انا كل عام نسمع هدرة جديدة وبالذات في موسم الاصطياف لما الناس تبدى تتنقل بين المدن الجزائرية واحد يطلع واحد يشرق واحد يغرب.
كيفاش تخلق وكيفاش تنتشر وتشيع الله يعلم.
عوض انو الناس تتقبل اختلافات بعضهم ومستوى معرفتهم واطلاعهم وطريقة عيشهم ولبسهم واكلهم وتفاعلهم مع الاشياء تلقا جزايري يسخر من خوه الجزايري عيب. لكن لو يكون الاخر اجنبي والله ويتقيالهم في الماكلة تعجبهم بصح خوك العربي تعايرو بلون البشرة او باللهجة او باي شيء بسيط.
على هاذي كاين مجموعات عايشين وهَم انهم هم النموذج المثالي للبشرية ومعاييرهم في العيش وسط مجتمعهم هي مقياس الحياة المثالية. ربما لانهم عايشين عقلية الحراڨ في بلادو . شغل هو إيميڨري ولا ڨاوري وعايش وسط اجناس يتقزز منها واي تصرف منهم يزعجه ويدعوه للسخرية منهم وحاس انهم ماهيش بلاصتهم معاه.
أي تصرف لايتناسب مع معاييرهم من انسان آخر يعتبر تخلف وجهل بالمدنية والتحضر لكن لما يكون يضرب في المصور والمحمر تحت النخلة ولا الزيتونة يقلك ناس كرم سيجينيال ولما يجيك المحروق في الشمس يبلقط في شوية بحر تضيق روحك تقعد تضحك عليه وتصور وتبهدل فيه. علاه انت اللي اخترعت الكاتلوج نتاع التبحار وكيفاش يقعدو وكيفاش يعومو واش ياكلو علاه انت الناتو داروك تعس البحر الابيض المتوسط.
صح كاين فئة عندها تصرف غير مهذب قدام الناس لكن هاذ الفئة منتشرة وموجودة في كل مكان حتى في القنوات التلفزيونية زعما عائلية عندها اسم واحد فقط( ناس ماهيش متربية ) وخلاص واش اداك أنت للقهوي والجبلي والصحراوي والڨبلي علاه أنت جدك كان يدومن مع الاسكندر المقدوني ولا بوك كان يتقهوى مع هتلر في داركم.
ههههه وكان نزيد شوية نبدى نخلط يا ليليا ق عفيني يرحم والديك.
