مشكلتي زوجي ينتقدني في كل شيء

[مشكلتي]

السلام عليكم اخوتي مالعنوان راكو فهمتو مشكلتي راجلي يلكك على كلش و ما تعجبو حتى حاجة نديرها حتى في ديني واش ندير يصيبلي ديفو سورتو على الماكلة لي نطيبها لازم يعلق عليها مع أني نطيبلو واش يحب و والله ما نزيد عليكم غير الناس كامل تشكر في طيابي حتى كانو يقولولي فاميلتي سورتو لي جان يا سعدو لي يديك حا ترشقيه بالماكلة خاطر نحب نطيب و نحب الكوزينة و نظل نتبع فالنات و نحوس على أطباق جديدة مي كي أنا كي غيري ديفوا لاه غالب تهرب ماليدي و هوا دايما يا مالح يامسوس يا ناشف يا صامط لازم يقولي خصت حاجة و أنا دايرة كامل جهدي باش نحطلو حاجة تعجبو مي واش ندير يصيبلي حاجة و يقلي طيبيها كيما يما و أنا قلت ماعليش مافيها والو يحب طريقة يماه فالطياب على جال هذا الشي وليت نطيب كيفها وليت البيض المقلي و قريب نسقسيها كيفاه طيبو تالمو كرهت التلكاك تاعو بصح المشكل حتى يماه و قاتلي كان دايمن يلكك على طيابي و ما يعجبو والو زيد بزيادة تقريبا ما ياكل والو يحب غير اللحومي وليت واش نطيب نعطي ليماه دوق هي تقولي بنين مي هو يصيب فيه حاجة و يهبطلي المورال بيها و المشكل ماهوش فالطياب على شغلي على شكلي هدرتي لبسي كلش حتى تربيت الذراري و أنا عادية في كلش يعني ماني لا كلاس ماني جبرية الفرق بيناتنا هو شباب بزاف و حاسب روحو هو الحطة و يعرف كلش و أنا صدقوني بلا ما راني نكدب و الله و ربي شاهد نقيقيا في شغلي و في لبسي أما شكلي نحب نكون عادية و نصلي يعني ما نقدرش نماكيي غير حاجة قليلة و هو ما عندو حاجة فالماكياج فاللول كي كنت نماكيي و نزين روحي يقولي لاه راكي دايرة في روحك هكدا و يقلي بالاك دوري قدام خاوتي بالماكياج مالا حبست غير كحل و شي قليل بزاف و مرات ما ندير والو حتى جسمي ما تلقوش وليت ندير الرياضة مع أني ماشي سمينة مي عندي مشكلة في كرشي خسرت بعد الولادة و راني مع السبور باش تولي كيما كانت المهم قلتلكم ما يعجبو والو و يعلق على كلش و أنا كرهت حياتي مالهدرتو يعطي يصيب حاجة مثلا نست كاش حاجة ما درتهاش في بلاستها ولا ما نتبهتش و ساب حاجة ماشي مغسولة مليح نقولو والله ما نتبهتلها تعرفني لوكان شتها ما نخليهاش هكدا و ليت طول النهار و أنا نفلي فالدار باش ما يسيب حتى ديفو مي يلقى و يقلي نحبك تنتبهي لكلش و نحب كلش كيما نحب حا نكلاطي مانيش قارة نزي نسم ليقاتو التافهة و زيد هو أكتر واحد ديزوغدوني ندل نلم موراه حتى دخانو حاشاكم هو يتكيف و أنا نقي انصحوني لاه يجازيكم.

 

[همس الوُرود]

وعليكم السلام ورحمة الله وبركاته
إن شاء الله تكوني مليحة وصحتك لاباس أختي
حاولي تصبري وتخبريه بلي راكي تحاولي قدر الإمكان ترضيه ولازم يجوزلك وش يشوف مش مليح
قوليلو نجوزوا على بعضانا بش نعيشوا هانيين وأنا نحاول نرضيك بلي نقدر عليه
لازم هدا الراجل يقدر الجهد والتعب الي راكي فيه
وأحسني عونو أختي حاولي تلقاي الجانب الي يرضيه طريقة التعامل كيفاش لازم تتعاملي معاه بش يرضى و يحبس هدا الكلام الكثير عليك
ربي يفرحك ويفرج عليك حبيبتي​

 

[بشرى ملاك]

سلام
كاين رجال كيما هاك مايبغيش يشكر لمرا هو فقلبه اكيد كلش عاجبه بصح يبين العكس كاين رجال عندهم نقص من جيهة النسا مايبغوش يبينو بلي خير منهم كاين لي يخمم يقول نشكرها غادية تاكلني ومدام حتى ماماه كانت تلقى معاه نفس المشكل معناها المشكل فيه هو قاع مايغيضكش الحال وماتقعديش كل ما ينتقد حاجة ديريها تقعدي تقلشي فيه خليه حتى يرضى وحده باسكو راجل مع زوجة تاعه كيما بيبي يبدى يتقلش عليها وكل ما قلشاته يزيد هو يتقلش كيما لبيبي تمام والطفل يليقله خطرة خطرة طريحة باش يخاف هههههه فهمتيني ومهما نقولولك راينا هدا زوجك انت وانت ادرى الناس بيه وانت الوحيدة لي تعرفي كيفاش تعامليه
وحكمة لمصريين يقولوها "ابنك على ماتربيه وزوجك على ماتعوديه"
وعلى تخلاط دار قاع رانا هاك انا تاني قاع نهاري نلم موراه تقولي بيبي كبير قاع الرجال كيما هاك
الله يوفق بيناتكم ان شاء الله

 

[ليليا مرام]

السلام عليكم اختي
اول شي الله يهدي راجلك ويهنيكم شوفي اختي اول شي حتى يماه قاتلك انو من الاول ميم عليها يهدر ويعلق يعني راجلك هو نقراش وحاجة ما تعجبو
كاين رجال هكذا خلقتهم ما يعجبهم العجب انت قدامك زوج صوالح انت نقية وقايمة بدارك وبيه وما خصك والو راكي ديري اللي عليك خلاص خليه لانو ما تخترعيش من عندك وحتى لو اخترعت ما يعجبوش املا خليه يوالف عقليتك وشغلك وجسمك وشكلك لانو المشكل والله ما فيك راه فيه هو وصعب تقنعيه لانو طباعو ما تقلقي روحك ما والو انت حاولي تهدري معاه سقسيه واذا مش نتاع نقاش وما يسمعش طيبي وحطي اذا ما عجباتوش خليها يجوع يجي ياكل يحب ياكل برا خليه ياكل ما يعيا ياكل برا ويجي لماكلتك يجري مهما كانت راجلك شافك انت مقلقة روحك بزاف كمل فتنقريش نتاعو املا اضربيها فال 0 وخليه انت قانعة بواش قاعدة ديري خلاص ما عندك ما تزيدي اكثر يهدر ويسكت ما تقلقيش روحك
الله يهديه كاين رجال والله تقولي نجوعهم ونخليهم معافن مليحة ليهم راهي بالمقلوب يحبو المعفونات

 

[GI Joe]

hotiih godamek w fahmih rakom kbar w ta3erfou slahkom wechi had l 3a9lia !! golili zewedjt b mra testahfedh bik w testahfedh biha fel ma39ol machi robot wala femme d menage ta3ek !! la faute ta3 mamah l3awdh trabih nhar kan f 3omro 15ans w bda yetkaber 3la ne3met rabi !!
allah yahdina

 

[الحركش]

السلام عليكم احبابنا
حكايتك راجل جاب لمرتو 4 بيضات
معرفتش كيفاه طيبهم 2 طيبتهم في الماء و 2 قلتهم
اي قاللها نورمالمو لي تقليهم طيبتيهم في الماء و لي طيبتيهم في الماء تقليهم
​

 

[rokamohamed]

hotiih godamek w fahmih rakom kbar w ta3erfou slahkom wechi had l 3a9lia !! golili zewedjt b mra testahfedh bik w testahfedh biha fel ma39ol machi robot wala femme d menage ta3ek !! la faute ta3 mamah l3awdh trabih nhar kan f 3omro 15ans w bda yetkaber 3la ne3met rabi !!
allah yahdina

 

[rokamohamed]

كل الرجاله هكذا للاسف

 

[aljentel]

انتِ تزوجتي رجل خبل وهذا النوع من الرجال حنان منان لايعجبه العجب
نصيحتي اصبري على الخبل لعل الله يرزقك منه بخلفه صالحه لانه خلاص دخل الفاس بالرأس
وهذا نصيبك الله يعينك ...

 

[الورد الأحمر]

السلام عليكم

هذو هوما الرجال لي نعافهم وكون صابني نلم لي من النوع هذا في شكارة ونطيش في لبحر وما نشوفش وراي!

نكره واحد شايف لمرا خدامة عندو كي راجلك سامحيني يعيف بمعنى كلمة يعيف وبعد لي حاسب روحو حاجة تطل عليه تلقاه تافه.

لمرا تاني ما لازمش تطلق روحها مع راجل هك ونقصد هنا ما تسكتش على تعليقاتو ولا ديري كيفو علقي على كلشي يديرو حطميلو ثقتو في نفسو كاشما يفيق مع عمرو ولا كي يعلق عليك انشعيه أنا نحير في وحدة ما تعرفش ترد الهدرة لراجلها !

طاعة الزوج عندها حدود حددها ربي غير هك لا وصل الإنسان للعبودية غير يطيش عليه لا طاعة لا والو اقصف جدو بعد شي ما عاجبو.

ربي يعينك وطولي بالك وفهميه بلي ماكيش خدامة عندو حتى تظلي تجري من ومن باه هو ما يعلقش وفكريه بلي راه بنادم برك شحم ولحم وعظم كيفك كيفو زيو نسا على روحو.

 

[أمـيـر الـجـزائـر]

دخلت الى الغرفة فوجدت طاولة التلفاز مليئة بالغبار
فكتبت بالغبارعلى الطاولة احبك يا........هذه هي رسالتي اليها
حقيقة الامر جد صعب معاملة هذا النوع من الرجال، لكن كما يقولون دوام الحال من المحال...
فصبرا جميلا سيدتي
تحياتي واحتراماتي لك​

 

[بقايا إنسان]

سلام الله عليكم ورحمة الله وبركاته وبعد:قبل كل شيء انت جلبتي الشتائم لزوجك وان لكم تقصدي ذلك فإن كان هذا يرضيك نقول وبالله التوفيق :لقد تذوق زوجك كل ما صنعته له يداك لكن لم يتذوق طعم الجوع ولو ذاقه لرضي بأوراق الشجر ولو كان مرّ
لأنه ان احسنتي قبح فعلكي
فاستعيني اذا بالذكاء والدهاء وقدمي له اكل جيرانك مثلا وما يقول فيه؟أوخلطي براحتك وخليك من التمحان في الطعام اذا كان نقده مطاردكي في كل مكان فأكيد سيتذكر طعامكي الاول ويحن اليه
وهذا حال المفقود ديما مطلوب والذي لم اقبله انا فيه هو:التذخين وله اطفال وزوجة؟؟هل تتحمين رائحة التدخين في زوجك؟صراحة شيء مقرف
رائحة شجارة في دارك تؤذي صغارك
سلام

 

[دعاء الجنات]

يا اختي كل راجل وطبيعتو كاين راجل لي ياكل برك ومايهموش المهم ماكلا مقبولة ونظيفة وكاين العكس ، الستيل تاغ راجلك كيما خويا في رمضان تنوض القرة دايما يدير مشكل في المايدة عمرو ماقال المايدة مليحة - انا نشوف هاذي هي طبيعتو عادي كل واحد وطبعو ومادامو راجلك الحل الوحيد تشوفي نهار مليح بدلي الجو وبدلي روحك شويا ووفريلو جو رومانسي واحكيلو على هاد المشكل بطريقة جد لطيفة وبلي راكي تديري البوسيبل باه ترضيه وراكي تتقاسي بزاف... انا ليا تحكيلو ليه خير ماتحكيلنا لينا... المشكلة تاعنا (الحوار) م

 

[لؤلؤة قسنطينة]

السلام عليكم
عندي مدة ماشاركتش في هاد القسم، على كل حال ربي يهنيك ختي لعزيزة وربي يصبرك ان شاء الله
لأنو اصعب مشكلة لما تكون في الرجل نفسو خاطر هو لي تعاشريه وتعيشي معاه ماش كيما تكون مع عايلتو
تخرجي تسكني بعيد عليهم تهناي شوي، المهم ضحكتني ختي الورد الاحمر قاتلك نلم الجماعة هادي في شكارة ونرمي هههههه
المهم الشي لي ضحكني في القصة انو العجوزة لي يصراو معاها المشاكل غالبا ظهرت بنت ناس وهي تعاون فيك
وكي هي مليحة الراجل تعوج، لا حول ولا قوة إلا بالله العلي العظي
ختي لعزيزة تقريبا رأيي من راي الإخوة والأخوات، كيما قالولك الراجل هادا والف الدلال ووالف يشوفك تقطعي روحك غير باه تفرحيه وترضيه
ماش عيب هاد الشي بالعكس من واجبك تعتني بزوجك وكلشي وتدلليه بصح لي يقر فيه الخير ماش نتي بالمغرفة لفمو وهو بالعود لعينيك
يسما نتي راكي ديري في واجبك وماكلتك نظيفة والكل يشهدلك بالطبخ الجيد ودارك نظيفة وقايمة بيها مالا ماتهتميش بهدرتو
نتي قدام ربي وعبادو بارية وماش مفرطة في واجباتك مالا علاه تقلقي روحك؟، كي يريكلامي على حاجة قوليلو هيه واسكتي
يعني ماتقوليلوش علاه وكيفاه وانا تعبت وانا هكا وهكا وصراحة ماعندي مانزيد على واش قالت الأخت بشرى ملاك
نوافقها الرأي وكيما قاتلك هادا زوجك نتي ونتي ادرى ولو بـ 50 بالمائة من طباعو مع انو متقلب الطباع وحاجة ماتعجبو
حاولي معاه وربي راهو معاك يعينك واذا مافادش فيه حطيه أمام الامر الواقع وتناقشي معاه وسقسيسه مباشرة قوليلو واش لازم ندير
باه يبان كلشي مليح عندك صارحيه مباشرة، وإياكِ أنك تنقصي من قيمتك وتقولي هو شباب عليا وتبداي تتوسوسي دايما حطي ثقة في نفسك
وربي يفرج ان شاء الله صراحة مثل هاد المشاكل نعجز نساعد فيها لأنها تدخل في شخصية الانسان
ربي يوفق لكل خير ان شاء الله وربي يهنيك
تحياتي
​

 

[ام سندس]

من شب على شئ شاب عليه

 

[rihab solotika]

3yit f pladstk ya khty...a3tini sebrek. Wlh rebi m3ak

 

[rihab solotika]

W ana tbanli gowa negrach w lazemk twelfih maykonch haka

 

[rihab solotika]

Si nn wladek yokhorjo kifo

 

[مينة آلاء الْقُدُّوس]

ربي يعينك عليه

 

[كمال مجرب]

الله يهديه هو قادر على كل شي لكن حولي تغير جو في راي وحاولي تبدل لا باسك وصورتك لانو رجل هيك يهتم بصورة اكثر من اي شي ودافعي عليه امام اهلك وكل شي ودعيه يرى محبتكي له ولكن لي سال مع احترامي كيف هو علاقته معكي وكيف هل يجاملكي هل يقترب منكي وهل ... وربي يقدر خير