الهُــدوء المزعج ~''

[الامين محمد]

قرار الرحيل ولا نقول التخلي بعد الادارك ، قرار ناتج عن قناعة تامة ، لانو وقتها الشخص يكون فهم كل حاجة و شاف الصورة من منظور آخر ، وين لقى روحو ضحى بزاف ، تحمل بزاف ، و تنازل بزاف ثاني ، شاف حتى نفسيتو لي تعبت ، في المقابل كاين قلة الاهتمام ، كاين سوء فهم و عدم تقدير لكامل وش دار ، يعني مايلقاش المعاملة لي كان يستناها ، وقتها يفهم انو خلاص ، مابقاش كاين توازن و عمرو لا راح يكون ، في اللحظة هذي " لحظة الادارك " المشاعر تتغير 180 درجة ، و كيما علابالكم المشاعر لي تتغير بسبب الإدراك جامي تولي كيما كانت .. المشاعر لا تعود ..

احيانا ندرك ذلك و لكننا لا نقطع حبل الود
طامعين في معجزة حدوث طفرة
او تنبيه يعيد الامور الى نصابها
لكننا نصاب بخيبة اخرى و اخرى
حتى يروننا سذج .... اخيتي

 

[لمعانُ الأحداق]

في وسط الفوضى و التقلبات لي في حياتك .. لي أنت بروحك مش فاهمها ، قليل وين تلقى شخص وجودو معاك برك " اطمئنان "، يخليك تحس بلي ماراكش وحدك ، تحس بالأمان و بلي مهما كان رح يبقى معاك يسندك ..
الشخص هذا مايتكررش ، مايجيكش في الحياة مرتين ، اذا لقيتو حافظ عليه ، حافظ عليه بالاهتمام ، بالتقدير ، بالكلام الطيب ، و اوقف معاه كيما يوقف هو معاك
الناس لي تخليك تحس هكا ، راهم حاجة نادرة بزاف ، " الأمان " ماهيش حاجة تنقال و لا مجرد كلام ، راه احساس ..
و ربما اكثر صفة ممكن تجذبك في الانسان انو يكون إنسان آمِن
يخليك مطمئن و يريح بالك ، اذا لقيتو ماتسمحش فيه و ماتخلي حتى حاجة تبعدك عليه ، راه عندك كنز

 

[لمعانُ الأحداق]

احيانا ندرك ذلك و لكننا لا نقطع حبل الود
طامعين في معجزة حدوث طفرة
او تنبيه يعيد الامور الى نصابها
لكننا نصاب بخيبة اخرى و اخرى
حتى يروننا سذج .... اخيتي

المُدرك و لي شاف الامور من زوايا مختلفة ماراحش يرجع
اذا امتلأت بكل أسباب الرحيل ، لن تعود
الخيبات المتكررة تخلي العلاقة تروح من سيء لأسوأ
تخليها مليئة بالعُقد و ما يبقى حتى قرار من غير الفراق
شحال تعيا تمد في الفرص و تطمع و مع التالي تلقى روحك ديما تتأذى ، ديما نفسيتك متعبة و تنهار
الشخص المناسب مش رح يخليك تحس هك و لا رح يهون عليه خاطرك ، اذا كانت الديار ماهيش ديارك ماكاش حاجة تخليك تبقى فيها ..
التخلي صح ماهوش حاجة ساهلة مي كي يكون على قناعة ماراحش ترجع الامور زي ما كانت و يولي حتمية لا مفر منها

 

[لمعانُ الأحداق]

مهما كنت انسان لطيف و قلبك ابيض و تحب الخير لغيرك ، فأنت شخص شرير عند " بعض الناس " ، و مهما كانت تصرفاتك عفوية و بسيطة ، فهي تصرفات مقصودة و مدروسة عند " بعض الناس " و مهما كانت نيتك سليمة فهي غير ذلك و مجرد حب ظهور عند " بعض الناس "
لازم تتقبل انو مش كل الناس تشوفك على حقيقتك مهما حاولت تبيّنها ، ساو ماتديرش بزاف حسابات في راسك ، ارتاح و خليك على طبيعتك و تذكر انو " كُلٌ يرى الناس بعين طبعه " يعني يشوفك بالطريقة لي هو عليها و كيما حاب يشوفك هو بعد

 

[لمعانُ الأحداق]

مازالك متفكر المحنة ولا المشكلة لي كنت تعاني منها في هذا الوقت قبل عام أو عامين ؟
و لي كنت تشوف فيها صايي هي النهاية .. نهاية الدنيا عندك .. !

خلاص راحت مابقاتش
و انت ضرك تفكرتها بسيف كيما نقولو ، حتى قتلك عليها باه جات في بالك و ولات تبانلك حاجة جازت و فرات

سايم مع هذي المحنة / البروبلام لي أنت فيه الآن
حتى هو رح يختفي و يولي لا شيء مستقبلا

كاين مثل يقولك ، اذا الامر هذا ماراحش يأثر عليك منا على 5 سنين ، ساو مايستاهلش تمدلو و لو 5 دقايق من وقتك حاليا

مالا ما تخممش بزاف .. This too shall pass

 

[الامين محمد]

مازالك متفكر المحنة ولا المشكلة لي كنت تعاني منها في هذا الوقت قبل عام أو عامين ؟
و لي كنت تشوف فيها صايي هي النهاية .. نهاية الدنيا عندك .. !

خلاص راحت مابقاتش
و انت ضرك تفكرتها بسيف كيما نقولو ، حتى قتلك عليها باه جات في بالك و ولات تبانلك حاجة جازت و فرات

سايم مع هذي المحنة / البروبلام لي أنت فيه الآن
حتى هو رح يختفي و يولي لا شيء مستقبلا

كاين مثل يقولك ، اذا الامر هذا ماراحش يأثر عليك منا على 5 سنين ، ساو مايستاهلش تمدلو و لو 5 دقايق من وقتك حاليا

مالا ما تخممش بزاف .. This too shall pass

كلام يرفع المعنويات اخيتي
احسنت

 

[لمعانُ الأحداق]

فاتو عليا بزاف ناس في حياتي ، كاين لي خرج منها بلا ما يولي ، كاين لي علاقتنا رجعت من بعيد و سطحية بعدما كنا قراب من بعضانا ، و كاين لي ولات عادية بلا اي اسباب واضحة ، و كاين لي اختفى بلا ما يقول والو ، و كاين مام لي ولات أقوى و كل مرة تزيد تقوى بمرور الوقت ..
المهم من كل هذا عرفت حاجة و هي انو ماكاش بنادم مايتبدلش و يبقى كيما عرفتو ديما

 

[لمعانُ الأحداق]

كاين جملة " المشاعر لا تُناقش نهائيا "
يعني مش من حقك تجي تحاسبني علاه قلقتني كاش عفسة و لا علاه زعفت من موقف معين ، على اساس الموضوع ميستاهلش و قاعدة نبالغ و ماهوش لهذي الدرجة يقلق
كامل عندنا ذكريات و حاجات في حياتنا متراكمة ، ساو كل موقف يضغط على حاجة قديمة لي في وقتها ماعبرناش عليها و ماخرجناش طاقتها السلبية و هكا اي موقف سيء يصرا اذا كان يؤثر علينا شوية يولي يؤثر بزاف
المختصر مش من حق اي واحد يحدد " مقدار " الشعور لي يحس بيه شخص آخر و لا اي موقف يليق يزعف عليه و اي موقف لا ، لانو ببساطة ماهوش عارف وش كاين داخلو

 

[لمعانُ الأحداق]

الطريقة لي تنصح بيها واحد
أهم من النصيحة في حد ذاتها

 

[rafid2]

أليس من الغرابة أن تظل هادئا بينما داخلك يعج بفوضى معارك !​

صدقت

 

[لمعانُ الأحداق]

{ هذا فراق بيني وبينك سَأُنبئك بتأويل ما لم تستطع عليه صبرا }
عند الفراق .. لازم تشرح الاسباب لي خلاوك تتخذ هذا القرار
و لي قادر الطرف الاخر يكون مش منتبه ليهم ولا مش فاهمهم ، خليك واضح و عبر ، ماتخليش باب لسوء الظن و التفكير المفرط ..
قال :
أما السفينة ..
أما الغلام ..
وأما الجدار ..

هكا تصفى الامور و حتى انت ترتبها عندك و ماتحسش بتأنيب الضمير ولا انك اتخذت القرار الخطأ و ظلمتو
و من جهة اخرى بعدت الشخص هذا على دوامة فوضى كانت رح تصرا داخل عقلو

 

[الامين محمد]

مرور
اخيتي

 

[لمعانُ الأحداق]

مرور
اخيتي

سرني مرورك
أهلا بك ^^

 

[لمعانُ الأحداق]

مش لازم تكون شباب و لابس لبسة جميلة باه تتصور
و لا لازم يكون صوتك جميل و موسيقي باه تغني

اي حاجة حاب تديرها ، ديرها .. ديرها لروحك مش شرط تعجب شخص آخر .. عيش لنفسك !

 

[لمعانُ الأحداق]

كاين جملة تلاقيت بيها " Family always comes first "
و نقدر نقول انو هذي أكبر حقيقة
فوضى اصوات العائلة كي تجتمع و الضحك و التنمر هذاك و المواضيع لي ماتخلاصش و الفرحة و الدفء في وجودهم و الإحساس باللمة و الأمان ، فعلا ماكاش حاجة تعوض الشعور هذا ، يكون نابع من القلب صح
و كلما تكبر كلما تكتشف انو الإنسان مادام ضمن دائرته الصغيرة " عائلته " و الناس لي يحبهم و يشوف فيهم بخير ، هذي نعمة كبيرة ، في الدنيا هذي الناس تروح و تجي حسب المواقف ، مي كاين لي يبقاو معانا في كل الظروف و في كل حالاتنا و نعيشو معاهم شعور مختلف تماما .. لهذا they always come first

 

[لمعانُ الأحداق]

كسرت mes lunettes ماشي بلعاني خاوتي
رحت نسييهم اذا يشدو درتلهم هك تكسرو
البروبلام مش هنا ، البروبلام انو هذو رابع lunettes نكسرهم
مانيش تاع lunettes من اللخر .. أصلا يخلو الناس يدو عليا نظرة تاع راني خباشة و يمدو انطباع دراسي واعر
و انا خاطيني .. مشاكل بسيطة
المهم نولي للمشكل الاهم ، الاحساس تاع كي يتكسرو هذا ما يعرفوه غير لي دايرينهم
الميدسين سبابنا و صايي

 

[لمعانُ الأحداق]

كي شفت شحال من مرة تقلقت من بنادم و لا من موقف و لا مثلا عييت ، لقيت بلي أنا قليل وين " تراضيت " كيما يقولو خاوتنا المصاروة ، اغلب الأحيان انا لي كنت نفوتها ، نوسع بالي و خاطري ، نقول للطرف الاخر اني صايي مانيش " مقلقة " باه يتغلق الموضوع برك و مانبقاش نحكي فيه ، مي داخليا حابة هكا يقولي شبيك و شوي كلام طيب و مُريح ، مانحسش روحي وحدي ، على الأقل يعترف بالخطأ تاعو و يتحمل ردة فعلي هذيك و يحاول يرجعني " مليحة " و مش هازة هذاك الشعور السيء و لا يعتذر ، مش يخليني انا نقص الحكاية و فرات ، دون مراعاة للنفسية ، لكن للأسف ، هذا مش ديما يصرا .. نقول " فرات " و هي ما فرات ما والو ، و هذو التراكمات هوما لي يخلو الانسان كي يمر بموقف بسيط مرة ثانية ، يكبرو و يأثر عليه بزاف ، لانو راه تراكم على غضب سابق و لا فكرو في حاجة ماخرجتش في وقتها ..

 

[لمعانُ الأحداق]

نقولك حاجة ..
و انت في أسوأ حالاتك ، ركز مع لي مازال يشوف الجمال لي داخلك ..
و انت تواجه في اكبر غلطاتك ، شوف لي رح يسامحك ..
و انت في عزلتك و حالتك الانطوائية لي تجي مرة على مرة و مش حاب تهدر و لا تشوف حتى واحد ، عس شكون رح يسقسي عليك و يحوس يشوفك..
و انت في عز انطفاءك ، لاحظ شكون لي يحاول يرجعلك النور و طاقتك ..
الحب ماهوش " الشيء " لي يصرا في الاوقات الجميلة و في الحالات العادية ، الحب يكون في أصعب الظروف و في الحالات الاستثنائية ، و يبان عند الشدائد .. شكون رح يبقى معاك و شكون لي رح يخليك

 

[لمعانُ الأحداق]

إيليا ابو ماضي يقول :
" فلست الثياب التي ترتدي ولست الأسامي التي تحمل ولست البلاد التي أنبتتك ولكنّما أنت ما تفعل "
شكلك ، لباسك ، منزلك ، سيارتك ، وظيفتك و عائلتك .. مش هوما لي يحددو قيمتك و ماهيش هذي هي الحاجات لي تفتخر بيها و تحكي عليها ..
بصح دينك ، خلقك ، عِلمك ، انسانيتك و مبادئك ، هذو هوما قيمتك تاع الصح و هذو هوما الاشياء لي يليق تفتخر بيهم

مانيش نقصد الافتخار من التفاخر باه ماتفهمونيش غالط لكن قصدي انك تكون فرحان بيهم و تحاول تطورهم و تكون افضل فيهم مما كنت عليه سابقا لانهم هوما لي يبينو شخصيتك و تبني بيهم نفسك

 

[الامين محمد]

تسجيل مرور
اخيتي دكتورتنا