- الأوسمة
- 1
***
اهلا بكم زوار رواد منتدى تربية الاطفال و رعايتهم لاشك انو الروضة في وقتنا هذا اصبحت لاتقتصر على الاثرياء فقط لكن شملت حتى اصحاب الدخل المتوسط من امهات عاملات و حتى الماكثات بالبيت ليستعد الطفل للمدرسة و يتعلم انو يختلط باقرانه .
ظروف الام العاملة و بعدها عن اهلها او اهل زوجها يخليها تضطر انها توضع اولادها في الروضة و المهم عندها انها تلقى روضة اما قريبة لبيتها او قريبة من مكان شغلها او شغل زوجها و ميهمهاش ما تتوفر عليه هذه الروضة .
في حين نلقى اغلب الروضات تفتقر لادنى الشروط المرسومة لرياض الاطفال سواء من حيث النظافة او المنهاج الدراسي او تقسيم الغرف على حسب سن الاطفال او حتى الوجبات .
راح نحكيلكم حكاية عاشتها وحدة من اهلي لقات خدمة في احد الروضات و هي خريجة جامعة تخصص علم النفس يعني تفهم في امور الاطفال , المهم قاتلي دخلت خدمت يومين تشوكيت بطلت الخدمة قالت قلبي متحملش واش راه يصرى في هاذ الروضة و كيف المربيات – ان صحت العبارة على مثل هذه الفئة – تعاملن الاطفال .
قاتلي وحدة من المربيات منشوفهاش طوال وقت الدوام تيليفونها ميخطيش وذنها و غالقة على روحها احد الغرف , و الاخرى تخيلو كي وصل وقت اكل الاطفال تروح تحوس في محافظ الاطفال و تدي لواحد تفاحة و الاخر ياؤورت و الاخر فرماج هاك و هي مدبرة غداها هههههه . و لي غطات كامل قاتلي واحد الام جابت بنها ميتعداش 6 اشهر من عمرو و مريض مسكين الحمة 40 درجة و دايخ كامل قاتلي تشوكيت في الام نفسها اولا كيفاش يعني متقدرش تبطل نهار على جال وليدها , أما المربيات مخليينو عادي قاتلي رحت ليه مسكين بدلتلو لي كوش و عيطت لماماه في التيليفون كي زاد عليه الحال باه تجي تديه .
و آخر حالة قاتلي كاين بنت عمرها 4 سنوات لاحظت انها تعاني من الحبسة و هاذ المرض يخلي البنت لسانها ثقيل و من المفروض انو مدير الروضة ميقبلهاش و يوجه اهلها الى مراكز متخصصة كالمركز الارطفوني . و نبه على العاملين انهم ميتكلموش مع الاولياء عن حالات ابنائهم حتى يتكلمو مع المدير و هو ينظر في الحالة – يعني اكيد راح يسكت- .
و خلي على افتقار الروضة الى ادنى الشروط.
و انا قريت عن مربية تعطي دواء نوم للاطفال باه يرقدو و اكتشفتها أم راحت باكرا لاخذ ابنها و لقاتو راقد عن غير عادته في تلك الساعة و مناضلهاش حتى وقت متأخر .
هذي فقط واش راها شافت و خلي على التسيب و اللا مبالاة لي راها تصرا في جل رياض الاطفال و التي حتى معندهاش رخصة باه تحل روضة المهم يكون مترفه و عندو المعارف تجيه سهلة انو يفتح مشروع استثماري كيما الروضة على حساب البراءة لانو باه يدير خطوة خطيرة كيما هاك لابد يكون عندو اكتاف غلاض يتسند عليهم , وبغض النظر عن طبيعة تكوين المربيات .لكنها تستقطب الكثير من الاطفال على اختلاف اعمارهم و خلي على الاسعار الي توصل حتى 7000دج شهريا و الذي لا يعكس بتاتا نوع الخدمة .
انا هنا لا اشمل كل رياض الاطفال في بلادنا كاين لي ماشاء الله تتوفرفيها كل الشروط من خدمات مميزة .
لكن هذا النوع من الرياض من يجب الحذر منهم على الاهل قبل ما يخلو اولادهم في الروضة لازم يشوفو هل تناسب ابنهم بالدرجة الاولى .
يعني باختصار رياض الاطفال رغم انها نعمة لاهميتها بالنسبة لتكوين شخصية الطفل الا انها قد تكون نقمة و سبب في تدهور شخصية ابنك فحذار كل الحذر في اختيار الروضة المناسبة .
آخر تعديل:
