مشكلتي تعقيب على مكسور خاطري...

[مشكلتي]

تعقيب على مشكلة مكسور خاطري....
مشكلتي حقيقة أني جيت نكتب فوقت كنت منهارة فيه ولكن ردودكم استفدت من بعضها....
بالنسبة للأخت اللي قالت حاولي تعاودي تعيشي شبابك معاه هو رجل اربعيني يعني ما يحبش اصلا الاجواء هاذوك و يقولي متأثرة بالمسلسلات علابيها تحبي ديري عشا سبيسيال ولا تحواس ولا اي عفسة معابعض...
المرأة = طبخ تربية تنظيف دقائق في العلاقة ...
حتى في السفر نعوم وحدي نطلع فالمانيج وحدي نلعب معاهم وحديمتضحكوش يظل يعايرني ذرية مي انا نلقى راحتي هكذاك أما فالايام العادية يدخل الدار يحكم التلفون لما لا نهاية...
بربكم اخبروني شكون هو العجوز هنا...
انا منين تزوجت كان يعايرني ماخلى صدري مخلى شعري ما خلى رموشي مع العلم شافني من غير موعد و على غفلة وبلا قطرة ماكياج موراها خطبني...
من هنا نقول بالاك الديفو فيه هو...
أنا رياضية وهو لا...
مين ذاك نحس يحب يخبي عيوبو و يتهجم عليا...
من نهار اللي قالي فيه ذيك الهدرة و شافني نبكي بحرقة رفد روحو من الشومبرة و رجع يرقد فالصالون...
غريب.....
فكرة الطلاق تراودني من مدة ولكنني أخاف المجهول .....
ما عندي شهادة مالقري انا من جهة لقراية طايرة نقدر نكون روحي بالخف ...
نخاف نعيش مع والديا وهما يرحبو بيا و رافضين نرجع ليهم بلا ولادي....
اخي قالي اكري و نخلص عليك هو يقولي هذا ما يحبكش و مش راح نكذب عليك...
أنا والله العظيم حايرة....
مي رجعت نخاف على روحي من الحرام...
لأنو حاسة راسي مش حامل ...
كثرة الضغط تخلي الانسان يفقد الثقة بربي...
سبحان الله كتتغلق على الواحد يا يحوس يهرب للحرام يا يفرط فصلاتو يا ثقتو بربي تروح...
كي لمرا تربي تتعب ولادها مستوى فور خارجين ليماهم... متخلقين بشهادة عائلة الزوج... تسهر تنظف والراجل شهار بالملايين و يجي يعايرها و ما يمدلهاش غير بالتحلال و حاجة قليلة...
نحس روحي ذليييييييلة و نا نحلل فذوك الدريهمات نشري حاجة ....
الحرام مش قصدي العلاقات و ماشابه ولكن العقيدة تهتز سيرتو هذا راهو خيار الوالدين مش خياري...
ادعولي ربي يبصرني بالطريق و يمدلي القوة ندير واش فراسي....
اكثر حاجة مقلقتني درك هي أنو هاذ الشخص قلبي برد من جهتو....
رجعت نتهرب من العلاقة مش لأنني شخص بارد ولست كذلك ولكن مكاش امرأة تتقبل انسان يهينها و يجيها واش من قلب عندها باش تقبل يقرب لها...
هل راهو حرام عليا ولا نن....
أما الأخوات اللي قالوا لبسي و ماكيي...
من هاذ الجهة أنا مطهلية ...
اللي فاهماتو أنا النظرة السيئة اللي رفدها عليا من يماه + حاب يبدل الفيستا ممكن ... و ما عرفش كفاش و لا خاف من نيتي بيسك علاباله مليح واش دار...
اسمحولي افكاري مشتتة قلبي يتقطع على روحي وعلى ولادي...
تخيلو تشوفو حياتكم قدامكم تضيع...
حرت و ما عرفتش واش ندير....
مشكلتي نخاف المجهول....
مي ساعات نقول حتى مستقبلي فدارو مجهول مكانش اللي يعرف الغيب...
اليوم حس بيا بللي راني نخطط لحاجة...
باسكو موالف نعاتبو نقوله علاش و نفهملو مي الخترة هاذي ني ساكتة و كالم و غير نصلي و ندعي ربي يبينلي طريقي...
قالي حاب نشري طوموبيل نكتبها باسمك...
قتله خليها عندك...
قلبي ميتشراش بدراهم و مور ما ذليتني منسحقش والو منك...
نهار قبل برك رحت لعرس عالتسعة تاع الليل قتله وصلني قالي نن روحي وحدك...
سكت وخرجت والمشكل كان لازم نروح....
تخيلو يا ناس نمشي و نقرا قران بيسك الطريق خاوية .....
رجعت وصلوني هوما لقاني ساكتة ما قلت والو نضحك مع ولادي....
صباح قالي نكتب لك طوموبيل باسمك....
عييت نخمم واش فراسه والله ما فهمتش...
ولا قدرت حتى نفهم روحي...
بالمختصر انا شخص ضعيف مش قادر يقرر قرار ....
و ما نلوموش هو قدر ما نلوم روحي بيسك أنا اللي ذليت روحي....
ومن جهة ما كنتش فاهمة الدنيا صح حتى وين كبرت وفهمت بللي رجال ميديروش هاك زيد التربية و العائلة اللي كبرت فيها ووالديا كان عندهم دور كبير...
اسمحولي افكاري مهومش مرتبين و مكاش كفاش نرتبهم....
دعواتكم والله عييت....
وربي عالم شحال...
دعواتكم

 

[إلياس]

ربي يحفظك و يسترك و يحميك و يغفر لك و يعطيك كل ما تمني ان شاء الله

 

[خديجة ph]

السلام عليكم حبيبتي
يعني عجزت عن الكلام اذا كان الوضع مثلما وصفتيه فأنا أحييك اختي و نبشرك بأن الفرج قريب باذن الله
اول شيء اعاتبك تقولي على نفسك كم من مرة انك ضعيفة و مشتتة و مش متمكنة اختي اتق الله راكي جبل انا عن نفسي محال نتحمل مثلك بارك الله فيك و ربي يرحم ذاك الكرش اللي جابتك انت فخر لكل امرأة جزائرية امرإة بعشر رجال
خلاص اختي راجلك بدأ يتهز و عن قريب راح يكشفلك كل نواياه مادام بدأ يرشي فيك بالسيارة و كذا واصلي بنفس الطريقة اصبري و كملي صدقيني حالتو اصعب من حالتك انت زهدتي فيه و هو عارف روحو غلطان اصبري برك و كملي بنفس الطريقة ايام و رايح وحدو يتفرقع و من ثم راح تعرفي كفاش تتصرفي اياك تخرجي من دارك هدفو كان يكرهلك معيشتك و تطلبي الطلاق او على الاقل تباني قدام الناس انت الغلطانة و اغلب ظني و الظن يخيب و يصيب ان هناك امرأة اخرى في الحكاية و هي تضغط عليه
خليه هو الان الحاصل لست انت فانت قنعت بما يفعله هو اللي مش قانع لا بما يفعله لا بردة فعلك صدقيني انت في مركز قوة رغم احساسك بالضعف
اصبري باه اذا غلط و جاء الغلط منو تلقاي واش تقولي للناس للقاضي لاولادك لما يكبرو. مش تقوليلهم عايرلي رموشي و خدودي صدقيني واحد ما راح يقبل هكذا اعذار رغم انها حقيقة لكن الكل راح يقول عايرها بزوج كليمات فرقت دارها
نصيحتي ليك بعد ان يصارحك بنواياه لا تشاورينا لا تشاوري لا خوك لا باباك لا يماك طووووول عند اقرب محامية تاع قضايا اسرة تنعتلك كفاش تجرجريه و اعتقد انك لازم تتفاهمي مع باباك ولا خوك من الان يجيبولك. لوسي للدار يكتب محضر بان هذا هو بيت الزوجية تاعك و بان عجوزتك مش ساكنة معاك هذي الخطوة ديريها الان و من بعد اقبلي على روحك السيارة فتكوني ضمنتيهم في زوج الدار و السيارة
وان شاء الله يكون ظني خايب و يظهر برك قاعد يدلل عليك
ربي المعين اختي
هذي ايام مباركة اختي صلي صومي ادعي ربي
باذن الله خير
ونستناو منك اخبار مليحة ان شاء لله
سلام

 

[ريحـان]

ربي يقويك و يبينلك طريقك لي يرضى عليه بيك و ان شاء الفرج قريب و ربي يجازيك حتما لصبرك

 

[أم أُنٌَيسة]

وعليكم السلام ورحمة الله وبركاته
اما معاشرة بالمعروف او مفارقة بالاحسان.
ولا يجوز لك ان تمنعي نفسك عن زوجك لاي سبب، الا للاسباب الشرعية المعروفة. فاماان تبقي متزوجة منه وفق الضوابط الشرعية، او الطلاق باحسان كي لا تكوني ظالمة شرعا.
اما ثقتك بالله اذا اهتزت فهذا بسبب ضعف ايمانك وعدم معرفتك بماهية الدنيا ولا معرفتك بالله عز وجل.
تروحي لعرس وحدك؟! من نيتك؟ في الليل؟ واذا بالغناء فهي طامة كبرى والله.
هل انت تسالين عن حكم الشرع؟ ان كنت تودينه فاسالي اهل العلم، نصيحة لوجه الله واتق الله في نفسك وفي غيرك.