مشكلتي نويتها حلالي وطعنتني !

مشكلتي

كلمة المرور: 4algeria2024
إنضم
19 أكتوبر 2013
المشاركات
777
نقاط التفاعل
4,348
النقاط
51
السلام عليكم
عيدكم مبارك
اما بعد
خاوتي وخوتاتي انا عضو قديم معاكم فالمنتدى عندي مشكلة وحبيت نشاركها معاكم
بلاك تقترحو عليا حلول فولله اني حيرة في امري

اولا انا تعرفت بانسانة متجلببة وكانت نيتي بيها الحلال ليس الا في اول ما.حكيت معاها قتلها تتيسر الامور ونجيك دارنا نخطبك من عائلتك وكلشي ، المهم بعد مرور 6 اشهر تماما وهنا كانت قربت مرحلة الخطوبة لي نورمارمو كنت راح نخطبها في سبتمتبر القادم المهم كنت نتقلاها احيانا وكنت نقولها مذبيا تكوني حلالي وان شاء وان شاء الله منتوشيكش فالحرام ومنكونش سبة انو ربي ميباركلناش فالعلاقة يعني كنت نخاف عليها من روحي .. حتى طاح عليا المشكل ..
انا انسان موظف ، المهم صراولي مشاكل كبار فالخدمة في هاذيك سمانة مقدرتش نحكي.معاها علما اني قبل كنت نحكي معاها بشكل يومي فالفيس، المهم هاذيك سمانة كانت تعيطلي وتالمو كان المشكل لي صرايلي كبير بزاف مكنتش قادر نركز مع اي انسان فدنيا وهي مقدرتش نعيطلها ولا ممبا نريبونديلها ومكنتش نفتح الفيس الا للضرورة مدة دقائق ونبلع علما اني مكنتش حاب نفولها مشاكل لي صاريلي بويس كانو بزاف كبار، المهم حتى في اليوم الرابع عيطتلها وقتلها عندي مشاكل واعذريني قاتلي مش سبة وانا وش دوري ونورمارمو تحكيلي مشاكلك ؟ المهم قتلها مش حاب نخلط بين مشاكلي وعلاقتنا .. مر اليوم هذاك ومبعد اليوم لي موراه دخلت للفيس تاني تزايدنا فالكلام ثم قتلها تصبحي بخير ...

بعدها خاوتي 15 يوم مجاني حتى اتصال وحتى ميساج منها حتى توسوست منها كي ندخل الفيس نصيبها اون لاين مي مبعتت حتى ميساج ، علما اني كنت ندخل مرة فالنهارين للفيس بسبب تعسر المشاكل ..
حت قلت ييني وبين روحي هذا الانسانة لي جبدت روحها ولي راني ناوي نتقدملها علاش منجربش نتاستيها .. كيما كان الحال فتحت حساب وبعتلها ميساجات نهارين لولين مريبونداتش حتى بعتلها ميساج قتلها يا بنت ناس ريبوندي راني نحتاجك في موضوع مهم ، عليه ريبوندات قاتلي وش الموضوع تماك قتلها انا انسان شفتك من زمان وحاب نجي نخطبك .. اذا توافقي ولا لا قاتلي انا منعرفكش قتلها مش مشكل انا وسمني فلان وكدا وكدا ونسكن كدا عطيتها معلومات خاطئة كليا ...
طلبت مني الصورة بعتهالها
قاتلي جامي شفتك قتلها وي بويسك نخدم شوية بعيد وكامل
المهم بعد دردشة على العيد والكبش والبوزلوف
قتلها معليش تمديلي نميرو يماك قاتلي واش السبب .. قتلها باش نمد ليما تحكي معاها
قاتلي يما معندهاش تيلفون
مبعد طلبت نميرو تاعها قتلها كي نكون راح نعيط اني نطلب منك تمدي تلفون ليماك ونجوزلها يما ويحكيو

المهم
خاوتي القصة راهي هنا ! واش راكم تشوفو انتم ؟

*اذا كنت انا غالط.معاها في شيء ؟
*اذا تستاهل نعطيها فرصة ولا نخرجلها فيها طاي طاي ونصارحها ونقولها انا هو ذاك الشخص ونقطع علاقتي بيها بشكل نهائي
*اذا منصارحها ما والوا ونجبد روحي كامل !

هاذي تتحسب خيانة ولا كيفااش !!
بالله عليكم ارشدوني فأني تآئه ومنيش حاب ندير قرار تعسفي
 
راكم ملاح كي حكيتو على الكبدة والبوزلوف هذو الحكايات لي لازم يحكوهم لي كوبل ،خويا اسمحلي أنت خلاط وهي خلاطة ،وأنا خلاط كثر منكم ،المهم الفايدة والحاصول أنت غالط وهي غالطة ،كي تحكي على علاقة ما تجبدش الجلباب ولا اللحية لأنو هذي من رموز الانسان اامتدين وطفلة بالجلباب وداخلة معاك في علاقة راك تشوه بطريقة غير مباشرة صورة المتجلببات ،اذا راك ناوي خويا هز يماك وروح ،نسيت حاجة 6 اشهر علاقة هذا وين طاح في بالك تاستيها نورمالمو التاست لول غير حكات معاك وحكيتو على البوزلوف اعرف بلي مافيهاش ،روح اخطب خويا و صاي ما تحكي معاها ما تكسر راسك .
 
اضافة فقط انو هي علابالهي بلي انت لي راك تهدر معاها في الفيس لانو باينة :geek:
 
هي صح غالطة مي نتا نورمالمو تصارحها و تفهمها واش كاين بسك اك جبت روحك بزاف عليها
 
وهيا بلاك من زعاف معلبلهاش واش دير سامحو بعضاكم و كملو فلحلال خير
 
اعتقد العلاقة ضربت في الصميم و صعب المواصلة ، لأن هذه الهزة ضربت وتر الثقة بينكما و راح يكون بينكما خلاف كبير اذا تزوجتما ، يعني الثقة راحت و راح ما تخليكمش تعيشو حياتكم مليح ، لأنها كانت مستعدة تفتح علاقة جديدة ، أمر آخر خطيك من حكاية العلاقة و اللقاء و التعارف ، توب لله و ادعي لي يرزقك بالزوجة الصالحة و صلي الاستخارة و ربي يفرج كربتك اخي
 
وعليكم السلام ورحمة الله وبركاته
توبة لكلاكما واستخارة..
هي بشر وانت بشر وفي زوج تغلطو ..
هدانا الله واياكم
 
السلام عليكم

بصراحة الامر صعب

ثم عليك بالاستخارة والصبر .

لي عودة
 
اخي المراة تحب الاهتمام في كل وقت و حين و انت هديك السمانة الي مهدرتش معاها بالنسبة ليك عادي لكن نحن النساء نراها بمنظور اخر و تفكير اخر بدون التعمق في التفاصيل المهم نتا زيد جرب كيفاش تتواصل معاهاو فهمها كل ما مررت به من مشاكل اذا تفهمت صحة واذا متفهمتش جبد روحك و استخير الله في كل امر و وسينير طريقك باذن الله
 
اللي ينوي يخطب ما يديرش هذي المكائد أخي
حط نفسك مكانها فتاة في العشرينات بعد كم سنة في الثلاثينات لا لا أرجوك تضع نفسك مكانها
هل تبقى تنتظر ختى يروح زعافك و ربما تقرر سيادتكم ان تتكرم لخطبتها بعد تسع سنين ولا عشرة وعندها تجي واحدة من قرايبك تقولك هذي بايرة لن تنجب أولاد فتبطل الخطبة و تتركها مثل البيت الواقف هذه هي حال نسائنا ان لم تكن تعلم يفتح سن الزواج عند 25 و يغلق عند 29 اربع سنوات بعدها الى مثواها الاخير تبقى تستناك تزعف و ما تردش بعد ان قررت خطبتها الاكيد ستفهم انك لم تعد تريدها
ربي يهديك على ما طمعتها بفرصة ثانية و انت تكذب عليها الم تكفيك خيبة املها فيك طمعتها بخاطب خيالي ربي يهديك تضربها بسكين واحد مرتين
المهم كما قال أخي @الامين محمد أظن أن الموضوع قد قتلته بيديك محال تستمر بينكما الحياة بعد كل هذه الامور التي خلقتها انت كما نقولو حنا فسدت سرح البنت و اجعل شخصيتك الخيالية الثانية تسرحها بركاك من افلام الاكشن هذي ربي يهدينا و يهديك
سلام
 
/

بغض النظر على انها علاقة محرمة وليشت في نطاقها الديني الا اني لمست فيك نوعا الكلام الجدي و انطباع الرجولة حيث انك على غرار كل شيء كنت نويوها حلالك وصارتحها بكل شيء .. على كل حال بالنسبة ليا البنت لو تحب تخونك راح تخونك حتى ولو وضعتها في قفص يعني غير متحرقش دمك وتبدا.دير فليتاست وقاع .. ربما درت هذاك الشيء كونك كنت حريص على انها هي راح تكون زوجتك لذالك لم يهدئ لك بال ..
المهم اخي انا في رأيي الينت تستاهل فرصة اخرى وهذ الفرصة تكون في الحلال بمعنى انه اذا عاودتو رونجيتو وصلحتو الأمور لي بينكم تقدم ليها اخطبها لكن لا تتسرع في الزواج بها .. يعني خلي فترة الخطوبة تتكفل بجنيع الايجابيات والسلبيات ... تماك افرض كامل شخصيتك وحط كامل عقليتك ... اذا كان عندها التقبل وكانت حاباتك فراح تستمر معاك واذا شفت بلي الامر معكوس تماما فتماك حلها الفراق ... ولان كل شيذ في الحلال فهو انظف واطهر وربي راه يسهل لي يقصد طريقو ... ويكشفلو النوايا ... ولما لا البنت تخرج بنت فاميلا وبهذا تكون ربحت انت مع روحك ومع ربي .. ربي وفقك اخي ويسهلك وكم اعلم ان الامر صعب باش تلقى بن فاميليا تقرر تكمل معاها كامل حياتك ... كأنما البحث عن ابرة في كومة قش
 

يعني ب أختصار شديد حنا لبنات نعرفو بعض​

ذك نقولك من اللول يعني نت تحكي معاها نهار ونهارات لا اكيد تقولك جا وقت الخطبة بدا يجبد ف روحو مام وتقولها عندي ظروف مراحش تصدقك​

و ثاني حاجا راك تقول خاناتك ونت 15 يوم مابعثت ميساج لا انت لا هي يعني يعني كي شغل تخليتو عل بعض راه كاين ناس تلقاها ف حياتك ومبعد تروح بلا اي سبب راك فاهم عليا يعني بلاك هي حسباتك كيف هاد العباد اوتعرفت عل شخص من هاد نووع يعني يجي وقت ما حب ويرروح وقت ما حب لا علينا​

انا يبالي موش خيانة هدي نت محكيت 15 يوم يعني بداية نسيان عند المراة اي هداك وين وقادر تكون عندها احساس بلي نت هو مول الفيس هداك او الشخص هداك لا علينا ...​

اذا ناوي الحلال صلي استخارة لله وشوف وربي يوفقك​

 
خويا انا نخرجهالك طاي طاي وماتزعفش مني
نتوما في زوج فيكم اللوش وسمحلي اولا نتا الغالط مشاكلك وهي جزء من حياتك يلا صح تبغيها خبرها بلي ماراكش مليح
ومديقوتي وكاره وعندك مشاكل وقوللها اصبريلي نرتاح شوي ونحكو ونخبرك ماشي ديراكت طحتلها خشين ماتهدرش بسمانة
راك شكلتها صديقي حق ربي وزاوجة هي كيفاش تحكي معا شخص وهي متعلقة بواحد ودايرها a titré يعني حلالو وجاي يخطبها
هادا وين بانتلك تاستيها ياااجدك ها بركانا من الشكيل تاعك
قومها ولا طلق هاكا يقولوا ناس بكري يلا عينك فيها روح اخطب ديراكت بلاك تبرد جمرتها بسكو راك كويتها
والمرا راك تعرف يلا توشيتلها ليسونتيمون تولي ماتعرفكش وزيد احكو بشوي وحلوها بيناتكم سي نو روح شوف باب وحداخور
 
الحركه التي قمت بها من فتح حساب بإسم مغاير ومحاولتك الإيقاع بها وإيهامها حركه معيبه لايمكن ان تكون من رجل سوي يعرف من اين تؤكل الكتف ، لذا دعها وشانها وحاول تنسى انك يوما كنت صدفة بحياتها ، فحرام عليكم تلعبوا ببنات الناس وتوهموهم بما لم يكن بخلدكم .. انتهى .
 
اذا لم تقع على الاقل خطبة فلا النية ولا الوعود ولا الزعل ولا الغميضة يجعلون اي شاب وصيا على بنت لا تزال اجنبية والاولوية لمن يتقدم لها هذا هو قانون المرور في الزواج حتى الى موعد عقد القران لا نتكلم عن الام الخيانة وطعنات الغدر ودراما التجارب والحياة والمسلسلات و نفس الوضع لا يجعل بنتا تخوض مع الخائضين لاجل وعد لمستقبل زاهر وتخوص في ظلمات ينعدم فيها بصيص العودة و النجاة كل ماوقع في هذا الموضوع تجربة يمكنك تصحيحها بالالتزام بقوانين مرور الزواج او تغيير الاتجاه الى وجهة ثانية بدون غميضة وبدون حوادث.
 
اخي عندها والديها راك تحكي على الخيانه ونتا تحكي معاها وجاتك نورمال .تقدملها او اتركها لمادا اللف والدوران وشكرا
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top