أميرة ميرال
:: عضو مُشارك ::
- إنضم
- 25 ماي 2016
- المشاركات
- 254
- نقاط التفاعل
- 615
- النقاط
- 21
راني رجعت ومساء الخير عليكم وهذا الموضوع 2
ليا في المنتدى هذا تاع واش راك تهدر ياك هنا يهدرو
جيت نهدر شوية على تجربتي من البارح لليوم :p:p
:sport01::sport01:
زعمة البارح منين سجلت ديجا دخلت حسيت روحي دايرة كي حبيبنا
تاع النص هذاك في كتاب القراءة تاع الإبتدائي بدوي في المدينة هههه
ما فهمت والو وما عرفت وين ندخل وحسيت روحي تايهة وغريبة
من بعد بديت ندرس في الوضعية ونشوف في المواضيع وزعماك عملت
موضوع وبديت نحس روحي نتأقلم مع لبلاد هذي هههه وبقيت نتفرج
في الأعضاء لقيت أنواع من الأعضاء ودرك رايحة نقسم الأعضاء على
حساب الألوان تاعهم ونحكي عليهم :p:p
1- كاين صحاب اللون هذا لي نكتب فيه وهو لخضر لي كي حالتي:
هذو كي نشوفهم نصبر روحي بيهم نقول ماكيش وحدك تايهة راهم كاين بزاف
ناس ضايعين كيفك وراهم في تقشف والمشاركات تاعهم تطلع بالشوية كيفي
2- صحاب هاد لاكولور لي هي المستقبل تاعي ان شاء الله هههه:
هذو منين نشوفهم نقول واش دارو باش تلونو وبقيت نخزر نخزر وحسيتها حقرة
علاش أنا باللون لخضر الباشع هذا وهذوكا ملونين بالموف حبيت الموف :love01: خير
من بعدا وليت نثبت هيا لقيت الجماعة هذي صحاب الخمسين ألف فرنك خخخ
قصدي صحاب 500 مشاركة وطلع والشوربة تسقاملي غالية 500 دج باش
نتلون لحكاية بالموف برك والله ورمضان جاي والتشومير داير حالة :tongue02::tongue02::tongue02:
3- صحاب اللون الوردي لي حبيتو بزاف: والله سخفت عليه منين دخلت
ووليت مع المحقق كورومبو اكتشفت بلي هذو راهم الوزيرات تاع المنتدى
علابيها مقلشينهم باللون هذا وكي نشوفهم نضبط روحي كاشما يعطوني بوست
ولا على الأقل يتوسطولي برك في كاش مصيبة نعملها هنا :p:p والضربة منين
نشوف مع مشاركاتهم
بزااااااف ونبقى نقول وهذو واش عملو حتى لمو الشيهذا :sport01::sport01: هذو عباد ولا محراث :p:p راني نزعق برك
4- هذو صحاب لزرق الوزراء والحق ما سخفتش على لونهم وهوما تاني نورمال
كان حبو يتوسطولي في كاش صايبة ولا كاش بوست ولا ليه ليه يشوفو مع
مواضيعي ويردو فيهم ونفرح والله ما نقول لا :p:p هذو كي نشوفهم ما فهمتش
واش نحس بلا إحساس أنا :regards02::regards02::regards02:
5- عندك الجماعة تاع اللون هذا مازال ما شفتهمش غير كي نشوفهم برك في
الليستة من تحت هذو بالاك الحاشية تاع الطبقة المالكة وما يحكوش معانا ؟ ههه
واقيل المصيبة راهي جاية وجدو رواحكم يا وزيرات ووزراء باش تتدخلو في حالة
ما درت مشكلة بلكلام هذا :p:p وباش ما نظلمش الناس كاينة أم ياسمين شفتها
تحكي بالاك هي الوسيط بين الطبقة الكادحة والطبقة المالكة هههه :tongue02::tongue02: والله
يعجبني التواضع أختي راني غير نزعق وانتي متواضعة :regards01:
6- الطبقة الحمراء هذي المالكة شفت منهم زوج برك واقيل واحد الملك والثانية
الملكة هذو نفرح برك كي نشوفلهم رد في موضوعي ولا إعجاب والحق مولات
القبعة ردتلي والله وفرحتني :yahoo01::yahoo01::yahoo01: وهذو ما حاباش نحكي عليهم بزاف العبد
ما يدريش وين توصل بيه لمواصل ههههه
هذا واش حبيت نحكيلكم اليوم والصح الصح احنا كأعضاء جدد والله نفرحو
كي نشوفو الأعضاء لقدم ولا المشرفين ولا الإداريين يتفاعلو معانا نحسو بلي
مقيمينا وما نحسوش رواحنا جدد ومازال واحد ما يعرفنا دونك واحد ما يعبرنا
ومرسي على هذا المنتدى والله درت فيه رايي من البارح لليوم هههه
تشاو
آخر تعديل بواسطة المشرف:
