راكي معجبة بيا

[sanaya]

سلام حباب
وشراكم
سمحولي منيش ڨاع نشارك
الله غالب منيش مليحة
مي اليوم حابة نحكي على حاجة من زمان راني حابة نحكي عليها
و إكزاكتومون حابة نحكي على عباد يفهموا كلشي كفاه يحبوا هما
هما عندهم تخمام مريض ويماجنيوا الناس كامل كيفهم
وباش تفهموني راح نحكيلكم حكاية صراتلي فالفايسبوك
أنا كنت مديرة فڨروب فالفايس ومبعد خترة دخل واحد جديد
لاعلينا
وأول ستاتي خبرنا فيه بلي راه مريض وغدوا يدير العملية
أيا درت ستاتي أنا وكتبت فيه لكل الأعضاء دعيوا ربي لخونا محمد بالشفاء العاجل وتنجح العملية
عااااادي
ويامات حل الفايس تاعو ودار ستاتي بلي العملية نجحت وشكرني بويسك خليت كامل اللي فلڨروب يدعوا لو بالشفاء
عادي
ومبعد كتبتلوا فكمنتير وشراك ياأخي محمد وكيفها صحتك ؟
أيا بعثلي للمسانجر ومريبونديتش
ونا من عادتي فالمسانجر نريبوندي على لبنات برك أما الذكور ديما نقولهم لي يسحقني يهدر معايا فلكمنتير فلستاتي تاوعي
الله غالب ڨروب فيها شحال من واحد منيش رايحة نريبوندي فكل وقت
واللي يسحقني إرجونس ولا صرالوا مشكل يجي لكمنتير ويهدر براحتوا
المهم كما ريبونديتش جا لكمنتير قالي :
الأخت مريم حاب نسقسيك ؟
- مرحبا
- علاه نهار مرضت درتي ستاتي باش يدعوا لي
- ههه عادي ياخي راك مريض ودعينالك
- لا واليوم زدتي سقسيتي واش صحتي راهي لاباس
- وراه المشكل كامل راهم يسقسوا عليك
- لا راني فايق بيك
- كفاه
- هاقوليها ديراكت راكي معجبة بيا



مخي صح تبلوكا
ياجدك انسان مريض و عملية جراحية ونهار تسقسي عليه تولي راكي معجبة بيه
هههههههه
والله شر البلية مايضحك
يعني مبقاتش انسانية مبقاتش أخوة
بقات حاجة وحدة هي الإعجاب والحب
سبحان الله
مي الواقع يقول أنو كل واحد يشوف لمور على حساب روحو
اللي قلبو مريض يخمم على حساب قلبو
إتسما دوكا حتى لوكان الواحدة تمشي برا وشافت واحد طاحت لو حاجة ولا هو صراتلوا حاجة متغزر مامبا معاه
بالاك يشك راهي ............. :kiss:
ياعباد طلعوا شويا النيفو
علاه لحياة كاملة وكل العلاقات تجمعوها فكلمة وحدة. هي الحب والإعجاب
أملا سيدنا موسى كعاون بنتو لشعيب باش تعمر الما هي تاني تقول :
إيه وقيلا راه معجب بيا
حاشا تقول هاك
وهذا دليل أنو المعاملات لا تنعدم أبدا وإنما أكيد كاين حدود وكل واحد خصو يصفي ذهنو و يرقى بالفكر نتاعوا وميبقاش
غير يخمم في سفاسف الأمور
ولكن للأسف كاين ناس عندهم :
الحياة = الحب
معندك وين تروح تهدر معاهم يفهموها كما يحبوا
هاالله غالب مستوى مشرف
و أصلا الناس لمثقفين معندهم وقت مامبا يخموا هاك
واللي نيتوا صافية تاني يماجيني الناس كامل كما هو
إتسما كل واحد راه يفهم على حساب روحو و كفاه يخمم
واللي مخو معمر ميخممش هاد التخمام
وربي يهدينا ويهديهم
سلام

 

[Hakan]

ربي سبحانو يقول في الآية الكريمة من سورة الاحزاب {ولاتخضعن بالقول فيطمع الذي في قلبه بمرض وقلن قولا معروفا }
من بين الاشياء التي لا تفهمها النساء بما انو الآية تختص بالنساء هو انو لازم تتعاملي بالرسميات
مش اي كان تضحكيلو ومش اي كان تبتسميلو ولا تعطيلو اشارات تفهم مش حتى من الشخص نفسو بل حتى من الناس كاامل
نشفى العام اللي فات كنا مدايرين اضراب على وحد الاستاذ هيا حبت وحد الطفلة تدخل وكانت تقرى معايا في القروب
قالولي الجماعة ياودي البنات راهم يحشمو منك ها روح اهدر معاها وقنعها كي ما الحال رحت حكيت معاها نورمال قاتلي مارانيش رايحة نكاسي الاضراب
على جالك والله ياخاوتي بهذي الكلمة قاتلي مي خليهم يدخلوني نصلي في المصلى لانو المصلى في الديبارتومون
هيا وكاين شي ناس سمعو الكلمة العجيبة { على جالك } ومشات هدرة بالل الطفلة هذيك راهي معجبة بحكيم
والحاجة اللي زادت هردتلها جد باباها كي كانت رايحة تدخل حسبو الجماعة بلي ما قدرتش نقنعها
هيا قاولولها ممنوع تدخلي قاتلهم خلوني ندخل مارانيش رايحة نكاسي الاضراب ههوما مافهموهاش
ياسيدي قاتلهم راني رايحة لبلاصة سقساوها وينا بلاصة قاتلهم راهو حكيم علابالو هههه ويزيد يحصل خوكم
الجماعة خلاوها كي سمعو اسمي ومن بعد كامل شافو فيا وقعدو يضحو ههه وبدا سوء الظن مع انو في داخلي كنت نشوف انو الطفلة عاملتني معاملة زميل تحتارمو برك
لكن الناس مافهموش انا ساعات نشوف بعض ليكومنتار لبعض صحابي ومعاهم فتيات هكاك ويحطو القلوب والضحك
انا نشك نقول بلاك راهي معجبة بيه يعني تصرفات الطفلة تخليك والمشكلة انو غالبية الناس قلوبها مريضة
يعني اي حاجة يفهمها انو الطفلة طايحة فيه وتحوس عليه مي كاين شي بنات يكثرو فيها
ساعات طفلة تصرعك بالرسائل الخااصة انت تشك في عمرك ااو واش تحوس هذي يعني تتجاوز هذيك الرسميات
حتى دخلك في افكار اخرى والله اعلم وربي يهدي الجميع شكرا موضوع جميل ..​

 

[البحر الهادي]

شكرا لك
صح أخت الأمور انقلبت
رب يوفقنا ويبصرنا بعيوبنا

 

[sanaya]

ربي سبحانو يقول في الآية الكريمة من سورة الاحزاب {ولاتخضعن بالقول فيطمع الذي في قلبه بمرض وقلن قولا معروفا }
من بين الاشياء التي لا تفهمها النساء بما انو الآية تختص بالنساء هو انو لازم تتعاملي بالرسميات
وي عندك الحق مي أنو تدعي لشخص وتسقسيه بعد العملية منيش شايفة هنا أي مشكل خصوصا وأنو لم أتواصل معه بأي شكل
ولو كانت المرأة عاملة مثلا وزميل عمل كان مريضا أليس من اللباقة السؤوال عنه
أنا نشوف هاذ الشي من باب الإنسانية
يعني لوكانت طفلة مريضة ندير نفس الموقف
علاه ككون ذكر يفهموا لحكاية كما يحبوا هما
هاذ موقف يتخذ مع أي شخص مريض ذكر أم أنثى
مش اي كان تضحكيلو ومش اي كان تبتسميلو ولا تعطيلو اشارات تفهم مش حتى من الشخص نفسو بل حتى من الناس كاامل
وي الضحك والكلام الزائد راني معاك فهاذي
نشفى العام اللي فات كنا مدايرين اضراب على وحد الاستاذ هيا حبت وحد الطفلة تدخل وكانت تقرى معايا في القروب
قالولي الجماعة ياودي البنات راهم يحشمو منك ها روح اهدر معاها وقنعها كي ما الحال رحت حكيت معاها نورمال قاتلي مارانيش رايحة نكاسي الاضراب
على جالك والله ياخاوتي بهذي الكلمة قاتلي مي خليهم يدخلوني نصلي في المصلى لانو المصلى في الديبارتومون
هيا وكاين شي ناس سمعو الكلمة العجيبة { على جالك } ومشات هدرة بالل الطفلة هذيك راهي معجبة بحكيم
والحاجة اللي زادت هردتلها جد باباها كي كانت رايحة تدخل حسبو الجماعة بلي ما قدرتش نقنعها
هيا قاولولها ممنوع تدخلي قاتلهم خلوني ندخل مارانيش رايحة نكاسي الاضراب ههوما مافهموهاش
ياسيدي قاتلهم راني رايحة لبلاصة سقساوها وينا بلاصة قاتلهم راهو حكيم علابالو هههه ويزيد يحصل خوكم
الجماعة خلاوها كي سمعو اسمي ومن بعد كامل شافو فيا وقعدو يضحو ههه وبدا سوء الظن مع انو في داخلي كنت نشوف انو الطفلة عاملتني معاملة زميل تحتارمو برك
شفت بعينك كلمة صغيرة ولات قنبلة
وهذا يعكس مستوانا التقافي والله أنا نشوفو نقص في الثقافة ومستوى فكري دنيء جدا

لكن الناس مافهموش انا ساعات نشوف بعض ليكومنتار لبعض صحابي ومعاهم فتيات هكاك ويحطو القلوب والضحك
انا نشك نقول بلاك راهي معجبة بيه يعني تصرفات الطفلة تخليك
وي كاين بنات يكثروا على رواحهم ككون نقاش فموضوع ثقافي نورمال مي ساعات نلقى دستاتي فارغين معندهم حتى معنى ونروح لكمنتير نلقى راهي دايرة حالة
راني معاك فهاذي حاجة وحدة النقاش فالمواضيع الثقافية و بأدب واحترام أعتقد أنو لا حرج فيه
والمشكلة انو غالبية الناس قلوبها مريضة
المشكل راه هنا إتسما حتى لوكان الواحد ماشي بنيتو لازم يعس روحو من هاذ الناس الفارغين
يعني اي حاجة يفهمها انو الطفلة طايحة فيه وتحوس عليه مي كاين شي بنات يكثرو فيها
ساعات طفلة تصرعك بالرسائل الخااصة انت تشك في عمرك ااو واش تحوس هذي يعني تتجاوز هذيك الرسميات
وي كاين الشاب لموسوس حاجة صغيرة يفهمها كما يحب وكاين الطفلة اللي تكثر على روحها
مي توجور
ومشكور على الحضور والرد القيم
سلام
حتى دخلك في افكار اخرى والله اعلم وربي يهدي الجميع شكرا موضوع جميل ..​

 

[sanaya]

شكرا لك
صح أخت الأمور انقلبت
رب يوفقنا ويبصرنا بعيوبنا

أمين يارب
ومشكور على المرور

 

[mohamedfathi]

ههههههههههههههههههههه
عفوا ..
أناس ينقصهم العاطفة يمكن ...
او أنهم في الهوى قدى غاصو ..
شكرا لك على الطرح القيم
واللهم أهدي الجميع

 

[sanaya]

ههههههههههههههههههههه
عفوا ..
أناس ينقصهم العاطفة يمكن ...
او أنهم في الهوى قدى غاصو ..
شكرا لك على الطرح القيم
واللهم أهدي الجميع

أنا نقولهم تخصهم الثقافة مش العاطفة
لوكان مخهم معمر ميخموش هاك
شكرا على الحضور أخي محمد
سلام

 

[حلم كبير]

السلام عليكم و رحمه الله تعالى وبركاته
اختي الفاضلة موضوعك قيم بارك الله فيك
شبابنا ضايع لا يعرف لا من طيب الخاطر ولا الاعجاب .
يعني ما الذي يجعلك مثلا تعجبين به لدخوله الى المستشفى وسؤالك عنه؟ الم يفكر بها قليلا هل رأيته حتى او رأكي هذا جهل بالنسبة لي وقلة حياء.
هل علم حتى انك متزوجة ام لاطفال جدة تسأل عن أحوال حفيدها مثلا ولم لا هناك جدات كثر في الفايسبوك وما أدراه.
اختي احترسي والحرس من هذه الاشكال.
نوعية الناس هاذي كثيرة وان لم تضعي حدا من الاول ستجدين منهم الكثير.
الله يسترك ويحفظك اختي الفاضلة
تقبلي مروري مع فائق الاحترام والتقدير
حلم كبير​

 

[miss victoria]

السلام عليكم
عندك الحق هاد الوقت يفهمو كلش بالنقص
و حتى في بعض الكلمات لي نقولوها يفهموها حاجة وخداخرة
الله غالب متخلفيييييييين البعض فقط

 

[يونس قاسم]

عيش تشوف صح

 

[*amani*]

السلام عليكم
اييه هذا هو الوقت اللي وصلنالو يشوفوك تهدر مع واحد خلاص فلانة راهي مع فلان..........
تضحك معاه وتعاملو بالمليحة وتحترموا خلاص السيدة طايحة فيا على الاخر
هه عقلية مصوفة .....سبحان الله
ربي يهدي ماخلق ...مشكوورة على الموضوع

 

[،كارينا،]

السلام عليكم خيتي سنايا
والله عندك الحق صرات معايا بزاف
نشفى مليح لواحد حكم عليا وقت وين مانكتب حاجة قولي علو وشكون راكي تهدري وتحبيه لهاد الدرجة لوكان غير جيت في بلاصتو قتلو ياخويا عفني قالي لو كان غير نلقى كيفك تولي مخلصة كما هاك
دا في المنتدى ماعلباليش وراه ضرك مي انا نقول صح نهار لي خرج فرحت تفكيت منو بصح نقولو ربي يسعدك ياخويا وتلقى لتسعدك ...على هدا انا من اليوم ومن موضوعك رايحة بلي لي انا نكتبو مانيش قاصدة بيه اي كان سواء لقريب مني او لبعيد لي نحبو ولا مانحبوش اذا سفتوني كاش ماكتبت اعرفوها كلمات عجبتني وفقط يقولو لي فات مات ...
والاحوال تتبدل حتى لو كان كنتي معجبة بيه صايي خلاص الدنيا تبدلت علاش تقعدوا لاصقين في كلمة تحبني ومعجبة وتكتب عليا وتهدر عليا خلاص .......
انا نقولك وقدام الجميع كان واحد شوي نميلوا هدرتو تعجب ناس ملاح هايل بصح ماشي معناتو رانيمن الحب ميتة عليه نوو وقت وفات كانت بكري الدنيا تتبدل .....
معناتو لازم يفهم ماشي مرة يحسبها طوول راكي عليه ...ونقول للجميع ربي يهنيكم ويسعدكم ...
ومشكووورة على المووضوع هايل
دمتي متالقة

 

[الامين محمد]

أهلا أختي
يعني سبحان الله شي عجب زعما هو ديكابريو و الطفلات طايحين عليه
و يا سعدها اللي شاف فيها
باختصار كل وعاء ينضح بما وضع فيه
فالكاس اللي فيها عسل تفرغ العسل و الكاس اللي فيها سم تفرغ سم
انت صنعتي واش تعلمتي من اهلك من تربية صحيحة و تعلكتي تسألي على المريض
و السيد تعلم الخدع و المكر و تعلم الرداءة
يعني انت عملتي بأخلاقك و هو عمل بأخلاقه و طبعه

ما تحزنيش اختي للأسف أصبحت هته الأمور شبه مألوفة في مجتمع خايب و بايخ
للأسف بعدنا على دينا و على العلوم و عمرنا وقتنا بالسخافات
أختااه في أحد الأيام كان عندي صديق مقرب من ناس واصلة و مسؤولين
واحد المرة كان عندهم اجتماع جا في بالي نسقسيه
واش راكم تتكلموا في الاجتماعتكم و هل فعلا راكم تتكلموا على هموم المواطن
و الله ضحك حتى قريب طاح و قال بالحرف الواحد اليوم حكينا
على الزين و شكون عنده أجمل سكيرتيرة
سبحان الله زعفت منه و قلت ليه رايح كلكم تموتوا و رايح هاذ الشعب
ياخذ حسناتكم طبعا اذا عندكم حسنات و رايح تحملوا ذنوب هاذ الشعب

و قبل ما تموتو رايح تصبحوا نتنين كيما الضباع و ما تلقاوش واحد يسلم عليكم
تخاصمنا و كل واحد راه لطريق و دارت الايام و و هاذ المسؤول اليوم ماهوش لاقي واحد يجلس معاه
و راه مريض نفسيا

آسف على الثرثرة سيدتي لكن هته الطباع تقلقني بزاف ربي يهدينا اجمعين

 

[Salah eddin]

السلام عليكم
ههه
على حساب ما فهمت لاني ما قريتش كل الموضوع
السيد راح بالو بعيد
و اصلا عالم الهلاك بوك هذا في اغلب الاحيان يدي لامور ما يتوقعهاش العبد و ما يحسبلهاش حساب
ههههه
السيد ق يتلاح
ونتي ثاني راكي شوي حليتي العين شوية
ههه
الهدرة هي هي في الماسنجر و لا في الكومونتار
ههه
ههه
الله يهدي العباد و يصلح البلاد
و
شكرا ​

 

[ليليا مرام]

السلام عليكم
سنايا اختي ما تحيري ما والو ناقصين حنان يماهم وجداهم وزيدي. وارثين مراية الشريره فميكي فلة والاقزام السبعة يا مرآتي من الاجمل
حكيم قالك. انو المرا فالدين مالازمش تهدر هدىه ويطمعو الرجال ايه عندك الحق خويا حكيم مي واش نديرو. للمهابل اذا الواحد موسوس راهي دعات للمريض قالها تحبيني يا حوجي وهذا الحب واش. اللي نديرلو كومونتير نحبوه هذا قلب والا ترمواي
انا مرة واحد سقسيتو على عيادة ورالي ايا رجعت مرة اخرى من نفس الطريق قالي لقيتيها قتلو ايه صحا خويا مشيت شوي قالي مادموزال قتلو تفضل خويا قالي قولي الصح. رجعتي. منا بالعاني شوفي نقولك واش درت والله صدقيني نحيت صباطي ضربتو بيه قتلو وي خاطر نسيت نعطيك بيه يا الحمار هههه قولي حكيم ضرك هذا حمار عادي والا وحشي وحدة تسقسي على بلاصةقالها رجعتي علجالي هذا معوق من راسو
سنايا ما تقلقيش روحك مرضى دايرين قيمة لروحهم بزاف

 

[،كارينا،]

حبيت برك نوضح حاجة كي قلت نميلو وهدرتو تعجب ماشي معناتو طايحة ونحبوو انو نو قصدي معناتو ينزل حاجات ذات معنى ومفهوم قيم ومتميز في كلشي فاهم ويعرف كيفاش يهدر يعني انا كوحدة من متابعين الدائمين ليه فقط
وفوقها ماشي هنا في المنتدى وباش مايفهمونيش بشكل غالط

 

[ليليا مرام]

حبيت برك نوضح حاجة كي قلت نميلو وهدرتو تعجب ماشي معناتو طايحة ونحبوو انو نو قصدي معناتو ينزل حاجات ذات معنى ومفهوم قيم ومتميز في كلشي فاهم ويعرف كيفاش يهدر يعني انا كوحدة من متابعين الدائمين ليه فقط
وفوقها ماشي هنا في المنتدى وباش مايفهمونيش بشكل غالط

يا كارينا ووعلاه راكي تشرحي
يا اختي انا لو واحد يعجبني فالمنتدى ونميل ليه وطايحه فيه شكون يسالني وعلاه ضرك اللي نديرلو شكر او رد نحبوه اواه جماعة. التوسويس الباب والتاقه مفتوحين واللي لاطاي ما تساعدوش يثقب البلافو ويخرج مش مجبره تبرري

 

[،كارينا،]

يا كارينا ووعلاه راكي تشرحي
يا اختي انا لو واحد يعجبني فالمنتدى ونميل ليه وطايحه فيه شكون يسالني وعلاه ضرك اللي نديرلو شكر او رد نحبوه اواه جماعة. التوسويس الباب والتاقه مفتوحين واللي لاطاي ما تساعدوش يثقب البلافو ويخرج مش مجبره تبرري

هههه ايه عندك الحق بصح انا حبيت نشرح وباش ما يجينيش لي يقولي راكي عليا ولا معجبة بيا نوضح من ضرك ماصدقت تفكيت من هداك الاول نلصق في التاني ..وايه اكيد طبعا مايسالوناش عندك الحق ...لخاطر وين ماتكتبي يقولك وشكون تقصدي وشكون هدا يكرهوك في حياتك
وشكرا خيتي ليليا فرحت بردك واهلا وسهلا ..موووفقة

 

[sanaya]

السلام عليكم و رحمه الله تعالى وبركاته
اختي الفاضلة موضوعك قيم بارك الله فيك
شبابنا ضايع لا يعرف لا من طيب الخاطر ولا الاعجاب .
يعني ما الذي يجعلك مثلا تعجبين به لدخوله الى المستشفى وسؤالك عنه؟ الم يفكر بها قليلا هل رأيته حتى او رأكي هذا جهل بالنسبة لي وقلة حياء.
هل علم حتى انك متزوجة ام لاطفال جدة تسأل عن أحوال حفيدها مثلا ولم لا هناك جدات كثر في الفايسبوك وما أدراه.
اختي احترسي والحرس من هذه الاشكال.
نوعية الناس هاذي كثيرة وان لم تضعي حدا من الاول ستجدين منهم الكثير.
الله يسترك ويحفظك اختي الفاضلة
تقبلي مروري مع فائق الاحترام والتقدير
حلم كبير​

هههههه لست جدة ياااو
ياأخي أنا تخليت عن إدارة الڨروب و بلوكيت الفايس لقديم بسباب هاذ التفكير
وناس كما هادو ميهمهمش لا مزوجة لا أم بالاك هو مطلش ڨاع فبروفايلي
مي أنا نقتل روحي كنتعامل مع انسان من نيتي ويجي يفهمها هاك
سبحان الله وكأنو لازم نعاملو الذكور على أنهم مخلوقات لاتستحق الشفقة
ونهار تسقسي على أخ أو زميل يولي يفهم ففهامات فارغين
و زيد العبد هاذا يومين ملي دخل لڨروب
وهدر هاك
إتسما شعب موسوس علاخر
مشكور على مرورك أخي
والحمد لله لقينا فاللمة إخوان مثقفين ومحترمين
وهدفنا الأول والأخير هو الثقافة
أليس أفضل من الفيس الذي لا توجد فيه رقابة
سلام

 

[sanaya]

السلام عليكم
عندك الحق هاد الوقت يفهمو كلش بالنقص
و حتى في بعض الكلمات لي نقولوها يفهموها حاجة وخداخرة
الله غالب متخلفيييييييين البعض فقط

نعم عندي تخلف
والمثقف ميلقاش الوقت يخمم هاك
مي الفارغين عندهم الوقت يخمو تخمام مريض
وحنا الله غالب نهدروا من نيتنا ونحصلوا