مشكلتي يوم الخطبة..

[مشكلتي]

السلام عليكم...
انا تعرفت على واحد في الجامعة..وطلب يتقدملي..وافقت..والحمد لله كانت نيتو حسنة..جا وتكلم مع أهلي..وأهلي وافقو عليه وتفاهمو على يوم لي يجييو فيه باه يديرو الشوفة..
لحق نهار لي يجييو فيه..جات امو واختو وباباه..رحبنا بيهم ضيفناهم. وكانت الامور كلها مليحة..
مي كاينة حاجة خلاتني نخاف ونتردد وهيا الوالدة تاعو..معاملتها وطريقة الكلام تاعها معجبتنيش..والله منيش نظلم في المرأة..مي حقيقة..كلامها كلو استفزازي..وكي دخلت باه نسلم عليهم وقعدت معاهم مشافتش فيا خلاص..
قاعدة تحكي غير مع ماما ومع مرت خالي وانا تجاهل تام..
كي دخل ابنها وقال وطلب رايها فيا قاتلو خي نت لي عجباتك..شغل قاتلو انا معندي مدخلني..كانت قادرة تقولو الله يبارك وتسكت..
ايا لا علينا ومنبعد روحو..طفل نيتو من الاول راضي وقابل وجاب اهلو للتعرف برك..ونا ثاني راضية..وقابلة..مي كي شفت الام تاعو دير هكا مفهمتش وش ندير..
بعد كي روحو فاتو يومين اتاصلت بيا قريبتهم قاتلي مبروك عليك وراهم حكاولي بلي جاو وشافوك وعجبهم الحال..وفي الأخير قاتلي جملة خلاتني نزيد نتأكد من نية أمو..قاتلي راهي قالت عجبتني عروس خالهم نحسبها هذيك هيا طفلة لي خيرها وليدي فرحت..مع العلم عروس خالي عروسة جديدة يعني مهيش كبيرة
دك بقيت حايرة وش ندير انسانة متعرفنيش وجامي شافتني مام كي دخلت مخزرتش فيا وبدات تحكي هكا..ومنبعد وش دير! كيفاه راح نعيش مع انسانة مدارتليش قيمة ولا مفرحتش بخطبتنا..

اعطيوني آرائكم حول الموضوع

 

[السلطانة]

وعليكم السلام ورحمة الله وبركاته


اهلا وسهلا بيك أختي الف مبروك ربي يكمللكم بالخير ان شاءالله
بانتلي امو ممكن حبت تخير لابنها وكي هو خير وحدو معجبهاش الحال
انا نقولك متخافي متترددي
راكم متفاهمين وقانعين ببعض
خطيبك هو الاساس
ننصحك نصيحة برك من اخت لاختها
اطلبي دارك وحدك باه متندميش مباعد
لانو حماة كيف هاذي تصمطلك حياتك
واذا كانت حماة خلاف انا حسب تجربتي الخاصة اطلبي دارك وحدك

وربي يكمللكم بالخير

 

[إلياس]

اوافق كلام الاخت في كلامها اطلب دار وحدك باش يكون صراع بينك وبين أمه باش يقعد القدر بينك و بين أمه ان شاء الله فيها خير ، ربي يهنيك و يجمع بينكم أن شاء الله تكوني أسرة متامسكة يسودها الاحترام المتبادل و المودة و الرحمة ، مبروك الف مبروك عليك

 

[جليلوس]

اهلا
مبروك عليك الخطبة وربي يتمم لي فيها الخير
شوفي نقولهالك ملخر يا كانت باغية تخطب لولدها يا ولدها خشن راسو وبغا يتزوجو وجابها بسيف باش تخطبك وخلاص باش يحبس تبلبيل عليها
يلا راكم متفاهمين نتوما سقسيه مافيها والوا على ميمتو واش قالت عليك نهار الشوفة بطريقة غير مباشرة باش ماتخسريه لا هو لا مو
انا نقولك حاجة روحي عاودي صلاة الإستخارة وربي يسخر ان شاء الله

 

[خديجة ph]

السلام عليكم اختي
مشكورة على طرح الموضوع ربي يكملك و يسعدك دنيا و آخرة
الاخوة ما شاء الله نصحوك مليح
حبيت نظيف ان هذي هي العجوزة الجزائرية اختي و حتى لو احبتك في الاول مع تزوجي خلاص يروح التمثيل
و كيما قالو الاخوة اول شيء داااارك وحدك و لو كراء ثاني شيء هل هذا الزوج يستاهل تتحملي ثرثرة امو ام انه ما يساهلش
هل هو راجل متدين هل هو تاع دار مش هواوي راسو فيه الريح هل كافي روحو و قادر يفتح دار هل هو مقتنع بك مش يحبك اعلم انه يحبك لكن هل عقله مقتنع بك هل عندما يقلك انه تعجبه صفاتك الفلانية مثلا خلوقة صبورة عاقلة حكيمة هل انت فعلا هكذا
ان كانت هذه الصفات موجودة فتوكلي على ربي رح تحاول تتدخل في حياتكم لكن بعد مدة رح تيأس يبقى غير ساعة على ساعة رشات من سمها ههههه و رح تنسايهم
لكن اذا كان اللي بينك و بينو نزوة حب و هو غير قادر عالزواج فالهربة اختي ديري جنحين و طيري للموزمبيق ولا تديه
لا تنسي الاستخارة
ربي يسرلك الخير
سلام