حالتي النفسية خاصة ... كي يهبط المورال

[Moha le sage]

خير و عافية ...

قالك فرغ قلبك .. وقلبي مليان .. بصح معليش نحكي شوي على روحي


حالتي النفسية خاصة ... كي نتقاس .. وكي يهبط المورال ..

قبل عوام كنت لاباس وديما زاهي و فرحان ..ما نخمم في والو .. كنت نقرا و كنت ضارب الدنيا بكودبي ... بصح هاذي مدة سنين لخرين .. ولات تحكمني حالة احباط .. تالمون تقست بزاف ..عاطفيا و ضروفي كانو مش ملاح ..

ولات عندي وحد العقلية كي يطيحلي المورال نولي عبد اظلم .. نطفي برطابلي و نريح في شمبرتي .. وما نهدر مع حتى واحد .. ونعود نحوس في راسي على سبة باش تحسسني ان لي معايا مش صحابي .. و نعود نحوس على سبة باش نكره هاذ العباد ..حتى ولو كانو قراب


شحال من واحد جبدت عليه بلاسبة باينة دارها .. باسكو شفت بلي دارلي عفسة مش مليحة ..

كي جات اللمة ثاني كيف كيف .. بزاف اعضاء كنت نحكي معاهم ونحيتهم من بالي بلا ما قتلهم .. خطراش نحس بلي مش مقيميني

انا جينيرالمون نتقاس من الناس اللي عزاز .. ولى الناس لي درتلهم وجه ولا قيمة و عكسوني

منحبش نتعكس ..في اي حاجة .. منحبش سيرتو نمد حاجة ولا ندير عفسة وواحد ميقبلهاش زعما ..منحبش نمد راي وواحد يعكسو .. انا نقراها بلي مش دايرلي قيمة ...

من الضرافة زعما و من حسن التصرف كي يمدلك واحد حاجة اقبلها وكي يروح ارميها ..كي يقلك على راي احترمو ولا ثمنو .. حتى و لو كنت مش قابل بيه ..كي يعرضك على حاجة ديرها وديرلو وجه ماشي تعكسو اونفاص ..

والله معرف انا لي حساس ولا الناس لي مش مدايرة قيمة للقصص هاذو ..

كيما تقول HELENE SEGARA في غنيتها .. :

Si la tendresse et la poésie ..Nous ont laissé ..Ces petits rien qui font si mal ..Me blessent en regret de cristal ...

​

معلاباليش علاش تبدلت .. كي شفت روحي حساس وليت نحمي في روحي بهاذ الطبع .. يعني ندير قيمة للعباد ..بصح اللي يقيسني بحاجة صغيرة حتى و لو مش قاصدها يروح ..نحيه من بالي طول ونقول ما يستاهلش ..

اي واحد يهدر معايا في هاذوك اللحضات .. راني نولي نديرلو في سبة باش ميزيدش يحكي معايا .. و قد ما يطلعلي المورال ..ميقدرش .. يسمى نولي عبد اخر ..خاطي محمد

شحال من مرة ضحكت ونا مقيوس ..ضحكة صفرا .. باسكو مقدرتش نقول للي دار الجاست بلي راك قستني .. نحس جبل فوق قلبي و هو يضحك و لى الجماعة ذيك تضحك .. و نبقى نتبسم ونا راح نكلاطي .. وراح قلبي يخرج .. واول حاجة نديرها هي نخطي ذيك البلاصة طول .. ونحوس على بلاصة ما فيها حتى بشر ..باش ما نتديرونجاش

كي يطلع المورال نتفكر بلي قست ناس و نلقى روحي بلي زعفت ناس خرى .. بصح نقول في بالي بلي كلش خرطي و مش مدايريلني حساب ..مالا فراقهم خير من بقاهم

الحالة هاذي ولات ديما تتعاود ..على مكاش يهبط المورال و على ماكان والو نتقاس ..

ديفوا نكره روحي .. وديفوا نقول منيش عايش في عالم تاعي .. والعباد هاذو ما ننتميش ليهم



حبيت نقول اذا كنت نحكي مع واحد ..من بعد جبدت عليه ... سير يكون قاسني ونا نحيتو من جيهتي ... بتخمامي لكحل هذا

بلاك راني غالط و بلاك ناس بزاف ظلمتهم .. بصح اللي موالف بالحفى ينسى سباطو .. ونا موالف براسي ووحداني .. خير من الغاشي الراشي حاشا القليل


المهم عبرت عن حالتي ..........................


الموضوع هذا علابالي ما يطولش .. راني ديجا ندمت كي كتبتو خطراش حياتي الخاصة ...

 

[عفاف الجزائرية]

نحكم بلاصتي انا الاولى
​

 

[nada242008]

ولات عادي في بلادي
تتعرف على عباد ومن بعد تتقرب منهم شويا وتفوت الايام تشوكا
يعني من الاول ماتامنش بزاااف في العبد هذاك
مش غير انت .كل مقيوسين من هاذو العباد وربما هما يقولي علينا كيما رانا نحكيو عليهم
ماعادش العبد فاهم هو اللي غالط ولا تخمامو اللي غالط ولا الناس ...
المهم كيما يقولو الضربة اللي ما تقسمش الظهر تصحوا
رانا كل يوم نتعلموا ومازال ان شاء الله نزيدوا
بصح نقلك ما يستاهل حتى عبد تدخل في حالة اكتئاب على جالو
ربي يهنيك ويفرج عليك

 

[عفاف الجزائرية]

شوف خويا محمد كل واحد والحالة اللي عندو انا تاني كي تجيني الحالة نتاعي نعود نطلع في حسابات ونهبط في اخرى
بصح يا خويا لعزيز هاذا الشي راه ما يخرجني لا انا ولا انت ولا الناس اللي مثلنا
هكذا رانا نعودو ما نقدروش نتعايشو مع المجتمع اللي رانا فيه
حتى وراه ماهوش مجتمع مليح بصح كاين دي فوا وين نخسروا عباد صح ملاح حتى ويكونو قاسونا بصح في الدنيا هاذي اينة حاجة لازم الواحد يكبر قلبو ويفوت حوايج باه يقدر يعيش اذا كان قلبو صغير ما يقدرش يعيش ويولي وحيدوهاذا الشي ماهوش مليح ليه
على هاذا لازملك خويا محمد تكبر قلبك كيما نعرفك قلبك كبير كي يكون طالعلك المورال ولازم نتفوتو عفسات تقسنا منهم وان شا الله ربي يسترنا هاذا ما نقدر نقول المهم حبيت نشكرك على الصراحة نتاعك ونقوللك ربي يخليك كيما عرفتك
​

 

[مروة MARWA]

هادا تخمامك وهادي حياتك وانت حر في تصرفاتك يا خويا
صح راك حسااس لدرجة كبيرة هاد الشيء مليح وماشي مليح في نفس الوقت كيما قلت لي يقيسك مثلا ومايكونش قاصدها هادي قادرة تكون - سلبية
وفي الاخير والله لا شيئ يستحق
​

 

[hind*alg-]

امممممم
اولا نتمنا مانكونش من هدوك لعباد لي اك محنحيهم من لحساب
وتانيا
اي واحد روحو عزيزة عليه وتقلق كي ينقاس ومن حقو يتقلق حنا كامل هكا ديقلك من ناس مديتلهم غير لخير من بعد كي يشوفوك محتاجهم يديرو رحم ما يعرفوكش
ونتا تتقلق وتقول خلالالالالالالالالالالاص مانزيد نعاون حتى واحد واحد ما يستاهل خلاصو لعباد ملاح مي كي تتهدن تقول اسكو اني صح ولالا
وشحال من واحد توقف معاه نهار يكونو كامل ضدو ومبعدا يدور عليك وهو يولي ضدك ومبعد تقنط وتقولا خلالالالالالالالاص مانزيد نحامي على حتى واحد
شحال من مرة تحب ناس وهما يبينولك بلي يحبوووك وهما من داخل يشمئزو كي يشوفوك
........... مي ساعات تكون مقلق من ناس وتفرغ قلبك في ناس مادارولك والو وكي تفيق تكون هرتها لانو كي تدرب واحد بمسمار ومبعدا تحيلو هداك لمسمار تقعد هديك تقبة وما تللمش...........


المهم نشالله نكون ماقلقتكش بهدرتي مي ماقدرتش علا خاطكش كامل قلوبنا معمرين
..........................تقبل مروري موح

 

[im£ne]

سلام خويا محمد
بغيت برك نعطيك نصيحة ديها من اختك الصغيرة
ماغاديش نهدر على الناس كثر ملي قلت نتا
كي يهبطلك المورال و تتقفل ادنيا في وجهك
كبر قلبك ووسع خاطرك و دير شويا كوراج
كثر من الاستغفار و نوض توضا و صلي غير ركعتين برك
هذا من عمل الشيطان يظلملك الدنيا حتى تعود تكرهها بناسها
و تقول واش راه معيشني في هذي الدنيا
و مانيش نقللك بلي ماكش عباد هاك
بالعكس المجتمع معمر بيهم
بصح ماتنساش كاين مرات دي جاست قادر نتا ماتفهمهمش صح
مي الدنيا تجربة و لازم نتعلموا منها

هيا راني وليت معاك بسيكولوg
ان شاء الله برك مانكونش صدعتلك راسك
كبر قلبك الدنيا ماتستاهلش...

 

[loca]

لا هي ماشي حالتك خاصة على خاطر دروك لوكان منردش غاية تقسيني حتى انا ههههههههههه لا والله ياخيي عادي ايه واحد من يمعني هدرة ولا يخرجلك خرجة ماشي زينة ردهاله بالمثل عادي وهاد دنيا انت ماشي حساس بصح من كثرت لي تبغي ناس اي جاست منهم تفسره انت بالناقص في بالي وانت تعرف .

 

[Voyage dans un rêve]

ما يحبط المورال ما والو خويا حتى حاجة في هاد الدنيا ماتستهل تدير عليها هاكا نحي من بالك..:001_smile:
و ادا كاش ما شفت مني انا ....اسمحلي

​

 

[السوفي حمة]

والله يا موح ندعي ربي متفوتش بالتجربة إلي فتت بيها أنا الأيام الماضية
احس روحك جيفة والكلاب جات تنهش في لحمك
ماش غير الدنيا تظلام ومينفعش تتخبى في الشمبرة وإلا تغلق البرتابل
تولي تخمم تطفي حاجة أخرى لولا شوية نتاع إيمان
الله غالب هذا هو المجتمع نتاعنا
​

 

[بحر الأحزان]

والله خويا محمد حاجة في دنيا هاذي ماتستاهل والله ياريت كنت كيفك دقيقة نحي لعباد من راسي أنا إذا جات حالتي نرح لشامبرتي ونقفل على روحي نبكي حتان ينشفو دموعي وحكي للورقة تاعي ومن بعد نخرج عادي بصح ي بقى الجرح في القلب
وكيما يقولو لي باعك بالفول بيعو بلقشور
​

 

[messikimo]

والله غير المورال حبـــــــــــــــــــــــــــــــــــــــــــط

 

[SOUHA]

موح كي يطيح المورال يروح لعقل

 

[programmeur]

في هادي الدنيا ماكان حتى حاجة تستاهل التخمام
خويا انا راني صغير وكنت نخمم كيما انت اي انسان يعملي حاجة ماشي مليحة
نردها بألأضعاف
بصح جابلي ربي نهار وفكرت في كلش
لوكان يغلط معاك واحد يبقى هو المخطأ بصح لوكان أنت تردله الصرف تولي انت الغالط
من داك النهار صفيت قلبي من جيهة كل الناس اللي ضلموني و راهم مسامحين دنيا واخرة
واللي يعملي اي شيئ ماشي مليح نقابلو وجها لوجه نتكلم معاه ونفكره بعمايله ونقوله بالنسبة الي ماكان والو بيني وبينك وراك مسامح و ونصلفحه ونروح
هكدا تبقى منهي و تبعد على الراس التفكير السيئ وتبقى توجور تحمم في امورك المهمة
وتربح بزاف صوالح منها اللي يكون عدوك يولي صديقك
وربي يفرج على كل مؤمن

 

[sami19280]

لي عودة مووووووووووح

 

[shy_girl]

سلام
اول مرة نجي لهاد القسم جذبني عنوان الموضوع ما نعرف علاه و كي قريتو
حسيت راني نحكي على روحي
و الله راو تصرالي نفس الحالة هاد الايام
منين دينا العطلة هادي طفيت البورطابل ......... ما سولت على حتى واحد ....... حسيت حابة نقعد وحدي في عالم وحدي ...
حتى مرات كي ضيق روحي خلاص ... نفتح التلفون و bipi لصحباتي كامل و مبعد نلقى تلاثة برك من حساب عشرين و لا اكثر برك اللي يرجعو ال bip نعاود نكره و نقول ما يستاهلوش و نطفيه و نرميه ....... معلابليش علاه ميجيش في بالي ممكن معندهمش كريدي ..... directement نخمم حوايج مشي مليحة ...كيما قلت غير نسبب عليهم .....
و حتى قررت نخليهم ......... وش نقل ربي يصلح احوالنا
و شكرا لك على الموضوع

تقبل مروري

 

[nassim007]

أزول فلاون

خويا موحا ياي بشويا برك .......ماتقلقش و ماتخممش بزاااف و الله حالتك كي حالتي
مي ماعليش قالك لي باعك بالفول بيعو بقشورو (ماتقيمهمش طووول ومادير ف راسك واالووو).......مابقاش نية ف الزمان هداا دكا

أيا تقبل مروري خووووك نسووووووووووووم

 

[* أميرة الأحلام *]

اخي محمد ماتقلقشي روحك وانا نقولك حاجة واعرفها من اختك نور والله تستاهل كل خير لانك انسان طيب وربي يبارك فيك
وراهو الشخص الي يمشي بنيته وبصدقه ديما تصراله المواقف هادي لكن واش راح نقولو ربي يهدي
وانا كنت كيفك نقلق نسكر كل شيء لكن المرة هادي تعلمت حاجة اني نعيش وحدي بعيد عن البشر لانهم جرحوني بزاااف
ونقولك خويا محمد عيش حياتك وخليك من كل شخص يسببلك قلق
وانشاء االله ربي يحفظك خويا محمد ​

 

[POLIYANA]

مالقيت واش نقول مناه علابالي بيك هاد الحوايج الي راك تحكي عليهم مهما يحاولو الناس يطلعولط المورال ويصبروك كيما راهم الاعضاء كامل قاعدين يديرو ويبقا كاين مناه نتا الديفو فيك اسمحلي على هدرتي هادي بالصح هاد الشي غير نتا الي تقدر تنحيه وتمحي هدي الافكار ووسواس الشيطان الي في داخلك وقاتلك ومخليك تفكر بالطريقة هادي خاصة انو قلت كيما يروحلك الغش تفيق مع روحك وتلقا روحك قست عباد ماعندهم حتى دخل يعني راك كنت في حالة خارج السيطرة وماكش محمد لمعتاد...اعفس على قلبك ودير المستحيل وماتخليش هادي الحالة تسيطر عليك كي تشوف روحك بلي بديت تنطوي وتحس بلي عبد راهو قاسك حاول بقدر الامكان تقول لالا او مكان والو اني انا برك حساس تلقا روحك تولي نورمال وماياترش عليك اي موقف :angry::angry: خلاص عييت من الكتيبة والهدرة بالصح نتمنا نكون فهمتك وين حابة نوصل وواش قصدي سلالالالام .اختك نجلاء​

 

[sweetprincess]

ربي يفرج عليك خويا محمد مهما الواحد كان قلبو كبير لكن مرات مايقدرش يحتمل
كلنا مرات يطيح المورال و مرات تحب تقعد وحدك في الظلمة واحد لا يقرب ليك لكن أفضل حاجة كي يصرالك هكا تروح تتوضأ و تصلي و تقرا شوية قرآن و لا تسمعو و الله كل شيء يروح من باآآلك و يصفى عقلك كأنك ماصرالك حتى شيء ، لكن أيضا ما تبقى تخمم في الشيء لي صرالك حتى ماتعاود تتكب عليك الهموم
و ربي ينورلك حياتك و طريقك و يفتحها قدامك خويا موح