هذي اللي قالك هبلنا وهبلنا معانا هههههههههه
ديجا كاين لي قالولي متبيعوش @الورد الأحمر أخطيك من المسابقة هذي لمهابل مكاش فاللمة راك وحدك دور هههه
وممبعد الطبيب الصغير لي في مخي قالي كوراج سكاكر هههههه
لوكان تشوفو نحكيلكم على واش صرالي بوه بوه على حياتي راحت ظلمة
انا نهار كنت سكر على ديداني ماشي كيما ضرك ولاو يقولولي فنيان
صح كنت فنيان شويا وزاد كمل عليا صاحبي
مرة انا راقد صباح ربي على 11 حتى نسمع لعياط يا السكر يا السكر
اووووف صاحبي الصامط هذا ديما يجيني كي نكون فالحلقة قبل الاخيرة تاع الحلم
ديما خدوجة تاع المسلسل في الحلم تاعي مانعرفش الى تزوجت ولالا وسوستني
المهم خرجت ليه فهمني واش تسحق مع صباح ربي
قالي أأأأأأأأسكر
أأأأأأرواح ننننننقققققيو الللللحومة مممممع اااااااااناس
أأأأأأكتتتتتعرف نننندييييييرو للللللخير
أسكت عليا وجهك وجه النقى مصاب تروح أدوش كي الناس
نضت على سواد سعدي
سكر أفنيدي كيما تقول ليلوش ههههه ينقي وسخ الحومة ماصراتش هذي
مي في خاطر خدوجة لي راهي طل ملبالكون ولمنام تاعها ماحبش يخلاص
نروح نعاونهم
غسلت وجهي لبست حطة شويا تجلجيلة وخرجت
هذا سكر ماشي حاجة منوالا هههههههههههه
وتانيت خدوج فلبالكون ماشي تانيت حاجة منوالا
رفدت الرفش فيدي ( كيما يقولولو في كتاب القراءة سنة 4 ابتدائي هههه )
السخانة حاطة فوق راسي تقول شواية فيها الشحمة مالسخانة ولعرق والفوحة أعق أعق
سي مال لو تغافاي دون لو بوبال
حتى جات وحد الطونوبيل الله الله انا ديركت طلعت راسي للبالكون تاع خدوج ياه ياه
نشوفها ولا حديدة ولا الله غالب عليها هههههههههه
أقراوها بالريبيتيسيو
يامحاينك ونشوفها ناضت وحكمت الجيمان وشافت حتى شكون فالطونوبيل
ويخرج ساشية تاع الزبل ويرميها وديركت بدون تحفظ ولا مبالات جات فوق راسي
طبرخ ... صراتلي كيما ازويط وقفت السيارة ... تاع كتاب القراءة دائما ههههه
المشكلة ضحكت عليا الراسة لمسخة تاع خدوج
بصح خوكم سبورتيف طاح ناض كان هنا وراح النفس مكاش مخلوفي فالجري هههههه
حتى لقيت روحي فالدار مع الشكارة تاع الزبل هذيك مكسل فوق الكنابي
آيما على يما وهذي واش راهي دير معايا فوق لفراش
نضت نرميها قلت نطل فيها واش كاين ممبعد ساهل
اوووومايgود وات ذيس ايز ... فور فالمواد الاخرى ماشي غير فكتاب القراءة برك هههههه
ويقولو السكر ماعندوش الزهر
يما سكرية وليدك خرج م الغرقة والبأس الدائم وجديلي لغدى راني جاي
يما جابتهالي كي تاع انوش مافيا اكاااااي اكاااااي تكون تسمع بيه هههههههههه
قلتلها يا يما وليدك مزهور ليوم لي فقت بصح ماشي روطار ههههه
وشفتي لي يضربوه بمليار في لوجه ههههه
قالتلي اواه لازم ترجعهولو يكون غلط ورماه وجا فوق وجهك
ياو والله مانرجعو والتبهديلة مع خدوج ... مانرجعهمش الى بغى يزيدولي مليار وحداخر
ديجا فلحلم تاعي اللي هو تاعها نقوللها غير تتزوج رضا الطارزون
ضحكت عليا وجه البخص خخخخخخخخ
يما راني خارج واش نجيبلك ليوم نفرحك يامحاينك
ايه جيبلي شويا قرفة وربطة معدنوس
اووووو يما مزيا مكاشها خدوج تزيد تضحك عليا
تولي ( اقراوها بالفرنسية ) 2 زون 1 تاع ضد القشرة
آه يا وليدك ويخرج سكاكر ويتبختر ويضرب شويا هواء ويطلع شعرو كي تاع مهند
وطل خدوج م لبالكون وطيح تتغاشى وانا لا أبالي بأحد
قلت ليوم نتمتع بالدراهم شحال مليح كي تولي شخصية بين نهار وليلة
هبطت للحومة
نبرد قبلي فالبيتزا او ديما نشم غير الريحة تاعها ليوم نسييها كيفاه
دخلت للبيتزيريا ونلقا صاحبي عزو غير ماشافني قالي
ممممماتتتتتقولش ببببببلي اااااانت لللللللي لللللقيت مممممليار
قولتلو ماتقوليش بلي فقتلي
قالي وووووباقي جججججامي ددددخلت لهنا
عععععععلعام ممممشومر أأأأنت
قلتلو بلاك تبيعني مالا كول بيتزا خالصة من عندي
كليت بيتزا ودشنت المليار جبدت منو صوميل يا محاينكم ههههه
بصح شاحل حلوة البيتزا ياو خيرمن ريحتها ههه
انا خرجت من البيتزيريا ونسمع لعياط مورايا
حبست هذا عزو صاحبي درت ليه
أأأأأسكر أأأأسكر لللللللابوليس
ياو فففففاقولك
تفكرت تاع عمار لابوليس
وننطلق للجري وين معلباليش آه تفكرت نروح لدار نجيب الشكارة
وفي تلك الاأثناء أنا أجري ولابوليس ورائي
حتى وصلت للدار دخلت من التاقة رفدت الشكارة فوق ظهري وانطلقت للجري
سوطيت من الدرجة تاع الباب حتى نسمع خدوج تعيط ملفوق
سكر أديني معاك ماتخلينيش هنا
وين نديك وين ياجدك عمبالك روبنهود فوق العود ياو لابوليس
قالتلي مالا خليلي الشكارة هذيك خخخخخ
آه شكارة ... تبا لك إنقلعي قبل أن أنفجر
لم أعبأ لصراخها وانطلقت للجري المهم غير الدراهم لي مايوليوش ليهم
ديجا أصلا الضربة للوجه هذيك وحدها تسوا مليار و200 مليون
هذوك 200 مليون سمحتهوملو خاطرش المسابقة هذي قالك مليار برك
في الطريق ديسيديت نروح لايروبور نحكم طيارة ديركت لألمانيا
الزين لصفر والعنين لخضر والسيارات الفخمة
الحطة والقدام
بالذكاء تاعي والخفة هربت للشرطة ديريكسيو سفارة ألمانيا
شريت فيزا ب 70 مليون تاع آلي صون روتور
ويامحاينك للمطار دخلت استقبلت الطائرة بصدر رحب
قابلت الطيارة بوجهي البشوش المفحم من الشمس
فتحت يدي كيما روز فالتيتانيك مع ديكابريو
بصح انا وحدي
وعيطت بصوت عالي
ألوفيو ألمانيا موشنغلدباخ شتوتغارت كلوزه بشردخ مانويل نوير
الترجمة
(رانا جايين يا ألمانيا حلو البيبان )
حتى نسمع واحد مورايا رجعلي بصوت بشع غليض
سركاجي ينادي نحبك يبلادي على وزن أغنية وردة
ويحكمني ميدي ويردخني أرض
قالك شرطة متهوم بسرقة المليار وتهريبه الى الخارج
تلخرتلي فالمحكمة نشارع وسيدي الجوج حكم عليا 6 أشهر حبس مع تنظيف كل اليوم المراحيض
قلت معليش الحبس للرجال
جوزت 4 شهور برك وخرجونا لاgراس
قالك الرئيس تاعكم نوى يتزوج خخخخخخ
يومين بعد ما خرجت من الحبس انا مريح فالحومة كي العادة مع صباح ربي
حتى جوز عليا خدوج رايحا تقضي فالمارشي
خدوج صباح الخير
شافت فيا بنص عين ودورت راسها
انا وقفت رفدت ساشية زبل ونتيريها عليها للوجه
علاه ماشي تحكم الشكارة وديماري بجرية وحدة لدارهم
أنا طنهت واش صرالها
طلعت راسي للبالكون حتى نلقاها تعيط نفس العيطة لي عيطتها انا نهار لقيت الدراهم
اوومايgود وات ذيس ايز
وبدات لبكا وطيشت الشكارة من البالكون
ههههههههه قالك سمانة وانا نشوف فيها كل يوم طلع النظاف والقريزيل ملحانوت ههههههه
الساشية هذيك فيها زوج ليكوش
قالك الطفل هذاك شرب زوج طيسان رايب وباطة تاع ياغورت وزات تغدى باللوبيا ههههه
وممبعد صرات الكارثة
هذي هي حكايتي مع المليار
ان شاء الله تكون عجبتكم قصتي
ايا في مواضيع أخرى
ماديروش عليا
سلام
آخر تعديل:
