كلنا بن شيخ

[قرصان الساحل]

السلام عليكم
علابالي انت لي قريت العنوان جا في بالك راح نتضامنو مع بن شيخ .. لالا انت لي راك تقرا وانا ثاني حنا بن شيخ .. ولا نقلك كامل الجزايريين متربي في داخلهم بن شيخ واش هو كل واحد وكيفاه .. يعني يختلف من انسان الى اخر
المهم قبل منحكو شوية في الموضوع بن شيخ هدا هو لاعب سابق في مولودية الجزائر والمنتخب الوطني من جيل 82 لي ربحو لالمان وحاليا هو محلل رياضي في قناة الهداف ودار ضجة اعلامية خاصة على صفحات مواقع التواصل الاجتماعي علخاطر هو ديما ضد التيار ويحب يبين روحو يفهم بزاف ويقول محرز ماشي جوار .. وفي النهاية تحصل على عدة القاب ابرزها مخترع كرة القدم.

في ميضوعي هدا مش راح نتطرق لشخص بن شيخ لكن حبيت نقول بلي حنا الجزائريين كامل كيما بن شيخ علخاطر نفهمو ديما زيادة على الناس وتانيك ما نحبوش لي يكون خير منا .. عارف حتى هاد السطر راك تقول واش يخرط علينا هدا

اوكي سيدي ولا سيدتي ادا كنت من مشجعي الريال ولا البارصا لاه تظالو تاكلو في بعضاكم على جال ميسي وكريستيانو ؟؟ علابالك علاه ؟؟؟ علخاطر بن شيخ صغير لي يعيش داخلك هو لي يغلي اما انت خاطيك

الغنان .. خشانة الراس .. العناد ... هادو كامل فيك انت لي راك تقرا مكان لاه تطيح خشين ولا خاطيك وحدة فيهم .. ببساطة انت ولا انتي مش شعرك اصفر وعينيك زروقة ... اذن هدا بسبب ان بن شيخ مرة اخرى يعبث بعقلك

حسنا .. في القهاوي ناس مريحة كل واحد يحكي في حكاية وفجـــــــــــــــــــأة .. جات وحدة جايزة .. تحسب عملت ليهم Mute .. ناس كامل تسكت وتخشع مع هاد المخلوقة وكاين لي نحي نواظرو باه يشوف مليح .. المهم هي فاتت ومبعد راح تولي كاين سوجي واحد يدور في كامل القهوة .. هادو كامل بن شيخ لازم يحللو هاد الطفلة

وفي الاخير ادا راك تقرا في موضوعي وداك نيف على بن شيخ علخاطر او ساكنك .. والا قريتو وستشفيت فيه انت تاني بن شيخ .. وادا ما تعرفوش اصلا شكون بن شيخ المهم ان عندك واحد ساكن فيك ... فكلنا بن شيخ

وشكــــــــرا
​

 

[ليليا مرام]

رد: كلنا بن شيخ

السلام عليكم خويا
الله يخليك موضوع طرحتو بطريقة هايلة وصح رانا كلنا بن شيخ هذا ولو خاطيني البالو نهائيا وانا نقرا قلت ما نردش لانو خاطيني البالو وما نحبش نحكي فحاجة ما نعرفهاش مي لما كملت فهمت واش تقصد
اييه كلنا محللين وكلنا نفهمو ما نقبلوش اللي يقولنا الصح او يكون ضدنا
الناس تشد فسوجي كيما قلت طفلة تفوت اييييييييه يا حسراه النهار كامل والحكاية عليها كيما قلت مش غرضنا بن شيخ فينا وعلى جال بن شيخ اللي فيا دخلت وراني رديت لانو حنا هذاطبعنا برك الواحد لازم يعرف يسمع للناس ويخلي الفرصة الواحد يمد وجهة نظرو بلا زعاف لانو مش لازم نكونو كامل كيفكيف ونخمو نفس التخمام الخاوة وتوام وكل واحد وتفكيرو
بارك الله فيك موضوع هايل

 

[قرصان الساحل]

رد: كلنا بن شيخ

السلام عليكم خويا وعليكم السلام ختي
الله يخليك موضوع طرحتو بطريقة هايلة هدا من ذوقك وردك هدا لي زاد فيه النص وصح رانا كلنا بن شيخ مزية لقيت شكون يوافقني هذا ولو خاطيني البالو نهائيا وانا نقرا قلت ما نردش لانو خاطيني البالو وما نحبش نحكي فحاجة ما نعرفهاش مي لما كملت فهمت واش تقصد ايه اني درت نبذة في موضوعي حكيت على بن شيخ علخاطر عارف كاين ناس خاطيهم البالو نهائيا -_-
اييه كلنا محللين من عند ربي الله يبارك فينا وكلنا نفهمو ما نقبلوش اللي يقولنا الصح او يكون ضدنا وعلاه حنا نغلطو او صح راه خلق معانا حنا
الناس تشد فسوجي كيما قلت طفلة تفوت اييييييييه يا حسراه النهار كامل والحكاية عليها ايه ولو كان زعما تسقسيهم علاه تحكيو يقلك وهي علاه تفوت علينا هه كيما قلت مش غرضنا بن شيخ فينا وعلى جال بن شيخ اللي فيا اممم بن شيخ لي ساكنك انت او كبير ومداير شلاغم غير نجبد روحي عليك دخلت وراني رديت لانو حنا هذاطبعنا برك الواحد لازم يعرف ايه بن شيخ ديري قناة الهداف تسمعيه يهدر تحساب هو لي اخترع كرة القدم قالهم على لاعبينا المحترفين في فرنسا يلعبو بساندويتش وعندنا يتكسلو يسمع للناس ويخلي الفرصة الواحد يمد وجهة نظرو بلا زعاف تاع الصح لازم نتقبل الراي الاخر لانو مش لازم نكونو كامل كيفكيف ونخمو نفس التخمام الخاوة وتوام وكل واحد وتفكيرو كيما يقلك صباع اليد وماشي كيف كيف على هادي تلقاي وحدة كل صبع بصنعة ووحدة كل صبع ضاربها برقدة والله ما علابالو بيها
بارك الله فيك موضوع هايل وفيكي بركة اختي ردك كان الاروع

اسمحيلي ختي خربشت ليك في الرد تاع الله غالب ماشي غرضي بن شيخ لي دارها ههه
نورتي الموضوع بردك المميز مشكورة جدا جدا ووحدة من بن شيخ في خاطرك جدااا
​

 

[louizalina]

رد: كلنا بن شيخ

مالي هادا جُوار شفت يهدروا علبه فالfacebook

عذرا ليس لي تعليق هههههههخ يا بلشيخ شاراك داير

 

[قرصان الساحل]

رد: كلنا بن شيخ

مالي هادا جُوار شفت يهدروا علبه فالfacebook

عذرا ليس لي تعليق

اني تكلمت عليه في موضوعي وقلت هو لاعب سابق في مولودية الجزائر والمنتخب الوطني سنوات الثمانينات يعمل كمحلل في الهداف .. لكن ينتقد كثير اللاعبيين الحاليين في المنتخب ويعتبر ان زمان لي لعب فيه هو احسن وقت للمنتخب الوطني وان لو كان هو يلعب في الوقت الحالي راه خير من كرستيانو وميسي بالمختصر طايح بلي هو لي اخترع كرة القدم
وشكرا على مروك .. تمنيت لو مديتي رايك في الموضوع
​

 

[الحلم الوردي]

رد: كلنا بن شيخ

السلام عليك
انا كي قريت العنوان
قلت باينة بن شيخ نتاع البالون
ايه صح نوغمالمو راييو يخليه لرحو ماش يهدر
على المياشر ويقولك
كيما محرز ماهوش جوار وشكون قال هكدا
انا تبانلي يطلع ويهبط وحدو
ايه نتاع الصح كل واحد فينا محلل ويحب
ديما هو الصح في كل شيء
مي مكاش قد الواحد الي يتفهم ويخلي الفرصة للاخرين
لازملنا مانكونوش بن شيخ
يعطيك الصحة على الموضوع خويا
دمت بخير
​

 

[louizalina]

رد: كلنا بن شيخ

اني تكلمت عليه في موضوعي وقلت هو لاعب سابق في مولودية الجزائر والمنتخب الوطني سنوات الثمانينات يعمل كمحلل في الهداف .. لكن ينتقد كثير اللاعبيين الحاليين في المنتخب ويعتبر ان زمان لي لعب فيه هو احسن وقت للمنتخب الوطني وان لو كان هو يلعب في الوقت الحالي راه خير من كرستيانو وميسي بالمختصر طايح بلي هو لي اخترع كرة القدم
وشكرا على مروك .. تمنيت لو مديتي رايك في الموضوع
​

هههههه هداوين فهمت اما راي. بلاك عنده الحق. Niveau هاود فالfoot عندنا. وهو مين مستواه عالي. بنوله هاك هاهو راي malgré خاتيني

 

[قرصان الساحل]

رد: كلنا بن شيخ

السلام عليك
وعليكم السلام
انا كي قريت العنوان
قلت باينة بن شيخ نتاع البالون
ههه وعلاه عندنا من راسو عشرة عندنا بن شيخ واحد
ايه صح نوغمالمو راييو يخليه لرحو ماش يهدر
على المياشر ويقولك
كيما محرز ماهوش جوار وشكون قال هكدا
انا تبانلي يطلع ويهبط وحدو
ايه تعرفي هادو جيل 82 واحد الوقت كانت الحكاية ويقلك حنا ربحنا لالمان كي جا هاد الجيل ونسى
في الانجازات تاوعهم كي شغل غطاو عليهم غاضتهم عمرهم اي بداو يبينو في الحقد نتاعهم بهاد التصريحات
والدليل هو تكلم في محرز اللي نورمالمو راح يسلموه احسن لاعب في انجلترا ومبعد يقول مكانش لي يفهم بالون خير مني ؟؟
ايه نتاع الصح كل واحد فينا محلل ويحب
ديما هو الصح في كل شيء
ايه حال الجزايريين في ابسط حاجة تجي تgاري طوموبيل كل واحد يدبر عليك
مي مكاش قد الواحد الي يتفهم ويخلي الفرصة للاخرين
ايه نورمالمو نتفهمو
لازملنا مانكونوش بن شيخ
المشكل تربي فينا هدا الهم تاع بن شيخ هههه
يعطيك الصحة على الموضوع خويا
الله يسلمك ختي
دمت بخير
وانت بالف خير
​

ههه لازم تساعفوني نحب نخربش في ردود تاعكم
ختي ردك كان هايل وزاد فعل الموضوع كثر ان شاء الله نشوفوك ديما
مشكووووووووورة
​

 

[قرصان الساحل]

رد: كلنا بن شيخ

هههههه هداوين فهمت اما راي. بلاك عنده الحق. Niveau هاود فالfoot عندنا. وهو مين مستواه عالي. بنوله هاك هاهو راي malgré خاتيني

ههه اونفا لقيت واحد داه نيف على بن شيخ وقال بلي عنده الحق ما دام خاطيك الفوت خليك في نيتك عنده الحق
خلاص ا لويزة ختي انت وبن شيخ تخرجو على بعضاكم يليق يدوك تحللي معاه في قناة الهداف ههه
مشكورة بزاف على مرورك ختي



​

 

[louizalina]

رد: كلنا بن شيخ

ههه اونفا لقيت واحد داه نيف على بن شيخ وقال بلي عنده الحق ما دام خاطيك الفوت خليك في نيتك عنده الحق
خلاص ا لويزة ختي انت وبن شيخ تخرجو على بعضاكم يليق يدوك تحللي معاه في قناة الهداف ههه
مشكورة بزاف على مرورك ختي



​

​

ههههههه ونقولهم. هشام هو لي ساعدني
في امان الله اخي. و شكرا

 

[قرصان الساحل]

رد: كلنا بن شيخ

ههههههه ونقولهم. هشام هو لي ساعدني
في امان الله اخي. و شكرا

هههه ... عفوا لويزة
نورتي الموضوع مرحبا بيك ديما
​

 

[safouane batna]

رد: كلنا بن شيخ

الجزائريون 40 مليون مفتي و40 مليون امام و40 مليون محلل رياضي و 40 مليون سياسي و 40 مليون محلل اقتصادي المهم فاهمين فكلش وحاجة ماتفوت ومانعلقوش وباالنسبة لبن شيخ الحقيقي صورة للمواطن الجزائري يعرف ويفهم كلش وهو احسن من الجميع وهو مخترع الكرة هههههه

 

[قرصان الساحل]

رد: كلنا بن شيخ

الجزائريون 40 مليون مفتي و40 مليون امام و40 مليون محلل رياضي و 40 مليون سياسي و 40 مليون محلل اقتصادي المهم فاهمين فكلش وحاجة ماتفوت ومانعلقوش وباالنسبة لبن شيخ الحقيقي صورة للمواطن الجزائري يعرف ويفهم كلش وهو احسن من الجميع وهو مخترع الكرة هههههه

وي خويا سفيان نفهمو في كلش بسلامتنا تعرف علاه ؟؟ على خاطر حنا قاويين ههه
وبن شيخ كيما قلت ما هو الا صورة مصغرة على جزايري فاهم ولو مكانش هو رانا تحرمنا من متعة كرة القدم يعطيه الصحة
مشكور على مرورك خويا



​

 

[zohor kfz]

رد: كلنا بن شيخ

السلام عليكم
يعطيك الصحا على الموضوع
في الاول منين شفت الكورة خرجت نجري قلت خطييييييييني و من بعد ديرت دورة و قلت ولله غير نعرف اسم راه صاري ههههه
هاد المخلوق منعرفوش و جامي سمعت عليه لانو اكيييييد خطيني الكورة ... بلاك يكون عندو وجهة نظر صحيحة بحكم الخبرة ... الله اعلم
اما علينا احنا كمجتمع مرات بدون متطلب الراي يجيك وحدو و بلاك من عباد ميعرفو عليك والو و يقولولك راك غالط في هذيك الحاجة ...

 

[قرصان الساحل]

رد: كلنا بن شيخ

السلام عليكم وعليكم السلام
يعطيك الصحا على الموضوع الله يسلمك ختي
في الاول منين شفت الكورة خرجت نجري قلت خطييييييييني و او انتوما هنا كامل خاطيكم الكورة هبلتوني واش تبعو مالا مسلسلات تركية من بعد ديرت دورة و قلت ولله غير نعرف اسم راه صاري ههههه هههه ايه نموتو على التقرعيج لازم نعرفو
هاد المخلوق منعرفوش و جامي سمعت عليه لانو اكيييييد خطيني الكورة وي مي اليوم عرفتيه وعرفتي شكون لي اخترع كرة القدم... بلاك يكون عندو وجهة نظر صحيحة بحكم الخبرة كيف لا وهو من اخترع الكرة :graduation: ... الله اعلم
اما علينا احنا كمجتمع مرات بدون متطلب الراي يجيك وحدو و بلاك من عباد ميعرفو عليك والو و يقولولك راك غالط في هذيك الحاجة وي هادي النقطة لي حبيت نشير ليها في موضوعي ناس كامل يعرفو ويبينو بلي يعرفو وكيما قلتي انت يمكن ما يعرف عليك حتى حاجة بالصح لازم يمد رايو ...

مشكورة ختي على تفاعلك مع الموضوع
في انتظار ردودك
موفقـــــــــــــــــــــــة
​

 

[Salah eddin]

رد: كلنا بن شيخ

السلام عليكم
واش راكم
هي على كل حال راني متفهم الراي نتاعك
و لكن
عندي ملاحظة برك
في حكاية محرز...ههه
انا مع بن الشيخ في ان محرز ماهوش من طينة الكبار
وعلاه ؟؟؟
انا نقلك و علاه
ياودي هذا محرز تقول يتكيف الدخان
كي يعود يلعب تقول عندو 4 ايام و هو يجري
هو صح عندو مهارات و فنيات
بصح مش بهذيك الصورة لي دارها الاعلام الجزائري
على كل حال هذا رأيي في اللاعب
و شكرا
تقبلوا مروري

​

 

[Msb security]

رد: كلنا بن شيخ

شكرا لموضوعك اخي لكن للاسف ف بلادنا لي يهدر الحق يولي ماشي مليح عل خاطر والفنا ب الكذابين و الخرطي همال كي يهدر بن شيخ جاتهم بيزار ماشي موالفين انسان يهدر هاكذا هاذ كل ما في الامر وبن شيخ لم يقل ان محرز ماشي جوار كان ينتقده عندما لا يلعب جيدا هاذ فقط وبن شيخ يفهمه لي يعرف كرة القدم جيداا
ربي يجيب الخير

 

[قرصان الساحل]

رد: كلنا بن شيخ

السلام عليكم
وعليكم السلام
واش راكم
لباس الحمد لله خويا صلاح الدين وانت راك مليح ؟
هي على كل حال راني متفهم الراي نتاعك
و لكن
عندي ملاحظة برك
تفضـــــــــــــــــــــــــــل
في حكاية محرز...ههه
واش بيه ؟؟
انا مع بن الشيخ في ان محرز ماهوش من طينة الكبار
هاود دوك وين ماركا كونتر سوانزي ا صلاح خويا ما تهبلوناش انت وبن شيخ
وعلاه ؟؟؟
انا نقلك و علاه
ياودي هذا محرز تقول يتكيف الدخان
كي يعود يلعب تقول عندو 4 ايام و هو يجري
هيه يتكيف الدخان ا سي بن شيخ مي هاو داير الهول في لانجليز
هو صح عندو مهارات و فنيات
بصح مش بهذيك الصورة لي دارها الاعلام الجزائري
مش قضية الاعلام الجزائري كل الاعلام العالمي تحدث عليه
واليوم كرموه لاعب الموسم في انجلترا
غير انت وبن شيخ مشنفين عليه تبانلي ما عجبكمش في الزي
على كل حال هذا رأيي في اللاعب
ايه يا بن شيخ الدوزيام متقبلين رايك
و شكرا
تقبلوا مروري

​

خويا صلاح جبتها جبتها ومبعد خسرتها اداك نيف على بن شيخ صاحب ما تقليش لعبت معا في المولودية هههه
مشكور خويا على تفاعلك المهم بن شيخ او ساكنك شوف رقي روحك خويا هه
مرورك مميز خويا نورتني
​

 

[Salah eddin]

رد: كلنا بن شيخ

خويا صلاح جبتها جبتها ومبعد خسرتها اداك نيف على بن شيخ صاحب ما تقليش لعبت معا في المولودية هههه
مشكور خويا على تفاعلك المهم بن شيخ او ساكنك شوف رقي روحك خويا هه
مرورك مميز خويا نورتني
​

الله يفظك يا خويا
والله لضحكتني ههه
ياودي مش لي يماركي راه لاعب كبير
انا هذوين شفت الماتش
الهدف تاع محرز ياك جا من خطا تاع المدافع تاع سوانزي
ولا نقولو ثاني بلي فيلايني لاعب كبير على خاطر ماركا البارح مع اليونايتد
المهم
شكرا على ردك ولكن نبقى على رايي انو محرز لاعب متوسط المستوى
كيما براهيمي العام لي فات ..شعل الدنيا و السنة راه راقد طول
ايا خويا بالعافية
و
السلام عليكم

​

 

[قرصان الساحل]

رد: كلنا بن شيخ

شكرا لموضوعك اخي عفوا اخي لكن للاسف ف بلادنا لي يهدر الحق يولي ماشي مليح عل خاطر والفنا ب الكذابين و الخرطي همال كي يهدر بن شيخ جاتهم بيزار ماشي موالفين انسان يهدر هاكذا هاذ كل ما في الامر وبن شيخ لم يقل ان محرز ماشي جوار كان ينتقده عندما لا يلعب جيدا نعم اذن اخطأ رانييري والاتحاد الانجليزي باعطاء محرز لقب لاعب الموسم واحسن بن شيخ اللي كل مرة يستغل الفرصة لينتقد محرز لكن خويا نقلك حاجة بن شيخ لا يعمل بالحيادية هو فقط يحب يبين بلي الجيل تاعو احسن من محرز هل حقق بن شيخ طيلة مسيرته الكروية ما حققه محرز في عام واحد انه انسان يخرط وفقط هاذ فقط وبن شيخ يفهمه لي يعرف كرة القدم جيداا ههه غريبة نفضل ما نفهمش الكرة على اني نفهم بن شيخ
ربي يجيب الخير امين[/QUOTE]

مشكور خويا على مرورك ومناقشتك للموضوع
موفق
​