مشكلتي أبي لا يتحمل المسؤولية

مشكلتي

كلمة المرور: 4algeria2024
إنضم
19 أكتوبر 2013
المشاركات
777
نقاط التفاعل
4,348
النقاط
51
السلام عليكم ورحمة الله
أنا فتاة في 22 من العمر مشكلتي مالڨري قدام بزاف مشاكل ما تبانش
مشكلتي أبي ماشي نقلكم يشرب ويعنف ويضرب بل والله 3 مرات بسبتو كرهت الرجال وكرهت حاجة يسموها زواج مش معناه راني نسيء الظن بربي سبحانو
بابا لا يتحمل المسؤولية نهائيا فكل الحمل على أمي وفوق ذاك الشيء يتقلش و يحط روحو حاجة قدامها و جامي فحياتو عوض عليها التعب لي تعباتو ..مصاريف البيت اللباس الغاز التريسيتي ليكور نتاع خاوتي كلش على ظهر الوالدة و والله له الحمد عايشين في رحمة ربي مي نقعد نخمم ونقول بابا علاه ميتحملش المسؤولية لاه برك هي تتعب وهو فوق هاذ الشي يتقلش عليها و أي شيء ميعجبوش ولا يلقى ديفو صغير يبدا يسب في امي بدون حضورها وانا منحبش بويسك لوكان ما هي والله رانا مرميين في الزنقا هو انسان ميصليش وكي يعود يحكي على الدين تحسبو امام حكيت معاه وقتلو يا بابا والله غير عيب كبير والدنيا ماراك راح تنال منها والو و الصلاة هي كلش سي فري تفاعل معايا مي والله ما ركع ركعة انا حاليا مخطوبة و اصلا زوجي عدت نشوف فيه كل مواصفات بابا و كرهت حاجة يسموها زواج ندعي و نصلي ليل مع نهار واملي بربي كبير بصح على واه برك نورمالمو راجل يشوف مرا هكا رافدة الدار بكل شيء فيها يقدسها و ولا يأثر فيا هاذ الموضوع
سيرتو راجلي من النوع لي يهز شنافتو على مكانش و يتكبر على فارغة ومافيهاش و حسيتو من النوع لي يحب يعفس لمرا
انا والله غير ديڨوتيت زواج صح ...املي بربي كبير و هاذ الديڨوتاج جا من تفانيا في الدعاء والصلاة بلاك ربي ماشي شايف فيه خير ولا مانعرف المهم ما يحس بالجمرة غير لي كاوياتو
والله نحس بمقت كبير احيانا لأبي وزوجي
ونزيدكم ابي لوكان يطلب من امي عينيها تمدهملو صح تمجعر بينها بين روحها مي متبخلوش وهو لوكان يصيب يبخلها بجغمة ماء مفهمتش لاه برك والله مافهمت قتلها كبري بالك و الحمد لله كشما تربحيها غدوا عند ربي ...هو خدام ولباس عليه من تدخل شهريتو من تقلو مثلا اعطيني نسلك ليكور يقلك منين نجيبلك عندي ناس تسالني وهو والله ماكاين غير عادة والفها
المهم خاوتي ادعولي وادعو لامي يطول في عمرها و يحفظها ماشي كي حكيت معناتو نكره بابا مي نكره فعالو و صرت نشوف فيها فزوجي عادت تبانلي نبقى سيليباتار ولا معيشة الذل سورتو كي نشوف مرا ماتسوا والو و راجلها دايرها لالات النساء ونشوف ماما تأثرت نولي نمقت بابا ثم صح

ربي يصلح احوالنا
 
Salam khti le3ziza
Rebi ygadar mamak nchallah wyahdi babak khsatan hkayat salat hadi
Hawli kifech tgoulilou baba haya tseli bina salat jama3a wbeynilou raki methamsa bech yseli bikoum wdima dirilou haka bech yhass bdnb wyerja3
Ama khti mouch kamel rjal ydaghtou 3la lemra
Nchallah khatibek maykounch mn had naw3
 
السلام عليكم :
صباح الخير
اولا تحية اجلال وتقدير للسيدة الوالدة حفظها الله وان شااء الله مقامها عالي عالي في جنة الفردوس لانو ارضاء الزوج وخدمة الزوج من اشرف اعمال المراة خاصة اذا كان الزوج من النوع الغير مبالي
ثانيا :
نضن والله اعلم انو الوالدة نتاعك ستايل قديم يعني كيما نتاع بكري متزوج للانجاب فقط اما الاحترام والحب فهو لا يراهما في المراة يعني الزوجة وعاملة النظافة نتاع وقتنا الحالي كيف كيف ؟
يشوف فيها غير الخدمة فقط وهذا شيء كبير في بلادنا لكن احمدي ربي انو عندك والديك رغم كل شيء مازالهم مع بعض لانو صراحة كاين اللي طلقو وممكن لو كانت بنت في مكانك
ووالديها منفصلين لوكان راهي تدعي باش تكون على قد حالتك انت نضن هنا الدور عليك انت باش تغيري عقلية الوالدة نتاعك بيسك انا نضن انو هي السبب في واش يصرى لانو الراجل مهما كان يبقى رجل ويبقى ضعيف من جانب المراة واي راجل نقطة ضعفو زوجتو لذا حاولو تستغلو هذي النقطة اظافة الى شوفو الرقية الشرعية ...بيسك كاين مثل بعض العين ولا سحر تاثر على العلاقة نتاع الزوجين وحتى الاب يصبح ما علابالوش بالاولاد نتاعو
صراحة ما نكذبش عليك في سنوات عندها بالاك 7 سنوات الوالد نتاعي تعرض لحادث مرور ومن بعد وقيلا حبس الخدمة لمدة فوق العامين حتى انو رجع غير مبالي تماما وكانت الوالدة نتاعي
معاه هكاك يعني ما يهتم بواش ياكلو اولادو ما والو حتى رحنا ديناه للراقي وقالنا انو الحادث نتاع المرور اثر عليها يعني عين نتاع حاسد والحمد لله بعد فترات العلاج ريح شويا حتى انو حاليا منين داك ترجعلو الحالة نتاعو
زيد حاب نسقسيك اذا كان عندك خوك كبير وقادر على المسؤولية باش يقدر يحكي مع باباك ويبدلو عقليتو شويا
اما انت يااختي اختيار الزوج لا علاقة له بالاب تماما وما تظلميش زوجك في حاجة مازالك ماشفتيهاش واذا راكي شاكة مازال الوقت متاح وتفسخي الخطوبة بعد الاستخارة والاستشارة وربي يكون معاك ختي
اما الوالدة صراحة لاشيء يدعو للاسف اذا ما ربحت حبو تربح حب ربو والسلام.
 
ادعوا الله ان يفرج كربك و يحقق لك مرادك و يرزقك بارزاقه و تاكدي اننا في دار ابتلاء و لمن صبر له الاجر الكبير عند الله عز وجل و الله سبحانه و تعالى ادا احب عبدا ابتلاه فتاكدي ان صبر امك لن يدهب سدى بل ستجزى عنه و ان شاء الله في الدنيا قبل الاخرة و ادا رايت ابتلاءات الناس صغر حجم مشكلتكم اما فيما يخص خطيبك فصلي صلاة استخارة فما خاب من استخار و لا تتعجلي و ادعي لاباك بهدا الدعاء و قولي اللهم يا متبت القلوب تبت قلبه على طاعتك و اره الحق حقا و ارزقه اتباعه و اره الباطل باطلا و ارزقه اجتنابه
 
آخر تعديل:
ربي يفرجها عليكم اختي ويطول في عمر الوالدة ويحفظها انشالله فهاذ الحالات ماينفع غير الصبر
 
السلام عليكم و رحمة الله تعالى و بركاته
الاخ حكيم كفى ووفى
ماعندي مانزيد نقول
اسال الله ان يرزقكم بما تحبون فيما يحب و يرضى لكم
تحياتي لكي اختي​
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top