والله راني حايرة :s
حايرة في ناس لي دارت خطوة صعبة ودارت النقاب لي نص الناس راهي تحتاج جرأة كبيرة باه تقدم على هاد الخطوة ومن بعد يفسدو هاد التقرب من الله بهاد الحوايج , وخاصة أنها كبيرة في السن كنت جات صغيرة نقولو بالاك مديتها الدنيا :down:
مرة تاني وحنا راكبين في الترامواي حتى نشوف في راجل ملتحي طلع هو ومرتو لي لابسة جلباب ما شاء الله حتى خيمارها وزوج أمتار , بصح مع شفت وجها تخلعت
والله تقول وجه عروسة , واش من كحل ( تقول تاع الفراعنة) وواش من ألوان زاهية فوق عينيها وواش من حماير , حتى خدودها وحمرتهم , والله استغربت صح من هاداك الإنسان لي راهو قاعد قدامها ولي اسمو زوجها إذا عندو قلب وغيرة ولا عندو خشبة لداخل , زعما سترها باللبسة وخلالها وجها لي راهو أكبر فتنة, اصلا لي يشوفها عينيه يروحو لوجها مباشرة :down:
مرة تاني شفت وحدة في الطريق لابسة حجاب طويل ما شاء الله رجليها وما يبانوش بصح هاداك الحجاب مشبوح عليها تقول شرب في الطريق ههه
والله استغربت وتعجبت , كيفاه تتحدى نفسك والشيطان ودير خطوة مليحة وتستر روحك بحجاب شرعي ولا دير النقاب لي نص البنات يحتاجو شجاعة ومحاربة النفس باه يديروه ومن بعد تفسديه بحوايج كيما هكا ؟؟
أنا بصراحة وجعني قلبي وهدرت وماش معناها نهدر على الناس وأنا ملائكة, لأنو كامل نغلطو ونوليو للطريق المستقيم , أنا حبيت برك نشاوركم ونشوف رايكم وقولولي إذا راني غالطة
هيا اتهلاو في رواحكم وما تبخلوش عليا بآراءكم
تحياتي للجميع
سلآم
