هل الاخت الكبرى هي العدو اللدود لاختوتها

[هالة]

السلام عليكم ورحمة الله تعالى وبركاته كيف احوالكم اصحاب اللمة توحشتكم بزاف عندي فترة مدخلتش هنا لكن تمنيت كي ندخل ندخل بحاجة مليحة وجديدة مشي نكسرلكم روسكم بمشاكلي المهم انا لقيت هذا الحل الوحيد الي نقدر نحكي فيه همي ونقول فيه وش نحب مشكلتي اني الاخت الكبرى ونحب الخير لخاوتي لكن هوما للاسف مشي مقدريني وميقبلوش مني كلمة مهما تكون حتى وتكون في صالحهم لكن ميسمعوهاش مني وكي ندخل يحقدو عليا ويكرهوني حتى ولات امي تقلي راكي كي تكلميهم ديريلي المشاكل لكن انا مشي هاك نيتي نيتي صافية ومنحبهمش كي يخطئو وميحبوش النصيحة وزيد انا امي مريضة ومشي قادرتلهم وابي يخدم في الصحراء وبعيد وانا بصراحة حبيت ندخل منخليهمش يمشو برايهم كي ندير هاك او نقول كلمة وميتقبولوهاش مني مع اني مشي شريرة ومسالمة ونحب الخير وكامل خاوتي شبه ربيتهم والي زادت الطين بلة اختي الي انا اكبر منها ب10 سنوات ربيتها من لما كان عمرها سنتين ترقد عندي ومتهلية فيها شبه انا امها ومدلتها ونلبسها ونمشط وندوش وندير كل شيئ حتى نشريلها غير الحوايج الهايلين الي تقعد العائلة كاملة تسال لكن للاسف كي كبرت اختي الان عمرها 16 سنة وشافت روحها ولات مرى ولات مشي مقدرتني نهائيا نقوللها كلمة تردها مئة وحتى تحرجني امام العائلة عادي وتجاوبني كلمة بكلمة وترفع صوتها عليا ومتسمع حتى كلمة مني مع اني لحد الان متهلية فيها وانا الي ندبر عليها ومنحبش فيها الشر لكن للاسف ولات شبه عدوة او منعرفش وش نقوللكم ولات متحبنيش وقاتلي انساي بلي راني اختك ومتكلمينيش وميهمنيش كي نخسرك وخسرانك ساهل علبالك راني نقول في هذا لكلام وقلبي محروق على الدنيا كيفاه ولات هذي اختي الي كانت بنيتي وكنت مدايرتها خير من روحي ونفرحها وكامل العائلة تشهدلي بهذا ولات لااحترام ولاتقدير وترفع صوتها عليا لدرجة الجيران يسمعوها وامي مريضة كون تسمعنا نداوسو تقلي راكم ديرولي في المشاكل وراني مريضة ومشي قادرة ولات تقول لامي هي سباب المشاكل وقوللها تخطيني تخيلو ولاو كامل خاوتي مديين هذي النظرة عليا انا انا سباب مشاكلهم وانا الي نعمر في امي عليهم ومنحبلهمش الخير مع انو العكس وربي يعلم نحب خواتاتي يكون خيار لبنات ومنحبهمش يتخدعو مع هذا الوقت الي رانا فيه ومنحبهمش يديرو الحوايج الي مشي مليحة سيرتو كي عادت امي مشي قادرة وحاقرينها ولا حتى ابي يقلي اخطيهم وراكي تحقدي في خاوتك عليك وخليهم الله يسهل عليهم حتى قررت اني ننسحب من حياتهم ونخليهم يديرو وش يحبو مع اني منقدرش كي نشوفهم خاطئين او حاقرين امي شوفو الدنيا ولا صاحب الحق والي يحب الخير هو العدو وفوقها راني مقهورة على خاوتي سيرتو كي نشوف بنات خالاتي الله يبارك متافهمين وبنات عمي كيفاه مقدرين ختهم لكبيرة ومقدسينها تقوللهم موتو يموتو وانا لا احترام ولا تقدير ولا معاملة حسنة مع اني كامل شبه ربيتهم وكي كبرو وليت لعدوة ويتمناو وكتاش نتزوج ونخرجلهم من الدار . نتمنى مساعدة ونصائح منكم وادعولي بالخير وانظرو لقضيتي بنظرة الرحمة وحسو بيا بواش راني نحس راني اختصرت الامر اكثر مما تتصورو في امان الله وشكرا لكل من قرا رسالتي

 

[الامين محمد]

مشكل الخلاف بين الاخوات تقريبا راه في كل حي
انا نظن لازم تكوني ذكية في التعامل معاهن راهم في سن مراهقة
و لقين فرصة غياب الاب
في الاخير كل واحد يتحمل مسؤلية تصرفاته

المهم رايح الاخوات يفيدوك بشكل افضل

 

[فيتامين سي]

انا عندي اخت كبيرة عليا ب 10 سنوات
عادي ندابزو و نتصالحو و كي تجي نقولولها راجلك ميجيش يديك بصح تعرف قداش نحبوها و قداش تحبنا.....كي ندابزو معاها ماما تقوللنا هي رباتكم و اكيد رانا نخلصو في الصرف في ولادها ...هذي هي دنيا
.....معلاباليش الحل ..بصح اختك هدي المرحلة راها تكون نفسها متجيبيلهاش اوامر ولا نصائح صاحبيها خرجيها معاك قوليلها نتفرجو مع بعض سيي تجبديها عندك راها في سن صعيب بزاف ..راها تشوف الدنيا و درك تحتاج الحنانة ماشي العنف ..خليها تشوف اخت تبغيها ..ديري خرجة معاها للسوق و للحديقة ..شوفي اختك كفاش تخمم
لي عودة ....

 

[هالة]

ههههههه ضحكتيني اختي كي قلتيلي اخرجي معاها اصلا انا خرجاتي كامل معاها وبقى نجري معاها ونشريلها ونوريلها هذيك الفترة تكون شوي شوي مليحة لكن غير نرجعو لدار تولي كاني مدرتلها والو وزيد انا مشي من الخواتات الي يضربو خواتاتهم بحكم انهم صغار عليها بالعكس نعاملهم مليح ودللتهم لكن كيما يقولو هذي هي نتيجة الدلال لاني ساكتة عليهم وندللهم ولاو فوق راسي لو جيت موريتهم العين الحمراء كون راهم يخافو مني المهم شكرا لكل من قدم رايه لكن صدقوني الحقيقة مشي كيف الكلام

 

[السلطانة]

كون غير جات عندي اختي لاشتى تتعارك معايا المهم كون جات كاينة برك

ربي يحفظكم لبعضاكم اختي اختك تبقى اختك مهما واش يصرا بيناتكم

عمرها 16 سنة اختك في سن المراهقة وراهي شوي عنيفة لازم تسايسيها وتكسبيها بالعقل

ان شاءالله شدة وتفوت

 

[❤️كلي أمل❤️]

السلام عليكم
اختي أنا عندي اختي اكبر مني ومتزوجة
كي تروح لدارها نتوحشها نقعد نعيطلها كل
دقيقة ونحكيلها كامل واش يصرا معايا
بصح كي تجي مانتفاهمش معاها هههههه
تقعد دخل روحها بزاف في حوايج يخصوني
وتنصحني في امور أنا مقتنعة بيهم
بصح ولله نحبها وغير تروح نتوحشها
خاصة كي مانلقاش شكون نحكيلو هههه
اختي ربي يخليكم لبعض واعرفي برك كيفاش
تقربيها ليك

 

[aljentel]

اصبري عليها وتحمليها ولا تحقدي عليها وقدري سنها ومراهقتها .... ثم ان مثل هذه الامور تحدث في كل البيوت ....
الله يخليكم لبعض ولا يفرقكم ....

 

[سكون الفجر]

الأخت الكبيرة ليست نقمة بل نعمة كبيرة لوالديها ولأخواتها
أنا الأخت الكبرى في البيت وأخواتي يعتبرونني الجزء الاخر من أمي ربي يحفظها
أنصح هذا وأكلم هذه وألاعب تلك، تحدث مشاكل بيننا ولكنها لا تصل الى الكره والحقد أبداً
الحمد لله
أختي الطيبه، أشعر بك وأعلم بأن هذا السن بالذات صعب جداً
أخي ظهرت عليه كل علامات الرجولة تقريباً، وبدأ يمارس إفراض رأيه بطريقة لا أحبها ولا تحبها امي
كانت تغضب منه امي فهو يتحدث دونما علم
فما كان مني إلا أن نزلت الى عمره وحاولت تفهمه
ونجحت ولله الحمد

ادعي لها وأسألي الله التوفيق والسداد وأن يوفقكِ على ان تكوني اخت محبوبة

حبيبتي التربية لا تأتي بالصراخ والغضب دائماً
بل شيء من هذا وذاك والكثير الكثير من الصبر والتأني والتفهم

وفقكِ الله عزيزتي وأعلمي ان المشاكل موجودة في كل منزل ولكن المجتهد من يحاول تفهم المشكلة وإصلاحها
لا إقحام نفسه بها دون علم

في أمان الله غاليتي​

 

[zohor kfz]

غيري طريقة تعاملكي معها ...ارخي الحبل و اعطيها حريتها لكن راقبيها من بعيد و ادا اخطات فكلنا نخطئ و من الاخطاء نتعلم ... هي في سن تبني فيه شخصيتها فلا تكبتيها و دعي لها الحرية في اتخاد قراراتها ... اعلم انك تحبينها و تخفين عليها من نسمة الهواء لكن افسحي لها المجال و لا تخافي بما انك زرعتي فيها مبادئ طيبة في الصغر فلن ترتكب اخطاء شنيعة ... انزلي الى عمرها لاعبيها اضحكي معها اعملي معها هي ما تريد و ستعود لكي اكيييييد
اعانكي المولى

 

[هالة]

شكرا لمروركم الكريم لكن بهذي الطريقة انتو القيتم اللوم علي وكانني انا الجاني وانا الظالمة لا والله بالعكس انا احن واطيب مما تتوقعون وطبعي هادئة ولااحب الصراخ لكن هي مشكلتها الصوت العالي والصراخ وكل العائلة تشكي من صوتها العالي ونرفزتها وانا حوالت نحيلها هذي العادة لكن ي مقدرتش والي مقلقنيمنها اكثر ترفع صوتها عليا لدرجةنحسهارايحةتضربني اونفضل تضربي ولاترفع صوتها عليا بهذيك الطريقة وزيد انا لاعمري ضربتها ولا منعتها من شيئ ولا قيدت حريتها ابدا بالعكس انا هي الي نخرجها ونكلمها ونحللها مشاكلها نتاع الثانوي وندخل فيها وحتى مرات يوصل بيا لما يكون ابي مشي هنا نعيط لود عمي ونحكيله كل شيئ وهو الي يروح للي حقرها وتاني لما تشكيلنا من واحد في الليسي امي تقوللها لانك انتي تردي لكلام وصوتك عالي انا نجي معاها حتى تتقلق امي وتقلي زيديها انتي تاني من لقبيل مليحة لكن للاسف كيما قالي خويا هذا دلالك ليها خلاها متخافش منك وعارفتني لما نغضب عليها انا نرجعلها عادي بدون مترجعني هيا ولا تقلي اسمحيلي يمكن هذا خطئي وتاني متنساوش ياخاوتي الصحبيات تاني يلعبو دور كبير في حياة البنت تولي تشوفهم احسن من عايلتها وتسمعلهم المهم حبيت نوضحلكم فقط الفكرة اني حاولت بشتى الطرق ولاعمري كنت قاسية بالعكس كنت احن اخت حتى العايلة كاملة يعرفوني بهذا الشيئ وهي بحد ذاتها في صغرها تناديني ماما ولما كبرت وليتلها عدوة وزيد عندي حوالي اسبوعين وانا وهي مشي نحكو كيف قبل ولاكلفت نفسها وجاتني او حاولت دير حاجة تبينلي انها ندمانة او غايضها فراقي بالعكس تماما خروجي من حياتها مخليها سعيدة وعايشة حياتها عادي وتغني وتلعب وكان شيئ لم يكن .انا نقول ربي يفرج عليا ويعوضني خير من ذلك شكرا لاهتمامكم

 

[العَنْقَاءُ]

مرحبا هالة
تعرفي اختي أنا الكبير في المنزل
لدي أخ وأخت أصغر
فرق في السن كبير جدًا جدًا
على الاقل 8 سنوات الى 10 سنوات
كلّ يوم يصرخوا في وجهي
ولهم عصيان مدني
واعرين
بصح عادي :p
نحبهم والفت
تحسي نفسك مقهورة صح
خوذيها قاعدة أنتِ المحبوبة
أنتِ الملجئ إذا حدث شئ
هالة هيا وريلهم هبالك أنتِ ثاني

​