ان شآء الله تكونو جميعآ بخير ~
{ أعتذر عن قلة توآجدي بسبب الدرآسة }
نرجعو للمفيد
هآد الايآم جربت كيكة الطبقآت هي في الأصل الوصفة لطآطآ ام وليد جزآهآ الله خيرآ
فقط انا غيرت شوية في المقآدير
نبدآو بســـــم الله
المقـــــــآدير:
4 بيض، فآني، كاس سكر، كاس حليب، كاس زيت، 2 كيسان ونصف فرينة، 2 خميرة الحلوى.
طريقة التحضيـــر:
نخفق جميع المكونآت مع بعض، حتى نتحصل على خليط،
نقسمه الى 4 اجزآء،
نآخذ مول دآئري به ورق الطبخ ونفرغ فيه الجزء الأول، وندخله لفرن مسخن ومشعول من تحت فقط
لمدة قصيرة بعد مآ ينشف الكيك ويآخذ لون ذهبي، نخرجه من الفرن ونرش الشوكو اللي نستعملوه مع الحليب بالصفاية من فوق،
ونفرغ الجزء الثآني بالعقل فقط، ونرجع المول للفرن لكن هآد المرة نشعلوه من فوق فقط حتى يحمآر الكيك
ونكرر نفس العملية مع الجزء 3 و 4، حتى طيب الكيكة
ملآحظة: شخصيآ بعد مآ طآب الجزء 4 وخرج الكيك من الفرن، كي نحيت ورق الطبخ من الجوآنب لقيت بقايا من الخليط مآزآل خصو الطيآب، مآلا نحيت الورق ورجعت الكيكة للفرن على درجة قليلة فقط من التحت حتى نشفو الجوآنب، فقط مديتهآلكم نصيحة اذا كآش مآ وحدة صرآتلها نفس العفسة، وحتى تتاكدي انو الكيك مستوي دخلي موس يخرجلك نآشف
الكلآصآج:
فنجآن زيت، فنجآن سكر، فنجآن ونصف تقريبآ كآكآو وفنجآن حليب
ضعي الكل في الميكسور وخلطي حتى تعقد الكريمة
واطلي بيها التآرت من فوق وزينيها ودخليها تبرد
هآد الكلآصاج عجبني بزآآف في تزيين الكيكآت احسن من تشري شوكولآ وتذوبيهآ، طعمه يجي مثل الشوكولآ نوآغ
يشد روحو بيآن وما يغبنش عند التقطيع
ان شآء الله تعجبكم كيكتي
في أمـــــــــــآن الله وحفظه
